1 Cunan yalishca jipa Mosíahpaj churicuna tucui cai cuzascunata rurashca jipa, huaquinda paicunahuan aparca paicunapaj taita jatun mandajpaman tigrarca, pai munaita mañarca saquichun, paicuna ajllashcacunahuan, Nefi alpaman vichai ringapa uyashca cuzascunata yachachingapa, Diospaj shimita paicunapaj huauquicuna, Lamanitacunaman carangapa—

2 Imashpapash paicunata Apunchij paicunapaj Diosta rijsinaman apamungapa, paicunapaj taitacunapaj na ali ruraicunata crichingapa; jambi ushaipapash Nefitacunata na ricunayachij yuyaicunamanda, apamuitucuchun Apunchij paicunapaj Diospaj cushijuiman, paicuna caishuhuan chaishuhuan alicai callarichun, ama ashtahuan fiñanajuicuna tiachun tucui alpapi imata Apunchij paicunapaj Dios carashcapi.

3 Cunan paicuna munarca quishpirinata shujllangaman causajman villashca cachun, paicuna ñana usharca maijan causaj runacunapash tucurichun; ari, nima yuyaipillapash nishuj alma mana tucurina llaquita yalichun caica paicunata manllashpa chujchuchin, ninanda chujchuchin.

4 Shina Apunchijpaj Espíritu paicunapapi trabajarca, ninan juchasapacuna cashca carca. Apunchijca, paipaj mana tucurina alicaimanda munarca paicunata quishpichingapa; shina cajpipash paicuna ashtacata llaqui yalirca almapaj llaquipi paicunapaj na ali ruraicunamanda, llaqui yalirca ashtacata, manllarcapash mana tucurinacaman llujchishpa cachashca canata.

5 Yalishca jipa paicunapaj taitata tauca punllacunata ninanda mañarca Nefi alpaman vichai ringapa.

6 Jatun mandaj Mosíah rirca Apunchijta paipaj churicunata Lamanitacunapaman vichai richun saquishachu nishpa tapungapa achil shimita yachachichun.

7 Apunchij Mosíahman nirca: Saqui vichai richun, tauca paicunapaj shimicunata cringa, paicuna mana tucurina causaita charinga; Lamanitacunapaj maquicunamanda quiquinba churicunata cacharichisha.

8 Yalishca jipa Mosíah saquirca richun, rurachun paicuna mañashcata.

9 Purishpa ri callarirca jichushca pambata vichaiman Lamanitacunaman achil shimita yachachingapa; jipaman paicunapaj rurashcacunata shuj tandachishpa quilcashcapi ñuca cusha.

10 Cunan jatun mandaj Mosíah reinota piman cungapa na charirca, nimaijan churi reinota na chasquisha nirca.

11 Chaimanda pai japirca tandachishca quilcashcacunata caita bronce jirru fangacunapi quilcashca carca, Nefipaj jirru fangacunapipash, tucui cuzascuna imata pai alichishpa, alchishpa charishcapash carca Diospaj rurachunbacha saquishcacunamanda, shuj shimirimaiman tigrachishca jipa tandachishca quilcashcacunata quilcachishpa caicuna carca curi jirru fangacunapi imata Limhipaj llactapuracuna tarishca carca, Limhipaj maquihuan chasquichishca carca;

12 Caica rurashca carca paipaj llactapuracuna jatun munaita charimanda; yachangapa munashca carca chai llactapuracunamanda picuna tucuchi tucushca carca.

13 Cunan pai shuj shimirimaiman tigrachirca ishcai rumicunahuan shuj arcopaj ishcai arocunapi huatashca carca.

14 Cunan cai cuzascuna alichishca carca callarimandapacha, shuj miraimanda cutishuj miraiman maquin maquin yalishca carca, shuj shimirimaicunata ima cajta yachangapa.

15 Caicuna alichishca carca, alchishpa charishcapash carca Apunchijpaj maquihuan, cai alpata chasquijcunaman, llactapuracunapaj na ali ruraicunata, millanayaicunatapash pai shujllangaman causajcunaman ricuchi ushangapa.

16 Cai cuzascunata maijan charij shutichishca can vidente, punda punllacunapaj layapi.

17 Cunan Mosíah cai tandachishca quilcashcacunata shuj shimirimaiman tigrachishpa tucuchishca jipa, riqui, shuj tandachishpa quilcashca carca llactapuracunamanda picuna tucuchi tucushca carca, chai punllamanda jatun torreta huasichimanda tucuchi tucushcaman, imaura Apunchijpandachirca llactapuracunapaj shimirimaita, alpa jahuallaman caiman chaiman shitai tucushca carca, ari, chai punllamanda Adán rurashcacaman.

18 Cunan cai tandachishpa quilcashca Mosíahpaj llactapuracunata ninanda rimachirca, ari, paicuna llaquirinahuan junda carca; shina cajpipash caica paicunaman curca ashtaca yachajuicunata, imapi paicuna cushijurca.

19 Cai tandachishpa quilcashcacuna jipaman quilcashca canga; minishtirishca can tucui llactapuracuna yachachun cuzascunamanda imami cai tandachishpa quilcashcapi cajta.

20 Cunan, cangunaman nishcani, jatun mandaj Mosíah cai cuzascunata rurashca jipa, pai bronce jirru fangacunata japirca, tucui cuzascunata imata alichishca cashcata, Almaman curca, pimi Almapaj churi carca; ari, tucui tandachishca quilcashcacunata, yalichinacunatapash, caicunata paiman curca, paita mandarca alichichun, alchishpa charichunbash, llactapuracunapaj shuj tandachishca quilcashcatapash alichichun, shuj miraimanda cutishujman maquin maquin yalichichun, imashna maquin maquin yalichimushca Lehi Jerusalénmanda llujshimushca punllamanda.