JST, Mathais 7:1–2. Piv rau Mathais 7:1–2
Tsis txhob txiav txim tsis ncaj ncees.
1 Nim no tej no yog tej lus uas Yexus qhia rau nws cov thwj tim kom lawv yuav tsum hais rau cov tib neeg.
2 Tsis txhob txiav txim tsis ncaj ncees, kom nej thiaj tsis raug txiav txim; tiam sis cia li txiav txim kom ncaj ncees.
JST, Mathais 7:4–8. Piv rau Mathais 7:3–5
Yexus qhia kom Nws cov thwj tim cem cov xib hwb, Falixais, cov pov thawj, thiab cov Neeg Levis vim lawv txoj kev siab dag.
4 Thiab ntxiv, nej yuav hais rau lawv hais tias, Vim li cas nej yuav saib ntsoov qhov hmoov ntoo uas nyob hauv nej tus kwv tij lub qhov muag, tiam sis tsis xav txog yav ntoo uas nyob hauv nej tus kheej lub qhov muag?
5 Los sis ua cas nej yuav hais rau nej tus kwv tij hais tias, Cia kuv muab qhov hmoov ntoo nyob hauv koj lub qhov muag rho tawm; tiam sis ho tsis pom ib yav ntoo nyob hauv nej tus kheej lub qhov muag?
6 Thiab Yexus hais rau nws cov thwj tim, Nej puas pom cov xib hwb, thiab cov Falixais, thiab cov pov thawj, thiab cov Neeg Levis? Lawv qhia nyob hauv lawv tej tsev sab laj, tiam sis tsis ua raws li txoj kev cai, thiab tsis ua raws li cov lus txib; thiab txhua tus tau tig mus deb ntawm txoj kev, thiab txhua tus ua txhaum.
7 Nej cia li mus thiab hais rau lawv tias, Vim li cas nej ho qhia txoj kev cai thiab cov lus txib rau tib neeg, thaum nej tus kheej twb yog cov me nyuam uas txawj lwj?
8 Hais rau lawv hais tias, Nej cov neeg siab dag, xub tshem tawm yav ntoo hauv nej lub qhov muag tso, ces nej yuav pom meej mus tshem tawm qhov hmoov ntoo hauv nej tus kwv tij lub qhov muag.
JST, Mathais 7:9–11. Piv rau Mathais 7:6
Yexus qhia Nws cov thwj tim kom qhia txog kev hloov siab lees txim thiab kom txhob faib tej txuj ci uas neeg tsis paub txog lub nceeg vaj rau neeg ntiaj teb.
9 Nej cia li mus qhia neeg ntiaj teb, hais rau sawv daws tias, Hloov siab lees txim, vim lub nceeg vaj ceeb tsheej twb los ze rau nej.
10 Thiab tej txuj ci uas neeg tsis paub txog lub nceeg vaj los nej yuav tsum ceev cia rau nej tus kheej; vim tsis tsim nyog muab tej uas dawb huv rau cov dev thiab muab nej tej hlaws pov rau cov npua, tsam lawv muab tsuj rau hauv lawv qab xib taw.
11 Vim neeg ntiaj teb tsis muaj peev xwm txais tau tej uas nej, nej tus kheej, twb tsis muaj peev xwm ris; yog li ntawd nej yuav tsum tsis txhob muab nej tej hlaws rau lawv, tsam lawv tig rov los thiab muab nej rhuav.
JST, Mathais 7:12–17. Piv rau Mathais 7:7–8
Yexus qhia Nws cov thwj tim hais tias Leej Txiv muab kev tshwm sim rau txhua tus uas thov.
12 Hais rau lawv tias, Thov Vajtswv; cia li thov, thiab yuav muab rau nej; cia li nrhiav, thiab nej yuav ntsib; cia li khob, thiab yuav qhib rau nej.
13 Vim txhua tus uas thov, yuav tau txais; thiab tus uas nrhiav, yuav ntsib; thiab rau tus uas khob, yuav qhib rau nws.
14 Ces nws cov thwj tim hais rau nws hais tias, Lawv yuav hais rau peb tias, Peb tus kheej yeej ncaj ncees, thiab tsis tas muaj lwm tus neeg qhia peb. Peb paub tias, Vajtswv hnov Mauxes thiab ib txhia ntawm cov yaj saub; tiam sis nws tsis hnov peb.
15 Thiab lawv yuav hais tias, Peb muaj txoj kev cai rau peb txoj kev cawm seej, thiab txoj kev cai ntawd yeej txaus rau peb lawm.
16 Ces Yexus teb, thiab hais rau nws cov thwj tim tias, Nej hais li no rau lawv hais tias,
17 Nej leej twg, uas muaj ib tug tub, thiab nws nyob nraud, ces nws hais tias, Txiv, qhib koj lub tsev rau kuv los noj hmo nrog koj, es nej yuav tsis hais tias, Los tsev, kuv tus tub; vim kuv li yog koj li, thiab koj li yog kuv li?