JST, Mathais 4:1, 5–6, 8–9. Piv rau Mathais 4:1, 5–6, 8–9; tau hloov ib yam rau Lukas 4:2, 5–11
Tus Ntsuj Plig coj Yexus, tsis yog Dab Ntxwg Nyoog coj.
1 Tom qab ntawd tus Ntsuj Plig coj Yexus mus rau tom roob moj sab qhua, mus nyob nrog Vajtswv.
5 Tom qab ntawd tus Ntsuj Plig coj Yexus mus rau hauv lub nroog dawb huv, thiab tus Ntsuj Plig coj nws mus rau saum lub tuam tsev qhov chaw uas siab tshaj plaws.
6 Tom qab ntawd tus dab phem los cuag nws thiab hais tias, Yog koj yog Vajtswv Leej Tub tiag, koj cia li dhia rau hauv av, rau qhov twb tau sau tseg lawm hais tias, Vajtswv yuav kom nws cov tim tswv tsom kwm koj, thiab lawv ob txhais tes yuav txhawb nqa koj, tsam koj ob txhais ko taw mus tsoo pob zeb.
8 Thiab ntxiv, Yexus muaj tus Ntsuj Plig, thiab tus Ntsuj Plig coj nws mus rau saum ib lub roob siab siab, thiab ua rau nws pom tag nrho tej teb chaws hauv ntiaj teb thiab tej ntawd lub yeeb koob.
9 Thiab tus dab phem rov qab los cuag nws dua, thiab hais tias, Kuv yuav muab txhua yam no rau koj, yog koj pe thiab teev tiam kuv.
JST, Mathais 4:11. Piv rau Mathais 4:11
Yexus xa cov tim tswv los txhawb pab Yauhas tus uas Muab Neeg Ua Kev Cai Raus Dej.
11 Thiab nim no Yexus tau paub hais tias luag muab Yauhas tso rau hauv lub tsev kaw, thiab Yexus tau xa cov tim tswv, thiab, saib seb, lawv tau los thiab txhawb pab Yauhas.
JST, Mathais 4:18. Piv rau Mathais 4:19
Cov yaj saub hauv Phau Qub hais txog Yexus.
18 Thiab nws hais rau nkawd tias, Kuv yog tus uas cov yaj saub tau sau hais txog; los nrog kuv mus, thiab kuv yuav qhia kom neb paub mus nrhiav neeg.
JST, Mathais 4:22. Piv rau Mathais 4:23
Yexus kho ib co neeg ntawm cov uas ntseeg Nws lub npe.
22 Thiab Yexus mus qhia hauv lawv tej tsev sab laj thoob plaws hauv Kalilais, thiab tshaj tawm txoj moo zoo ntawm lub nceeg vaj; thiab kho txhua yam mob, thiab txhua yam mob kis hauv cov neeg uas ntseeg nws lub npe.