Achil quilcashcacuna
Mosíah 3


3 Capítulo

Jatun mandaj Benjamín catin paipaj parlaicunahuan—Tucui Ushaita Charij Apunchij runacunamanda achil yachachinga alpahuan rurashca tabernáculopi—Shujllangaman porocunamanda yahuar shutunga cai pachapaj juchacunamanda huañujpi—Paipaj shutimandallami jatun quishpirinaca shamunga—Runacuna natural runamanda cachariri ushan Santocunaman tigranbash Shujpa Juchacunamanda Huañunamanda—Na alita rurajcunapaj llaqui apaica shuj nina azufrepash cocha laya canga. Nara 124 C.Ñ.

1 Cutinbash ñuca huauquicuna, canguna uyachun cayachingapa munani, ashtahuanbash parlanata charini; riqui, ima shamunamanda villana cuzascunata charini.

2 Cai cuzascunataca ñuca villagrini Diospamanda shuj ángel yachachihuashcata. Pai nihuarca: Rijchari; ñuca rijcharircani, riqui pai ñuca ñaupapi carca.

3 Pai nihuarca: Rijchari, uyai ñuca villargrini quiquinman shimicunata; riqui, ñuca villangapa shamushcani mushuj cushijunacunamanda jatun cushijunamanda.

4 Apunchijca quiquinba achil mañaicunata uyashca can, quiquinba ali ruraicunata ricushpa chasquichishca can, quiquinman villachun cachamuhuashca cushijui ushachun; canba llactapuracunaman villachi ushachun, paicunapash cushijuihuan junda cachun.

5 Riqui, punlla shamun, na carupi canllu, ushaihuan, Tucui Ushaita Charij Apunchijca pimi reinan, pimi carca pimi canbash tucui mana tucurinamanda tucui mana tucurinacaman, urai shamunga jahua pachamanda runacunapaj huahuacunaman, alpahuan rurashca tabernáculopi causanga, runacunamanda ringa, jatun juyailla ruraita ricuchishpa, ungushcacunata jambishpa, huañushcata causachishpa, na purij ushajcunata purichishpa, ñausacunata ricushishpa, na uyaita ushajcunata uyachishpa, tucui laya unguicunata jambishpa.

6 Pai llujchishpa cachanga ayacunata, nacashpaca aya espíritucunata runacunapaj huahuacunapaj shungucunapi causajcunata.

7 Riqui, pai tentacióncunata llaqui yalinga, cuerpo nanaitapash, yarjaita, yacunayaita, shaijuitapash, runa llaquita charinata yali, huañungacaman na; riqui, shujllamanda porocunamanda yahuar jicharinga, jatun canga paipaj llaqui na alita rurajcunamanda paipaj llactapurapaj millanayaicunamandapash.

8 Pai shutichishca canga Jesucristo, Diospaj Churi, jahua pachapaj alpapash Taita, tucui cuzascunata callarimanda Ruraj; paipaj mama shutichishca canga María.

9 Riqui, paipapuracunaman shamun, jatun quishpirina runacunapaj huahuacunaman chayamuchun paipaj shutipi feta charijpi; tucui caicunamanda jipa paica shuj runami yan, paica ayata charijmi nin, paita macangapash, chacatangapash.

10 Pai causaringa quimsa punlla huañushcamanda; riqui, cai pachata ricushpa chasquichingapa shayaringa; riqui, tucui cai cuzascunata rurashca canga shuj ali ricushpa chasquichina runacunapaj huahuacunaman shamuchun.

11 Riqui, paipaj yahuar shujpa juchacunamanda huañunbash juchacunamanda maijangunami urmashca can Adán na alita ruraimanda, picunami huañushca Diospaj munaita na yachashpa, nacashpaca pimi juchata rurashca na yachaimanda.

12 Ashtahuangari ay, ay picunami yachashpata Diosta na cazujnajun! Caicunamanga maijanmanbash na quishpirinaca shamunllu ashtahuangari arrepentimientomanda femandapash Apunchij Jesucristopi.

13 Apunchij Dios cachamushca can achil villachijcuna tucui runacunapaj huahuacunaman, cai cuzascunata villachichun tucui aillucunaman, jatun llactacunaman, shimirimaicunaman, cashna maijanbash crijpi Cristo shamunga yashpa, paicuna chasquinga juchacunata anchuchinata, cushijungapash ninan jatun cushijuihuan, paicunapaman ña shamushca cajpishna.

14 Shina cashpapash Apunchij Dios ricurca paipaj llactapuracuna na cazujcuna carca, catichunbacha saquishcacunata churarcami, cai Moiséspaj catichunbacha saquishcacunata.

15 Tauca señalcunata, juyailla ricurinacunapash, símbolocuna figuracunapash paicunaman ricuchirca, pai shamunamanda; achil villachijcunapash paipaj shamunamanda parlarca; ashtahuanbash paicunapaj shungucunata shinlliyachirca, na yuyaipi chasquirca Moiséspaj catichunbacha saquishcacunaca nimapa na can paipaj yahuar shujpa juchacunamanda huañushpalla.

16 Uchilla huahuacuna juchai ushana cajpipash paicuna na quishpirinmanllu; ashtahuangari ñuca ninimi paicuna achilyachishcacuna can; riqui, imashna Adánpi, nacashpaca canacaimandallata, paicuna urman, Cristopaj yahuarca paicunapaj juchacunamanda jicharin.

17 Ashtahuanbash, cangunaman nini, cutishuj shuti na cushca cangachu, cutishuj ñanbash, cutishuj laya runacunapaj huahuacunapaman quishpirina chayamuna, Cristopa shutipilla, Tucui Ushaita Charij Apunchij paipaj shutipilla.

18 Riqui pai ricushpa chasquichin, paipaj ricushpa chasquichinaca alimi can; uchilla huahua huahuacashpallata huañushpa paipaj espíritu na llaqui yalin; ashtahuangari runacuna condenaciónda ufian paicunapaj almacunapaj paicuna humillarishpalla uchilla huahua layaman tigrashpa, crishpapash quishpirina cashcata, can, shamunapash can, Cristopaj yahuarpi shujpa juchacunamanda huañuna, Tucui Ushaita Charij Apunchijmanda.

19 Natural runaca Diosta na ricunayachij can, Adán urmashcamandapacha cashca, shina canga, imaurapash na tucurina imaurapash na tucurinacaman, Achil Espíritupaj cumbidaicunaman quimirishpalla, natural runacaita anchuchishpa shuj santoman tigrashpa Apunchij Cristopaj shujpa juchacunamanda huañunamanda, shuj uchilla huahua laya tigrashpa, sumiso, manso, humilde, paciente, juyai junda, Apunchij imata nijmanbash quimirijlla, imashna shuj uchilla huahua paipaj taitapaman quimirij laya.

20 Ashtahuanbash, cangunaman nini, punlla shamungami imaura Jatun Quishpichijpa yachaicunaca tucui pushtucunaman jicharinga shujllangaman jatun llactaman, reinoman, shimi rimaiman, llactapuracunamanbash.

21 Riqui, imaura punlla shamujpica, pipash culpa illa na cangachu Diospaj ñaupapi, uchilla huahuacunalla culpa illa canga, Tucui Ushaita Charij Apunchij Diospaj shutipi feta charishpa arrepentirishpalla.

22 Chai punllapi, imaura yachachishca cajpipash quiquinba llactapuracunaman cuzascunata imata Apunchij quiquinba Dios mandashcata, Diospaj ricuipica culpa illa na tupashca can, ñuca parlashca cani shimicunamanda.

23 Cunan ñuca parlashca cani shimicunata maijan Apunchij Dios mandahuashcata.

24 Apunchijca shina nin: Paicuna canga shuj punchalla testimonio laya llactapuracunaman, chai punlla ricushpa chasquichinga; chaimanda ricushpa chasquichishca canga, shujllangaman runacunaman paicunapaj rurashcacunamanda, caicuna ali cajpi, na ali cajpipash.

25 Na ali cajpica manllanayai ricuiman cushca canga paicunapaj propio juchachi millanayaicunamanda, Apunchijpaj ñaupamanda huashaman shuchuringa chai manllanayai na tucuri tian llaquiman, maimandami na tigramui ushanga; chaimanda paicuna ufiashca canga condenaciónda paicunapaj almacunapa.

26 Chaimanda, paicuna ufiashca can Diospaj fiñai copamanda, alicaita na nita ushana Adán na nishca urmashcamanda pai na nishpa saquishca fucushcata chasquimanda; chaimanda, llaqui na ima nita ushan mana tucurinacaman.

27 Paicunapaj llaqui can shuj nina azufreshna cocha laya, rupajunlla ninashna, chaipaj cushnica vichai rin imaurapash na tucurina imaurapash na tucurinacaman. Shina Apunchij mandahuashca. Shinacapashcachun.