1 Cunan, yalishca jipa jatun mandaj Mosíah catilla sumaj cusaita quimsa huatacunata charishca jipa, munarca yachangapa llactapuracunamanda picuna vichai rirca Lehi-Nefi alpaman, nacashpaca Lehi-Nefipaj llactaman; paipaj llactapuracuna nimapa paicunamanda na yachashca carca Zarahemla alpata saquishcamandapacha; chaimanda, paicuna tapunajurcalla rishcacunamanda.

2 Yalishca jipa jatun mandaj Mosíah mañachirca chunga sujta jatun racu runacunata Lehi-Nefi alpaman vichai richun, paicunapaj huauquicunamanda tapuchun.

3 Yalishca jipa caya punlla paicuna vichai ri callarirca, paicunahuan rirca shuj Ammón nishca, pai cashpa shuj racu shinllipash runa, Zarahemlapaj cati aillu; paicunapaj pushajpash carca.

4 Cunan, paicuna maiman rinata na yacharca jichushca pambapi purirca vichai rishpa Lehi-Nefi alpaman; chaimanda tauca punllacunata jichushca pambapi chingashca, chuscu chunga punllacunata caiman chaiman purirca.

5 Chuscu chunga punllacunata caiman chaiman purishpa shuj uchilla urcuman chayarca, Shilom alpapaj vichai lado carca, chaipi paicunapaj facha huasicunata shayachirca.

6 Ammón quimsa huauquicunamanda pusharca, paicunapaj shuticuna carca Amalekí, Helem, Hempash, paicuna Nefipaj alpaman urai rirca.

7 Riqui, paicunaca Nefipaj alpapi Shilompaj alpapipash causajcunapaj jatun mandajta rijsirca; jatun mandajta ricujcuna muyundi carca, japi tucurca, huatai tucurca, cárcelpi vichai tucurcapash.

8 Yalishca jipa ishcai punllacunata cárcelpi cashpa, jatun mandajpaj ñaupaman cutin aparca, paicunapaj huatashcacunata cacharichirca; jatun mandajpa ñaupapi carca, saquishca carca, ali nishpaca mandashca, paicuna tapuicunata tigrachichun imata paicunata tapujpi.

9 Paicunaman nirca: Riqui, ñuca cani Limhi, Noépaj churi, pimi Zeniffpaj churi carca, pimi Zarahemlamanda shamurca cai alpata chasquingapa, cai alpaca paipaj taitacunapaj carca, pai jatun mandajpa cayashca carca llactapuracunapaj shimihuan.

10 Cunan, ñuca yachangapa munani imashpa manllai illa cashpa quimirimurcanguichi llactapaj pircacunaman, ñucallata, ñuca ricujcunahuan pungu canllapi cajpi?

11 Cunan, caimandami ñuca saquishcani canguna alchishpa charishca cachun, ñuca tapuchi ushangapa, nacashpaca ñuca ricujcunata canguna huañuchi niman carcani. Parlachun saquishcami canguichi.

12 Cunan, Ammón imaura ricurca parlachun saquishca cajta, rirca urai cumurirca jatun mandajpa ñaupapi; cutin jatarishpa nirca: Oh jatun mandaj, ñuca cani ninan cushijushca Diospaj ñaupapi cai punlla ñuca causara caimanda, parlachun saquishca caimandapash; ñuca parlangapa munani manllai illa;

13 Ñuca yachanipachami ñucata rijsishpaca na saquinguimanllu carca cai huatashcacunata ñucata churachun. Ñuca cani Ammón, Zarahemlapaj cati aillu, Zarahemla alpamanda urai shamushcani ñucanchi huauquicunamanda tapungapa, picunata Zeniff chai alpamanda apamurca.

14 Cunan, yalishca jipa Limhi Ammónpaj shimicunata uyashca cashpa, ninanda cushijurca, nircapash: Cunan, ñuca yachani ciertopacha ñuca huauquicuna picunami Zarahemla alpapi cajcuna causanajunrami. Cunan, ñuca cushijusha; caya punlla ñuca llactapuracunatapash cushichisha.

15 Riqui, ñucanchi Lamanitacunapaj huatai tucushcashna canchi, shuj apangapa shinlli tributota churashca ñucanchiman. Cunan, riqui, ñucanchi huauquicuna cacharichinga ñucanchi huatai tucushcashnamanda, nacashpaca Lamanitacunapaj maquicunamanda, shina ñucanchi huauquicunapaj esclavocuna cashun; yali ali can Nefitacunapaj esclavocuna cai Lamanitacunapaj jatun mandajman tributota pagana randi.

16 Cunan, jatun mandaj Limhi paipaj ricujcunata mandarca Ammónda paipaj huauquicunatapash ama ashtahuan huatachun, ashtahuangari paicuna richun uchilla urcuman caica Shilom vichai ladopi carca, paicunapaj huauquicunata llactaman pushamuchun, caipi micuchun, ufiachun, samachun paicunapaj purishpa shaijushcacunamanda; imashpa paicuna tauca llaquicunata yalirca; yarjaita, yacunayaita, ñana ushai shaijuitapash yalirca.

17 Cunan, yalishca jipa caya punlla jatun mandaj Limhi paipaj tucui llactapuracunaman shuj tucuiman villachinata cacharca, Achil Huasipi paicuna tandanajuchun, paicunaman parlagrijuj shimicunata uyachun.

18 Yalishca jipa imaura paicuna tandanajushca cajpi parlarca cai layapi, nishpa: Oh ñuca llactapuracuna, vichai alsaichi cangunapaj umacunata alillapash caichi; riqui, punlla maquipimi, na carupichu, imaura ñucanchi ñana ashtahuan ñucanchita na ricunayachijcunapaj maquipi cashunchichu, masqui ñucanchipaj tauca ninan fiñanajuicuna, caicuna yanga cashca; shina cashpapash ñuca yuyani catinara shuj alipacha ninan fiñanajuita ruranara canchi.

19 Chaimanda, vichai alsaichi cangunapaj umacunata, cushijuichi, Diospi confianzata churaichi, chai Diospi pimi carca Abrahampaj Dios, Isaacpaj, Jacobpaj; chai Dios pimi apamurca Israelpaj huahuacunata Egipto alpamanda, paicunata Puca Jatun Mama Cochata purichirca chaquishca alpapi, manáta micuchirca ama huañuchun jichushca pambacunapi; paicunamanda tauca ashtacata rurarca.

20 Cutin, chai Diosllata ñucanchi taitacuna Jerusalénpaj alpamanda pushamushca carca, alichishca alchishpa charishcapash paipaj llactapuracunata cunangaman; riqui, ñucanchipaj na ali ruraicunamanda millanayaicunamandami paica pushashca huatai tucushcashnaman.

21 Tucuicuna cai punlla ricunajunguichi, Zeniff, pimi carca cai llactapuracunapaj jatun mandaj, pai ninanda munashca carca paipaj taitacunapaj alpacunata chasquingapa, chaimanda jatun mandaj Lamánpaj na alipa yachashca umachinacunahuan umachi tucushca carca, jatun mandaj Zeniff shuj tratoman yaicurca, paipaj maquipi churashpa asha alpa charishcacunata, Lehi-Nefi llactata, Shilompaj llactatapash; muyundi alpatapash—

22 Tucui caicunata rurarca, shuj munaimandalla cai llactapuracunata paipaj maquiman apamungapa nacashpaca huatai tucushcashnaman. Riqui, ñucanchi cai punlla tributota pagana canchi Lamanitacunapaj jatun mandajman, ñucanchi saracunamanda chaupita, ñucanchi cebadata, tucui laya muyucunatapash, ñucanchi mirashca corral llamacunata chaupita huagracunamandapash; tucui ñucanchi charinchi charishcacunamanda chaupita Lamanitacunapaj jatun mandaj shinatapacha mañan, ñucanchi causaicunatapash.

23 Cunan, nachu apangapa shinlli can? Nachu cashna, ñucanchi llaqui, jatun? Cunan riqui, mashna jatun shinacaicunata llaquiyangapa charinchi.

24 Ari, cangunaman nini, jatun can shinacaicuna imamanda ñucanchi llaquiyangapa charinchi; riqui mashnachari ñucanchi huauquicunamanda huañuchi tucushca can, paicuna yahuar yanga jichashca can, tucui cai na ali ruraicunamanda.

25 Cai llactapuracuna na ali ruraipi na urmashca cajpica Apunchijca na saquinmanllu carca cai jatun na ali paicunapaman shamuchun. Ashtahuangari, paicuna paipaj shimicunata na uyanayachirca; ashtahuangari fiñanajuicuna paipurahuan jatarirca, yahuarta paipura jichangacaman.

26 Shuj Apunchijpaj achil villachijtapash paicuna huañuchirca; ari, Diospaj ajllashca runa, pimi paicunaman villarca paicunapaj na ali ruraicunata millanayaicunatapash, achil villachirca tauca cuzascuna shamunata, ari, Cristo shamunatapash.

27 Paicunaman nimanda Cristo Dios cashcata, tucui cuzascunapaj Taita, nircapash pai japinga paipillata runa rijchatapacha, cangami rijchapachaca callaripi imashna runa rurashca carca shina; shuj laya nishpa, pai nirca runaca rurashca carca Diospaj rijchatapacha catishpa, Dios urai shamungami runacunapaj huahuacunaman, aichata yahuarta paipillata japingapa, alpa jahualla ringapash—

28 Cunan, caita nimanda, paicuna huañuchirca; ashtahuan tauca cuzascunata paicuna rurarca imami paicunaman Diospaj fiñaicunata apamurca. Chaimanda, pita manllaringuichi paicuna huatai tucushcashnapi cashpa chugrichishca cajpi ninan llaquicunahuan?

29 Riqui, Apunchij nirca: Ñuca na ayudashachu ñuca llactapuracuna paicunapaj na ali ruraj punllapi; ashtahuangari ñuca jarcashami paicunapaj ñangunata ama ali mirachun; paicunapaj ruraicuna canga shuj nitijana rumishna paicunapaj ñaupapi.

30 Cutin, pai nin: Ñuca llactapuracuna mapallata tarpushpaca, jupata chasquinga paimanda acapanata; chai catica veneno can.

31 Cutin pai nin: Ñuca llactapuracuna mapallata tarpushpaca chasquingami indi llujshij lado huairata, caica ñapash tucuchinga.

32 Cunan, riqui, Apunchijpaj nishcapachaca pactachishca can, canguna chugrichishca llaquichishcapash canguichi.

33 Ashtahuangari Apunchijpaman tigrarichi tucui shungu munaihuan, paipi confianzata churaichi, tucui yuyaihuan utsia sirvichi, canguna cai rurashpaca, pai, paipaj yuyaihuan munaihuanbash, huatai tucushcashnamanda cangunata cacharichingami.