Sa Kerei Keda o Koya Meda Ligana

Mai vei Cheryl A. Esplin

Matai ni Daunivakasala ena Mataveiliutaki Raraba ni Lalai

Na veiqaravi dina va-Karisito e sega ni dau nanumi koya ga ka vakanamata vei ira tale eso.

“Mo dou veilomani, me vaka kau sa lomani kemudou.”¹ Na veivosa oqo, ka lagata na matasere totoka oqo, a vosataka o Jisu ni bera na Nona veisorovaki levu—na solibula ka vakamacalataka o Elder Jeffrey R. Holland ni “ivakaraitaki bibi duadua ni loloma vakalou ka se qai bau vakaraitaki ena itukutuku kei vuravura.”²

E sega ni vakatavulici keda ga o Jisu meda veilomani, ia e bulataka o Koya na ka a vakatavulica. Ena Nona gauna ni veiqaravi vakalotu, “a lako voli ka daucaka vinaka” o Jisu ³ ka “vakamasuta na tamata taucoko mera muria na Nona ivakaraitaki.”⁴ A vakatavulica, “Ia ko koya yadua sa via maroroya na nona bula ena vakayalia: ia ko koya ena vakayalia na nona bula ena vukuqu, ena maroroya.”⁵

A kaya o Peresitedi Thomas S. Monson, e dua sa kila vakamatata ka bulataka na ivakavuvuli ni loloma: “Au vakabauta ni kaya eke vei keda na iVakabula kevaka meda na sega ni vakayalia noda bula ena vukudra na tani, ena sega soti ni vakaibalebale na noda bula tiko. O ira era bula voli ga me baleti ira vakatabakidua era na raqosa ka … vakayalia na nodra bula, kei ira era vakayalia na nodra bula ena nodra veiqaravi vei ira na tani era na tubu bulabula ka seraka—ia era na vakabulai.”⁶

Na veiqaravi dina va-Karisito e sega ni dau nanumi koya ga ka vakanamata vei ira tale eso. Dua na marama ka qarava voli na watina vakaleqai tu vakayago a vakamacalataka, “Kakua ni raica na bibi ni nomu icolacola; vakasamataka ga ni oqori e dua na madigi mo vulica kina na ibalebale dina ni loloma.”⁷

Ni vosa voli ena dua na sokalou ni BYU, a taroga o Sisita Sondra D. Heaston: “Vakacava ke a rawa ni da rai curuma vakaidina na loma ni tamata yadua? Eda na veikilai vakamatata cake beka? Ni da vakila na ka era vakila e so, raica na ka era raica e so, ka rogoca na ka era rogoca e so, eda na solia beka, ka taura na gauna me da qaravi ira eso tale, ka da na qaravi ira li ena sala rakorako? Eda na qaravi ira li ena yalorawarawa levu cake, yalovinaka levu cake, kei na yalovosota levu cake?”

E wasea o Sisita Heaston e dua na ka a sotava ena nona veiqaravi ena dua na keba ni Goneyalewa. Kaya o koya:

“E dua ka … vosa ena neimami sokalou … a vakatavulici keimami baleta na ‘yaco me.’ Dua na nona malanivosa … e vakoqo, ‘Mo dua ka dau sudra yani mo kilai ira ka qaravi ira na tani—kolotaka laivi na iloilo ka rai curuma na katuba leka.’

iVakatakilakila

Ena dredre nodrau veitalanoa e dua na goneyalewa kei na dua na iliuliu ni rau rai tiko ena dua na iloilo

“Ni matanataka, a kaciva o koya e dua na goneyalewa ka tukuna vua me duri vakanamata tu vua. A qai dreta mai [o koya] e dua na iloilo ka biuta ena kedrau maliwa kei na goneyalewa me rawa vua, [o koya e vosa tiko], ni rai tiko ena iloilo ena nona tovolea me vosa vei goneyalewa. Sega ni veivakurabuitaki, na nodrau a sega ni rawa ni vakayacora e dua na veitalanoa momona se yaga sara. Oqo e dua na lesoni matataki kaukauwa ka vakaraitaka na dredre ni noda veivosaki vata se qaravi ira na tani kevaka eda sa rui lomaleqataki keda ka raici keda ga kei na noda gagadre. A qai biuta tani [o koya] na iloilo, ka dreta mai e dua na waqa ni katubaleka, ka biuta ena kedrau maliwa kei na goneyalewa. … Keimami a raica rawa ni sa yaco me vakanamata [nona] rai vua na goneyalewa, e gadrevi na veiqaravi yalodina na noda vakanamata ki na nodra gagadre na tani. Vakavuqa eda sa rui lomaleqataki keda kei na noda bula ogaoga—ni da rai ena iloilo ni tovolei tiko meda raica na madigi e so meda qarava—ka da sega ni raica curuma vakamatata na katubaleka ni veiqaravi.”⁸

iVakatakilakila

Sa rawarawa nodrau veivosaki e dua na goneyalewa kei na dua na iliuliu ni rau veiraici ena dua na katubaleka

Sa dau vakananumi keda wasoma o Peresitedi Monson ni da sa “vakavolivoliti tu oqo mai vei ira era gadreva tu na noda veikauwaitaki, noda veivakayaloqaqataki, noda veitokoni, noda veivakalomavinakataki, noda yalovinaka—se ra lewe ni noda matavuvale, itokani, veikilai, se vulagi.” Kaya o koya, “Eda sa liga ni Turaga e vuravura edaidai, kei na itavi ni veiqaravi ka vueti ira cake na Luvena. O Koya sa vakararavi tu mai vei keda.”⁹

iVakatakilakila

Era sureti na gonelalai me ra veiqaravi ka liga ni Turaga

Ena Janueri ni yabaki sa oti, erau a sureti ira na gone taucoko e vuravura na mekasini na Friend kei na Liahona mera muria na ivakasala nei Peresitedi Monson—me ra liga ni Turaga. Era a sureti na gone mera vakayacora na cakacaka e so ni veiqaravi—lelevu ka lailai. Era a qai vakauqeti mera vola na ligadra ena dua na tikinipepa, kotiva tani, vola kina na veiqaravi era cakava, ka vakauta ki na mekasini. E rawa ni vuqa vei kemuni na vakarorogo tiko nikua eso vei ira na udolu vakacaca na gone ka vakayaco veiqaravi ni loloma ka vakauta mai. ¹⁰

iVakatakilakila

Era vola na gonelalai na veicakacaka ni veiqaravi ena liga koti ena pepa

iVakatakilakila

E udolu na gonelalai era vakauta mai na itukutuku ni nodra veiqaravi vei rau na mekesini

Ni ra vulica na gone na ivakarau ni loloma kei na veiqaravi ni ra se gone, era sa tuva e dua na iwalewale ni veiqaravi me baleta na vo ni nodra bula. Wasoma na nodra vakatavulici keda na gone ni vakaraitaki ni loloma kei na veiqaravi e sega ni dodonu me ka levu ka vakasakiti me vakaibalebale kina ka vakavu veisau.

A wasea na ivakaraitaki oqo e dua na qasenivuli ni Lalai. “Nikua,” kaya o koya, “era a cakava na neitou kalasi ni yabaki lima kei na ono e so na itaube ni loloma. Era droinitaka na gone yadua na yaloyalo e so ena veitiki ni pepa: dua e baleti ira, dua e baleti Jisu, ka so me baleta na lewe ni nodra matavuvale kei na nodra daulomani. Keimami vakabira vakacowiri na veitiki ni pepa ka curumaki ira vakayadua me rawa kina e dua na sinucodo ka keimami vukica ki na itaube ni loloma. Ni ra droini voli, era a talanoataka na nodra matavuvale na gone.

“Kaya o Heather, ‘Au sega ni vakabauta ni lomani au o tuakaqu. Keirau dau veivala tu ga. … Au sa sevaki au talega. Sa noqu na bula ca.’ Ka biuta na uluna o koya ki na ligana ruarua.

“Au vakasamataka na ituvaki ni bula ni nona matavuvale ka vakila ni sa dredre dina na bula vua. Ia ni sa tukuna oti oqo o Heather, a sauma o Anna, ena yasa kadua ni teveli, ‘Heather, au sa biuti iko ena noqu itaube ena kequ maliwa kei Jisu baleta ni lomani iko o Koya kau lomani iko o au.’

“Ni tukuna oya o Anna, a qasi o Heather ena ruku ni teveli me yaco vei Anna ka mokoti koya.

“Ni cava na kalasi, ni sa mai kauti koya o buna, a kaya o Heather, ‘Kila na cava, Bubu? O Jisu e lomani au.’”

Ni da sudra yani ena loloma kei na veiqaravi ena veisala lalai saraga, sa veisautaki ka vakamalumalumutaki na yalo ni ra vakila na tani na loloma ni Turaga.

Ia, ena so na gauna, baleta na tawawili rawa ni tamata era tu wavoki voli ka gadreva tu na veivuke kei na veivakacegui mai na icolacola e so, sa rawa ni dredre toka me sotavi na veigagadre bibi e vuqa.

Kemuni na marama, eso vei kemuni na vakarorogo tiko e nanuma o ni sa cakava tiko na veika taucoko o ni rawata ena nomuni qarava voli na gagadre ni lewe ni matavuvale. Nanuma, ena itavi matau ka vakasevaki e so, ko sa “qarava tiko na Kalou.”¹¹

E so vei kemuni ena rairai vakanananu lala voli ka na rawa ni vakatawani ni ko rai yani ki na vanua o vakaitikotiko kina me baleta na madigi e so mo veivuke kina mo vakamamadataka na nona icolacola e dua tale.

O keda kece e rawa ni da vakayacora e so na veiqaravi ena veisiga. Eda bula tiko ena dua na vuravura voravora. Eda veiqaravi ni da sega ni veidusi, ni da sega ni vosamuri, ni da sega ni vakalelewa, ni da matadredredre, ni da vakavinavinaka, ka ni da yalovosota ka yalovinaka.

E so tale na mataqali veiqaravi e taura na gauna, na tuvatuvanaki matau, kei na icegu bula. Ia era sa yaga sara ki na noda sasaga. De vinaka meda tekivu ni vakatarogi keda ena veitaro oqo:

O cei au bau kila tu meu vukea nikua?
Na gauna kei na ivurevure cava soti e tiko vei au?
Ena sala cava soti au rawa ni vakayagataka kina na noqu taledi kei na maqosa meu vakalougatataki ira na tani?
Na cava meda na cakava vakamatavuvale?

A vakatavulica o Peresitedi Dieter F. Uchtdorf:

“Mo vakayacora … na veika era a cakava na tisaipeli i Karisito ena itabagauna yadudua: oya na veirogorogoci, vakayagataka na ivurevure kece sara sa tu, vakasaqara na veivakauqeti ni Yalo Tabu, kerea na veivakadeitaki ni Turaga, ka cokia na liga ni nomu sote ka laki cakacaka yani.

“Au sa solia vei kemuni e dua na yalayala,” a kaya o koya, “Kevaka mo ni muria na ivakarau oqo, ko ni na ciqoma na veidusimaki digitaki me baleti cei, na cava, gauna cava, kei na vanua cava mo veivuke ena sala ni Turaga.”¹²

Na veigauna au vakananuma kina se na vakaevei tu na gauna ena lako tale mai kina na iVakabula, au vakasamataka na Nona veisiko kivei ira na Nifai ni taroga o Koya:

“Sa tiko li e so na nomudou tauvimate? Dou kauti ira mai. Io dou kauti ira mai na lokiloki, na mataboko, na gera, na mudu, na vukavuka, ko ira sa malai, ko ira na didivara, kei ira kece ga sa tauvimate tu? Dou kauti ira mai kau na vakabulai ira, niu sa lomani kemudou; ia sa vuabale sara na noqu loloma. …

“… A sa vakabulai ira kecega [na iVakabula].”¹³

Ena gauna oqo, sa kerei keda o Koya meda ligana.

Au sa qai kila tu ni sai koya na lomana na Kalou kei na wekamu e vakaibalebale kina na bula. Meda sa muria na ivakaraitaki ni noda iVakabula kei na Nona veivunauci ni sudra yani kivei ira na tani ena loloma.

Au vakadinadinataka na dina ni yalayala nei Peresitedi Henry B. Eyring “ni kevaka [eda na] vakayagataka na [noda] isolisoli meda qarava kina e dua tale, [eda na] vakila na loloma ni Turaga me baleta na tamata oya. [Eda na] vakila talega na nona loloma kivei [keda].”¹⁴ Ena yaca i Jisu Karisito, emeni.

Me kilai: Ena 2 ni Epereli , 2016, sa mai vagalalataki kina o Sisita Esplin mai na itutu vakaimatai ni daunivakasala ena Mataveiliutaki Raraba ni Lalai.