Veivakacaucautaki Vei Ira Era Veivakabulai
Ni da vakatotomuria na nona loloma na iVakabula, ena vakalougatataka dina o Koya ka vakavuavuai vinakataka na noda sasaga dodonu me da vakabula na noda bula vakawati ka vaqaqacotaka noda matavuvale.
Ena vica na yabaki sa oti, au a tiko voli ena Valetabu mai Frankfurt Jamani ka raica rawa e dua na veiwatini qase ni rau veitauriliga tiko. E tara na yaloqu na yalo ni veikauwaitaki kei na loloma erau vakaraitaka vakairau.
Au sega ni vakadeitaka rawa sara na vuna e tarai au kina vakalevu na ka au a raica oya. E rairai baleta beka na kamica ni veilomani erau veiwaseitaka na lewerua oya—e dua na ivakaraitaki veivaka uqeti ni vosota kei na yalodina. E matata ni sa dua na gauna balavu erau bula vata tu mai kina na veiwatini oqo ka se bula ka kaukauwa vinaka tu ga na nodrau veidinadinati.
Dua na iSoqosoqo ni Veika Cacawale
Au vakabauta e dua tale na vuna e dede tu kina vei au na ka au a raica oqo sai koya na kena veibasai ki na so na itovo ni bula ena gauna nikua. Ena vuqa na isoqosoqo wavoliti vuravura, na veika kecega e vaka me cacawale. Ni sa tekivu ga me ca mai se makawa e dua na ka—se ni sa madra ga mai vei keda—eda sa viritaka laivi ka vakaisosomitaka ena dua na ka vinaka cake—vou cake se taliva cake.
Eda dau vakayacora ki na talevoni tuberi, isulu, motoka—vakakina, ka ni rarawa, ena isema vakaveiwekani.
Ena yaga beka na noda dau vagalalataka na noda bula mai na veika vakayago eso eda sega ni gadreva, ia, ni baleta na veika e tawamudu na kena bibi—noda bula vakawati, noda matavuvale, kei na yavu ni bula vinaka—na ivakarau ni rai me vakaisosomitaki na ka makawa ena ka vou e rawa ni vakavuna na yaluma levu.
Au vakavinavinaka niu lewena e dua na lotu e vakabibitaka na bula vakawati kei na matavuvale. Era kilai na lewe ni Lotu i Jisu Karisito ni Yalododonu Edaidai e vuravura taucoko ni ra taukena eso vei ira na bula vakawati kei na matavuvale uasivi duadua o rawa ni raica. Au vakabauta ni vakavuna oqori, ena dua na tikina, na dina vakasakiti a vakalesui mai vei Josefa Simici ni inaki ni vakawati kei na matavuvale me tawamudu. E sega ni inaki walega ni matavuvale me taladrodro kina na veika eso e vuravura oqo ka na biu laivi ni da sa yaco ki lomalagi. Ia, rau sa ivakarau vakalomalagi. Rau sa vakatakila ni dua na ivakarau vakasilesitieli ka vakatotomuria na matavuvale tawamudu ni Kalou.
Ia na bula vakawati qaqa kei na isema vakamatavuvale era sega ni dau yaco baleta ga ni da lewe ni Lotu. E gadrevi kina na cakacaka vakainaki e veigauna. E dodonu me vakauqeti keda na ivunau ni matavuvale tawamudu me da solia na noda igu vinaka duadua me vakabulai ka vakavutuniyautaki na noda bula vakawati kei na matavuvale. Au qoroi ira ka vakacaucautaki ira na maroroya ka vakabulabulataka voli na isema bibi ka tawamudu oqo.
Nikua au vinakata meu vosa vakacaucautaki ira na veivakabulai.
Vakabulai Noda Vakawati
Ena veiyabaki sa sivi, au dau qarava na nodra cakacaka vakalotu ni veivauci eso na veiwatini nanamaki ka veilomani. Au se bera vakadua ni sotava e dua, ni rau veiraici mata ena dela ni icabocabo ni soro, me rau vakasamataka ni rau na tini ena veisere se na kavoro ni uto.
E kalouca, ni so e vakakina.
Ia, ni sa toso na veisiga ka veisau mai na roka ni veilomani vakaveiwatini, eso sa malumalumu ni vakananuma voli na nodrau dui bulamarau ka sa tekivu siqema mai na veicala lalai. Ena mataqali draki ni bula oqori, eso era sa rawai ena vakasama rerevaki ni sa sega soti ni maqosa na watina, sega soti ni lasa, se sa qase mai. Ka sa basika kina na vakasama ni dodonu me ra sa tekivu vaqaqara ena so tale na vanua.
Kemuni na taciqu, kevaka e voleka sara ni vakamacalataki kemuni na veika oqo, au sa vakasalataki kemuni ni ko ni sa lakova voli na sala e muataki ki na kavoro ni bula vakawati, kavoro ni matavuvale, kei na kavoro ni uto. Au vakamasuti kemuni me sa mudu sara ga oqo, vuki lesu, ka lako mai ki na salatu taqomaki ni buladodonu kei na yalodina ni veiyalayalati. Ka, vakakina, e sa baleti ira talega na noda marama daulomani na ivakavuvuli oqo.
Oqo, e dua ga na vosa vei kemuni na tagane sega ni vakawati ka vakacalai tiko na nomuni vakasama me kune mada e dua na “yalewa vinaka sara” me qai caka na veimusumusuki se vakawati.
Kemuni na taciqu lomani, meu vakananuma mada vei kemuni, kevaka e sa tiko e dua na yalewa vinaka sara, o nanuma vakaidina li ni na maleleti iko o koya?
Ena nona ituvatuva ni marau na Kalou, eda sega ni vaqara sara e dua ka vinaka sara ia e dua e rawa ni da vakaduavata taka na noda sasaga, ena bula taucoko, ena kena tarai cake e dua na isema e tiko kina na loloma tudei ka uasivi sara. Oqori na lalawa.
Kemuni na taciqu, o ira era vakabula nodra bula vakawati era kila ni sasaga oqo e gadrevi kina na gauna, na vosota, ka uasivi duadua, na veivakalougatataki ni Veisorovaki i Jisu Karisito. E gadrevi vei iko mo dau yalovinaka, sega ni dauvuvu, sega ni vaqara na ka me nomu ga, sega ni vakacudrui vakarawarawa, sega ni dau vakasamataka na ca, ka dau rekitaka na dina. Ena dua tale na kena itukutukuni, e gadrevi kina na loloma cecere, na loloma savasava i Karisito.1
Na veika kece oqo e sega ni yaco ena dua ga na gauna. Na bula vakawati cecere e tara cake vakalalai ena dua na gauna, ena veisiga yadua, ena gauna ni bula taucoko.
Oqori na itukutuku vinaka.
Veitalia na dragali ni nomu bula vakawati ena gauna oqo, kevaka o vakuria tikoga na qereqere lalai ni yalovinaka, yalololoma, veirogorogoci, solibula, veiciqomi, kei na sega ni nanumi koya ga, ena yaco me tekivu tubu mai e dua na uluvatu kaukauwa.
Kevaka e kena irairai ni taura e dua na gauna tawayalani, nanuma tiko: na bula vakawati e kena inaki me tawamudu! Ia “mo dou kakua ni oca ena cakacaka vinaka, raica dou sa tura tiko na yavu ni dua na [bula vakawati] cecere. Ia ena tubu mai ena veika lalai na veika lelevu.”2
Ena cakacaka berabera toka, ia e sega ni dodonu me na dragali. Ia, deu tukuna na ka sa matata tu, dau vakavudua sara me yaco na veisere vei ira na veiwatini bula mamarau.
Me da marau!
Kemuni na taciqu, vakurabuitaka na watimu ena nomu cakava na veika e dau vakamarautaki koya.
O ira era vakabula nodra bula vakawati era digitaka na bula marau. E dina ni so na mataqali mate e dau gadrevi kina nodra veiqaravi na kenadau, au dau taleitaka na tikina yalomatua oqo mai vei Abraham Lincoln: “E levu na tamata era marau ena kena levu era vinakata me vakakina.” E veidonui vinaka kei na kena isema vakaivolanikalou: “Vakasaqara, ko na kunea.”3
Kevaka eda vakasaqara na malumalumu vua na watida se na veika rarawa ena noda bula vakawati, eda na kunea vakaidina, baleta ni tamata kece e tu vua. Ena yasana kadua, kevaka eda vakasaqara na ka vinaka, eda na kunea vakaidina, baleta na tamata kece e tu vua e levu na ka vinaka.
O ira na vakabula na bula vakawati era cavuta laivi na co ca ka vakasuasuataka na senikau. Era marautaka na veicakacaka lalai ni loloma ka vakauqeta na yalovinaka ni loloma cecere. O ira na vakabula na bula vakawati sa vakabula na veitabatamata ni mataka.
Kemuni na taciqu, vakananuma na vuna o a dodomo kina.
Cakacakataka na veisiga yadua mo vaqaqacotaka ka vakamarautaka nomu bula vakawati.
Kemuni na noqu itokani lomani, me da cakava noda vinaka duadua me da wili vata kei ira na yalo vakatabui ka mamarau era sa vakabula na nodra bula vakawati.
Vakabula Noda Matavuvale
Nikua au vinakata talega meu vakacaucautaki ira era vakabula nodra veimaliwai vakamatavuvale. Na veimatavuvale kece e gadreva me vakabulai.
Ena kena vakasakiti ni dau kilai tu na Lotu oqo me baleta na qaqaco ni kena veimatavuvale, eda na rairai nanuma ena vuqa na gauna ni oqo sa baleta na veimatavuvale kece ni Yalododonu Edaidai, vakavo ga na noda. Ia na ka dina oya ni sa sega ni dua na matavuvale vinaka sara.
Na veimatavuvale yadua e dau tu na gauna e drakidrakita kina.
Me vaka ena gauna erau kerei iko kina na nomu itubutubu mo “tabaki” rau, se ena nona cikevaka nomu nei levu ni o se dawai voli ga baleta ni o sa rui digidigi vakalevu, se ena nona nanuma na tavalequ dau vakadonui koya ni nona rai vakapolitiki sa rai vakosipeli, se ni tuvalaka o tamamu e dua na itaba vakamatavuvale ka vakaisulu tu na lewe ni matavuvale kece ena nodra isulu na vakaraitaki ena nona iyaloyalo taleitaki.
Ka vakasaurarataki mo daramaka na isulu o sega sara ga ni kilai kina.
E vaqori tu na matavuvale.
Ena tautauvata beka na veika ena noda dra, ia eda sega ni tautauvata. E duidui na yaloda. E duidui na noda dau vakauqeti ena veika eda sotava. Ka duidui na vanua eda dui yaco kina.
Mai na noda dau vinakata me da vakasaurarataki ira na kena vo ki na dua na ivakarau eda vinakata, sa rawa ni da digitaka me marautaki na duidui eso oqori ka vakavinavinaka ni vakuri ka vakaiyautaki ena veika vovou eso na noda bula.
Ena so na gauna, era dau digitaka se cakava eso ena noda matavuvale na ka vakamosiyalo, se dukadukali ena dela ni yalowai. Na cava me da cakava ena veigauna vaqori?
E sega ni dua ga na iwali me sotava na veika kece oqo. O ira era vakabula nodra matavuvale era rawaka baleta ni ra dau veitalanoa kei na watidra, vakasaqara na loma ni Turaga, ka vakarogoca na veivakauqeti ni Yalo Tabu. Era kila ni ka e donu ki na dua na matavuvale ena sega beka ni donu ki na dua tale.
Ia, e dua na ka e sa donu ena veigauna kecega.
Ena iVola i Momani eda vulica kina e dua na matatamata ka kunea na ka vuni ki na bula marau. Ena veitabatamata, “sa sega na veileti ena vanua. … Era sa tamata mamarau cake mai vei ira na tamata kecega sa bulia na Kalou.” Era cakava li vakacava? “Ni sa tiko e lomadra na tamata na loloma ni Kalou.”4
Se cava ga na leqa e sotava tiko nomu matavuvale, se cava ga mo cakava me wali kina, na itekivu kei na itinitini ni iwali na loloma cecere, na loloma savasava i Karisito. Kevaka e sega na loloma oqo, ena sotavi dredre na veimatavuvale ka ra daumaka tu. Ni tiko, ena rawaka na veimatavuvale era bolei tu vakalevu.
“Sa sega ni mudu na loloma.”5
E sa dina ena vakabulai ni bula vakawati! E sa dina ena vakabulai ni matavuvale!
Vakatikitikitaka na Qaciqacia
Na meca levu ni loloma cecere na qaciqacia. Na qaciqacia e dua vei ira na vuna levu duadua era sotavi dredre kina na bula vakawati kei na matavuvale. Na qaciqacia e dau cudrucudru totolo, yaloca, ka dauvuvu. Na qaciqacia e dau vakalevulevui koya ka tabonaka na nodra ivalavala dodonu na tani. Sa dau kocokoco na qaciqacia ka rawarawa ni cudru. Na qaciqacia e dau raica na inaki ca ena vanua e sega kina ka vunia nona malumalumu ena matavulo. Na qaciqacia e dau vakadonui koya, sega nona inuinui, cudrucudru, ka sega ni dauvosota. Sa dina sara, kevaka sa loloma savasava i Karisito na loloma cecere, na qaciqacia sa nona itovo ni bula tudei o Setani.
Na qaciqacia e rairai dua na bula druka kilai levu vakatamata. Ia e sega ni dua na tiki ni noda ivotavota vakayalo, ka sega nona tikina vei ira era taura tu na matabete ni Kalou.
E lekaleka na bula, kemuni na taciqu. Na veivutuni e rawa ni taura tu e dua na gauna balavu—eso ena yacova tawamudu sara yani na kena revurevu.
Na nomu ivakarau vua na watimu se luvemu se nomu itubutubu se o ira na tacimu e rawa ni vakatotomuri tu ena veitabatamata. Na iyau cava beka o na via biuta tu mai vei ira na nomu kawa? Na itovo voravora, na sosomitaka na ca, na cudrucudru, rerere, se bula galili? Se na loloma, yalomalumalumu, veivosoti, yalololoma, tubu vakayalo, kei na duavata?
Sa gadrevi meda nanuma taucoko ni na, “lewai ka sega ni lomani ko koya sa sega ni ia na loloma.”6
Ena vuku ni kemu isema vakamatavuvale, ena vuku ni yalomu, yalovinaka dau ia na loloma, na “dauloloma sa rawa na veilewai.”7
Vakatikitikitaka na qaciqacia.
Na nomu kere veivosoti ena yalodina vei ira na luvemu, watimu, nomu matavuvale, se o ira nomu itokani e sega ni ivakatakilakila ni malumalumu ia ni qaqa. E bibi cake li na bula dodonu mai na taraicake ni dua na ivalavala ni veisusu, veivakabulai kei na loloma?
Tara ikawakawa; kakua ni basuraka sobu.
Kevaka sara mada ga o sega ni cala—rairai vakauasivi ena gauna o sega ni cala kina—laiva na loloma me rawa na qaciqacia.
Kevaka o na vakayacora oqo, na kalouca cava ga o sotava tiko ena tasiri, ia ena loloma ni Kalou e lomamu, ena seavu na veiqati. Na veivakavuvuli oqo ni vakabula isema vakaveiwekani sa baleti keda kece, veitalia eda sa vakawati, veisere, yada, se tiko duadua. Eda rawa kece ni ivakabula ni matavuvale qaqa.
Na Loloma Cecere Duadua
Kemuni na taciqu, ena noda sasaga me da vakabula noda bula vakawati kei na matavuvale, me vaka ena veika kecega, me da sa muria na nona ivakaraitaki o Koya sa vakabulai keda. Sa rawata na iVakabula “me da sa nona ga.”8 Sa noda Vakavuvuli o Jisu Karisito. Na Nona cakacaka sa noda cakacaka. E sa cakacaka ni veivakabulai, ka sa tekivutaki ena noda itikotiko.
Na loloma ena ituvatuva ni veivakabulai e sega ni nanumi koya ga ka sa segata na nodra tiko vinaka na tani. Oqori na loloma e tiko vua na Tamada Vakalomalagi me baleti keda.
Ni da vakatotomuria na loloma ni iVakabula, ena vakalougatataka dina o Koya ka vakavuavuai vinakataka na noda sasaga dodonu me da vakabula na noda bula vakawati ka vaqaqacotaka noda matavuvale.
Me vakalougatataki kemuni na Turaga ena nomuni sasaga tawaguce ka dodonu mo ni wili vata kei ira na veivakabulai. Oqo na noqu masu ena yaca i Jisu Karisito, emeni.