AuLuveni Kalou
    Footnotes

    Au Luve ni Kalou

    Na kilai vakadodonu ni noda iyau vakalomalagi ena gadrevi me rawa kina na bula vakacerecerei.

    Na noda ivunau bibi duadua e okati kina na kilaka ni da sa luvena e dua na Kalou bula. Oqori na vuna e dua kina vei ira na Yacana bibi duadua na Tamada—Tamada Vakalomalagi. Sa vakavuvulitaki vakamatata sara na ivunau oqo mai vei ira na parofita ni veitabayabaki:

    • Ni temaki mai vei Setani, a cudruvi Setani o Mosese ka kaya: “Ko cei ko iko? Raica, koi au oqo e dua na luve ni Kalou.1

    • Ni vosa tiko vei ira na Isireli, a tukuna na Daunisame, “Dou sa luve i Koya sa Cecere Sara.2

    • E vakavuvulitaka o Paula vei ira na kai Aceni ena Delana ko Masi ni ra sa “kawa ni Kalou.”3

    • Erau a raica o Josefa Simici kei Sidney Rigdon e dua na raivotu ka rau raica kina na Tamana kei na Luvena, ka tukuna mai e dua na domo vakalomalagi ni o ira na lewei vuravura era “sa luve ni Kalou.4

    • Ena 1995, era a vakadeitaka kina na 15 na iapositolo kei na parofita bula: “Na tamata kece … a buli me ucuya na Kalou. O keda yadudua eda luvena tagane se yalewa lomani vakayalo na noda itubutubu vakalomalagi.5

    • E vakadinadinataka o Peresitedi Thomas S. Monson: “Eda sa luvena tagane kei na yalewa e dua na Kalou bula. … Eda sega ni rawa ni vakadinata oqo kevaka e sega ni vakilai e dua na yalo momona vou ni igu kei na kaukauwa.”6

    Na ivunau oqo e sa rui rawarawa, dau cavuti wasoma, ka rawarawa sara ena rairai ka wale kina, ni ka vakaidina e sa dua vei ira na kilaka bibi duadua eda rawa ni rawata. Na kilai vakadodonu ni noda iyau vakalomalagi ena gadrevi me rawa kina na bula vakacerecerei. Sa yavutu me kilai kina na ituvatuva lagilagi ni veivakabulai ka susugi kina na vakabauti ni Ulumatua nei Tamada, o Jisu Karisito, kei na Nona Veisorovaki lomani.7 Me kuria, e vakarautaka tikoga na veivakauqeti me da cakava ka maroroya na noda veiyalayalati tawamudu veiganiti.

    Vakavo beka ga e vica, o keda kece eda tiko ena soqoni oqo e rawa vei keda ena gauna oqo, ni sega tu na qaqa ni sere volai se ikabakaba ni ivakatagi, ni lagata “Au Luve ni Kalou.”8 Na serenilotu lomani oqo e dua vei ira ka dau lagati wasoma ena Lotu oqo. Ia na taro bibi sai koya, eda kila dina tiko li?” Eda kila tiko li ena noda vakasama kei na lomada kei na yaloda? E sa keda ivakatakilakila taumada vakalevu sara tiko li na noda itubutubu vakalomalagi?

    E vuravura, eda dau vakatakilakilataki keda ena vuqa na sala, oka kina na vanua eda sucu kina, na vanua eda kilai kina, kei na noda vosa. Eso era vakatakilakilataki ira sara mada ga ena nodra cakacaka se na veika era dau taleitaka. Na veivakatakilakila vakavuravura oqo era sega ni cala vakavo ke ra sa vakaliuci se vakalatilati ki na keda ivakatakilakila tawamudu—ni da sa luvena tagane se yalewa na Kalou.

    Ni yabaki ono tiko na luvei keirau gone duadua ka kalasi dua e koronivuli, a solia nona qasenivuli vei ira na gone e dua na vakatovotovo ni volavola ena loma ni kalasi. Oqo ena vula o Okotova, na vula ni Halloween, e dua na vakacagicagi e dau vakayacori ena so na veiyasai vuravura. Ni sega tu ni dau noqu vakacagicagi taleitaki, au nanuma ni na rairai tiko beka eso na vakasama dodonu ka veivueti me baleta na Halloween.

    A veisoliaka mai o qasenivuli e yadua na tiki ni pepa vei ira na gonevuli gone. E cake e toka kina e dua na iyaloyalo droinitaki tu ga vakaca ni dua na buinigone tevoro (au sa tukuna oti vei kemuni oqo e sega ni dau noqu vakacagicagi taleitaki) ka tucake tu ena dua na yasa ni kuro buebue. Na taro e volai tu ena pepa, me vukea nodra raitayaloyalo na gone ka vakatovolea nodra maqosa ni volavola, e vaqo “O se qai gunuva oti ga e dua na bilo mena gunu na buinigone tevoro. Na cava e yaco vei iko?” Yalovinaka mo ni kila ni italanoa oqo e sega ni wasei me dua na vakatutu vei ira na qasenivuli.

    “O se qai gunuva oti ga e dua na bilo mena gunu na buinigone tevoro. Na cava e yaco vei iko?” Ena nona maqosa duadua ni se qai tekivu volavola, a vola vaqo neirau ka lailai, “Au na mate kau na tiko mai lomalagi. Au na taleitaka mai kea baleta ni sa vanua vinaka duadua meda tiko kina baleta o sa tiko vata kei na Tamamu Vakalomalagi.” Na isaunitaro oya a vakidacalataka na nona qasenivuli; ia, ni kauta mai vale na luvei keirau yalewa na nona cakacaka, keirau raica ni a soli vua e dua na kalokalo, na icocovi cecere duadua.

    Ena bula oqo, eda sotava na dredre dina ka sega ni vakatayaloyalotaki. Sa tiko na mosi—vakayago, e lomada, ka vakayalo. Sa ra tiko na mosi ni yalo ni duatani sara na ka eda sotava mai na veika eda a namaka. Sa tiko na lewa tawadodonu ni sega ni vaka me ganiti keda na keda ituvaki. Sa yaco na yalorarawa ni cavilaki keda e dua eda a vakabauta. Sa tiko e so na leqa ni bula se ka vakailavo e rawa ni da veilecayaki kina. Ena rairai tiko na gauna e so ni vakatataro ni ulabaleta na noda kilaka oqo e dua na tiki ni ivunau se itukutuku makawa.

    Ni yaco ena noda bula na veika dredre, eda na sotava vakacava? Ena veilecayaki beka se vakatitiqa se tuvakasuka vakayalo? Ena yavalati beka noda vakabauta? Eda na beitaka beka na Kalou se o ira tale eso ena veika e yaco vei keda? Se na imatai beka ni ka eda cakava me da nanuma o cei o keda—ni da luvena e dua na Kalou dauloloma? E salavata beka oqori kei na veivakabauti dei ni sa vakatara o Koya eso na rarawa vakavuravurabaleta ni kila o Koya ni na vakalougatataki keda, me vaka na nona bukawaqa na dausava koula, me da vakataki Koya ka me da rawata na noda iyau tawamudu?9

    Ena dua na gauna walega oqo, au a tiko ena dua na soqoni vata kei Elder Jeffrey R. Holland. Ni vakavuvulitaki ni rawa ni mosimosi na bula oqo ia na noda veidredre e tu na kedra inaki tawamudu—kevaka sara mada ga eda sega ni kila tu ena gauna ko ya—e kaya o Elder Holland, “E rawa ni nomu na ka o vinakata, se nomu e dua na ka vinaka cake.”

    Ena lima na vula sa oti, keirau a lako ki Aferika kei na watiqu o Diane, vata kei rau o Elder kei Sisita David A. Bednar. Na ika ono ka iotioti ni matanitu keitou sikova o Liberia. O Liberia e dua na vanua cecere ka ra vakaturaga na kena tamata ka vutuniyau tu na kena itukutuku makawa, ia e sega ni rawarawa na veika mai kea. Na veiyabaki ni tiko yavavala vakapolitiki kei na ivalu vakavanua sa qai vakacacana ga vakalevu na bula dravudravua. Qai kuria, na nodra mate e voleka ni 5,000 na tamata mai na iotioti ni kena veitauvi na mate rerevaki na Ebola. O keitou na imatai ni ilawalawa iliuliu ni Lotu mai taudaku me keitou sikovi Monrovia, na koroturaga, me tekivu mai na gauna a vakatakila kina na World Health Organization ni sa rawa na veilakoyaki ni oti na veitauvi ni Ebola.

    Ena dua na mataka katakata ni Sigatabu, keitou a lako ki na dua na vale ni soqoni saumi ena lomadonu ni siti. E tuvai na idabedabe kece ekea, kena levu taucoko e 3,500. Na iwiliwili taucoko ka tiko rawa e 4,100. E voleka ni o ira kece na lako mai era taubale se vodo mai ena lori e sega soti ni vinaka tu na kena ituvaki; e sega soti ni dau rawarawa nodra soqoni vata na Yalododonu. Ia era lako mai. E levu vei ira era yaco mai ni se vo tu e vica na auwa me tekivu na soqoni. Ni keitou curuma yani na olo, a veidreti na vakilai ni bula vakayalo! Era sa tuvakarau na Yalododonu me ra vakavulici.

    Ni cavuta e dua e vosa tiko na ivolanikalou, era na cavuqaqataka i cake na lewenilotu na qaqana. Veitalia—se ivolanikalou lekaleka se balavu; era na cavuta vata na ivavakoso taucoko. Ia, eda sega ni dau vakatura soti na ka vakaoqo, ia sa veivakauqeti dina ni ra rawata. Kei na matasere—sa kaukauwa saraga. Vata e dua na iliuliu ni sere bulabula kei na dua na cauravou yabaki 14 ena ivakatagi, era a lagasere vakadoudou ka vakaqaqa na lewenilotu.

    Oti qai vosa o Elder Bednar. Oqo, sa dina sara, na ilutua ni soqoni era namaka tiko—me ra rogoca ni veivakavulici ka vakadinadina e dua na iApositolo. Vakamatata ena veidusimaki vakayalo, ena loma ni nona vosa, a cegu o Elder Bednar ka kaya, “O ni kila beka ‘Na Yavu Tudei’?”

    E vaka ni ra sauma mai na 4,100 na domo, “IO!”

    Oti qai taroga o koya, “O ni kila na ika 7 ni qaqana?”

    Era sauma taucoko tale mai, “IO!”

    Na tuvalaki ni serenilotu qaqa oqo “Na Yavu Tudei” ka ra lagata na Mormon Tabernacle Choir ena 10 na yabaki sa oti e sa okati kina na ika 7 ni qaqana, ka sega ni dau lagati vakalevu e liu. A vakarota o Elder Bednar, “Me da lagata na ika 1, 2, 3, kei na 7 ni qaqana.”

    Sega ni bera, nona lade cake na iliuliu ni sere kei na Matabete i Eroni–ka veitomani voli ena ivakatagi ka tekivu me vakatagitaka bulabula na kena itekivu. Ena dua na ivakarau ni yalodina au se bera vakadua ni bau vakila ena dua na sere ni ivavakoso, keimami lagata na ika 1, 2, kei na 3 ni qaqana. Oti qai laveti cake na rorogo kei na kaukauwa vakayalo ni ra sa lagata vata na 4,100 na domo na ika vitu ni qaqana ka ra cauraka:

    O koya e dau ravi tu vei Jisu

    Au na dau totaka ka maroroya tu;

    Ke saga ko eli me rawai koya ga,

    Au sega ka sega, au sega ka sega,

    Au sega ka sega niu biuti koya tu!10

    Ena dua na gauna vakasakiti vakayalo duadua ni noqu bula, au a vakavulici ena dua na lesoni bibi ena siga o ya. Eda tiko ena dua na vuravura e rawa ni vakavuna me da guilecava o cei dina o keda. Na levu ni veivagolei tani e wavoliti keda tu, na kena rawarawa me da vakawalena, ka vakanadakuya, ka guilecava na keda isema kei na Kalou. O ira na Yalododonu mai Liberia e lailai na veika vakayago e tu vei ira, ia sa vaka me tu vei ira na veika taucoko vakayalo. Na ka keitou vakadinadinataka ena siga o ya mai Monrovia o ya e dua na ilawalawa tagane kei na yalewa luve ni Kalou ka ra sa kila tu!

    Ena vuravura nikua, veitalia na vanua eda tiko kina ka veitalia se vakacava tu na keda ituvaki, sa yaga me keda ivakatakilakila bibi duadua ni da sa luvena na Kalou. Ni kilai oya ena vakavuna me taladrodro na noda vakabauta, ena vakauqeta na noda veivutuni tikoga, ka na solia na igu me da “tudei ka sega ni yavalati rawa” ena gauna taucoko ni noda ilakolako ena bula oqo.11 Ena yaca i Jisu Karisito, emeni.