« រឿងរ៉ាវអំពីពិធីបុណ្យជ្រមុជទឹក » ប្រិយមិត្ត ខែ កក្កដា ឆ្នាំ ២០២៣ ទំព័រ ៣០-៣១ ។
រឿងរ៉ាវអំពីពិធីបុណ្យជ្រមុជទឹក
ម៉ាក់បាននិយាយថា ៖ « អ្នកត្រួសត្រាយផ្លូវគឺជាអ្នកដែលធ្វើអ្វីមួយមុនគេ » ។
ដំណើររឿងនេះបានកើតឡើងនៅ ស.រ.អា. ។
ម៉ារីងក់ក្បាល ហើយសរសើររ៉ូបពណ៌សរបស់នាងនៅក្នុងកញ្ចក់ ។ វាជារ៉ូបដែលម្ដាយនាងស្លៀកនៅពិធីបុណ្យជ្រមុជទឹករបស់គាត់ ។ លោកយាយម៉ាលូស បានសារ៉េវាឲ្យត្រូវនឹងម៉ារី ។ ឥឡូវនេះ ម៉ារីអាចពាក់វានៅពិធីបុណ្យជ្រមុជទឹករបស់នាងផ្ទាល់ !
« កូនស្អាតណាស់ ! » ម៉ាក់បានចាប់ដៃម៉ារី ហើយបានបង្វិលនាងម្ដងទៀត ។
ម៉ារី សើចកក្អឹក ។ « តើកូនអាចពាក់វាពេញមួយថ្ងៃបានទេ ? »
ម៉ាក់បាននិយាយថា « ទុកវាពាក់សម្រាប់ពិធីបុណ្យជ្រមុជទឹករបស់កូនវិញ ដើម្បីឲ្យវានៅស្អាត ហើយអត់ប្រឡាក់ណាកូន ? » ។
« ចាសម៉ាក់ » ។ ម៉ារីនឹងទទួលបុណ្យជ្រមុជទឹកពេលនាងមានអាយុប្រាំបីឆ្នាំ ហើយនាងបានរៀបចំខ្លួនអស់មួយរយៈមកហើយ ។ នាងបានទៅថ្នាក់កុមារ អានព្រះគម្ពីរ ហើយក៏បានទៅពិធីបុណ្យជ្រមុជទឹករបស់មិត្តភក្តិនាងផងដែរ ។ ប៉ុន្តែថ្ងៃខួបកំណើតរបស់នាងហាក់ដូចជានៅយូរណាស់ !
ម៉ារីឱបម៉ាក់នៅលើសាឡុង ។ « ម៉ាក់ តើម៉ាក់មានអាយុប៉ុន្មាន ពេលម៉ាក់បានទទួលបុណ្យជ្រមុជទឹក ? »
« ម៉ាក់មានអាយុ ១៦ ឆ្នាំ ។ »
« អស្ចារ្យណាស់ ! » ហេតុអ្វីបានជាម៉ាក់រង់ចាំយ៉ាងយូរដូច្នេះ ? »
ម៉ាក់ឱបម៉ារីយ៉ាងណែន ។ « ដោយសារម៉ាក់មិនបានដឹងអំពីសាសនាចក្ររបស់ព្រះយេស៊ូវគ្រីស្ទដែលបានស្ដារឡើងវិញរហូតដល់ពេលនោះ ។ ប៉ុន្តែម៉ាក់បានចាប់ផ្តើមទៅសកម្មភាពសាសនាចក្រជាមួយមិត្តភក្តិមួយចំនួន ។ ហើយពេលម៉ាក់បានរៀនកាន់តែច្រើន ម៉ាក់កាន់តែចង់ទទួលពិធីបុណ្យជ្រមុជទឹកកាន់តែខ្លាំងឡើង ! »
« ហេតុអ្វី ? » ម៉ារីបានសួរ ។
« ដោយសារម៉ាក់ចង់មានគ្រួសារជានិរន្តរ៍មួយ » ។ ម៉ាក់បានចង្អុលទៅរូបភាពព្រះវិហារបរិសុទ្ធដែលព្យួរនៅចំពីលើពួកគេ ។ « ម៉ាក់បានរៀនថាថ្ងៃណាមួយម៉ាក់អាចផ្សារភ្ជាប់ជាមួយគ្រួសារម៉ាក់នៅក្នុងព្រះវិហារបរិសុទ្ធជារៀងរហូត ។ ការមានគ្រួសារជានិរន្តរ៍មួយ គឺជាក្តីសុបិនរបស់ម៉ាក់ ។ ហើយពិធីបុណ្យជ្រមុជទឹកគឺជាជំហានដំបូង ! ឥឡូវសុបិនរបស់ម៉ាក់ក្លាយជាការពិតហើយ » ។
ម៉ារីបានញញឹម ។ « កូនមានប៉ា ម៉ាឡូរី និងកូនតូច មេវ៉ា ! ប្រាកដណាស់ រួមទាំងម៉ាក់ដែរ » ។
« ចាស ពិតមែនហើយ ។ រួមទាំងលោកយាយអេនជេឡាផងដែរ » ។
« តើលោកយាយបានទទួលពីធីបុណ្យជ្រមុជទឹកជាមួយម៉ាក់ដែរមែនទេ ? »
« គាត់បានរង់ចាំពីរបីឆ្នាំ ។ ប៉ុន្តែនៅពេលណាដែលយើងបានធ្វើដំណើរទៅជិតព្រះវិហារបរិសុទ្ធ យើងចូលចិត្តឈប់ឡាន ហើយមើលទៅព្រះវិហារបរិសុទ្ធណាស់ » ។
ម៉ារីស្រមៃគិតពីម៉ាក់ និងលោកយាយដែលកំពុងមើលទៅព្រះវិហារបរិសុទ្ធជាមួយគ្នា ។ « ចុះប៉ាវិញ ? តើប៉ាមានអាយុប៉ុន្មាន ពេលគាត់ទទួលបុណ្យជ្រមុជទឹក ? »
« ប៉ាអាយុ ១១ ឆ្នាំ » ។
« ហើយពេលនោះប៉ារស់នៅប្រេស៊ីលមែនទេ ? »
ម៉ាក់បាននិយាយថា « មែនហើយ » ។ « មានមនុស្សទូទាំងពិភពលោកដែលកំពុងរៀនសូត្រអំពីព្រះយេស៊ូវ និងពិធីបុណ្យជ្រមុជទឹក ។ ពួកគេភាគច្រើនជាពួកអ្នកត្រួសត្រាយផ្លូវ » ។
« ពួកអ្នកត្រួសត្រាយផ្លូវ ? »
ម៉ាក់បានពន្យល់ថា ៖ « អ្នកត្រួសត្រាយផ្លូវគឺជាអ្នកដែលធ្វើអ្វីមួយមុនគេ » ។
ម៉ារី បានគិតអំពីរឿងនោះ ។ « អ៊ីចឹងដូចដែលម៉ាក់ជាមនុស្សដំបូងគេក្នុងគ្រួសាររបស់ម៉ាក់ដែលបានទទួលពិធីបុណ្យជ្រមុជទឹកដែរមែនទេ ? »
ម៉ាក់បានងក់ក្បាល ហើយញញឹម ។
ភ្លាមនោះ ប៉ាក៏ដើរចូលទៅក្នុងបន្ទប់ ហើយបានប្រជ្រៀតអង្គុយលើសាឡុង ។
« ប៉ា តើប៉ាជាអ្នកត្រួសត្រាយផ្លូវសម្រាប់គ្រួសារប៉ាមែនទេ ? »
« ប្រហែលដែរ ។ បន្ទាប់ពីប៉ាទទួលពិធីបុណ្យជ្រមុជទឹកហើយ ប៉ាបានដឹងថា លោកយាយ រ៉ូស៊ីមឺរ ក៏ជាសមាជិកម្នាក់ក្នុងព្រះវិហារយើងដែរ ! ប៉ុន្តែគាត់មិនបានទៅជាច្រើនឆ្នាំហើយ » ។
« ពិតមែនឬ ? តើមានអ្វីកើតឡើងមែនទេ ? »
« ប៉ាបានចាប់ផ្ដើមទៅព្រះវិហារ ។ បន្ទាប់មកបងប្រុសប៉ាបានចាប់ផ្ដើមទៅព្រះវិហារ ហើយលោកយាយរ៉ូស៊ីមឺរក៏ទៅដែរ ។ សូម្បីតែលោកយាយ តួត ម៉ាលូស ក៏បានចូលរួមដែរ ! »
ម៉ារីបានស្រមៃថាប៉ាទៅព្រះវិហារដោយខ្លួនឯង បន្ទាប់មកនាំគ្រួសារគាត់បន្ថែមទៀតទៅជាមួយគាត់ ។
ម៉ារី បាននិយាយថា « អស្ចារ្យណាស់ » ។ « កូនចូលចិត្តស្តាប់រឿងរ៉ាវរបស់ប៉ាម៉ាក់ណាស់ ។ វាធ្វើឲ្យកូនរំភើបចិត្តកាន់តែខ្លាំងដើម្បីទទួលពិធីបុណ្យជ្រមុជទឹក ។
ប៉ាបាននិយាយថា « អរគុណដែលបានសួរប៉ាម៉ាក់នូវសំណួរទាំងអស់នេះ ម៉ារី » ។ « ឥឡូវប៉ាម៉ាក់អាចសួរកូនមួយបានទេ ? »
ម៉ារី បានងក់ក្បាល ។ តើពួកគាត់នឹងសួរអ្វី ?
« ហេតុអ្វីកូនចង់ទទួលបុណ្យជ្រមុជទឹក ? »
ម៉ារីបានគិតអំពីអ្វីដែលនាងបានរៀនពីព្រះគម្ពីរ និងអារម្មណ៍របស់នាងនៅព្រះវិហារ ។ « ដោយសារកូនចង់ដើរតាមព្រះយេស៊ូវ ហើយនៅជាមួយគ្រួសាររបស់កូនជារៀងរហូត » ។
ម៉ាក់ និងប៉ាទាំងពីរបានញញឹម ហើយម៉ារីបានស្រវាឱបឪពុកម្តាយនាង ។ « កូនស្ទើរតែមិនអាចរង់ចាំបាន ! »
រចនារូបភាពដោយ ថេមមី លីអន