1 Ko’ág̃a, Tupã Ñandejára ombopohyive ñembyahýi Ur retãme, upévare omano Harán, che joyke’y; ha katu che ru Taré, oiko gueteri Ur, caldeo-kuéra retãme.

2 Ha ojehu che, Abraham, ajapyhy che rembirekorã Sarai-pe, ha Nacor, che joyke’y, ojapyhy hembirekorã Milca-pe, ha’éva Harán rajy.

3 Ko’ág̃a, Ñandejára he’íkuri chéve: Abraham, esẽ ne retãgui, ha umi ne hentekuéragui ha nde ru rógagui, peteĩ tetã Che ahechaukátavape ndéve.

4 Upévare, che asẽkuri Ur, caldeo-kuéra retãgui, aha hag̃ua Canaán retãme; ha agueraha Lot, che joyke’y ra’y, ha hembireko ha Sarai, che rembirekópe; ha che ru chesegi avei, tetã rohenóiva Harán peve.

5 Ha sa’ive ñembyahýi; ha che ru opyta Harán-pe ha oiko upépe, oĩgui heta ovecha’aty Harán-pe; ha che ru ojerejey ita’angarayhúpe, upévare ha’e opytánte Harán-pe.

6 Ha katu, che, Abraham ha Lot, che joyke’y ra’y, roñembo’e Ñandejárape, ha Ñandejára ojehechauka chéve ha he’i: Epu’ã ha ejapyhy Lot-pe nendive; Che ha’émagui roguenohẽtaha Harán-gui, ha ajapotaha ndehegui peteĩ minístro regueraha hag̃ua che réra peteĩ pytagua retãme, Che ame’ẽtava mba’erepy opave’ỹva ramo ne ñemoñare nde rireguápe, ohendu vove hikuái che ñe’ẽpu.

7 Che ha’e rupi Ñandejára nde Tupã; aiko yvágape; pe yvy ha’e che pyenda; aipyso che po yguasu ári, ha iñe’ẽrendu che ñe’ẽre; che ajapo yvytu ha tatágui che mba’yru; yvytykuérape Che ha’e—Pesẽ ko’águi—ha péina ápe, ojegueraha ko’ãva upe yvytujerére, peteĩ tesa pirĩme, sapy’aitépe.

8 Che réra ha’e Jehová, ha Che aikuaa ipaha iñepyrũmby guive; upévare, che po nemo’ãta.

9 Ha Che ajapóta ndehegui peteĩ tetã tuicháva, ha Che tuichaiterei rohovasáta, ha aikuaaukáta nde réra opa tetãnguéra apytépe, ha nde ha’éta peteĩ jehovasa ne ñemoñare nde rireguápe, ipopekuéra ogueraha hag̃ua hikuái ko ministério ha Sacerdocio opa tetãnguérape;

10 Ha ahovasáta chupekuéra nde réra rupive; opavave omog̃uahẽva ko Evanhélio oñehenóitagui nde rérare; ha ojeipapáta hikuái ne ñemoñare ramo, ha opu’ãta ha nderovasáta hikuái itúva ramo;

11 Ha Che ahovasáta umi nderovasávape, ha amoñe’ẽngáita umi nemoñe’ẽngáivape; ha nde rupi (péva he’ise, nde Sacerdocio-pe), ha ne ñemoñarépe (péva he’ise nde Sacerdocio), Che ame’ẽgui ndéve promésa nde rupi oho memetaha ko derécho, ha ne ñemoñare nde rireguápe, (péva he’ise ñemoñare tee, térã, ñemoñare teteguigua), ojehovasáta opa tetãmegua ogayguakuéra, jepeve Evanhélio jehovasa reheve, ha’éva salvasiõ jehovasakuéra, tekove ijapyra’ỹva jepeve.

12 Ko’ág̃a, Ñandejára oñe’ẽmba rire chéve, ha oipe’a rire hova che renondégui, che ha’ékuri che korasõme: Ne rembiguái nde rekákuri jesarekópe; ko’ág̃a rojuhúma;

13 Remboúkuri ne ánhel chemosãso hag̃ua Elkénah tupãnguéragui, ha ajapo porãta ahendúramo ne ñe’ẽpu, upévare, eheja ne rembiguái topu’ã ha toho py’aguapýpe.

14 Upéicha, che Abraham, asẽkuri Ñandejára he’i haguéicha chéve, ha Lot oho chendive; ha che, Abraham, arekókuri sesenta y dos áño asẽrõguare Harán-gui.

15 Ha ajapyhy Sarai-pe, ajapyhyva’ekue che rembirekorã aikóvo Ur, caldeo-kuéra retãme, ha Lot, che joyke’y ra’y, ha opa ore mba’erepy rombyatyva’ekue, ha umi ánga roganava’ekue Harán-pe, ha rojagarra Canaán retã rape, roikóvo oga’aópe roje’ói aja;

16 Upévare, ára apyra’ỹ ha’ékuri ore mo’ãha ha ore itaguasu ha ore salvasiõ, rohóvo Harán-gui, Jersón rapére, rog̃uahẽ hag̃ua Canaán retãme.

17 Ko’ág̃a che, Abraham, amopu’ãkuri peteĩ altar Jersón retãme ha ajapókuri peteĩ ñeme’ẽmby Ñandejárape, ha añembo’ékuri ojei hag̃ua ñembyahýi che ru rógagui, ani hag̃ua omano hikuái.

18 Ha Jersón-gui rohasa pe yvy rupi tenda Siquem meve; opytáva More yvypépe, ha rog̃uahẽmakuri Cananeo-kuéra retã rembe’ýpe, ha ame’ẽkuri temikuave’ẽ upépe, More yvypépe, ha ahenói añetékuri Ñandejárape, rog̃uahẽmagui ko tetã ita’angarayhúva yvýpe.

19 Ha Ñandejára ojehechauka chéve ombohováivo che ñembo’ekuéra, ha he’i chéve: Ne ñemoñarépe Che ame’ẽta ko yvy.

20 Ha che, Abraham, apu’ãkuri upe tenda amopu’ã haguégui peteĩ altar Ñandejárape, ha aha upégui peteĩ yvytýpe, Betel kuarahyresẽme, ha amoĩ upépe che róga’ao, oĩvo Betel kuarahyreiképe ha Hai kuarahyresẽme; ha upépe amopu’ã ambue altar Ñandejárape, ha ahenói jey Ñandejára réra.

21 Ha che, Abraham, aje’óikuri, aha memévo sur gotyo; ha oĩnte gueteri ñembyahýi upe tetãme; ha Che, Abraham, ha’e chejupe aguejytaha Egipto-pe, aiko hag̃ua upépe, ivaietégui pe ñembyahýi.

22 Ha ojehu che ag̃uímavo, aike potávo Egipto-pe, Ñandejára he’i chéve: Péina ápe, Sarai ne rembireko peteĩ kuña iporãitereíva;

23 Upévare, ojehúta Egipcio-kuéra ohechávo chupe, he’íta hikuái—Ha’e hembireko; ha ndejukáta hikuái, ha katu ndojukamo’ãi hikuái chupe; upévare, kóicha rejapóta:

24 Te’i ha’e Egipcio-kuérape ne reindyha, ha oikovéta ne ánga.

25 Ha ojehu che, Abraham, ha’ékuri Sarai, che rembirekópe, opa Ñandejára he’iva’ekue chéve—Upévare, ajerure ndéve, ere hag̃ua chupekuéra nde che reindyha, ohoporã hag̃ua chéve nde rupive, ha toikove che ánga nde rupi.