11. Ples blong Fa Wes Tempol
Ples ia long Fa Wes, Misuri, i kam hom blong 3,000 kasem 5,000 Sent we oli lukaotem wan ples blong haed long hem long taem we ol man long Jakson mo Klei Kaonti oli givim hadtaem long olgeta. Long 1838, Lod i givim oda long olgeta Sent blong bildim wan tempol long ples ia (luk long D&K 115:7–8). Hadtaem we i kam long grup blong ol rabis man i blokem olgeta blong mekem hemia. Long 31 Oktoba long yia ia, oli arestem Profet Josef Smit mo ol nara lida blong Jos, mo afta we oli bin pas long kot long Rijmon, oli go long kalabus long Libeti Kalabus. Long taem blong winta blong yia 1838–1839, oli ronemaot ol Lata-dei Sent aot long Fa Wes mo ol nara ples long Misuri; ol Lata-dei Sent oli go stap long Ilinoa.
Ol Impoten Samting we oli bin Hapen: Oli dediketem wan ples blong bildim tempol, mo oli putum ol konaston i stap. Josef i bin kasem seven revelesen we oli pablisim long Doktrin mo Ol Kavenan (ol seksen 113–115; 117–120). Josef F. Smit, nambasikis Presiden blong Jos, i bon long 13 Novemba 1838 long Fa Wes. Fa Wes i bin stap smol taem olsem hedkwota blong Jos anda long Profet Josef Smit.