17. Wokbaot i go long Wes
Plan blong sta blong aot long Nauvu, Ilinoa, i blong i hapen long manis Maj–Epril, be from ol strong toktok blong ol grup blong ol rabis man, Presiden Brigham Yang i talem se wokbaot blong olgeta Sent blong krosem Misisipi Reva bae i stat long 4 Febwari 1846. Presiden Yang i bin stap blong mekem endaomen blong olgeta Sent mo i no bin aot long Nauvu kasem medel blong manis Febwari.
Ol Impoten Samting we oli bin Hapen: Bifo hem i ded, Profet Josef Smit i bin talem profesi ia: “Sam long yufala bae i laef blong go mo help blong bildim ol haos, mo bildim ol siti, mo luk olgeta Sent oli kam wan strong pipol long medel blong ol Roki Hil.” Kolosap 12,000 Sent oli aot long Nauvu stat long Febwari kasem Septemba 1846. Afta we olgeta Sent oli aot long Winta Kwota mo ol narafala ples moa, oli bin oganaes long ol kampani (grup) blong ten, fifti, mo handred pipol, mo wanwan kampani i gat wan kapten (D&K 136:3). Long Septemba 1846, wan grup blong samples 800 man oli tekem sikis bigfala kanon mo blokem Nauvu. Afta sam dei blong faet, olgeta Sent we oli bin stap oli mas sarenda blong save sevem laef blong olgeta mo kasem janis blong krosem reva. Samples faef kasem sikis handred man, woman mo pikinini oli krosem reva mo kamp long saed blong reva. Presiden Brigham Yang oli sendem ol tim wetem ol saplae blong sevem olgeta mo karem olgeta pua Sent ia oli kam.