Ol Foto blong Histri blong Jos

Ol Samting we Oli Stap Insaed
Fas Toktok
Bigfala Toktok
1. Tabu Bus
2. Hil Kumora mo Palmaera-Eria blong Manjesta
3. Wud Haos blong Josef Smit Senia
4. Grandin Pres mo Print Stoa
5. Suskehana Reva
6. Ples blong Haos blong Pita Witma
7. Niuwel K. Witni mo Kampani Stoa
8. Haos blong Jon Jonson
9. Ketlan Tempol
10. Adam-ondi-Aman
11. Ples blong Fa Wes Tempol
12. Libeti Kalabus
13. Stori Haos long Nauvu
14. Red Brikis Stoa blong Josef Smit Junia
15. Nauvu Tempol
16. Katej Kalabus
17. Wokbaot i go long Wes
18. Sol Lek Tempol

Ol Foto blong Histri blong Jos

Ol Foto blong Histri blong Jos

Fas Toktok
Olgeta foto ia, oli ol foto blong ol impoten ples blong Jos histri we oli soemaot ol graon we ol fas Lata-dei Sent oli wokbaot long olgeta, ol ples we ol profet blong tedei oli bin stap long olgeta mo ol ples we oli bin tij, mo ples we plante samting we skripja i tokbaot oli bin hapen.
Bigfala Toktok
Map daon ia i soem ples blong ol foto long pat ia. Long ol pej we oli kam afta, wanwan foto i gat namba i kam wetem wan smol toktok we i tokbaot ples long foto. Ol impoten samting we oli bin hapen long ples ia we ol skripja oli tokbaot, oli putum i kam afta, wetem ol skripja refrens blong mekem se yu save weaples blong ridim moa abaot ol samting we oli bin hapen.
1. Tabu Bus
Tabu Bus i stap long tufala Taonsip ia, Palmaera mo Manjesta long Niu Yok. Bus blong ol tri ia i stap long Wes saed blong ples we smol wud haos blong famli Smit i bin stap long hem long 1820.
2. Hil Kumora mo Palmaera-Eria blong Manjesta
Lukluk i go long Not, foto ia i soem Hil Kumora long Manjesta, Niu Yok. Hil i kamaot daon long raet han kona blong foto mo i go kasem kolosap hafwei blong top blong foto. Waet bilding we oli save luk long Not long en blong hil i givim ona long enjel Moronae mo taem ia we Buk blong Momon i kamaot. Hil Kumora i stap samples 5 kilometa Saot Is long Tabu Bus. Kolosap long top blong foto, i gat Palmaera Vilej, we i stap 6 haf kilometa longwe. Smit fam mo Tabu Bus i stap long lef saed antap evriwan long foto ia.
3. Wud Haos blong Josef Smit Senia
Wan kopi blong haos blong Josef Smit Senia we oli bildim long stret ples we fas wud haos blong hem i bin stap long hem kolosap long Palmaera, Niu Yok. Smit famli i bin bildim fasfala wan haf stori wud haos i no longtaem afta we oli kasem Palmaera. Famli ia i bin stap long ples ia stat long 1819 i go kasem 1825.
4. Grandin Pres mo Print Stoa
Print stoa, we oli mekem bakegen, blong Egbert B. Grandin long Palmaera, Niu Yok; ples we oli pablisim fas edisen blong Buk blong Momon long 1830. Martin Haris i putum fam blong hem blong bank i holem mo i salem pat blong fam ia blong pem rod blong printim 5,000 kopi blong Buk blong Momon. Wok blong rere long buk blong printim i sat long Ogis 1829, mo oli finisim blong mekem ol kopi long 26 Maj 1830.
5. Suskehana Reva
Foto ia i soem Suskehana Reva long Hamoni Taonsip, Pensilvania.
6. Ples blong Haos blong Pita Witma
Wud haos ia i representem fas haos blong Pita Witma long Feyet, Niu Yok.
7. Niuwel K. Witni mo Kampani Stoa
Stoa blong Niuwel K. Witni i bin plei blong bigfala pat long histri blong Jos long Ketlan. Josef mo Ema Smit oli bin stap long ples ia blong wan sot taem. Plante impoten revelesen oli bin kamaot long ples ia. Skul blong Ol Profet i bin tekples insaed long stoa stat long 24 Jenuware 1833 kasem samples long Epril 1833.
8. Haos blong Jon Jonson
Haos blong Jon mo Alis Jonson i bin stap long Haeram, Ohaeo. Rum ia i stap long seken stori.
9. Ketlan Tempol
Ketlan Tempol i stap long Ketlan, Ohaeo.
10. Adam-ondi-Aman
Lukluk i go Saot long vale blong Adam-ondi-Aman, we i wan kwaet mo naes vale we i stap long Not Wes long Misuri kolosap long komuniti blong Galatin.
11. Ples blong Fa Wes Tempol
Ples ia long Fa Wes, Misuri, i kam hom blong 3,000 kasem 5,000 Sent we oli lukaotem wan ples blong haed long hem long taem we ol man long Jakson mo Klei Kaonti oli givim hadtaem long olgeta. Long 1838, Lod i givim oda long olgeta Sent blong bildim wan tempol long ples ia (luk long D&K 115:7–8). Hadtaem we i kam long grup blong ol rabis man i blokem olgeta blong mekem hemia. Long 31 Oktoba long yia ia, oli arestem Profet Josef Smit mo ol nara lida blong Jos, mo afta we oli bin pas long kot long Rijmon, oli go long kalabus long Libeti Kalabus. Long taem blong winta blong yia 1838–1839, oli ronemaot ol Lata-dei Sent aot long Fa Wes mo ol nara ples long Misuri; ol Lata-dei Sent oli go stap long Ilinoa.
12. Libeti Kalabus
Kalabus ia long Libeti, Misuri, samples long yia 1878. Josef Smit mo faef nara brata, oli bin sarem olgeta long kalabus long fasin we i no stret; kalabus ia, wol blong hem i 1.2 m tik; oli bin stap long kalabus stat long 1 Disemba 1838 kasem 6 Epril 1839. (Sidni Rigdon i go fri long en blong manis Febwari). Oli mas stap long rum andanit long kalabus ia, mo oli silip long ston we i kolkol, we oli sakem smol gras nomo long floa, wetem smol laet mo i no gat samting blong blokem kolkol blong winta.
13. Stori Haos long Nauvu
Josef Smit Junia mo famli blong hem oli muv i go long Stori Haos long Nauvu long Ogis 1843. Afta long hemia oli ademap wan rum long Is saed blong bilding ia, mekem se i gat 22 rum insaed long Stori Haos ia. Stat long Jenuware 1844, Ebenesa Robinson i bin lukaotem haos ia olsem wan hotel, mo Profet i bin holemtaet sikis rum blong famli blong hem. Haos ia i bin stap olsem wan sosol senta blong Nauvu sosaeti. Profet i bin welkamem ol impoten man blong gavman long ples ia.
14. Red Brikis Stoa blong Josef Smit Junia
Kopi blong stoa blong Josef Smit Junia mo ofis blong hem, i stap long Nauvu, Ilinoa. Hem i bin wan long ol bilding we i moa impoten insaed long Jos long taem blong Nauvu. Ples ia i stap olsem wan jeneral stoa, be tu, i stap olsem wan senta blong ol aktiviti long saed blong sosol, politik mo relijin. Josef Smit i bin gat wan ofis long seken stori.
15. Nauvu Tempol
Oli bin bildim fas Nauvu Tempol wetem ol lokol grei-waet laemston. Bilding ia, hem i 39 mita long mo 27 mita waed. Top blong taoa i stap long 48 mita antap long mak blong graon. Ol memba blong Jos oli bin mekem ol bigfala sakrifaes blong bildim naesfala tempol ia, mo wok i bin stat long 1841. Sam oli wok plante manis long bilding ia; ol narawan oli sakrifaesem mane blong olgeta. Nomata we tempol i no bin finis evriwan, ol memba oli bin fulumap gud mo oli bin kam blong mekem ol odinens long ol manis bifo oli aot i go long Wes. Taem we plante long olgeta Sent oli bin aot long Nauvu long stat blong Springtaem blong yia 1846 folem strong toktok blong ol grup blong ol rabis man, wan spesel grup i bin stap blong finisim tempol. Long 30 Epil 1846, ol Elda Orson Haed mo Wilfod Wudrof blong Kworom blong Olgeta Twelef Aposol mo samples 20 narawan oli bin dediketem haos ia long Lod. Tempol ia i bin stap nating long manis Septemba taem oli ronemaot ol memba blong Jos we oli bin stap oli aot long Nauvu; ol grup blong ol rabis man ia oli prapa spolem tabu haos ia. Insaed long tempol i bin bon long faea long manis Oktoba 1848. Tempol we oli bildimbak tempol (olsem i stap long foto), we i stret olsem faswan, Presiden Godon B. Hinkli nao i dediketem long 27–30 Jun 2002.
16. Katej Kalabus
Kalabus haos long taon blong Katej, Ilinoa.
17. Wokbaot i go long Wes
Plan blong sta blong aot long Nauvu, Ilinoa, i blong i hapen long manis Maj–Epril, be from ol strong toktok blong ol grup blong ol rabis man, Presiden Brigham Yang i talem se wokbaot blong olgeta Sent blong krosem Misisipi Reva bae i stat long 4 Febwari 1846. Presiden Yang i bin stap blong mekem endaomen blong olgeta Sent mo i no bin aot long Nauvu kasem medel blong manis Febwari.
18. Sol Lek Tempol
Sol Lek Tempol, we oli lukluk long Not Is saed blong hem. Afta samfala dei we fas kampani blong ol paeonia blong ol Lata-dei Sent oli go insaed long Sol Lek Vale, Presiden Brigham Yang i kilim graon wetem wokingstik blong hem mo talem: “Long ples ia nao bae yumi bildim tempol blong God blong yumi.” Graon ia, oli bin brekem long 14 Febwari 1853. Long 6 Epril 1853, oli putum ol konaston. Tempol i bin finis mo oli bin dediketem 40 yia afta long 6 Epril 1893. Fas Presidensi mo Kworom blong Olgeta Twelef Aposol oli stap mit evri wik blong toktok raon mo lukaotem daereksen blong Lod blong lidim mo bildimap kingdom blong God.