Tu Vata Kei Ira na iLiuliu ni Lotu
    Footnotes

    Tu Vata Kei Ira na iLiuliu ni Lotu

    Ko sa tu vata li kei ira na iliuliu ni Lotu ena dua na vuravura butobuto me rawa kina vei iko mo vakatetea na Rarama i Karisito?

    Eda kidavaki ira ena veidokai na kacivi vou ena Vakaitutu Raraba, Vitusagavulu ni iWasewase, kei na mataveiliutaki raraba vou totoka ni Lalai. Eda vakavinavinaka vakalevu, kivei ira era sa mai vagalalataki. Keimami lomani kemuni vakayadua.

    Kemuni na taciqu kei na ganequ lomani, eda sa mai vakaitavi ena dua na cakacaka veivakalougatataki ena noda laveliga meda tokoni ira na parofita, daurairai, ka dauvakatakila kei ira na iliuliu eso kei na vakailesilesi raraba kacivi mai vua na Kalou ena gauna oqo. Au dau sega ni vakawalena se vakamamadataka na gauna ni nodra tokoni ka dusimaki mai vei ira na italai ni Turaga. Ni sa mai vica na vula na noqu kacivi meu lewe ni Kuoramu ni iApositolo Le Tinikarua, au doka na nomuni veitokoni kei na yalonuidei. E ka cecere nomuni tu vata kei au kei ira na iliuliu cecere oqo.

    Ni oti noqu tokoni ena Okotova sa oti, au a gole ki Pakisitani, ena dua na ilesilesi, ka sotavi ira na Yalododonu yalodina ena matanitu o ya. Era lewe lailai toka ga, ia era cecere vakayalo. Ni oti vakalailai noqu lesu i vale, au a ciqoma na ivola oqo mai vei Baraca Shakeel Arshad, e dua na lewenilotu lomani au a sotava mai kea: “Vinaka vakalevu, Elder Rasband, nomuni gole mai ki Pakisitani. Au vinakata meu tukuna vei kemuni ni keimami … na lewe ni Lotu … keimami tokoni kemuni ka lomani kemuni. [Keimami sa] kalougata dina nomuni mai tiko eke ka vakarorogo vei kemuni. Sa dua dina na siga koula ena bula ni noqu matavuvale ni keitou sotava e dua na i Apositolo.”1

    Na sotavi ira na Yalododonu vakataki Baraca Arshad sa veiuabaleti ka rokovi ka meu vakayagataka nona vosa, “dua na siga koula.” talega vei au.

    Ena Janueri era a vakaitavi kina na iliuliu ni Lotu ena dua na kakaburaki e na Veisotari ena Matanavotu kei ira na itabagone, nodra iliuliu, kei na itubutubu e veiyasai vuravura. A vakaraitaki bula na kakaburaki ena Initaneti ki na vuqa na vanua ena 146 na matanitu; ka so na vanua era vakasinaita na valenilotu, ka so na vale yadua era sarava tiko mai e dua ga na itabagone. Taucoko, e vuqa na drau na udolu era a sema tiko mai kina.

    Veisotari ena Matanavotu kei Elder Rasband, Sisita Oscarson, kei Baraca Owen

    Ni semati ki na levu ni vakarorogo, au a tokoni vata kei Sisita Bonnie Oscarson, na peresitedi raraba ni Goneyalewa; Baraca Stephen W. Owen, peresitedi raraba ni Cauravou; kei au—ka tokoni mai vei ira na itabagone, daunisere ivakatagi kei na so tale—ena saumi nodra taro na itabagone.

    2016 iKau ni Muavata

    A neimami inaki me vakaraitaki raraba na itoko ni itabagone ni 2016, “Dou Toso ki Liu ka Tudei vei Karisito” mai na 2 Nifai, ka vakaoqo: “Ia mo dou toso ki liu ka tudei vei Karisito ena nomudou vakanuinui taucoko sara, mo dou lomana na Kalou kei na tamata kecega. Ia kevaka dou sa toso ki liu ka tugana ki lomamudou na vosa i Karisito ka vosota me yacova na ivakataotioti, raica sa kaya vakaoqo na Tamada: Dou na rawata na bula tawamudu.”2

    Ni wiliki e vuqa na drau nodra vakatataro na noda itabagone, na cava eda sa vulica? Keimami sa kila ni ira na itabagone era sa lomana na Kalou, tokoni ira nodra iliuliu, kei na gadreva me saumi na nodra taro! Na vakatataro sa ivakaraitaki ni gagadre me vuli tikoga, me vakuri ki na dina o ya sa tu oti e na noda ivakadinadina, ka vakavakarau vinaka cake ki na “toso ki liu ka tudei vei Karisito.”

    Na Vakalesui mai ni kosipeli e tekivu mai vua e dua na cauravou, o Josefa Simici ni a taro. E vuqa na ivakavuvuli ni iVakabula a tekivu ena taro. Nanuma Nona a tarogi Pita: “Ia dou sa kaya se ko cei koi au”3A sauma o Pita: “Oi kemuni na Karisito, na Luve ni Kalou bula.”4E gadrevi meda veivukei meda kunea na kena isau mai vua na Tamada Vakalomalagi ena veidusimaki ni Yalotabu.

    Ena kakaburaki o ya, au qai kaya vei ira na itabagone:

    “O ira na iliuliu ena Lotu oqo era sa kila tiko na nomuni bula, nomuni leqa, kei na nomuni ibolebole.

    “Era tiko na luveda. Era tiko na makubuda. Keimami dau sota wasoma kei ira na itabagone e vuravura taucoko. Keimami sa masulaki kemuni tiko, keimami sa tukuni kemuni tiko ena veivanua tabu cecere, ka lomani kemuni.”5

    Au gadreva meu wasea e dua vei ira na vuqa sara na vakasama mai na soqo o ya.

    A vola mai o Lisa mai Grand Prairie, Alberta, Canada: “Na soqoni E Matanavotu a totoka sara. Sa vaqaqacotaka dina na noqu ivakadinadina kei na dina ena kosipeli. Eda sa kalougata sara vei ira na iliuliu veivakauqeti era sa kacivi mera veiqaravi ena vuqa na itavi.”6

    A vola taumada mai o Liz, mai Pleasant Grove, Utah: “Au vakavinavinakataka noqu vakabauta kei na madigi meu tokona e dua na parofita ni Kalou kei ira na turaga kei na marama era veiqaravi vata kei koya.”7

    Nikua eda sa tokoni ira na iliuliu, era sa kacivi ena veivakauqeti vakalou mera veivakavulici ka veidusimaki ka ra kaci tiko meda qarauna na veika rerevaki ena veisiga yadua—mai na rokovi vakamamada na Siga ni Vakacecegu, ki na vakarerei na matavuvale, ki na valuti na galala vakalotu, vakakina na veiletitaki ni ivakatakila ni siga nikua. Taciqu kei na ganequ, eda sa rogoca tiko beka nodra ivakasala?

    Vuqa na gauna ena koniferedi, soqoni ni sakaramede, kei na Lalai, eda lagata kina na vosamalua, “Meu tuberi, ka liutaki.”8 Na cava e kena ibalebale vei iko? O cei o nanuma ni ko vakasamataka? O sa vakila beka nodra veivakauqeti na iliuliu dodonu, ira na tisaipeli i Jisu Karisito era tara nomu bula e liu ka tomana tiko nikua, ka ra lako tu ena salatu ni Turaga vata kei iko? Era na rairai voleka ena nomu itikotiko, nomu ivavakoso, se vosa mai ena itutu ni vunau ena koniferedi raraba. Ira na tisaipeli oqo era wasea vata kei keda na veivakalougatataki ni ivakadinadina ni Turaga o Jisu Karisito, na iliuliu ni Lotu oqo, na iliuliu ni yaloda, ka sa yalataka, “Ia mo dou kakua ni rere se yalolailai, raica koi au na Turaga, au sa tiko vata kei kemudou ka vakaukauwataki kemudou.”9

    Au nanuma sara na italanoa i Peresitedi Thomas S. Monson ena nona a sureti ki na vale nei nona peresitedi ni iteki o Paul C. Child me vakavakarau ki na tabaki ki na Matabete i Melikiseteki. Sa dua dina na veivakalougatataki vei peresitedi ni iteki o ya, ni sega tu ni kila ena gauna ya ni sa vakavulica tiko e dua na cauravou gone ni Matabete i Eroni ni dua na siga ena laki parofita ni Kalou.10

    Au sa dau vakavulici talega mai vua na noda parofita lomani, o Peresitedi Monson. E sega ni lomatarotaro na noqu vakasama se lomaqu ni sai koya na parofita ni Turaga e vuravura; kau sa ciqoma talega ena yalomalua ni sa ciqoma vakakina o koya na ivakatakila ka cakacakataka. Sa vakavulica tiko vei keda meda dodoliga yani, ka veitaqomaki, ka veivakabulai yani. A vakavulici vakaoqo ena wai o Momani. Era sa gadreva mera “vakatokai me nona tamata” sa lomadra mera “veivuketaka na nomudou icolacola,” “tagi vata kei ira sa tagi,” ka “vakadinadinataka na Kalou.”11

    Au tu nikua niu sa vakadinadinataka na Kalou na Tamada Tawamudu kei na Luvena, o Jisu Karisito. Au kila ni bula tiko na noda iVakabula ka lomani keda ka dusimaki ira tiko na Nona italai, iko kei au, me yaco kina na inaki ena vuravura oqo.12

    Ni da toso ki liu, ka da digitaka meda muria na veidusimaki kei na ivakaro ni noda iliuliu, eda sa digitaka meda muria na Turaga ni gauna e muri tani tiko kina o vuravura. Eda sa digitaka meda ququmi matua ki na ititoko kaukaumea, meda sa Yalododonu Edaidai, meda sa italai ni Turaga, ka “vuabale na [noda] marau.”13

    Sa matata tiko na taro dau tarogi wasoma oqo: o sa tu vata tiko beka kei ira na iliuliu ni Lotu ena vuravura butobuto oqo me rawa ni ko vakatetea na Rarama i Karisito?

    Sa rui ka bibi na veimaliwai kei ira na iliuliu. Se cava na yabaki ni nodra bula, era voleka se tu vakayawa, se na gauna era tara kina na noda bula, na nodra veivakauqeti e salavata kei na vosa nei dauniserekali ni Amerika o Edwin Markham, ni a kaya:

    E dua na icavacava daru sa veitacini kina:

    E [sega e dua] me lako duadua ga:

    Vei ira na tamata daru sa vakauta kece kina

    Sa lesu mai me nodaru ga. .14

    Na noqu itokani o Shakeel Arshad, mai Pakisitani, a tokoni au mai, o tacina kei nona itokani. Sa vakakina e vuqa vei kemuni. Ni da dodoliga yani meda veilaveti cake, eda sa tukuna tiko na vosa qaqa o ya: “E [sega e dua] me lako duadua ga.”

    Kena bibi duadua, eda sa gadreva na noda Turaga ka iVakabula o Jisu Karisito. Dua na italanoa mai na ivolanikalou e dau vakauqeti au vakayalo o ya na gauna a taubale kina o Jisu Karisito e dela ni wai me sotavi iratou Nona tisaipeli era soko tiko ena Wasawasa o Kalili. Oqo o ira na iliuliu, era kacivi vou vakataka e vuqa vei keda ena itutu e cake. E volai vakaoqo ena Maciu:

    “A sa qai tiko e loma ni wasawasa na waqa, a suaigelegele [ena] ua: ni sa cagi leca.

    “Ia ena ikava ni wase ni bogi sa lako vei ira ko Jisu, a sa lako voli e dela ni wai.

    “Ia ni sa raica ko ira na tisaipeli ni sa lako voli ko koya e dela ni wai, era sa kidroa, … a ra sa qoqolou ni ra sa rere.

    “A sa vosa sara vei ira ko Jisu, ka kaya, Dou vakacegu; koi au ga; dou kakua ni rere.”15

    A rogoca o Pita na veikacivi totoka o ya ni veivakayaloqaqataki mai vua na Turaga.

    “A sa vosa vei koya ko Pita, ka kaya, Na Turaga, kevaka sai kemuni, kacivi au me bau yani vei kemuni e dela ni wai.

    “A sa kaya ko [Jisu], Lako ga mai.”16

    Qo na yaloqaqa. E gonedau o Pita, ka kila vinaka tu na veitubuyaki ni wasawasa. Ia, sa lomana dina me muri Jisu—siga se bogi, ena waqa se vanua mamaca.

    Au rawa ni raitayalotaka nona sa lade e bati ni waqa, sega tale ni wawa me kacivi tale, ka tekivu me taubale e dela ni wai. E dina, e kaya na ivolanikalou, “Sa lako ena dela ni wai me lako vei Jisu.”17 Ni sa kaukauwa ka voravora mai na cagi ka tubu na biau e yavana, sa rere ko Pita ka “sa vakatekivu me lutu dromu, sa kaci sara [icake], ka kaya, Na Turaga, ni vakabulai au.

    “Sa qai dodoka sara na ligana ko Jisu, a sa taura.”18

    Sa qai dua dina na lesoni kaukauwa. Sa tu e kea na Turaga ena vukuna, me vaka ga vei iko kei au. A dodoka yani na ligana ka tauri Pita me vueti bula.

    Au sa dau gadreva na iVakabula kei na veivueti ni Ligana ena vuqa na gauna. Au gadrevi Koya vakalevu cake oqo mai na kena e liu, vakakina oi kemuni yadua. Au nuidei niu ladeva yani na yasani waqa, na kena ibalebale, na veivanua tawakilai, kau raica niu sega ni cakava rawa vakai au ga.

    Ena veivosaki ena soqoni ni E Matanavotu, sa dau dodoliga mai na Turaga mai vei ira noda matavuvale kei na iliuliu, ka sureti keda meda lako yani Vua—me vaka nona dodoliga me vakabulai Pita.

    Ena levu talega nomu veigauna mo sauma na veisureti vakawasoma ni “lako mai vei Karisito.”19 E sega beka ni o koya oqo na veika sa baleta na bula oqo? Na veikacivi e rairai baleta na vueti ni dua na lewe ni matavuvale; lako mai mo kaulotu; lesu tale mai ki lotu; lako mai ki valetabu, kei na kena eda rogoca oti mai na soqoni ni E Matanavotu, yalovinaka lako mai, ka vukei au meu sauma na noqu vakatataro. Ena yaco na gauna eda na rogoca kece kina na kaci “Lako mai vale.”

    Sa noqu masu ni da na dodoliga yani, dodoliga yani, ka taura na liga ni iVakabula ka dedeka tu mai vei keda, vakawasoma mai vei ira na Nona iliuliu kacivi vakalou kei ira noda lewe ni matavuvale—ka rogoca Nona kaci meda lako mai.

    Au kila ni bula tiko o Jisu Karisito; au lomani Koya, kau kila e yaloqu taucoko ni sa lomani keda vakayadudua. Sai Koya na noda Daunivakaraitaki cecere ka iliuliu vakalou ni luvena taucoko na Tamada. Sa noqu ivakadinadina vakalou oqo ena yaca i Jisu Karisito, emeni.