Dua na iVakarau ni Vakacegu
    Footnotes

    Dua na iVakarau ni Vakacegu

    Na vakacegu eda vakasaqara taucoko tiko e gadrevi meda cakacakataka—ni da vuli vei Jisu Karisito, rogoca Nona vosa, ka lako vata kei Koya.

    Ena vica na yabaki sa oti, a kerei o luvequ yalewa kei watina me rau vakavulica vata e dua na kalasi ni lima na cauravou lalai yabaki va ena Lalai. Na ilesilesi nei luvequ me na veivakavulici kei vugoi keirau me vakaraici ira matua, ka rau saga me maravu na ka kece, ni dau yaco na dredre e loma, me rawa ni vakavulici na ivakavuvuli ni kosipeli vei iratou na gone oqo.

    Ena dua na gauna ni kalasi voravora, ni oti nona vunauci vakavica e dua na cauravou walitolito, a kauta sara i tuba o vugoi keirau na gone yabaki va oqo. Ni rau tu e tuba, ka vakarau vosa vei cauravou lailai baleta nona itovo kei na gadrevi me laurai na nona itubutubu, a tarovi vugoi keirau o cauravou lailai oqo me kua ni vosa, ka laveta na ligana ena rarawa, ka kaya, “So na gauna—so na gauna—e dau dredre meu vakasamataki Jisu!”

    Na noda ilakolako ena bula oqo, ena lagilagi vaka na keda icavacava namaki ka marautaki sara ni toso na ilakolako, ia eda na sotava taucoko na veivakatovolei kei na rarawa ni da lako tiko. E vakavulica o Elder Joseph B. Wirthlin: “Ia na cowiri ni bula rarawa ena yaco ki na tamata yadua. Ena yaco ga mai, mera sotava na tamata yadua na rarawa. E sega ni dua e vakuwai kina.” 1“Ena Nona vuku na Turaga e sega ni viribaita e dua mai na tagi se rarawa.”2 Ia, na noda gumatua meda lako ena salatu oqo ena vakacegu, e kena usutu, ena vakatau ena kena dredre se sega na noda dauvakananumi Jisu.

    Ena sega ni vakadeitaki na vakacegu ni vakasama, vakacegu ni lomada, kei na vakacegu ni yaloda ena noda gumatua meda drotani mai na veivakatovolei, rarawa, kei na mosi ni yalo. Se cava sara noda vakamamasu yalodina, na cagilaba kece ena sega ni lakotani, ena sega ni takali na mateveitauvi, ka da na sega ni kila vinaka na vunau, ivakavuvuli, se ivakarau era vakavulica na parofita, daurairai, ka dauvakatakila. Ia, sa yalataki tu vei keda na vakacegu—ka dua na kena ivakarau.

    Ena Kosipeli i Joni, a vakavulica na iVakabula se cava ga na veika dredre ni bula oqo, sa rawa meda reki tiko; meda vakanuinui, ka kakua ni rere, baleta ni a kaya, “Dou na rawata na vakacegu ena vukuqu.”3 Na vakabauti Jisu Karisito kei na Nona veisorovaki sa imatai ni ivakavuvuli ni kosipeli ka tawamudu ka sa yavu me na tara kina na noda nuitaka tiko na “kune vakacegu ena vuravura oqo, ka rawata na bula tawamudu ena bula sa bera mai.”4

    Ena noda vakasaqara na vakacegu ena loma ni bolebole ni bula ena veisiga, sa soli kina vei keda e dua na ituvatuva rawarawa meda raica matua tiko kina na iVakabula, ni a kaya: “Mo vuli vei au, ka muria na noqu vosa; mo vakarorogo vua na noqu Yalotabu, mo rawata kina na noqu vakacegu. Koi au ko Jisu Karisito.”5

    Vuli, rogoca, ka lako—e tolu na ikalawa e yalataki tiko kina e dua na ka.

    iMatai, “Vuli vei Au”

    Eda wilika ena Aisea, “A ra na lako na tamata e lewe vuqa ka kaya, Meda mai laki cabe cake ki na ulunivanua i Jiova, ki na vale ni Kalou i Jekope; ena vakavulica vei keda ko koya na nona ivalavala.”6

    Ena kena sa levu tiko na iwiliwili ni valetabu era sa tu e vuravura, eda vulici Jisu Karisito kei na Nona ilesilesi ena ituvatuva ni Tamada ni sa Dauveibuli ni vuravura oqo, ka sa noda iVakabula ka Dauveivueti, ka sa noda ivurevure ni tiko vakacegu.

    A vakavulica o Peresitedi Thomas S. Monson: “Na vuravura e rawa ni vanua ni bolebole me da tiko kina. … Ni daru lako yani ki na veivale savasava ni Kalou, ni da nanuma na veiyalayalati eda cakava e loma, sa na rawarawa cake kina vei keda me da sotava na veivakatovolei ka da vakamalumalumutaka na veitemaki. Ena veivanua tabu oqori eda na kunea kina na vakacegu.”7

    Au a lesi ki na dua na koniferedi ni iteki niu a veiqaravi tiko mai Sauca Amerika, kau sotava kina e dua na veiwatini rau vakalolokutaka tiko na mate ni luvedrau tagane sucu vou.

    Ena dua na veivakatarogi ena koniferedi oqo au qai sotavi Baraca Tumiri kina vakadua kau kila kina na leqa oqo. Ni keirau veivosaki, a kaya ni sega walega ni lolositaka na takali nei luvena tagane ia e lomaleqataka vakalevu ni na sega tale ni raici koya. A vakamacalataka, ni ratou se qai lewe ni Lotu vou, ratou a maroroi ilavo tu mai ka curu ki valetabu ena dua na gauna, ni bera ni mai sucu o cauravou lailai, ka vauci vata vakaveiwatini ka vauci vei rau na luvedrau yalewa. A qai kaya ni ratou a maroroi ilavo me ratou lesu tale ki valetabu ia a sega ni rawa me kau o nodrau cauravou lailai me laki vauci talega vua.

    Niu kila ni sa yaco na veilecayaki, au kaya sara ni na raici nona cauravou tale, ke yalodina tikoga, baleta ni cakacaka vakalotu ni veivauci e semati koya vei watina kei rau na luvedrau yalewa sa taucoko vinaka me vauci koya talega vei nona cauravou, ni sa mai sucu ena loma ni veiyalayalati.

    Ena kurabui, a taroga ke dina beka oqo, niu vakadeitaka ni ka dina, qai kerei au ke rawa meu na vosa vei watina, ni sa sega ni vakacegui rawa ena rua na macawa a mai mate kina o luvena tagane.

    Ena yakavi ni Sigatabu, ni oti na koniferedi, au a sotavi Sisita Tumiri ka vakamacalataka talega vua na vunau lagilagi oqo. A se rarawataka tu ga na mate oqo, ia ena vakanuinui rarama, a taroga ena luluvu, “Au na mokota tale beka e ligaqu na noqu cauravou lailai? Sa na noqu beka, me tawamudu?” Au a vakadeitaka vua ni sa mai maroroya tiko na nona veiyalayalati, na kaukauwa ni veivauci e tiko e valetabu, sa na mana baleta na lewa i Jisu Karisito, ena rawa kina me tiko vata kei luvena tagane ka tauri koya e ligana.

    Dina ni a kavoro na yaloi Sisita Tumiri ni sa takali o luvena tagane, a gole yani ena tagi ni vakavinavinaka ka vakasinaiti ena vakacegu ena vuku ni cakacaka vakalotu ni valetabu, sa vakayacora na noda iVakabula ka Dauveivueti.

    Ena veigauna kece eda tiko e valetabu—ena ka kece eda rogoca, cakava, ka cavuta; ena cakacaka vakalotu yadua eda vakaitavi kina; kei na veiyalayalati kece eda cakava—sa dusimaki keda vei Jisu Karisito. Eda vakila na vakacegu ni da rogoca na Nona vosa ka vuli mai na Nona ivakaraitaki. E vakavulica o Peresitedi Gordon B. Hinckley, “Gole ki na vale ni Turaga ka mo vakila e kea na Yalona ka veivosaki kei Koya, ko na qai kila e dua na vakacegu o sega ni kunea mai na dua tale na vanua.”8

    iKarua, “Rogoca na Noqu Vosa”

    Ena Vunau kei na Veiyalayalati eda wilika “Ena vakayacori vakaidina na vosa kau sa tukuna, se ra tukuna na noqu tamata.”9 Mai na gauna nei Atama ka curuma mai na veitabayabaki me yacovi noda parofita nikua, o Thomas Spencer Monson, sa vosa tiko na Turaga vei ira na italai sa vakadonuya o Koya. O ira era sa digia mera rogoca ka muria na vosa ni Turaga, era sa solia mai na Nona parofita, ena taqomaki ka kune vakacegu.

    Ena iVola i Momani eda raica kina e vuqa na ivakaraitaki ni sa ka bibi na vakamuria na nodra ivakasala na parofita ka tuvata kei na parofita, vata kei na lesoni mai na raivotu nei Liai baleta na vunikau ni bula, e tiko ena 1 Nifai wase e 8. Se bera vakadua ni osodrigi na vale vakaitamera se na voqa mai na kena katubaleka na veivakacalai, veivakalialiai, kei na veilecayaki me vakataka na kena sa yaco tu nikua. Ena tikina oqo eda na wilika kina e rua na mataqali tamata kei na nodra lewa ki na domolevu mai na vale vakaitamera.

    Tadra nei Liai

    Tekivu ena tikina e 26, eda wilika kina:

    “Au sa veiraiyaki talega, kau raica ena tai kadua ni uciwai, e dua na vale vakaitamera. …

    “Era sinai kina na tamata, … ia era sa dusi ira mai ka vakalialiai ira … sa kania na vuanikau.

    “Ia ena vuku ni nodra veivakalialiai, era sa madua kina ko ira sa kania oti na vuanikau, era sa muria na sala tani ka ra sa lako sese kina.”10

    Ena tikina e 33 eda wilika eso na tamata a duidui nodra lewa ki na veivakacacani kei na veivakalialiai mai na valelevu o ya. A vakamacalataka o Liai ni o ira ena valelevu o ya “sa qai dusi au ka vakalialiai au kei ira talega era sa kania na vuanikau; ia keimami sa sega ni kauwaitaki ira.”11

    E tiko e dua na usutu bibi baleti ira era a madua, muri tani, ka yali yani vata kei ira era a sega ni kauwaitaka na veivakacacani mai na valelevu o ya ka tuvata kei na parofita e tukuni tiko ena rua na malanivosa: imatai, “ko ira era sa kania oti,” kei na ikarua, “ira era sa kania na vuanikau.

    Na imatai ni ilawalawa era sa yacova yani na vunikau, vakalekaleka nodra tuvata kei na parofita, ka ra tovolea walega na vuanikau. Ni ra sega ni kania tikoga, era sa vakatara na veivakatotogani mai na valelevu o ya me rawai ira, ka ra gole tani kina mai vua na parofita ki na vanua tani, ka yali yani.

    Era duidui o ira era tovolea na vuanikau ka yali yani kei ira sa kania tikoga na vuanikau. O ira yadua oqo era sega ni malele ki na veicavilaki mai na valelevu o ya, era tuvata kei na parofita, ka marautaka na kena veitaqomaki kei na vakacegu. Na noda yalodina vua na Turaga kei ira na Nona italai ena sega ni rawa me yalodina vakaveimama. Ke yaco, eda sa qai rawa ni rawai mai vei ira sa saga me vakarusa na noda tiko vakacegu. Ni da vakarorogo vua na Turaga mai vei ira na Nona italai vakadonui, eda na tucake tu ena vanua tabu ka sega ni yavalati rawa.

    Ena solia o vu-ni-ca na iwali lasulasu e vaka me isau ni taro ia ena kauti keda tani mai na vakacegu eda vakasaqara tiko. Ena raitayaloyalotaka mai na veika ni sa dodonu ka veitaqomaki ia e muri, me vaka ga na vale cecere vakaitamera o ya, ena kasura, ka rusa kece o ira era vakasaqara kina na vakacegu.

    Na dina e kunei ena serenilotu rawarawa ni Lalai: “Vosa ni parofita: Karona na ivunau. E tiko kina na veitaqomaki kei na vakacegu.12

    iKatolu, “Lako ena Yalomalumalumu ni Noqu Yalotabu”

    Se vakacava sara noda lako tani tu mai na salatu, sa sureti keda tiko na iVakabula meda lesu mai ka lako vata kei Koya. Na veisureti oqo ni lako vata kei Jisu Karisito sa veisureti meda tomani Koya ki Kecisemani mai Kecisemani ki Kalivari mai Kalivari ki na iBulubulu ena Were. Sa veisureti me da rokova ka vakayagataka na Nona solibula veisorovaki cecere, ni sa ka ni tamata yadua ni sa tawayalani. Sa veisureti ni veivutuni, me da taura na Nona kaukauwa veivakasavasavataki, ka qumia na ligana dauloloma sa dedeka tu mai. Sa veisureti me da tiko vakacegu kina.

    Eda Sureti me da Lako Vata kei Koya.

    Eda sa vakila taucoko, ena so na gauna ni noda bula, na rarawa kei na mosi ni yalo e salavata kei na ivalavala ca kei na caka cala, ni “kevaka eda sa kaya sa sega ni tu vei keda na ca, eda sa vakaisini keda, sa sega ni tu vei keda na dina.”13 Ia, “kevaka sa vaka na ka kulakula na [noda] ivalavala ca,” ni da vakayagataka na Veisorovaki i Jisu Karisito ka lako vata kei Koya ena veivutuni vakaidina, “sa na vulavula me vaka na uca vulavula.”14 Dina ni da sa tabaki sobu sara ena noda cala, eda na rawata na vakacegu.

    Eda Sureti me da Veivutuni.

    Sa lomai Alama Lailai me sa vorata na nona ivalavala ca ni sa sikovi koya e dua na agilosi ni Turaga. A vakamacalataka kina vakaoqo:

    “A sa kani au na yaluma e sega ni tukuni rawa, ia sa rarawa vakalevu na yaloqu ni sa rui levu na noqu ivalavala ca.

    “… Io, au sa qai kila niu sa talaidredre tiko vua na noqu Kalou, ka sega ni muria na nona vunau.”15

    Ni sa bibi sara na nona caka ca, ia ena loma ni rarawa oqo, a tomana:

    “Au sa qai nanuma ni a dau vunautaka ko tamaqu, ni na lako mai ko Jisu Karisito na Luve ni Kalou, me bokoca na nodra ivalavala ca na kai vuravura.

    “… Au sa masuti Koya ena yaloqu taucoko ka kaya: Oi kemuni Jisu na Luve ni Kalou; ni lomani au mai.”16

    “Ia au sa qai masuta na Turaga ko Jisu Karisito me yalololoma vei au, ka sa bokoci kina na noqu ivalavala ca. Ia niu sa masu vua,sa vakacegu kina na yaloqu.17

    Me vakataki Alama, eda na kunea talega na vakacegu ni yaloda ni da lako vata tu kei Jisu Karisito, veivutunitaka noda ivalavala ca, ka vakayagataka na Nona kaukauwa veivakabulai ki na noda bula.

    Na vakacegu eda vakasaqara taucoko tiko e sega walega ni gadrevi. E gadrevi meda cakacakataka—ni da vuli Vua, rogoca Nona vosa, ka lako vata kei Koya. Eda na sega beka ni lewa na veika e yaco wavoliti keda, ia sa rawa meda lewa na sala meda vakayagataka kina na ituvatuva ni bula vakacegu sa vakarautaka tu na iVakabula—na ituvatuva rawarawa meda dau nanumi Jisu tikoga.

    E rawa ni da vakayagataka na nona ivakarau na iVakabula.

    Au vakadinadinataka ni o Jisu Karisito “na sala, kei na vu-ni-dina, kei na vu-ni-bula” 18 ia mai Vua duadua ga eda na rawata kina na vakacegu dina ni noda bula kei na bula tawamudu ena vuravura sa roro tiko mai. Ena yaca i Jisu Karisito, emeni.