1 Upérõ Ñandejára he’i: Jaguejy. Ha oguejy hikuái pe iñepyrũmbýpe, ha ha’ekuéra, oje’eháicha, umi Tupã, omohenda ha ojapo yvagakuéra ha yvy.

2 Ha yvy, ojejapopa rire, isarambipa ha nandi, ha’ekuéra ndojapoiguikuri mba’eve ndaha’éirõ pe yvýnte; ha pytũmby ojaho’i pe y pypuku rova ape, ha umi Tupã Espíritu ojaho’i umi y rova.

3 Ha ha’ekuéra (umi Tupã) he’íkuri: Toiko tesape; ha oikókuri tesape.

4 Ha ha’ekuéra (umi Tupã) oikũmbýkuri upe tesape, ojajáigui; ha omboja’o hikuái tesape, térã ojapo tojei pytũmbykuéragui.

5 Ha umi Tupãnguéra ombohéra upe tesapépe Ára, ha umi pytũmbýpe ohenói hikuái Pyhare. Ha ojehu ka’arupytũ guive pyhareve peve ohenói hikuái pyhare; ha pyhareve guive ka’arupytũ meve ohenói hikuái ára; ha kóva ha’ékuri peteĩháva, térã upe ha’ekuéra ohenoiva’ekue ára ha pyhare ñepyrũmby.

6 Ha umi Tupã he’i avei: Toiko peteĩ arapy umi y mbytépe, ha kóva omboja’óta umi y ykuéragui.

7 Ha umi Tupã omandákuri arapýpe, ha upéicha rupi oñemboja’o ykuéra oĩva arapy guýpe, ykuéra oĩvagui arapy ári; ha oiko, jepeve ha’ekuéra omanda haguéicha.

8 Ha umi Tupã ohenói arapýpe, Yvága. Ha ojehu pe ha’éva ka’aru guive pyhareve peve ohenói hikuái pyhare; ha ojehu pe ha’éva pyhareve guive ka’arupytũ meve ohenói hikuái ára; ha ha’ékuri mokõiha jeyve ohenoihague hikuái pyhare ha ára.

9 Ha umi Tupã omandákuri, he’ívo: Taijaty peteĩ hendápe ykuéra yvága guygua, ha taikã upe yvy; ha oiko omanda haguéicha hikuái;

10 Ha umi Tupã ohenóikuri yvy ikãvape, Yvy; ha umi y ijatývape ohenói hikuái Y Guasu; ha umi Tupã ohechákuri oñe’ẽrenduha hikuái.

11 Ha Tupãnguéra he’i: Ñambosako’i pe yvy omoheñói hag̃ua kapi’ipe; pe ñana tome’ẽ yvara’ỹi; pe yvyramáta hi’áva tome’ẽ yva heseguáicha, hi’yvara’ỹi teégui ome’ẽtava heseguáicha yvy ári; ha oiko, jepeve omanda haguéicha hikuái.

12 Ha umi Tupã omohendákuri upe yvy omoheñói hag̃ua kapi’ipe ha’ỹi teégui, ha pe ñana tomoheñói ñana ha’ỹi teégui, ome’ẽvo yvara’ỹi heseguáicha; ha pe yvy omoheñói hag̃ua yvyramáta hi’áva ha’ỹi teégui, ome’ẽvo yva’a, ha’ỹingue ikatúva omoheñói ijehegui añónte, heseguáicha; ha umi Tupã ohecha oñeñe’ẽrenduha hesekuéra.

13 Ha ojehu oipapákuri hikuái umi ára; ka’arupytũ guive pyhareve peve ohenói hikuái pyhare; ha ojehu, pyhareve guive ka’arupytũ meve ohenói hikuái ára; ha ha’ékuri mbohapyha ára jeyve.

14 Ha umi Tupãnguéra omohendákuri umi tesapeha yvága arapýpe, ha ojapo oñemboja’o ára pyharégui; ha omohendákuri umívape ha’e hag̃ua umi techaukaha ha arajere, ha ára ha arykuéra;

15 Ha omohenda umíva ha’e hag̃ua tesapeháramo yvága arapýpe, ohesape hag̃ua yvy; ha oiko.

16 Ha umi Tupã omohenda umi mokõi tesape tuicháva, tesape tuichavéva oisãmbyhy hag̃ua ára, ha tesape michĩvéva oisãmbyhy hag̃ua pyhare; ha upe tesape michĩvéva ndive omoĩ avei hikuái mbyjakuéra;

17 Ha umi Tupã omoĩ umívape yvága arapýpe, ohesape hag̃ua yvy, ha oisãmbyhy hag̃ua ára ha pyhare ári, ha oñemboja’o hag̃ua tesape pytũmbykuéragui.

18 Ha umi Tupã oma’ẽporã umi mba’e omandava’ekuére iñe’ẽrendu peve umíva.

19 Ha ojehu ka’aru guive pyhareve peve ha’e pyhare; ha ojehu pyhareve guive ka’aru peve ha’e ára; ha ha’ékuri irundyha jeyve.

20 Ha umi Tupã he’i: Ñambosako’i umi y omoheñói heta hag̃ua tekovekuéra omýiva oikovéva; ha guyrakuéra, oveve hag̃ua yvága arapy guasúre.

21 Ha umi Tupã ombosako’i ykuéra omoheñói hag̃ua umi piraguasu tuichaitéva ha opa tekove oikove ha omýiva, umi y heta omoheñóitava, heseguáicha; ha opa guyra ipepóva, heseguáicha. Ha umi Tupã ohechákuri oñeñe’ẽrenduha hesekuéra, ha iplan oĩporãha.

22 Ha umi Tupã he’i: Jahovasáta umívape, ha jahejáta taheñói ha toñemboheta, ha tomyenyhẽ umi y yguasúpe, térã, ykuéra tuicháva; ha jahejáta umi guyra toñemboheta yvy ári.

23 Ha ojehu ka’arupytũ guive pyhareve peve ohenói hikuái pyhare; ha ojehu pyhareve guive ka’arupytũ meve ohenói hikuái ára; ha ha’ékuri kínto jeyve.

24 Ha umi Tupã ombosako’íkuri yvy omoheñói hag̃ua mymba oikovéva, heseguáicha, mymba’aty ha opa otyryrýva, ha umi tymba yvy arigua heseguáicha; ha oiko, he’i haguéicha hikuái.

25 Ha umi Tupã omohendákuri yvy omoheñói hag̃ua umi tymba heseguáicha, ha mymba’aty heseguáicha; ha opa mba’e yvy ári otyryrýva, heseguáicha; ha umi Tupã ohechákuri iñe’ẽrendutaha hikuái.

26 Ha umi Tupã oñomongeta joa ha he’i: Jaguejy ha jajapo yvypórape ñane ra’angáicha, ñandeichagua; ha ñame’ẽta chupekuéra taipu’aka umi pira yguasupeguáre, umi guyra yvytuguáre, mymba’atýre ha opa upe yvýre ha opa mba’e yvy ári otyryrývare.

27 Upéicha umi Tupã oguejýkuri omohenda hag̃ua yvypórape ha’angáicha, ojapo hag̃ua umi Tupã ra’angáicha, ojapo hag̃ua chupekuéra kuimba’e ha kuña.

28 Ha umi Tupã he’i: Jahovasáta chupekuéra. Ha umi Tupã he’i: Jahejáta tomoheñói ha toñemboheta hikuái, ha tomyenyhẽ upe yvy ha tomoĩ ipoguýpe; ha taipu’aka pirakuéra ypeguáre, guyrakuéra yvytuguáre, ha opa mba’e oikovévare, yvy ári omýivare.

29 Ha umi Tupã he’i: Péina ápe, ñame’ẽta chupekuéra opa ñana oguerekóva yvara’ỹi, heñóitava opa yvy ape ári, ha opa yvyramáta hi’átava; héẽ, ñame’ẽta chupekuéra upe yvyramata’a ome’ẽva yvara’ỹi; kóva ha’éta chupekuéra ikarurã.

30 Ha opa tymba yvy arigua, opa guyra yvytupegua, ha opa mba’e yvy ári otyryrývape, péina ápe, ñame’ẽta tekove, ha avei, ñame’ẽta chupekuéra opa ñana rovyũ tembi’úramo, ha kóicha oñemohendáta opa ko’ãva.

31 Ha umi Tupã he’i: Jajapóta opaite ja’eva’ekue, ha ñamohendáta umívape; ha péina ápe, iñe’ẽrenduetéta hikuái. Ha ojehu, ka’arupytũ guive pyhareve peve ohenói hikuái pyhare; ha ojehu, pyhareve guive ka’arupytũ meve ohenói hikuái ára; ha oipapa hikuái séxto jeyve.