Achil quilcashcacuna
Mosíah 14


14 Capítulo

Isaías Mesías laya parlan—Mesíaspaj humillación llaquiricunamandapash parlashca can—Paica almata ofrendata ruran juchacunamanda, na ali rurajcunamanda shayarin—Isaías 53-huan parijashpa ricui. Nara 148 C.Ñ.

1 Ari, nachu Isaías nin: Pita crishca ñucanchi villaicunata, pimanda Apunchijpaj rigrata ricuchishca?

2 Paipaj ñaupapi viñanga shuj llullu plantashna, chaquishca alpapaj sapishna; pai na charin formata, yuyaillapash na can; paita ricujpica juyaillapash na canga, na munashunchichu.

3 Runacunapaj millanayachishca, na cazushca; llaquirinacunapaj runa, llaquicunapaj yachashca; ñucanchi ñavicunata pacarcanchi paipamanda; millanayachishca carca, nimapa na valij yarcanchi.

4 Ciertopacha pai apashca ñucanchi llaquirinacunata, nanachishca ñucanchi nanaicunata; shina cashpapash macai tucushcapi charishcanchi, Diospaj chugrichishca, llaquichishcapash.

5 Ashtahuangari ñucanchi juchacunamanda chugrichishca, ñucanchi na alita ruraicunamanda huajtai tucushca; paipaj jahuapi ñucanchi sumajpaj castigo; paipaj carachacunahuan ñucanchi jambishca canchi.

6 Tucui ñucanchi, llamacunashna, chingarishcacuna cashcanchi; shujllangaman shicanyarishcanchi ñangunamanda; Apunchijca paipaj jahuapi churashca tucui ñucanchipaj na ali ruraicunata.

7 Pai na alicachishca carca, llaquichishca carca, shina cashpapash paipaj shimita na pascarca; shuj llamagushna huañuchinaman apai tucushca can, shuj llamagushna paipaj milmata cuchujcunapa ñaupapi upa can paipaj shimita na pascarca.

8 Cárcelmanda, ricushpa chasquichinamandapash anchuchishca carca; pishi villanga paipaj miraimanda? Causajcunapaj alpapi huañuchishca carca; ñuca llactapuracunapaj na alita ruraicunamanda llaquichishca carca.

9 Rurarca paipaj pambana pushtuta na alicunahuan, charijcunahuan paipaj huañuita; na alita na rurashca caimanda, nima umaicuna na tiarca paipaj shimipi.

10 Shina cashpapash Apunchijca munarca llaquichingapa; paipi llaquita churarca; imaura paipaj almata ofrendarca juchamanda paipaj cati aillucunata ricurca, paipaj punllacunata ashtahuan mirachirca, Apunchijpaj munai paipaj maquipi ali miranga.

11 Paipaj almapaj llaquita ricunga, munailla saquiringa; paipaj yachaimanda ñuca ali siervo taucacunata alimi ninga; paicunapaj na ali ruraicunata apanga.

12 Chaimanda jatungunahuan chaupingacha shuj porcionda, charishca quichushcata ali shinllicunahuan chaupingacha; huañuicaman paipaj almata jichashca; yupai tucushca carca na ali rurajcunahuan; aparca juchacunata taucacunamanda, na ali rurajcunamandapash shayarirca.