Na Vua ni Kaukauwa Vakamatabete
    Footnotes

    Na Vua ni Kaukauwa Vakamatabete

    Eda sa lomasoli li meda masu, lolo, vuli, vakasaqaqara, sokalou, ka veiqaravi vaka turaga ni Kalou me rawa ni tiko vei keda na mataqali kaukauwa vakamatabete oya?

    Ono na vula sa oti ena koniferedi raraba ni Okotova 2015, au a vosa kivei ira na marama ena Lotu me baleta na nodra itavi rokovi vaka marama ni Kalou. Ia au sa via vosa oqo kivei kemuni na veitacini me baleta na nomuni itavi rokovi vaka turaga ni Kalou. Niu veitosoyaki voli e vuravura, au qoroya na kaukauwa kei na yalovinaka momona ni turaga kei na cauravou ni Lotu oqo. E sa ka dredre me wiliki na yalo ko ni sa vakabula kei na bula ko ni sa laveta. Vinaka!

    Ena noqu itukutuku ni koniferedi sa oti, au a vakamacalataka na ka vakadomobula au a sotava ena vuqa na yabaki sa oti, vaka-vuniwai ni uto, a sega ni vakabula rawa na bula ni rua na veitacini yalewa lalai. Ena veivakadonui nei tamadrau, au na via tukuna e levu tale na ka me baleta na matavuvale oya.

    Na ituvaki ca ni uto ena gauna ni sucu a tauva na luvedrau e tolu o Ruth kei Jimmy Hatfield. Na matai ni luvedrau tagane, o Jimmy Jr., a mate ka sega tu na kena ivakamacala matata. Au mai donuya na ituvaki oqo ni rau qara veivuke voli na itubutubu me baleta na luvedrau yalewa e rua, o Laural Ann kei na tacina, o Gay Lynn. Au a luvuci ena rarawa ni rau a mate na yalewa ni oti na nodrau sele.1 Kilai no vakamatata ni rau sa voroki vakayalo tu o Ruth kei Jimmy.

    E muri, au kila ni rau a tomana voli na nodrau veivakaduiduitaki kivei au kei na Lotu. Voleka ni onosagavulu na yabaki, na noqu vakatotogani voli ena ituvaki oqo kau sa rarawataki rau na Hatfield. Au a tovolea ena vica na gauna meu veitaratara vata kei rau, ka sega ni vakavotukana.

    Qai dua na bogi ena Me sa oti, au a vakayadrati mai vei rau na veitacini yalewa oya mai na yasana kadua ni ilati. Dina ga au sega ni raici se rogoci rau ena noqu veiwakilakila vakayago, au a vakila ga na nodrau tiko. Vakayalo, au a rogoca na nodrau vakatakekere. A lekaleka ka matata na nodrau itukutuku: “Baraca Nelson, keirau sega ni vauci tu kivua e dua! Rawa ni o vukei keirau?” Vakalailai toka ga oya, au rogoca rawa ni sa leqa na tinadrau, ia se bula voli o tamadrau kei na ganedrau gone.

    Niu vakayaloqaqataki tu mai na vakatakekere nei Laural Ann kei Gay Lynn, au tovolea tale meu veitaratara kei tamadrau, kau rogoca ni sa tiko vata kei na luvena tagane o Shawn. Rau sa lomasoli ena gauna oqo me rau sotavi au.

    Ena June, au a tekiduru saraga ena matai Jimmy, ka sa yabaki 88 oqo, ka vakayaco veivosaki momona vata kei koya. Au wasea na nodrau vakatakekere na luvena yalewa ka tukuna vua ni na ka dokai vei au meu vakayacora na cakacaka vakalotu ni veivauci me baleta na nona matavuvale. Au vakamacalataka talega ni na taura e dua na gauna kei na sasaga levu vua kei Shawn me rau na vakarau tu ka bula kilikili ni curuma na valetabu, ni sega ni dua vei rau sa bau taura na nona edaumeni.

    A vakilai vakaukauwa na Yalo ni Turaga ena sota oya. Na gauna rau ciqoma yadua kina o Jimmy kei Shawn na noqu kerekere, au sa marau saraga! Rau a cakacaka vagumatua vata kei na nodrau peresitedi ni iteki, bisopi, dauveisiko, kei na iliuliu ni kaulotu ena tabanalevu, vakakina kei ira na daukaulotu gone kei na dua na veiwatini daukaulotu qase. Ka qai, sega sara ni dede, ena Valetabu e Payson Utah, a noqu na madigi vakasakiti meu vauci Ruth kivei Jimmy kei na va na luvedrau kivei rau. Keirau a veitagici kei Wendy ni keirau vakaitavi ena ivalavala vakasakiti oya. Vuqa na yalo a vakabulai ena siga oya!

    O Elder kei Sister Nelson ena valetabu vata kei na matavuvale na Hatfield

    Ni vakasamataki voli na ka a sotavi oya, au sa qoroi Jimmy kei Shawn kei na ka rau sa tu vakarau me rau cakava. E rau sa noqu tamata qaqa. Ke sa rawa niu vakayaco lomaqu, sa ikoya mera na matanataka na turaga kei na cauravou yadua ena Lotu oqo na yaloqaqa, na kaukauwa, kei na yalomalumalumu ni tama kei na gonetagane oqo. Rau sa tu vakarau me veivosoti ka vakanadakuya na mosi kei na itovo makawa e so. Rau sa tu vakarau ni ciqoma ka muria na veituberi mai vei ira na nodrau iliuliu ni matabete me rawa ni na vakasavasavataki ka vaqaqacotaki rau na Veisorovaki i Jisu Karisito. Rau sa tu vakarau ni yaco me dua na tamata bula kilikili ka taura na matabete “me vaka ga na ilesilesi tabu vakabete ni Kalou.”2

    Me tauri sa kena ibalebale me tabei na bi ni ka e tauri tiko. E sa dua na veidinadinati tabu na kena tauri na matabete, ka sa kaukauwa ka dodonu ni lewa cecere ni Kalou. Vakasamataka oqo: na matabete ka vakatikori vei keda e sa kaukauwa vata saraga kei na dodonu ni lewa a bulia kina oqo kei na vuravura tawawili rawa na Kalou, ka vakatulewataka na lomalagi kei na vuravura, ka vakacerecerei ira na Luvena talairawarawa.3

    Au a tiko kei Wendy wale toka ga oqo ena dua na soqoni ka sa vakarau tu kina na dautabaoqani me vakatagitaka na idola ni sere. A koto na matana ena ivakatagi, nona iqaqalo ena ki e so. A tekivu tabaki na veiki, ia a sega na rorogo. Au vakasolokakana vei Wendy, “E sega vua na kaukauwa.” Au vakabauta ni dua na ka e sa tarova na drodro ni kaukauwa vakalivaliva ki na oqani oya.

    Kemuni na taciqu, ena sala vataga, au ririkotaka ni tiko e vuqa sara na turaga ka soli vei ira nadodonu ni lewa ni matabete ia ka sega vei ira na kaukauwa ni matabete baleta na drodro ni kaukauwa e sa tarovi tu ena ivalavala ca vaka na vucesa, veicavilaki, dokadoka, ivalavala tawadodonu, se vakaogai tu ena veika ni vuravura.

    Au ririkotaka ni tiko e vuqa sara na tauri matabete ka sa cakava e lailai ga se sega saraga me vakatorocaketaka na nodra sasagaka ni kena rawati na kaukauwa ni lomalagi. Au lomaleqataki ira kece ka duka tu na nodra vakasama, vakanananu, se qaravitavi se o ira ka beca na watidra se luvedra, ka vakavuna na tagutuvi ni kaukauwa vakamatabete.

    Au ririkotaka ni vuqa sara era sa sorova vakarawarawa na nodra dodonu ni digidigi kivua na vunica ka tukuna voli ena nodra imoimoi, “Au kauwaitaka vakalevu cake na vakalomavinakataki ni noqu gagadre mai na kena tauri voli na kaukauwa ni iVakabula me vakalougatataki ira na tani.”

    Au ririkotaka, kemuni na taciqu, ni so vei keda ena rairai yadra cake ena dua na siga ka vakila na kaukauwa vakaidina e tiko ena matabete ka veivutunitaka vakabibi ni ra a vakayagataki gauna vakalevu cake ena qarai ni kaukauwa tale e so se kaukauwa ena cakacaka mai na vulici ni kena cakacakataki vakaoti na kaukauwa ni Kalou.4 A vakatavulica o Peresitedi George Albert Smith “eda sega ni tiko eke meda vakasavuliga voli ena bula oqo ka qai gole ki na dua na ivakatagedegede ni veivakacerecerei; ia eda sa tiko eke meda rawaka vakaikeda ena veisiga ki na itutu e so sa namaka kivei keda na Tamada meda tawana ni cava na bula oqo.”5

    Cava na vuna me vakayalia kina na nona veisiga e dua na tamata ka vakacegui koya ena rourou nei Iso6 ni sa vakatautaki tu vua na ciqomi vakaidina ni veivakalougatataki taucoko i Eparama?7

    Au vakamasuti keda yadua vakabibi meda bulataka vakadodonu na noda madigi vaka-dautauri matabete. Ena dua na siga mai oqo, oira ga na turaga ka ra vakabibitaka na nodra matabete, ni qaraivagumatua mera vakatavulici mai vua na Turaga Vakaikoya, sa na rawa ni veivakalougatataki, veituberi, veitaqomaki, veivaqaqacotaki, ka veivakabulai vei ira na tani. Na tamata duadua ga sa cakava na ka e gadrevi me kilikili kina na tauri ni kaukauwa vakamatabete ena rawa ni caka mana voli kivei ira e lomana ka taqomaka na nona bula vakawati kei na matavuvale, ena gauna oqo ka tawamudu.

    Na cava e gadrevi me vakatorocaketaki kina na kaukauwa oqo? Na iliuliu ni iApositolo ni iVakabula, o Pita—na Pita vata ga kei Jemesa kei Joni a vakatikora na Matabete i Melikiseteki kivei Josefa Simici kei Oliva Kauderi8—a cauraka na ivakarau e so meda vaqara meda “rawata kina na ka sa vakalou.”9

    Vakatikora na Matabete i Melikiseteki o Pita, Jemesa, kei Joni.

    A tukuna o koya na vakabauta, ivalavala vinaka, vuku, ivalavala malua, vosota, daulotu, veilomani vakaveitacini, kei na yalololoma.10 Ka kakua ni guilecava na yalomalumalumu!11 Au taro kina, na cava era na kaya na lewe ni noda matavuvale, veitokani, kei na itokani vakacakacaka ni daru sa cakava tiko ena vakatorocaketaki ni veisolisoli vakayalo oqo kei na so tale?12 Na levu ga ni kena vakatorocaketaki na ivakarau oya, na levu cake ni noda kaukauwa vakamatabete.

    Eda na rawa tale vakacava ni vakalevutaka na noda kaukauwa ena matabete? Sa gadrevi meda masu mai na vu ni yaloda. Na vosataki matau ni itaviqaravi sa oti kei na kena me vakayacori, ka vakacavari ena so na kerekere ni veivakalougatataki, e sega ni rawa ni vakavurea na mataqali veivosaki vata kei na Kalou e kauta mai na kaukauwa veivakadeitaki. O sa lomasoli li mo masu mo kila na iwalewale ni masu me baleta na kaukauwa levu cake? Na Turaga ena vakatavulici iko.

    O sa lomasoli li mo vakasaqaqara ena ivolanikalou ka tugana ki lomamu na vosa i Karisito13—mo vulica vagumatua mo rawata kina na kaukauwa levu cake? Kevaka o vinakata na watimu me na dokai iko, me na raici iko o koya ni o vulica tiko ena Initaneti na ivunau i Karisito14 se wilika tiko na nomu ivolanikalou!

    O sa lomasoli li mo sokalou vakawasoma ena valetabu? Sa dau taleitaka na Turaga me vakayacora na Nona veivakatavulici ena Nona vale tabu. Raitayaloyalotaka na Nona marau voli kevaka o kerei Koya me vakatavulici iko me baleta na idola ni matabete, dodonu ni lewa, kei na kaukauwa ni ko sotava voli na cakacaka vakalotu e so ni Matabete i Melikiseteki ena valetabu.15 Raitayaloyalotaka na vakalevutaki ni kaukauwa vakamatabete e rawa ni nomu.

    O sa lomasoli li mo muria na ivakaraitaki nei Peresitedi Thomas S. Monson ena nodra qaravi na tani? Sa vica vata na yabaki na nona lakova vakabalavu na salatu i vale, ni vakamuria na veivakauqeti ni Yalotabu me yaco ki na dua na matarukuruku ka qai rogoca na vosa e so vaka na, “O kila vakacava ni oqo na tikinisiga ni ivakananumi ni mate nei luvei keirau yalewa?” se “O kila vakacava ni noqu siganisucu?” Ka, kevaka o vinakata vakaidina na kaukauwa vakamatabete levu cake, o na vakamareqeta ka cuqena na watimu, ni tauri matua o koya kei na nona ivakasala.

    Ia, kevaka e sa rogo sivia na veika kece oqo, yalovinaka navuca na kena rawa ni duidui na noda veimaliwai vata kei na watida, luveda, kei na ilawalawa vakacakacaka kevaka meda a kauwaitaka soti na rawati ni kaukauwa vakamatabete me vaka na noda sa rawaka voli ena cakacaka se vakalevutaka voli na ilavo ena noda akaude ni baqe. Kevaka eda soli keda ena yalomalumalumu kivua na Turaga ka kerei Koya me vakatavulici keda, ena vakaraitaka vei keda o Koya na iwalewale me vakalevutaki kina na noda rawata na Nona kaukauwa.

    Ena veisiga edaidai, eda kila ni na tavuki na veivanua duidui eso.16 De lakolako dua vei ra na tavuki ni vanua oya na nomu itikotiko saraga, ka na rairai yaco kina na “tavuki” ni vakasama, vakailavo, se vakayalo. Na kaukauwa vakamatabete sa rawa ni vakamaravutaka na wasawasa ka vakaseavutaka na duidui ena vuravura. Na kaukauwa vakamatabete sa rawa talega ni vakamaravutaka na vakasama ka vakaseavutaka na duidui ena lomadra o ira eda lomana.

    Eda sa lomasoli li meda masu, lolo, vuli, vakasaqaqara, sokalou, ka veiqaravi vaka turaga ni Kalou me rawa ni tiko vei keda na mataqali kaukauwa vakamatabete oya? Baleta ni rau a guta sara na yalewa lailai e rua me rau vauci ki na nodrau matavuvale, a lomasoli talega o tamadrau kei na ganedrau ni sauma na vua ni kena tauri na Matabete tabu i Melikiseteki.

    Kemuni na taciqu lomani, sa mai soli vei keda e dua na veidinadinati tabu—na dodonu ni lewa ni Kalou me vakalougatataki ira na tamata. Meda sa duri cake yadua vaka na turaga ni Kalou eda a lesi taumada me vakakina—vakarau tu ni taura vaqaqa na matabete ni Kalou, guta yani na isau ni vua cavaga sa gadrevi me vakalevutaka na nona kaukauwa ena matabete. Ena kaukauwa oya , sa rawa ni da veivuke ni vakarautaka na vuravura ki na iKarua ni Lakomai ni noda iVakabula, o Jisu Karisito. Oqo na Nona Lotu, sa liutaki edaidai mai vua na Nona parofita, o Peresitedi Thomas S. Monson, kau sa lomana ka tokona vakaidina. Au sa vakadinadinataka ena yaca i Jisu Karisito, emeni.