JST, Mathais 6:14. Piv rau Mathais 6:13; tau hloov ib yam rau Lukas 11:4
Tus Tswv tsis coj peb mus rau kev ntxias.
14 Thiab tsis txhob cia peb raug coj mus rau kev ntxias, tiam sis tso peb dim ntawm tej kev phem.
JST, Mathais 6:22. Piv rau Mathais 6:22
Yog hais tias peb lub qhov muag tsuas ntsia ntsoov Vajtswv lub yeeb koob, tag nrho peb lub cev yuav kaj nrig.
22 Qhov pom kev ntawm lub cev yog lub qhov muag; yog li ntawd, yog nej lub qhov muag tsuas ntsia ntsoov Vajtswv lub yeeb koob, tag nrho nej lub cev yuav kaj nrig.
JST, Mathais 6:25–27. Piv rau Mathais 6:25; 10:10
Yexus ceeb toom Nws cov thwj tim hais tias lawv txoj hauj lwm yuav nyuaj tiam sis cog lus tias Nws yuav npaj txoj kev thiab Leej Txiv Saum Ntuj Ceeb Tsheej yuav nrhiav noj nrhiav haus rau lawv.
25 Thiab, ntxiv, kuv hais rau nej tias, Nej cia li mus rau neeg ntiaj teb, thiab tsis txhob txhawj txog neeg ntiaj teb; vim neeg ntiaj teb yuav ntxub nej, thiab yuav tsim txom nej, thiab yuav ntiab nej tawm hauv lawv tej tsev sab laj.
26 Txawm li ntawd los, nej yuav tsum mus ntawm ib lub tsev rau ib lub tsev, qhia cov neeg; thiab kuv yuav mus ua nej ntej.
27 Thiab nej Leej Txiv saum ntuj ceeb tsheej yuav nrhiav noj nrhiav haus rau nej, txhua yam uas nej tsim nyog tau los noj, tej uas nej yuav noj; thiab ris tsho hnav, tej uas nej yuav hnav los sis rau.
JST, Mathais 6:38. Piv rau Mathais 6:33
Peb yuav tsum xub nrhiav kev txhim tsa Vajtswv lub nceeg vaj tso.
38 Yog li ntawd, tsis txhob nrhiav tej uas yog lub ntiaj teb no li tiam sis nej cia li xub nrhiav kev txhim tsa Vajtswv lub nceeg vaj tso, thiab tsa nws txoj kev ncaj ncees, thiab yuav muab tag nrho tej yam no ntxiv rau nej.