Achil quilcashcacuna
Mosíah 1


Mosíahpaj Quilcashca

1 Capítulo

Jatun mandaj Benjamín yachachin paipaj churicunaman paicunapaj taitacunapaj shimirimaicunata achil villachicunatapash—Paicunapaj Diosta crishpa causaita, ali yachajushpa causashcacuna alchishpa charishca cashca tandachishpa quilcashcacuna tauca jirru fangacunapi alichishca caimanda—Mosíah jatun mandaj cachun ajllashca can tandachishca quilcashcacunata ali alichishpa charichunbash cutishuj cuzascunapash. Nara 130–124 C.Ñ.

1 Cunan na ashtahuan randimanda plituri tiarca tucui Zarahemla pambapi, tucui llactapuracunahuan picunami jatun mandaj Benjamín cajcuna, shina jatun mandaj Benjamín paipaj tucui punllacunapi sumaj causaita charirca.

2 Yalishca jipa pai quimsa churicunata charirca; paicunata shutichirca Mosíah, Helorum, Helamán. Paicunata paicunapaj taitacunapaj tucui shimirimaicuna yachajuchirca, shinashpa paicuna yachajushca runacunaman tigrai ushachun; achil villaicunata yachai ushachunbash paicunapaj taitacunapaj shimicunahuan parlashca carca, caicuna Apunchijpaj maquihuan cushca carca.

3 Paicunaman tandachishca quilcashcacunamanda yachachircapash maijan bronce jirru fangacunapi quilcashca carca, nishpa: Ñuca churicuna, munanimi canguna yarichun na cai jirru fangacuna tiajpica, imami charin tandachishca quilcashcacunata cai rurachunbacha saquishcacunata, ñucanchi nimata na yachashpa causanchiman carca, cunan punllacamanllata, Diospaj na villashcacunata na yachaj chayashpa.

4 Cashna na canman carca ñucanchi taita, Lehi, tucui cuzascunata yari ushanman carca, paipaj huahacunaman yachachingapa, cai jirru fangacunapaj ayudahuan na cashpaca; pai yachajushca carca Egipciocunapaj shimirimaipi chaimanda cai quilcashcacunata lii usharca paipaj huahuacunaman, chaimanda paicuna yachachi usharca paicunapaj huahuacunaman, Diospaj rurachunbacha saquishcacunata pactachishpa, cunan punllacamanbash.

5 Cangunaman nini, ñuca churicuna, cai cuzascuna na canman carca, maijan alchishpa charishca carca Diospaj maquihuan alichishca, ñucanchi liichun yuyaipi chasquichun paipaj na villashcacunata, paipaj rurachunbacha saquishcacunata charichun punllan punllan ñucanchi ñavi ñaupapi, shinapash ñucanchi taitacunapash na crishpa asha asha chingarirca, ñucanchipash huauqui Lamanitacunashna canchiman carca, picuna cai cuzacunamanda nimata na yachan, nacashpaca paicuna na crij paicunata yachachijpipash, imashpa paicunapaj punda taitacunapaj yachachishcacunamanda, maijan pandaicuna can.

6 Oh ñuca churicuna, munanimi canguna yarichun cai cuzascunaca ciertopachami, cai tandachishca quilcashcacunapash ciertopacha can. Riqui, Nefipaj jirru fangacunapash, caicuna tandachishca quilcashcacunata charin ñucanchi taitacunapaj shimicunatapash Jerusalénmanda llujshimushcamanda cunan punllacaman, caicunapash ciertopachami; ñucanchi yachai ushanchi caicuna na llulla cajta imashpa ñucanchi ñavi ñaupapi charinchi.

7 Cunan, ñuca churicuna, munanimi canguna yarichun caicunata utsialla mascashpa rijsichun, caicuna cangunapa alicachun; munanimi canguna Diospaj rurachunbacha saquishcacunata alichichun, canguna pambapi ali mirachun imashna nishcapachamanda maijan ñucanchi taitacunaman Apunchij rurarca.

8 Tauca ashtahuan cuzascuna jatun mandaj Benjamín paipaj churicunaman yachachirca, cai quilcashcapi na quilcashca can.

9 Yalishca jipa jatun mandaj Benjamín paipaj churicunaman yachachita tucuchishca jipa, rucuyarca, ricurca tucui alpapaj ñangunata ñallapacha rinata; chaimanda, pai yaipica alicana carca paipaj churicunamanda shujman reinota cuna.

10 Chaimanda, paipaj ñaupaman Mosíahta cayacacharca; cai shimicunatami paiman parlarca, nishpa: Ñuca churi, munanimi can tucuiman shuj villachinata rurachun tucui cai pambacunaman tucui cai llactapuracunaman, nishpa Zarahemla llactapuracunaman, Mosíahpaj llactapuracunaman picuna cai alpapi causan, caihuan paicuna tandanajuchun; caya punlla ñuca tucuiman villasha ñuca llactapuracunaman ñuca shimihuanllata nisha can shuj jatun mandaj shuj pushaj cajta cai llactapuracunapaj, picunata Dios ñucanchi Apunchij ñucanchiman cushca.

11 Ashtahuanbash, cai llactapuracunaman shutita cujrini, cashna paicuna Apunchij Dios Jerusalénpaj alpamanda pushamushca tucui llactapuracunamanda ali rijsishca cachun; ñuca caita rurani paicuna utsia mascaj llactapuracuna cashcamanda Apunchijpaj rurachunbacha saquishcacunata alichinapi.

12 Shuj shutita paicunaman cusha caica nimaura na fichashca cangachu, paicunapaj na ali ruraimandalla.

13 Ari, ashtahuanbash canman nini, Apunchijpaj ninanda ayudashca llactapuracuna na ali ruraihuan urmashpa, na ali, adúltero llactapuracunaman tigrajpica, Apunchijca jichushpa saquinga irquicunaman tigrachun paicunapaj huauquicunashna; ashtahuan ñana alchishpa charinga paipaj na pajtai juyaillapacha ushaihuan, imashna cunangaman ñucanchi taitacunata alchishpa charishca can.

14 Canman nini, paipaj achil rigrata na chutanman carca ñucanchi taitacunata alchishpa charinapi Lamanitacunapaj maquicunapi urmanman carca, paicunapaj na ricunayachijpa chugrichi tucushca canman carca.

15 Yalishca jipa jatun mandaj Benjamín paipaj churiman cai shimicunata tucuchishca jipa, paiman reinopaj tucui ruranacunata mingarca.

16 Ashtahuanbash, mingarca tandachishca quilcashcacunata maijanguna bronce jirru fangacunapi quilcashca carca; Nefipaj jirru fangacunapash; Labánpaj espadatapash, esfera nacashpaca ñaupachijtapash, imami ñucanchi taitacunata jichushca pambacunata pusharca, maijan Apunchijpaj maquihuan rurashca carca caihuan paicuna pushamui tucuchun, shujllangaman aliguta ricushpa utsia mascaita paicuna caiman cujpi.

17 Chaimanda, paicuna na fielcuna caimanda paicuna na charijyarca shinallata na mirarca paicunapaj puricunapi, ashtahuangari huashaman tigrachishca carca, Dios-huan na alicachi tucurca; paicuna llaquichi tucurca ninan yarjaihuan millayai llaquicunahuanbash, tangaj shina paicunata yarichingapa paicunapaj ruranacunata.

18 Cunan, yalishca jipa Mosíah rirca rurarcapash paipaj taita mandashcata, tucui Zarahemla llactapi cajcunaman tucui llactapuracunaman villachirca shina paipuracuna tandanajuchun, achil huasiman vichai richun shimicunata uyachun paipaj taita paicunaman parlagrijujta.