1 Ha che, Abraham aguerekókuri upe Urim ha Tumim, Ñandejára che Tupã ome’ẽva’ekue chéve Ur, caldeo-kueraguápe;

2 Ha ahechákuri mbyjakuéra, ha tuichaiteha umíva, ha peteĩva hi’ag̃uiveha Tupã apykajeguáre; ha oĩkuri heta umi tuicháva hi’ag̃uíva chugui;

3 Ha Ñandejára he’i chéve: Ko’ãva ha’e umi oisãmbyhýva; ha upe tuichavéva réra ha’e Kólob, oĩ rupi che ypýpe, Che ha’égui Ñandejára nde Tupã: Kóvape amoĩkuri oisãmbyhy hag̃ua opa umi ha’éva upe nde reimeha orden-pegua.

4 Ha Ñandejára he’i chéve, upe Urim ha Tumim rupive, Kólob ha’eha Ñandejára reheguáicha, hi’ára ha hi’arajere ojereháicha; peteĩ ojerévo ha’eha peteĩ ára Ñandejárape g̃uarã, ha’e oipapaháicha, ha’éva mil áño, ára ojehechaukaháicha upe nde reimévape. Kóva ha’e Ñandejára ára jeipapa, Kólob oipapaháicha.

5 Ha Ñandejára he’i chéve: Pe planéta tesape michĩvéva, michĩve upe ára oisãmbyhýtavagui, jepe pyharegua tesape, ijyvateve térã tuichave upe nde reimehágui, jeipapápe, órden mbeguevépe omýigui; kóva oho órdenpe, oĩgui yvy nde reimeha ári; upévare, ndahetái hi’ára jeipapa, idía, imése ha hi’áño jeipapápe.

6 Ha Ñandejára he’i chéve: Ko’ág̃a, Abraham, ko’ã mokõi mba’e oiko, péina ápe, nde resa ohecha; oñeme’ẽ ndéve reikuaa umi ára jeipapa ha ára moĩmbyréva, héẽ, pe yvy nde reimeha ára moĩmbyréva, upéicha avei pe tesape tuichavéva ára moĩmbyréva, oñemoĩva’ekue oisãmbyhy hag̃ua ára, ha tesape michĩvéva ára moĩmbyréva, oñemoĩva’ekue oisãmbyhy hag̃ua pyhare.

7 Ko’ág̃a, pe tesape michĩvéva ára moĩmbyre ipukuve ijeipapápe, upe yvy nde reimeha ári jeipapágui.

8 Ha oĩháme ko’ã mokõi oikóva, oĩta ambue oikóva hi’arikuéra, upéva he’ise, oĩtaha ambue planéta hi’ára jeipapa ipukuetevétava;

9 Ha upéicha oĩta peteĩ pláneta ára jeipapa ambue ári, reñemoag̃ui meve Kólob rehe, ha’éva Ñandejára ára jeipapáicha; ko Kólob oñemoĩ Tupã apykajegua ypýpe, oisãmbyhy hag̃ua opa umi planéta ha’éva upe nde reimeha ordenpeguaite.

10 Ha oñeme’ẽ ndéve reikuaa hag̃ua opa mbyja ára ñemoĩmbyre, oñemoĩva’ekue ome’ẽ hag̃ua tesape, reñemoag̃ui meve Tupã apykajeguáre.

11 Ha upéicha, che Abraham, añe’ẽkuri Ñandejárandi, ojováre, peteĩ kuimba’e oñe’ẽháicha ambue ndive; ha oñe’ẽkuri chéve umi tembiapo ipo ojapova’ekuére;

12 Ha ha’e he’i chéve: Che ra’y, che ra’y (ha ipo ojeipysókuri), péina ápe, Che ahechaukáta ndéve opa ko’ãva. Ha ha’e omoĩ ipo che resakuéra ári, ha ahechákuri umi mba’e ipo ojapova’ekue, hetaitereíva; ha oñemboheta hikuái che resa renondépe, ha ndaikatúi ahecha ipaha.

13 Ha ha’e he’i chéve: Kóva ha’e Shinehah, ha’éva kuarahy. Ha ha’e he’i chéve: Kókob, ha’éva mbyja. Ha ha’e he’i chéve: Olea, ha’éva jasy. Ha ha’e he’i chéve: Kókaubeam, he’iséva mbyjakuéra, térã opa umi tesape guasu oĩva yvága arapýpe.

14 Ha pyharékuri Ñandejára he’írõguare chéve ko’ã ñe’ẽ: Che rombohetáta, ha ne ñemoñare nde rireguápe, ko’ãvaicha; ha reipapa kuaáramo umi yvyku’i, upéichata ne ñemoñarekuéra retakue.

15 Ha Ñandejára he’i chéve: Abraham, Che ahechauka ndéve ko’ã mba’e reike mboyve Egipto-pe, remombe’u hag̃ua opa ko’ã ñe’ẽ.

16 Oĩramo mokõi mba’e, ha peteĩva oĩ ambue ári, oĩta mba’e tuichavéva hi’arikuéra; upévare, Kólob ha’e tuichavéva opa Kókaubeam rehechava’ekuégui, hi’ag̃uivégui chehegui.

17 Ko’ág̃a, oĩramo mokõi mba’e, peteĩva ambue ári, ha pe jasy oĩramo yvy ári, upéramo ikatu oĩ hi’ári peteĩ planéta térã peteĩ mbyja; ha ndaipóri mba’eve Ñandejára nde Tupã he’íva ikorasõme ojapotaha ha ndojapói.

18 Upevére ha’e ojapókuri pe mbyja tuichavéva; upéicha avei, oĩramo mokõi espíritu, ha peteĩva iñintelihenteve ambuévagui, upevére ko’ã mokõi espíritu, peteĩva iñintelihentevérõ jepe ambuévagui, naiñepyrũmbýi; oĩkuri hikuái upe mboyve, ndopamo’ãi, oikóta hikuái upe rire, ha’égui hikuái gnolaum, térã ijapyra’ỹva.

19 Ha Ñandejára he’i chéve: Ko’ã mokõi mba’e oikove: Oĩ mokõi espíritu, ha peteĩ intelihénsia ambuégui; oĩta ambue intelihénsia chuguikuéra; Che ha’e Ñandejára nde Tupã, Che cheakãporãve opa chuguikuéra.

20 Ha Ñandejára nde Tupã omboúkuri hi’ánhel nemosãso hag̃ua sacerdote Elkénah pógui.

21 Che aiko opa imbytepekuéra; ko’ág̃a, upévare, Che aguejýkuri amombe’u hag̃ua ndéve umi tembiapo che po ojapova’ekue, che aranduve opa chuguikuéra, Che arreinágui yvate yvágape ha iguýpe yvy ári, opa arandu ha akãguapýpe, opa akãporã nde resa ohechava’ekue iñepyrũmby guive ári; Che aguejýkuri iñepyrũmbýpe opa umi intelihénsia nde rehechava’ekue mbytépe.

22 Ko’ág̃a, Ñandejára ohechaukákuri chéve, Abraham, umi intelihénsia oñemohendava’ekue upe múndo oiko mboyve; ha opa ko’ãva apytépe oĩkuri heta umi noble ha tuicháva;

23 Ha Tupã ohechákuri ko’ã ánga hekojojaha, ha ha’e oĩkuri imbytepekuéra, ha ha’e he’íkuri: Ko’ãvape ajapóta che sãmbyhyhára; ha’e oĩguikuri umi ha’éva espíritu apytépe, ha ha’e ohechákuri hekojojaha hikuái; ha he’i chéve: Abraham, nde ha’ékuri peteĩva ko’ãva apytépe; rejeporavókuri nereñói mboyve.

24 Ha oĩkuri ijapytepekuéra peteĩ Tupãme ojoguáva, ha he’i umi oĩvape hendive: Jaguejýta, oĩgui tenda upépe, ha jajapyhýta ko’ã material-gui, ha jajapóta peteĩ yvy ko’ãva ikatuhápe oiko;

25 Ha pévape jaipy’ara’ãta chupekuéra, jahecha hag̃ua ojapótapa hikuái opa mba’e Ñandejára Itupã omandáva chupekuéra;

26 Ha umi oñongatúvape heko peteĩha oñeme’ẽvéta; ha umi noñongatúiva heko peteĩha ndoguerekomo’ãi glória peteĩhagua rréinope umi oñogatúva ndive heko peteĩha; ha umi oñongatúvape heko mokõiha, oñemoĩvéta glória iñakã arikuéra akói ha tapiaite g̃uarã.

27 Ha Ñandejára he’i: Mávape amondóta? Ha ombohovái peteĩ Kuimba’e Ra’ýpe ojoguáva: Ápe aime, chemondo chéve. Ha ambue ombohovái ha he’i: Kóina aime che, chemondo chéve. Ha Ñandejára he’i: Che amondóta upe peteĩháme.

28 Ha pe mokõiha ipochýkuri, ha noñonongatúi heko peteĩha; ha, upe ára, heta ohókuri hapykuéri.