2010–2019
Na Vanua Tabu ni Veivakalesui Mai
Epereli 2016


Na Vanua Tabu ni Veivakalesui Mai

O Palmyra na vanua ni Veivakalesui mai, ni na rogo mai kina na domo ni Tamada ni oti e rua na mileniumi.

Dua noqu itokani vinaka e lewe ni Lotu, a saga voli, ena vica na yabaki, me vakavulici au ena kosipeli ni matavuvale tawamudu. Ia me yacova sara noqu gole ki na dolavi raraba ni Valetabu e São Paulo Brazil ena Okotova 1978, kau curuma na loqi ni veivauci, sa qai curuma na yaloqu na ivakavuvuli ni matavuvale tawamudu, ka vica na siga au a masulaka tiko ke sai koya oqo na Lotu dina.

Au a sega ni daulotu ia au a susugi cake veirau na itubutubu ka rau a raica na veika vinaka ena lotu tale eso. Ena gauna ni noqu bula o ya, au nanuma ga ni ra sa vakadonui kece na lotu vua na Kalou.

Ni oti noqu gole ki na dola raraba ni valetabu, au sa kerea e dua na ka ena masu, niu vakabauta ka nuitaka na Kalou ni na tukuna vei au na Lotu cava e Nona e vuravura.

Ni oti noqu sasaga bula vakayalo, au sa qai ciqoma na kena isau. Au a sureti meu papitaiso, a qai yaco sara ena 31 ni Okotova, 1978, na bogi ni bera na kena vakatabui na Valetabu e São Paulo Brazil.

Au sa qai kila ni kilai au ka lomani au vakalevu na Turaga ni sa sauma mai na noqu masu.

Ena mataka e tarava keirau a gole vakaveiwatini ki São Paulo me keirau laki tiko ena dua na soqoni ni vakatabui ni valetabu.

Keirau sa tu e kea, ia au sega sara ni kila na sala meu marautaka kina na totoka ni madigi o ya. Ena siga e tarava keirau a tiko ena dua na koniferedi ni iwasewase.

Sa tekivu na neirau bula ena loma ni Lotu, ka kunei ira na itokani vinaka era a ciqomi keirau ena itosotoso vou ni bula oqo.

Na neirau tiko ena kalasi ni lewenilotu vou ena veisoqoni ni Sigatabu ena veimacawa a totoka dina. Era a vakasinaiti keirau ena kila ka keirau diva me sa oti totolo ga na macawa me yaco mai na Sigatabu me tauri vakalevu tale na veivakabulabulataki vakayalo.

Keirau sa namaka vakaveiwatini ena marau na curu ki valetabu me laki vauci neirau matavuvale me tawamudu. A qai yaco oqo ni oti e dua na yabaki vitu na siga mai na noqu papitaiso, ka sa dua dina na gauna totoka. Au nanuma ga ni sa wasei rua na veigauna tawamudu ena icabocabo ena kena a yaco e liu kei na gauna sa oti kina na veivauci.

Niu a vakaitikotiko ka dodonu vakalawa ena Baravi Tokalau kei Amerika ena vica na yabaki, au sa matau sara ki na siti lalai ka ra toka ga e ke ya.

Veigauna niu dau wilika se rogoca na veika a yaco e mua ki na iMatai ni Raivotu, e dau tukuni tiko e dua na ilawalawa tamata, ka sega ni matata sara vei au.

Au sa tekivu vakataroga eso na ka. Cava na vuna me laki vakalesui mai kina na Lotu mai Amerika ka sega e Brazil se Italy, na nodra vanua na noqu qase e liu?

Sa evei o ira na ilawalawa tamata era tukuni tiko era a vakaitavi ena veivakalotutaki kei na veilecayaki vakalotu—era a yaco kece tiko beka ena dua na vanua sautu ka veivakacegui?

Au a taroga oqo ki na vuqa na tamata ia a sega ni saumi mai. Au a wilika na veika kece ena vosa vaka-Potukali kei na Vakavalagi ia au a sega ni kunea na ka me vakaceguya na yaloqu. Ia au a vakasaqara tikoga.

Ena Okotova ni 1984, au a laki tiko ena dua na koniferedi raraba niu daunivakasala ena mataveiliutaki ni iteki. Ni oti, au a gole ki Palmyra, niu gadreva meu kunea na isau ni taro.

Niu yaco e kea au saga meu kila vinaka: Na cava e mai yaco kina eke na Veivakalesui mai, kei na vuna a levu kina na veileti vakalotu? Era lako mai vei o ira na tamata a tukuna tiko o Josefa? Cava e yaco kina ekea?

Ena gauna o ya, na isau dodonu vinaka vei au o ya ni solia na galala na Lawatu ni Matanitu o Amerika.

Ena mataka o ya au a laki raica na Valelevu o Grandin, na vanua a tabaki kina na imatai ni iVola i Momani. Au a gole sara ki na Veikau Tabu, kau laki masu kina vakalevu.

A sega ni bau dua a tavali ena gaunisala ni taoni lailai oqo. Sa evei na lewevuqa a vakamacalataka o Josefa?

Ena yakavi o ya sa lomaqu sara meu gole ki na itikotiko nei Peter Whitmer, niu yaco yani au raica sara e dua na tagane ena dua na katubaleka ni valekau. E rui ramase sara na matana. Au vakabula sara yani vua ka taroga vua na ka kece o ya.

A tarogi au, “E vo beka nomu gauna?” au a kaya, io.

A vakamacalataka na Drano o Erie kei Ontario ka lako sobu yani, ka tiko ena yasana o ya na Uciwai na Hudson.

Ena itekivu ni yabaki ni 1800 era sa lewa mera kelia e dua na ikelimusu me sokovi ka na takosova yani na yasana o ya, ka na 300 na maile (483 na kilomita) na kena balavu me yacova na Uciwai na Hudson. Oqo sa veivakatorocaketaki levu ena gauna o ya, ka mera cakacaka ga kina na tamata kei na kaukauwa ni manumanu.

A yaco o Palmyra me tiki talega ni cakacaka oqo. Era gadrevi kina na tamata kila vakacakacaka, daunimisini, matavuvale kei na nodra itokani. E vuqa na tamata era sa tekivu gole yani mai na veitaoni voleka, na veivanua yawa, mera cakacaka ena ikelimusu.

O ya sa dua na gauna tabu ka vakayalo baleta niu sa mai kunei ira na tamata o ya. Era a kauta mai na nodra itovo vakavanua kei na vakabauta. Ni vakamacalataka na nodra vakabauta, a vakararamataki na noqu vakasama ka dolava na mataqu vakayalo na Kalou.

Ena gauna o ya, au sa qai kila na sala ni Kalou, ena Nona vuku cecere sara, a vakarautaka kina na Nona ituvatuva me kauti cauravou Josefa Simici, ka biuti koya ena loma ni veilecayaki vakalotu, baleta, e kea, e Cumorah, a buluti tu kina na peleti talei ni iVola i Momani.

Oqo na vanua ni Veivakalesui mai, ni na rogo mai kina na domo ni Tamada ni oti e rua na mileniumi, ena dua na raivotu totoka, ka vosa vei cauravou Josefa Simici, ena nona gole yani ki na Veikau Tabu me laki masu ka rogoca: “Oqo na Noqu Gone ni Toko. Mo rogoci Koya!”1

E kea a raica kina e rua na ituvaki vakatamata, a uasivia cake na ka kecega na kedrau rarama kei na lagilagi. Io, sa mai vakaraitaki Koya tale na Kalou kivei ira na tamata. Na butobuto a kovuti vuravura tu sa mai takali yani.

Na parofisaitaki ni Veivakalesui mai sa tekivu me yaco. “Ia kau a raica e dua tani tale na agilosi sa vuka ena maliwa kei lomalagi kei vuravura, a sa taura nai tukutuku vinaka e sega ni oti rawa, me vunautaka vei ira era sa tiko e vuravura, vei ira kece talega na veimatanitu, kei na veimataqali, kei na duivosavosa, kei ira na tamata.”2

Ena vica walega na yabaki a muataki yani o Josefa ki na itukutuku ni parofisai, veiyalayalati, kei na cakacaka vakalotu era solia mai na parofita ni gauna makawa, na noda iVola i Momani lomani.

A sega ni rawa me vakalesui mai na Lotu i Jisu Karisito ke sega na kosipeli tawamudu, a tukuni tiko ena iVola i Momani ni sa dua tale na ivakadinadina kei Jisu Karisito, na Luve ni Kalou, na Lami ni Kalou, sa mai bokoca laivi na ivalavala ca kei vuravura.

A kaya na Karisito vei ira Nona tamata e Jerusalemi,

“Eso tani tale na noqu sipi, era sa sega ni tiko ena bai oqo.”3

“Oi au na ivakatawa vinaka, ia kau sa kilai ira sa noqu, ia ko ira sa noqu era sa kilai au.”4

Au a biuta mai na itikotiko nei Whitmer, kau vakabauta niu a sega ni vakamoce. Au nanuma ga ni sa tuturu mai na wai ni mataqu. Sa laki dromu toka na siga ena lomalagi totoka o ya.

Ia na yaloqu sa reki vakaidina sara ka sa vakacegu na lomaqu. Au sa vakasinaiti ena vakavinavinaka.

Au sa qai kila vinaka oqo na vuna. Sa mai solia tale vei au na Turaga na kila-ka kei na rarama.

Niu sa lesu i vale, sa drodro tikoga mai na ivolanikalou ki na noqu vakasama: na yalayala vei Tamada o Eparaama ni nona kawa era na vakalougatataki kina na matavuvale e vuravura taucoko.5

Ena ka oqo, era na tara kina na valetabu me rawa ni vakatikori tale kina na kaukauwa vakalou ki na tamata e vuravura mera duavata kina na matavuvale, sega ni mai tini ga ena mate ia ena veigauna tawamudu taucoko.

“Sa na yaco ena gauna maimuri, ni a vakataudeitaki na ulunivanua ni vale i Jiova me sivia na veiulunivanua, ena vakaceceretaki ka me lolovira na veiulunikoro; ka ra na drodro kina na veimatanitu kecega.”6

Ke dua e rogoci au e taroga tiko na yalomu eso na ka, kakua ni soro!

Au sureti iko mo muria na ivakaraitaki nei Parofita Josefa Simici ena nona wilika ena Jemesa 1:5: “Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua.”

Na ka e a yaco mai Kumora sa tiki ni Veivakalesuimai bibi sara ni a ciqoma o Josefa Simici na peleti ka tiko kina na iVola iMomani. E na vukei keda na ivola oqo me da toso voleka vei Karisito mai na ivola tale e so.7

Au vakadinadinataka ni Turaga sa vakatikori ira na parofita, daurairai, ka dauvakatakila mera dusimaka na Nona matanitu ena iotioti ni siga oqo vata kei na Nona ituvatuva tawamudu mera na laki bula tawamudu vata kina na matavuvale. Sa daukaroni ira na Luvena ka dausauma mai na noda masu.

Ena vuku ni Nona loloma cecere, sa sorovaka kina na noda ivalavala ca, o Jisu Karisito. Sai Koya na iVakabula kei vuravura. Au sa vakadinadinataka oqo ena yaca tabu i Jisu Karisito, emeni.