1 Yalishca jipa Amulón Lamanitacunapaj jatun mandajpaj ñavipi alicachi tucurca; chaimanda, Lamanitacunapaj jatun mandaj saquirca pai, paipaj huauquicuna yachachijcunata ajllashca cachun llactapuracunamanda, ari, Shemlón alpapi cajcunatapash, Shilom alpapipash, Amulón alpapipash.

2 Lamanitacuna tucui cai alpacunata japishpa causanajurca; chaimanda, Lamanitacunapaj jatun mandajca cai tucui alpacunapi jatun mandajcunata ajllashca carca.

3 Cunan Lamanitacunapaj jatun mandaj carca Lamán, paipaj taitamanda shina shutichishca carca; chaimanda pai shutichishca carca jatun mandaj Lamán. Taucapacha llactapuracunapa jatun mandaj carca.

4 Amulónpaj huauquicunamanda yachachijcunata ajllarca shujllangaman alpacunapi maipi causanajurca paipaj llactapuracuna; shina Nefipaj shimirimaita yachachi callarirca Lamanitacunapaj tucui llactapuracunapi.

5 Caishuhuan chaishuhuan ali llactapuracuna carca; shina cashpapash Diosta na rijsircachu; Amulónpaj huauquicunapash Apunchij paicunapaj Diosmanda na yachachirca, Moiséspaj catichunbacha saquishcacunatapash, Abinadípaj shimicunatapash na yachachirca.

6 Ashtahuangari paicunata yachachirca tandachishca quilcanata alichichun, paicuna quilcai ushachun shujmanda cutishujman.

7 Shina Lamanitacuna mirai callarirca charijyashpa, caishuhuan, chaishuhuan jatushpa randishpa callarirca, jatunyarcapash, yachashcacuna cai callarirca, yachashca llactapuracuna, cai pachapaj yachaihuan, ari, ninan yachashca llactapuracuna, tucui laya na ali ruraicunapi cushijujcuna, shuhuaipipash, ashtahuangari na paicunapaj huauquipuracunata.

8 Cunan yalishca jipa Amulón paipaj autoridadta churai callarirca Almaman, paipaj huauquicunamanbash, paita na ricunayachishpa cati callarirca, Amulónpaj huahuacuna Almapaj huahuacunata na ricunayachishpa cati callarichirca.

9 Amulón rijsirca Alma, jatun mandajpaj sacerdote cashcata, pai crishca carca Abinadípaj shimicunata, jatun mandajpaj ñaupamanda calpachishca carca, chaimanda paita fiñashca carca; Lamán jatun mandajpaj munaiman curishca carca, shina cashpapash paipaj autoridadta churarca, shinlli trabajocunatapash churarca, trabajanajujta ricujcunatapash churarca.

10 Yalishca jipa paicunapaj llaquicuna jatunbacha carca, chaimanda Diosta ninandapacaha mañai callarirca.

11 Amulón mandarca paicuna ama ashtahuan mañachun; ricuj runacunata churarca paicunata cuidachun, pitapash Diosta mañanajujta tupashpaca huañuchichun.

12 Alma, paipaj llactapuracuna na alsarca paicunapaj shimicunata Apunchij paicunapaj Diosta, ashtahuangari paicunapaj shungucunata paipi jicharca; pai yacharca paicunapaj shungucunapaj yuyaicunata.

13 Yalishca jipa Apunchijpaj shimi shamurca paicunapaj llaquicunapi, nishpa: Cangunapaj umacunata vichai alsaichi, animarichi, ñuca yachani conveniota imata canguna rurashcanguichi ñucahuan; ñuca conveniota rurasha ñuca llactapuracunahuan, huatai tucushcashnamanda cacharichisha.

14 Fangallayachishapashmi quipicunata imata cangunapaj rigra jahuacunapi churashcata, na sentinguichipashchu huashacunapi cajta, huatai tucushcashnapi cashpapash; ñuca caita rurasha jipaman canguna testigocuna cachun, canguna ciertopacha yachanguichi ñuca, Apunchij Dios, ñuca llactapuracunata llaquicunapi ricuj shamuni.

15 Cunan yalishca jipa quipicuna imata Almaman, paipaj huauquicunamanbash churashcata fangallayachishca carca; ari, Apunchij shinlliyachirca shina quipicunata fangalla apai usharca, paicuna cushijuihuan, pacienciahuan quimirirca Apunchijpaj tucui munashcaman.

16 Yalishca jipa paicunapaj fe, pacienciapash jatunbacha carca, Apunchijpaj shimi cutin shamurca, nishpa: Consolarichi, caya punlla ñuca cangunata huatai tucushcashnamanda cacharichisha.

17 Almata nirca: Quiquin ringui cai llactapuracunata ñaupashpa, ñuca quiquinhuan risha, cai llactapuracunata huatai tucushcashnamanda cacharichisha.

18 Cunan yalishca jipa Alma, paipaj huauquicunahuan tutapi paicunapaj ataju llamacunata tandachirca, paicunapaj murucunatapash; ari, tucui tuta paicunapaj ataju llamacunata tandachinajurca.

19 Tutamandapi Apunchijca Lamanitacunaman ninan puñunaita cachamurca, ari, tucui trabajanajujcunapaj ricujcunapash sumajta puñunajurca.

20 Alma, paipaj llactapuracuna jichushca pambaman rirca; tucui punlla purishpa paicunapaj facha huasicunata pugru pambapi shayachirca, Alma pugru pambata shutichirca, jichushca pambapi pai pushajuimanda.

21 Ari, Alma pugru pambapi shutichirca Diosta ninanda pagui nirca paicunahuan ali cashca caimanda, paicunapaj quipicunata fangallayachishcamanda, huatai tucushcashnamanda cacharichishcamanda; paicuna huatai tucushcashnapi carca, nipipash na cachari usharca, Apunchij paicunapaj Dioslla usharca.

22 Diosta pagui nirca, ari, tucui runacuna, tucui huarmicuna, tucui huahuacuna parlai ushajcuna paicunapaj shimicunata vichai alsarca Diosta alicachishpa.

23 Cunan Apunchij Almata nirca: Utsiai, llujshi cai alpamanda can, cai llactapuracunapash, Lamanitacuna rijcharishcami, catimunajunmi; chaimanda cai alpamanda llujshi, ñuca Lamanitacunata cai pugru pambapi trancasha, cai llactapuracunata ama catichun.

24 Yalishca jipa pugru pambamanda rirca, jichushca pambapi purishpa rirca.

25 Jichushca pambapi chunga ishcai punllacunata cashpa jipa Zarahemla alpaman chayarca; jatun mandaj Mosíahpash cushijuihuan chasquirca.