1 Yalishca jipa Mosíah rurarca paipaj taita mandashcata, shuj tucuiman villanata rurashca carca tucui alpacunaman, paicuna achil huasiman vichai richun shimicunata uyachun jatun mandaj Benjamín paicunaman parlagrijujta.

2 Llashaj mirashcapacha carca, taucacunapacha na yupai tucushca carca; paicuna ninandapacha mirashca carca taucapacha alpapi mirarca.

3 Paicuna aparcapashmi punda huachashca animalcunata, sacrificiota cungapa rupachina ofrendapash imashna Moiséspaj catichunbacha saquishcacunamanda;

4 Paicunapaj Apunchij Diosta pagui nichunbash, pimi Jerusalénpaj alpamanda pushamushca, pimi paicunapaj na ricunayachijcunapaj maquicunamanda cacharichimushca, cayashca carca ali runacunata paicunapaj yachachijcuna cachun, ali runatapash paicunapaj jatun mandaj cachun, pimi Zarahemla alpapi sumaj causaita churashca, yachachishca carca Diospaj rurachunbacha saquishcacunata alichichun, paicuna cushijuchun juyai jundashca cachun Diosman tucui runacunamanbash.

5 Yalishca jipa imaura paicuna achil huasiman vichai shamushpa, paicunapaj facha huasicunata muyundi shayachirca, shujllangaman runa paipaj aillumanda, cai paipaj huarmi carca, paipaj churicunapash, ushicunapash, paicunapaj churicunapash, ushicunapash, rucumanda chaira viñajcaman, shujllangaman aillu shujmanda cutishujman carulla carca.

6 Paicunapaj facha huasicunata achil huasi muyundi shayachirca, shujllangaman runa paipaj facha huasipaj punguta achil huasiman ricunahuan, shina cashpaca paicunapaj facha huasipi cachun uyachunbash shimicunata imatami jatun mandaj Benjamín paicunaman parlagrijta;

7 Ashtacapacha tandanajushcacuna ninan jatun caimanda jatun mandaj Benjamín na yachachi usharca achil huasi pircacuna ucupi, chaimanda shuj torreta shayachichirca, chashna paipaj llactapuracuna uyai ushachun pai parlashca shimicunata.

8 Yalishca jipa jatun torremanda pai llactapuracunaman parlashpa callarirca; na tucui paipaj shimicunata uyarca ashtacapacha tandanajushca caimanda; chaimanda shimi rimashcacunata quilcachirca cacharcapash maijanguna paipaj shimi nita na uyajman, paicunapash shimicunata chasquichun.

9 Caicuna carca shimicuna pai parlashca quilcachishcacuna, nishpa: Ñuca huauquicuna, tucui cangunapuralla tandanajushca canguichi, canguna ñuca shimicunata uyai ushaj cai punlla parlagrini; ñuca na mandashcani canguna cai jahuaman shamuchun ñuca parlagriju shimicunata jahua shungulla uyachun, ashtahuangari canguna ali uyahuachun, rinricunata pascashpa uyachun, cangunapaj shungucunapash yuyaipi chasquichun, cangunapaj yuyaicuna Diospaj na villashcacunata cangunapaj ricuicunamanda anchurishca cachun.

10 Ñuca na mandashcani canguna cai jahuaman shamuchun ñucata manllachun, ama canguna yuyachun ñucamandalla huañuna runata yali caj.

11 Ashtahuangari ñuca canguna layallata cani, cuerpopi yuyaipipash tucui laya irquiyaicunata ñucata llaquichin; shina cashpapash ajllai tucushca cani cai llactapuracunamanda, ungishca ñuca taitahuan, saquishca Apunchijpaj maquihuan shuj apaj jatun mandajpash cachun cai llactapuracunapa; alichishca alchishpa charishca cashcani paipaj na pactana ushaihuan, cangunata sirvingapa tucui ushaihuan, yuyaihuan shinllicaihuanbash imata Apunchij ñucaman carahuashca.

12 Cangunaman nini saquishca cani ñuca punllacunata cangunata sirvishpa tucuchichun, cunan punllacaman, cangunapamanda na mascashcanichu curita, culquita nima laya charijyanacunatapash;

13 Na saquishcanipashchu canguna alpa ucu prezuna ucupi vichachun, na cangunata shujmanda caishuman esclavocuna rurachun, na huañuchi tucuchun, na shuhuachun, na upalla shujcunapata japichun na adulteriota rurachun; na saquishcanipashchu canguna rurachun ima laya na ali ruraicunata, yachachishcanipash Apunchijpaj rurachunbacha saquishcacunata alichichun, tucui cuzascunapi maijan canman pai mandashca—

14 Ñucallata, trabajashcani ñuca maquicunahuanllata cangunata sirvingapa, ama llaquichishca canguna cachun tributocunahuan, ama urmachunbash nima cangunapi imapash apangapa shinllicunata—tucui cuzascuna imata parlashcani, cangunallata ricushca canguichi cai punlla.

15 Shina cashpapash, ñuca huauquicuna, cai cuzascunata na rurashcanichu ñucallata ninanda jariyangapa, na ninipashchu cangunata caicunahuan juchachingapa; ashtahuangari cai cuzascunata nini canguna yachachun cunan ñuca tigrachi ushasha mapa illa yuyaihuan Diospa ñaupapi.

16 Riqui, cangunaman nini ñuca punllacunata cangunata servishpa tucuchishcani ñuca nishca caimanda, ñuca na munanichu ninanda jariyangapa, Diospaj serviciopilla cashcani.

17 Riqui, cangunaman nini cai cuzascunata canguna yachajui ushachun yachaita; yachajui ushachun cangunapurata sirvinajushpaca Diospaj serviciopilla canguichi.

18 Riqui, canguna cayahuanguichi cangunapaj jatun mandaj; ñuca jatun mandaj nishpa cayashcapash, trabajani cangunata sirvishpa, nachu canguna trabajana canguichi caishuta chaishuta sirvishpa?

19 Riqui, ñucata, pitami nihuanguichi cangunapaj jatun mandaj, pimi paipaj punllacunata cangunata sirvishca tucuchishca can, shinapash Diosta sirvijushca can, cangunamanda ima pagui ninata minishtinichu, Oh imashna canguna pagui nita cuna canguichi cangunapaj jahua pacha Jatun Mandajta!

20 Cangunata nini, ñuca huauquicuna, tucui pagui nita cunguichiman alicachinguichiman cangunapaj tucui alma chari ushaita, Diosman pimi cangunata rurashca can, alichishca can cangunata alchishpa charishcapash, cai cangunata cushichishcapash, cushcapash sumajta causachun caishuhuan chaishuhuan—

21 Cangunata nini canguna sirvinguichiman paita pimi rurashca cangunata callarimanda, cangunata alchishpa charishca can punllan punllan, samaita cushpa, causai ushachun cuyurichun rurachunbash cangunapapacha munaimanda, cangunata ñapash ñapash shinllichishpa—Ñuca nini, canguna paita sirvishpapash tucuicuna tucui almacunahuan shinapash yanga sirvij runacunarami canguichi.

22 Riqui, tucui pai munashca can cangunamanda paipaj rurachunbacha saquishcacunata alichichun; pai nishcapacha can canguna paipaj rurachunbacha saquishcacunata alichishpaca cai pambapi ali miranguichimi; pai nishcamanda nimaurapash na shuj layata ninllu; chaimanda, canguna paipaj rurachunbacha saquishcacunata alichijpica pai achilyachinga ali mirachingapash.

23 Cunan, callaripica pai cangunata rurashca, cangunaman causaita cushca, caimanda canguna dibijcuna canguichi.

24 Catipi, pai minishtin cangunaman mandashcata rurachun; caita rurajpica, paica ñapash achilyachinga; chaimanda pai pagashpa canga. Canguna paimanga dibinguichira, canguichi, cagringuichirapash, imaurapash na tucurina imaurapash na tucurinacaman; chaimanda, imamandata ninanda jariyagringuichi?

25 Cunan ñuca tapuni, ushanguichichu imatapash nita cangunamandallata? cangunaman tigrachini, Na. Na ni ushanguichichu alpamanda alpashna cani; shina cashpapash, alpamanda alpahuan rurashca canguichi; ashtahuangari riqui, cai paipami can pimi cangunata rurashca.

26 Ñucapash, pimi cangunapa jatun mandaj ninguichi, cangunata yalishca ali na canichu, ñucapash alpamandallata cani. Ricuhuanguichi ñuca rucu cani, cai huañuna aichata paipaj alpa mamaman cungapa cani.

27 Chaimanda, imashna cangunaman nishcani ñuca cangunata sirvishcani, purishpa mapa illa yuyaihuan Diospaj ñaupapi, ñuca cai punlla cangunapura tandachishcani, culpa illa cajta tarihuachun, cangunapaj yahuar ama ñucapaman shamuchun, imaura ñuca shayarisha Diospaj ricushca chasquichichun cangunaman pai mandashca cuzascunamanda.

28 Cangunaman nini tandachishcanimi cangunapura cangunapaj yahuarmanda ñuca churajunacunata mapa illa saquichun, cai punllapi imaura ñuca ñalla urai risha ñuca pambarina pushtuman, sumaj causaipi urai risha, ñuca na huañuna espíritu tandanajui ushachun jahua pacha cantaicunahuan shuj ali caj Diosta alicachishpa cantangapa.

29 Ashtahuanbash, cangunata nini tandachishcani cangunapura, ñuca villai ushangapa ashtahuan ñuca ñana cangunapa yachachij cagrinichu, cangunapa jatun mandajpash;

30 Cunanllata ñuca tucuilla cuerpo ninanda chujchun parlangapa munajujpi; ashtahuangari Apunchij Dios shinlliyachihuan, saquihuashcapash cangunaman parlachun, mandahuashcapash cai punlla villachun, ñuca churi Mosíah jatun mandaj cajta cangunapa mandaj.

31 Cunan, ñuca huauquicuna, munaiman canguna rurachun cunangaman rurashca cashcashna. Imashna ñuca mandashcacunata alichishca canguichi, ñuca taitapaj mandashcacunatapash, ali mirashca canguichi, huacaichishca canguichipash cangunapaj na ricunayachijpa maquicunapi ama urmachun, shinallata ñuca churipaj mandashcacunata alichijpica, nacashpaca Diospaj rurachunbacha saquishcacuna imata pai nimunga, cai pambapi ali miranguichi, cangunapaj na ricunayachijcunapash na ushaita charingachu cangunapa jahuapi.

32 Ashtahuangari, Oh ñuca llactapuracuna, ricuriaichi fiñanajuicuna cangunapi mirarinman, ayapaj espírituta cazungapa munanguichiman, imamanda ñuca taita Mosíah parlashca carca.

33 Riqui, tianmi shuj ay tucuiman villachishca pimi ajllan chai espírituta cazungapa; paita cazungapa ajllajpi, chai cashpa paipaj juchacunapi huañujpica, paipaj almapallata condenaciónda ufian; pai chasquin pagota mana tucurina castigota, Diospaj catichunbacha saquishcacunata na alita rurashca caimanda paipaj yuyaipi chasquishcamanda na ali ladoman.

34 Cangunaman nini, cangunamanda na pipash tianllu, cangunapaj uchilla huahuacunalla cai cuzascunamanda na yachachishcacuna, ashtahuangari yachanguichi mana tucurinacaman dibijcuna canguichi cangunapaj jahua pacha Taitaman, paiman cuna tucui charishca tucui cashca; tandachishca quilcashcacunamandapash yachachishca canguichi maijan achil villachishcacuna charin imamanda achil villachijcuna parlashcacuna carca, ñucanchi taita, Lehi, Jerusalénmanda llujshimushca punllamanda;

35 Cunangaman ñucanchi taitacuna tucui parlashcacunapash. Riqui, Apunchij paicunaman mandashca carca chaicunata paicuna parlarca; chaimanda, alicuna ciertopachapash can.

36 Cunan, cangunaman nini, ñuca huauquicuna tucui cai cuzascunata yachashca yachajushca jipaman, canguna na ali rurashpa na ali ladoman rishpaca imatami parlashca cashca, Apunchijpaj Espírituta cangunamanda llujchinajunguichi, cangunapapi ama cachun pushangapa yachai puricunapi achilyachishca canguichi, ali mirashca alchishpa charishcapash—

37 Cangunaman nini, maijan runa caita rurangapa tucuiman villachijca, tucui munaihuan tucui yachajta Diosmanda na ali ladomanmi; chaimanda pai ajllan cazungapa ayapa espírituta, tucui alita rurajcunapaj na ricunayachijman tigran; chaimanda, Apunchij na paipapi canga, imashpa paica na causanllu mapa huasicunapi.

38 Chaimanda chai runa na arrepentirijpica, chaipi cashpa huañun Diospa na ricunayachi cashpa huañun, divino alicaipaj demandacuna jatarin paipaj na huañuna almapi causa causa yuyaicuna paipaj propio juchachimanda, caimi Apunchijpaj ñaupamanda huashaman tigrachinga, paipaj pecho juchachihuan junda, nanaihuan, llaquihuanbash, na huañushpa rupajuj ninashna laya, caipa cushni vitsian imaurapash na tucurina imaurapash na tucurinacaman.

39 Cunan cangunaman nini, shujta llaquinaca chai runata ima nita na ushan; chaimanda paipaj tucuri condenación can catiriajunalla na tucurina tiaj llaqui yali.

40 Oh, tucui rucu runacuna, viñaj huambracunapash, uchilla huahuacunapash ñuca shimicunata yuyaipi chasqui ushajcuna, ñuca parlashcani punchalla na pandanallata canguna yuyaipi chasquichun, ñuca achil mañani rijcharichi manllanayai caimanda yuyarichun picunami na ali ruraihuan urmashcacuna.

41 Ashtahuanbash, ñuca munani canguna yarichun achilyachishca cushijui canapash maijangunami Diospaj rurachunbacha saquishcacunata alichijcuna. Riqui, paicuna tucui cuzascunapi achilyachishca canga, ishcandi temporal espiritualpash; tucurinacaman fielcuna cajpica jahua pachapi chasqui tucunga, Dios-huan causangapa nimaurapash na tucurina cushijui canapi. Oh yarichi, yarichi cai cuzascuna ciertopachacuna can; Apunchij Dios caita parlashca can.