1 Ha péicha ñambopaháta yvy ha yvagakuéra, ha opa umi hekoveaty.

2 Ha umi Tupã he’i ojupe: Sétimo árape ñambopaháta ñane rembiapo, pe ja’e haguéicha; ha sétimo árape japytu’úta opa ñane rembiapo ja’eva’ekuégui.

3 Ha sétimo árape umi Tupã he’íkuri, upe sétimo árape opytu’útagui hikuái opa hembiapokuéragui, (umi Tupã) pe he’iva’ekue ojupe ojapotaha; ha osantifika upéva. Ha péicha idesisiõnguéra ára he’írõguare hikuái ojupe ojapotaha yvagakuéra ha yvy.

4 Ha umi Tupã oguejy ha ojapókuri ko’ã yvága ha yvy apo’ypy, ojejaporõguare umíva upe ára umi Tupã ojaporõguare yvy ha yvagakuéra,

5 He’ihaichaite hikuái, opa ñumegua ka’avo oĩ mboyve yvy ári, ha opa ñumegua ñana okakuaa mboyve; umi Tupã nomboúiguikuri ama yvy ári he’irõguare ojapotaha ko’ãva, ha ndojapói gueteri yvypórape oñemitỹ hag̃ua yvy.

6 Ha katu yvýgui ojupi peteĩ ytimbo, ha omyakỹ opa pe yvy ape.

7 Ha umi Tupã ojapo yvypórape yvytimbógui, ha ojapyhy ijespíritu (kóva ha’e, yvypóra espíritu), ha omoĩ hyepýpe; ha oipeju itĩme tekove pytu, ha yvypóragui oiko ánga oikovéva.

8 Ha umi Tupã oñotỹ peteĩ yvotyty Edén kuarahyreiképe, ha upépe omoĩ hikuái yvypórape, pe ijespíritu omoĩva’ekue hikuái upe tete ojapova’ekue ryepýpe.

9 Ha umi Tupã ojapo taheñói yvýgui opa yvyramáta ombohorýva tesa ha iporãva hi’upyrã; ha avei pe tekove yvyramáta upe yvotyty mbytépe, ha yvyramáta kuaapy iporãva ha ivaíva rehegua.

10 Oĩva’ekue peteĩ ysyry Edén-gui osyrýva omyakỹ hag̃ua pe yvotyty, ha upégui isarambi oikóvo chugui irundy ysyry.

11 Ha umi Tupã ojapyhýkuri yvypórape ha omoĩ chupe Jardín de Edén-pe, oñemitỹ hag̃ua ipype ha oñangareko hag̃ua hese.

12 Ha umi Tupã omandákuri yvypórape, he’ívo: Opaite yvyramáta yvotytyguágui ikatu re’u,

13 Ha katu yvyramáta kuaapy iporãva ha ivaíva reheguágui ndere’umo’ãi; ára re’u vove chugui, añetehápe remanóta. Ko’ág̃a, che, Abraham, ahechákuri ha’eha Ñandejára áraicha, ha’éva Kólob áraicha; upe ára peve umi Tupã ne’ĩrã gueteri ome’ẽ Adán-pe hi’ára jeipapa.

14 Ha umi Tupã he’i: Jajapo peteĩ pytyvõha porã kuimba’épe, naiporãigui kuimba’e oĩ ha’eño; upévare, jajapóta chupe g̃uarã peteĩ pytyvõha porã.

15 Ha umi Tupã ojapo to’a Adán ári peteĩ topehýi mbarete, ha ha’e oke; ha ojapyhy hikuái peteĩ ikostílla ha omboty hendaguépe ho’o;

16 Ha pe kostíllagui umi Tupã oipeva’ekue kuimba’égui, ojapo ha’ekuéra peteĩ kuña, ha ogueru chupe kuimba’épe.

17 Ha Adán he’i: Kóva umi che kanguekue kangue, ha che ro’okue ro’o; ko’ág̃a oñehenóita chupe Kuña, ojepe’águi kuimba’égui;

18 Upévare, kuimba’e ohejava’erã itúva ha isy, ha ojoaju hembirekóre; ha ha’éta hikuái peteĩ to’o.

19 Ha mokõive ijopívo, upe kuimba’e ha hembireko, ha nahi’õtĩri hikuái.

20 Ha yvýgui umi Tupã ojapókuri opa tymba ñumegua ha opa guyra yvytupegua, ha ogueru hikuái Adán-pe ohecha hag̃ua mba’éichapa ombohérata umíva; ha Adán omboheraháicha opa tekove oikovéva, upéichata herakuéra.

21 Ha Adán ombohéra opa mymba’aty, guyrakuéra yvytupegua, ha opa mymba ñumegua; ha ojejuhúkuri peteĩ pytyvõha porã chupe g̃uarã.