Facsimile gikan sa Basahon ni Abraham

Pig. 1. Ang Kolob, nagtimaan sa unang paglalang, labing duol sa celestial, o ang pinuy-anan sa Dios. Una sa pangagammhanan, ang kataposan kalabot sa pagsukod sa panahon. Ang sukod sumala sa celestial nga panahon, ang celestial nga panahon nga nagpasabot nga ang usa ka adlaw sama og sukod sa gitas-on sa bukton. Ang usa ka adlaw sa Kolob katumbas sa usa ka libo ka tuig sumala sa sukod dinhi niini nga kalibotan, nga gitawag sa mga Ehiptohanon og Jah-oh-eh.

Pig. 2. Nagbarog sunod sa Kolob, nga gitawag sa mga Ehiptohanon og Oliblish, nga mao ang sunod nga labing taas nga pamunoan nga nilalang duol sa celestial o ang dapit diin nagpuyo ang Dios; naghupot usab sa yawe sa gahom, kalabot sa ubang mga planeta; sama sa gipadayag gikan sa Dios ngadto ni Abraham, samtang mihalad siya og sakripisyo sa altar, nga gihimo niya alang sa Ginoo.

Pig. 3. Gibuhat aron sa paglarawan sa Dios, nga naglingkod sa iyang trono, gisul-oban sa gahom ug pagmando; uban sa korona sa walay kataposang kahayag diha sa iyang ulo; naglarawan usab sa labing mahinungdanong Yawe sa mga pulong sa Balaan nga Pagkapari, ingon nga gipadayag ngadto ni Adan sa Tanaman sa Eden, mao usab ngadto ni Seth, Noe, Melchizedek, Abraham, ug ngadto sa tanang gipadayagan sa Pagkapari.

Pig. 4. Mga tubag sa Hebreohanon nga pulong nga Raukeeyang, nangahulogan og kawanangan, o ang hawan sa kalangitan; usab usa ka simbolo sa numero, sa Ehiptohanon nangahulogan nga usa ka libo; nagtubag sa sukod sa panahon sa Oliblish, nga parehas sa Kolob ang iyang pagtuyok ug ang iyang sukod sa panahon.

Pig. 5. Gitawag sa Ehiptohanon nga Enish-go-on-dosh; usa usab kini sa tigdumala nga mga planeta, ug gitawag sa mga Ehiptohanon nga mao ang Adlaw, ug mohulam sa iyang kahayag gikan sa Kolob pinaagi sa Kae-e-vanrash, nga mao ang kinadak-ang Yawe, o, sa laing pagkasulti, ang tigdumala nga gahom, nga nagdumala sa laing napulog lima ka planeta o mga bitoon nga anaa kanunay sa ilang nahimutangan, ingon usab sa Floeese o ang Bulan, ang Yuta ug ang Adlaw sa ilang tinuig nga mga pagtuyok. Kini nga planeta nagdawat sa iyang gahom pinaagi sa Kli-flos-is-es, o Hah-ko-kau-beam, ang mga bituon nga gilarawan sa mga numero 22 ug 23, nagdawat sa kahayag gikan sa mga pagtuyok sa Kolob.

Pig. 6. Naglarawan niini nga kalibotan sa upat ka suok niini.

Pig. 7. Naglarawan sa Dios nga naglingkod sa iyang trono, nagpadayag pinaagi sa kalangitan sa labing mahinungdanong Yawe sa mga pulong sa Pagkapari; ingon, usab, ang timailhan sa Espiritu Santo ngadto ni Abraham, pinaagi sa porma sa salampati.

Pig. 8. Naglangkob sa mga sinulat nga dili mapadayag ngadto sa kalibotan; apan maangkon diha sa Balaan nga Templo sa Dios.

Pig. 9. Dili pa angay nga ipadayag niining panahona.

Pig. 10. Usab.

Pig. 11. Usab. Kon ang kalibotan makahibalo niini nga mga numero, pasagdi nga mahitabo kini. Amen.