Ki na Veivueti: E Rawa ni da Cakava
    Footnotes

    Ki na Veivueti: E Rawa ni da Cakava

    Sa vakarautaka na Turaga na iyaragi ena ganita me da na rawa ni lako ka laki veivueti vei ira na luluqa kei ira na noda itokani sega ni lewenilotu.

    E kila vakamatata na iVakabula na Nona itavi me vueti ira na luvena na Tamada Vakalomalagi, ni a kaya:

    “Ni sa lako mai na Luve ni tamata me vakabulai koya sa yali.

    “ … [Ni sa] vakatalega oqo na Tamamudou sa tiko mai lomalagi, ni sa sega ni vinakata me yali e dua vei ira na lalai oqo.”1

    E kila vakamatata na tinaqu yalo vakaagilosi o Jasmine Bennion Arnold, na nona itavi me veivuke ena nodra vueti na nona sipi mavoa se lakosese na Tamada Vakalomalagi, oka kina o ira na luvena kei na makubuna. Sa dua na itavi vakasakiti e rawa ni ra qarava na tubunigone ena nodra bula na makubudra.

    E dau lesi o Na me sikovi ira e toso dredre tiko na nodra vakabauta, o ira era luluqa tu vakalotu kei ira na matavuvale lewenilotu vakatikina; ia era dau okati ena nona qelenisipi e vica vata tale ka sega ni dau lesi me sikovi ira. E vakalevu na nona veisiko e sega ni dau vakadua ga ena dua na vula, ni dau vakarorogo vakamalua, ni qaravi ira voli na tauvimate ka veivakayaloqaqataki ena loloma. Ena vica na iotioti ni vula ena nona bula, sa tu ga vakadua e vale, ka dau volavola vei ira, me vakaraitaka nona loloma, wasea nona ivakadinadina, ka laveti ira cake era dau mai veisiko.

    Ni da laki veivueti, sa dau solia vei keda na Kalou na kaukauwa, veivakayaloqaqataki, kei na veivakalougatataki. Ni vakaroti Mosese me vueti ira na luvei Isireli, a rere ko Mosese, me vaka noda dau rere e vuqa vei keda. A vakaiulubale o Mosese, ka kaya, “Kau sa sega ni rawata na vosa, … niu sa dauvosa vakamalua ka yame berabera.”2

    A vakadeitaki Mosese na Turaga:

    “Ko cei sa cakava na gusu ni tamata? … koi au ko Jiova, se segai?

    “Ia oqo, mo lako, kau na tiko kei na gusumu, ka vakavulici iko ena ka mo kaya.”3

    A kaya tiko na Turaga vei Mosese, “E rawa ni o cakava!” Kila na cava, e rawa talega vei keda!

    Meu wasea mada e va na ivakavuvuli ka na veivuke ena noda sasaga ni veivueti.

    iVakavuvuli 1: Me da Kakua ni Lokuyarataka Noda Veivueti

    A talanoataka o Elder Alejandro Patania, e dua na Vitusagavulu ni iWasewase e liu na italanoa kei tacina, o Daniel, ka a soko yani kei ira na nona kaimua ena ilakolako ni qoli. Ni oti e dua na gauna, a ciqoma o Daniel e dua na ivakasala vakatotolotaki ni qaqarauni ni sa toso totolo tiko mai e dua na cava levu. Ena gauna vata ga oqori sa tekivu me ra lako ki vanua o Daniel kei ira nona kaimua.

    Soko ki wasabula

    Ni sa kaukauwa cake tiko mai na cava sa sega ni yavala na idini ni dua na waqa ni qoli toka voleka. Era a vesuka e dua na keveli ki na waqa vakaleqai o ira na kaimua nei Daniel ka tekivu me tuya yani ki vanua. Era kere veivuke ena walesi, ni ra kila, ni sa kaukauwa cake tikoga na cava, era na gadreva na veivuke totolo duadua.

    Kaukauwacake na Cava

    Ni ra wawa toka ena yalo nanamaki na nodra daulomani, era sota me ra vakatulewataka na iwalewale vinaka duadua ni veivueti na mata mai na tabana ni yadrava na baravi, na isoqosoqo ni dauqoli, kei na mataivalu e wai. Eso era a vinakata me ra lako yani vakatotolo ia a tukuni me ra waraka me dua na ituvatuva. Ni toso tikoga nodra vakatakekere o ira era sotava tiko na cava, era tomana tiko na nodra bose na mata, ni ra tovolea tiko me ra vakadonuya vata e dua na sala dodonu kei na ituvatuva.

    Era mate ena wawa na daulomani

    Ni qai vakaduri rawa e dua na ilawalawa ni veivueti, a yaco mai e dua na iotioti ni kaci ni leqa. Sa gutuva na keveli na cava kaukauwa ka ra sa lesu na kaimua nei Daniel me ra vueti ira nodra itokani dauqoli. Kena itinitini, erau qai luvu ruarua na waqa, ka ra yali na kedrau kaimua okati kina na taci Elder Patania o Daniel.

    Erau yali ruarua na waqa.

    E vakatauvatana o Elder Patania na leqa oqo ki na Nona ivakasala na Turaga ena Nona kaya: “Dou sa sega ni vakaukauwataka, … [se] kauta tale mai na ka sa vakasevi, … [se] vakasaqara na ka sa yali; … ia kau na taroga na noqu sipi vei ira.”4

    E vakamacalataka o Elder Patania, sa dodonu me da tuvakarau ena noda veimatabose, kuoramu, mataisoqosoqo kei na tamata yadua sara mada ga, me da kakua ni lokuyarataka na laki veivueti. Ena so na gauna e sivi e vicavata na macawa na noda veivosakitaka tiko na ivakarau me da vukei ira kina era vakaleqai tu. Eda veitalanoataka o cei me sikovi ira kei na ivakarau me muri. Ena gauna vata oqori, era ia tikoga mai na kere veivuke na tacida kei na ganeda era lakosese voli oqo. Me da kakua ni lokuyara.

    iVakavuvuli 2: Me da Kakua ni Soro

    E sa vakarogoya tiko na kaci matata ni veivueti o Peresitedi Monson, e raica, “E gadrevi me vakananumi vei ira noda lewenilotu e sega vakadua ni sa bera ni baleti ira na … lewenilotu luluqa … sa nanumi beka ni sa sega ni dua na inuinui ena vukudra.”5

    Me vaka e vuqa vei kemuni, eso au sa wasea vei ira na kosipeli sa vakarau me ra papitaiso se vakabulabulataki mai, kei na so tale—me vaka noqu itokani sega ni lewenilotu kei na watina luluqa vakalotu, o Charlene—taura e levu tale na gauna.

    E sivia na 25 na yabaki au dau vakaitavitaki Tim ena veivosaki vakosipeli ka dau kauti rau o Tim kei Charlene ki na valetabu dolavi raraba. Era mai vakaitavi ena veivueti eso tale, ia a sega ni ciqoma o Tim na veisureti kece me sota vata kei ira na daukaulotu.

    Ena dua na mua ni macawa au a lesi me vakatulewa ena dua na koniferedi ni iteki. Au a kerea na peresitedi ni iteki me lolovaka ka masulaka o cei me keitou na laki sikova. Au kurabui ni solia mai vei au na yaca ni noqu itokani o Tim. Ni keitou tukituki e nona katuba na bisopi nei Tim, peresitedi ni iteki kei au, a dolava mai o Tim, raici au, raici bisopi, ka kaya “Bisopi, au nanuma ni o a tukuna ni o na kauta mai e dua na tamata digitaki!”

    Oti qai dredre o Tim ka kaya, “Curu mai, Merv.” A yaco e dua na cakamana ena siga ko ya. Sa papitaiso oti ena gauna oqo o Tim, ka rau sa vauci oti ena valetabu kei Charlene. Meda kakua ni soro.

    O Tim kei Charlene mai valetabu

    iVakavuvuli 3: Ena Vakaevei na Nomu Reki Kevaka o Kauta Mai e Dua Mada Ga na Yalo vei Karisito

    Ena vuqa na yabaki sa oti au a tukuna na nona kila o José de Souza Marques na vosa ni iVakabula ni “kevaka e dua vei kemudou sa vakasinaiti ena Yalo Tabu, me rau sala vata kei na dua sa malumalumu, me… kaukauwa sara kina ko koya.”6

    E kila o Baraca Marques na sipi yadua ena nona kuoramu ni bete ka raica ni yali tiko o Fernando. A vaqarai Fernando i nodratou vale, oti qai lako ki na nona vale nona itokani, ka lako sara ki baravi.

    Vueti o Fernando

    Qai kunei Fernando ni vakasisisi tiko e wasawasa. A sega ni wawa tiko me luvu mada na waqa, me vaka ena italanoa kei Daniel. A kilu yani ki wai ena gauna vata ga me vueta nona sipi lakosese, ka kauta mai ki vale ena reki. 7

    Vakadeitaka me kakua tale ni na qai biuta o Fernando na lomanibai

    Qai vakadeitaka ena veiqaravi tomani tikoga me kakua tale ni biuta na qelenisipi o Fernando.8

    Meu tukuna mada na veika sa yaco me tekivu mai na nona sa vueti o Fernando ka wasea na reki e yaco ena nona vueti e dua mada ga na sipi lakosese. Qai vakamautaki nona daulomani o Maria ena valetabu o Fernando. Ena gauna oqo sa lima na luvedrau ka 13 na makubudrau, ka ra bulabula kece tu vakalotu. E levu tale na wekadrau kei na matavuvale era sa lewena talega na Lotu. Erau sa solia vata yani e udolu vakaudolu na yaca ni tubudrau me ra ciqoma na cakacaka vakalotu ni valetabu, ka sa lako tikoga mai na veivakalougatataki.

    Matavuvale nei Fernando

    Sa veiqaravi tiko oqo vakabisopi ena ikatolu ni gauna o Fernando, ka tomana tikoga nona veivueti. A wasea ena dua na gauna wale toka ga qo, “Ena neitou tabanalevu, e 32 na cauravou bulabula vakalotu ni Matabete i Eroni, e 21 era a vueti ena 18 na vula sa oti.” Vakatamata yadua, matavuvale, kuoramu, mataisoqosoqo, kalasi, kei na dausiko kei na dauveituberi vakavuvale, eda rawa ni cakava!

    Cauravou nei Fernando

    iVakavuvuli 4: Se Cava ga Noda Yabaki, Eda sa Kacivi Kece me da Veivueti

    A kaya o Peresitedi Henry B. Eyring: “Se cava ga noda yabaki, noda kaukauwa, itavi vaka-Lotu, se vanua eda tu kina, eda sa kacivi ki na cakacaka me da vukea [na iVakabula] ena Nona tatamusuki ni yalo me yacova Nona lesu tale mai.” 9

    Ena veisiga yadua sa levu cake tikoga vei kemuni na nodal alai, noda itabagone, noda cauravou goneyalewa itabaqase kei na noda lewenilotu qase ena veitabayabaki sa rogoca tiko na domona na iVakabula me da lako mai ki na veivueti. Vinaka vakalevu na nomuni igu! Meu wasea mada eso na ivakaraitaki:

    O Amy, yabaki 7, a sureta nona itokani o Arianna kei na nona matavuvale ki na nona parokaramu ni soqoni ni sakaramede vakayabaki ni Lalai. Ni oti yani e vica na vula, eratou sa papitaiso o Arianna kei na nona matavuvale.

    A vakauqeti o Allan, e dua na cauravou itabaqase, me wasea na vidio ni Lotu, itukutuku ni Momani, kei na tiki ni ivolanikalou eso vei ira kece nona itokani ena tabana vakaitukutuku ni veimaliwai.

    Sa tekivu me wasea o Sister Reeves na kosipeli kei ira yadua na dau volivolitaki era qiri mai.

    A sureta o James nona itokani sega ni lewenilotu o Shane ki na papitaiso nei luvena yalewa.

    A vakauta o Spencer e dua na isema ki na vosa ni koniferedi nei Peresitedi Russell M. Nelson vua na ganena luluqa vakalotu qai tukuna mai, “A wilika na vosa ka sa dolavi kina e dua na katuba.”

    Sa vakarautaka na Turaga na iyaya ni cakacaka kece sara e gadrevi me da veivueti kina vei ira noda itokani luluqa kei na sega ni lewenilotu. E rawa vei keda kece me da cakava oqo!

    Au sureti kemuni yadua mo ni rogoca na nona kaci na iVakabula ka laki veivueti. E rawa ni da cakava!

    Au vakadinadinataka niu kila ni o Jisu nai Vakatawa Vinaka, ni lomani keda ka dau vakalougatataki keda ni da veivueti. Au kila ni bula tiko; Au kila. Ena yaca i Jisu Karisito, emeni.