JST, Mathais 21:33. Piv rau Mathais 21:32–33
Ib tug neeg yuav tsum hloov siab lees txim ua ntej nws yuav ntseeg tau Khetos.
33 Vim tus uas tsis ntseeg Yauhas ntsig txog kuv, nws ntseeg tsis tau kuv, tsuas yog nws xub hloov siab lees txim.
JST, Mathais 21:47–56. Piv rau Mathais 21:45–46
Yexus tshaj tawm hais tias Nws yog tus thawj ncej zeb tag. Tau coj txoj moo zoo mus rau cov neeg Yudais thiab tom qab ntawd mus rau Lwm Haiv Neeg. Cov neeg phem yuav raug puas tsuaj thaum Yexus rov qab los.
47 Thiab thaum cov thawj ntawm cov pov thawj thiab cov Falixais tau hnov nws tej lus piv txwv, lawv paub hais tias Yexus hais txog lawv.
48 Thiab lawv hais rau lawv tus kheej tias, Tus txiv neej no ib leeg xwb es nws xav hais tias nws muaj peev xwm ua kom lub nceeg vaj muaj hwj chim no puas tsuaj no los? Thiab lawv tau chim siab rau nws.
49 Tiam sis thaum lawv tab tom yuav ntes Yexus, lawv ntshai cov neeg coob coob, vim lawv paub hais tias cov neeg coob coob suav hais tias Yexus yog ib tug yaj saub.
50 Thiab nim no Yexus cov thwj tim los cuag nws, thiab Yexus hais rau lawv tias, Puas yog nej xav tsis thoob rau tej lus ntawm zaj lus piv txwv uas kuv tau hais rau lawv?
51 Kuv hais tseeb rau nej tias, kuv yog lub pob zeb, thiab cov niag phem ntawd xyeej kuv.
52 Kuv yog tus ncej zeb tag. Cov Neeg Yudais no yuav tawm tsam kuv, thiab lawv yuav puas tsuaj.
53 Thiab Vajtswv lub nceeg vaj yuav raug muab tshem ntawm lawv mus, thiab yuav muab rau ib haiv neeg uas txi txiv li ntawd; (hais txog Lwm Haiv Neeg.)
54 Yog li ntawd, yog lub pob zeb no vau tsoo leej twg, nws yuav ua kom tus ntawd ntsoog mos mos.
55 Thiab thaum tus Tswv vaj txiv hmab los, nws yuav ua kom cov niag neeg qias, neeg phem ntawd puas tsuaj mus, thiab yuav muab nws lub vaj txiv hmab rau lwm cov neeg ua teb tu, nyob hauv hnub nyoog kawg, cov uas yuav sau tej txiv hmab los rau nws thaum yog lawv lub caij.
56 Thiab tom qab ntawd lawv to taub zaj lus piv txwv uas nws tau hais rau lawv, hais tias Lwm Haiv Neeg yuav raug puas tsuaj thiab, thaum tus Tswv yuav nqis saum ntuj ceeb tsheej los kav nws lub vaj txiv hmab, uas yog lub ntiaj teb thiab cov tib neeg nyob haud.