1 Afei aber a Mosiah yɛɛ iyi wiei no, ɔsomaa ma wɔkɔr asaase no nyinara do wɔ no nkorɔfo no nyinara mu kebisaa hɔn nyia wɔpɛ dɛ ɔyɛ hɔn hen.

2 Na ɔbaa dɛ nkorɔfo no buaa dɛ: Yɛpɛ dɛ wo babanyin Aaron yɛ hɛn hen na hɛn hwɛdofo.

3 Afei aber yi nna Aaron kɔ Nephi asaase do, dɛm ntsi ɔhen no enntum ammfa ahendzi no amma no; nna Aaron noara so ammpɛ ahendzi no; nna ^aMosiah ne mbabanyin no so hɔn mu biara ammpɛ dɛ ɔbɛgye ahendzi no ato no do.

4 Dɛm ntsi, ɔhen Mosiah somaa bio ma wɔkɔr nkorɔfo no mu; nyew ɔkyerɛɛw nwoma mpo ma wɔdze kɔr nkorɔfo no hɔ. Na nsɛm a ɔkyerɛwee nye dɛ:

5 Hwɛ, O hom a hom yɛ mo nkorɔfo, anaa mo nuanom, na dɛm na mefa hom dɛ hom yɛ, mepɛ dɛ hom susu dza wɔafrɛ hom dɛ hom nsusu ho yi—osiandɛ hom pɛ dɛ hom nya ^aɔhen.

6 Afei merema hom atse ase dɛ nyia ahendzi no dzi wɔ no no atwe asan, na ɔse ɔrenngye ahendzi no.

7 Na afei sɛ wɔfa obi fofor hyɛ n’ananmu a, hwɛ musuro dɛ wentwiwentwi bɔsoɛr wɔ hom mu. Na woana nyim dɛ annhwɛ a me babanyin no a ahendzi dzi wɔ no no bɛsesa n’adwen na no bo efuw na ɔatwe dɔm yi mu fa akã noho, na dɛm no bɛma akõkoekõ na wentwiwentwi aba hom mu, na dɛm bɛma wɔakã bɔgya pii egu na wɔakontom Ewuradze n’akwan mu, nyew, na wɔasɛɛ akra pii.

8 Afei mese hom dɛ hom mma yenhu nyansa na yensusu dɛm ndzɛmba yi ho yie, osiandɛ yennyi tum biara a yɛdze bɛsɛɛ me babanyin no, nna yennyi kwan dɛ yɛsɛɛ obiara a wobeyi no dɛ ɔnhyɛ n’ananmu.

9 Na sɛ me babanyin no san n’ekyir wɔ ahantanyɛ mu na ɔsan dwendwen dza ɔakã ho, na ɔper n’ahendzi ho a ɔbɛma ɔno nye nkorɔfo yi nyinara so ayɛ bɔn pii.

10 Na afei hom mma yenhu nyansa na yɛnhwɛ dɛm ndzɛmba yi kwan, na yɛnyɛ dza ɔdze asomdwee bɛbrɛ nkorɔfo yi.

11 Dɛm ntsi, mebɛyɛ hom hen me nda a aka nyinara; naaso, hom mma ^ayenyi ^batsɛmbuafo, ma wombu nkorɔfo yi atsɛn dɛ mbrɛ hɛn mbra tse; na yɛbɛhyehyɛ ndzɛmba nyinara fofor dze ama hɔn, na yebeyi enyansafo ma wɔayɛ atsɛmbuafo, ama woeebu nkorɔfo yi atsɛn dɛ mbrɛ Nyame ne mbrasɛm tse.

12 Afei oye ma nyimpa dɛ Nyame bobu no atsɛn sen ɔdasanyi osiandɛ Nyame n’atsɛmbu yɛ pɛrpɛr daa nyinara, na nyimpa dasanyi n’atsɛmbu dze ɔnntse dɛm.

13 Dɛm ntsi sɛ ɔbɛyɛ yie dɛ hom benya ^anyimpa a wodzi pɛrpɛr ma wɔayɛ hom ahemfo, hɔn a wobotum ahyehyɛ Nyame ne mbra, na woebu nkorɔfo yi atsɛn dɛ mbrɛ ne mbrasɛm tse a, nyew, sɛ hom benya ahemfo a wobotum mpo ayɛ dza m’egya ^bBenjamin yɛɛ dze maa nkorɔfo yi a—Mese hom dɛ, sɛ dɛm adze yi botum esi daa a nkyɛ obeye dɛ hom benya ahemfo daa ma wɔahwɛ hom do.

14 Na emi mara mpo medze mo tum nye nyansa a menya nyinara abɔ mbɔdzen dɛ medze bɛkyerɛkyerɛ hom Nyame ne mbrasɛm, na mama asomdwee etsim wɔ asaase nyinara do, amma akõkoekõ anaa wentwiwentwi, anaa adzewia, anaa epoobɔ, anaa ewudzi, anaa emumuyɛ biara ennsi;

15 Na obiara a ɔyɛɛ emumuyɛ no, ^amotwee n’aso dɛ mbrɛ mbra a hɛn egyanom dze maa hɛn no tse.

16 Afei mese hom dɛ, ɔnam dɛ nyimpa nyinara nndzi pɛrpɛr ntsi, onnhia dɛ hom benya ɔhen anaa ahemfo ma wɔahwɛ hom do.

17 Na hwɛ, ^aemumuyɛ dodow a ɔhen ^bomumuyɛnyi botum ama wɔayɛ, nyew, na hwɛ ɔsɛɛ kɛse botum aba!

18 Nyew, hom nkaa ɔhen Noah, ^an’emumuyɛdze nye n’ebusudze nye no nkorɔfo so hɔn emumuyɛdze nye hɔn ebusudze. Hwɛ ebɛn ɔsɛɛ kɛse na ɔbaa hɔn do; na bio, osian hɔn bɔn ntsi wɔkɔr ^bnkowaasom mu.

19 Na sɛ nnyɛ hɔn nyansaa nyinara Bɔadze no bɛyɛɛ ntamugyinafo ma wonuu hɔnho nokwar mu a, nkyɛ wɔda ho wɔ nkowaasom mu besi ndɛ.

20 Mbom hwɛ, ɔgyee hɔn osiandɛ ^awɔbrɛɛ hɔnho adze wɔ n’enyim; na ɔnam dɛ ^bwosũu dzendzenndzen guu no do ntsi oyii hɔn fii nkowaasom mu; na dɛm na Ewuradze dze no tum yɛ edwuma wɔ adasamba mu wɔ akwan nyinara mu, ɔtsen ^cn’ehumbɔbɔr abasa wɔ hɔn a wɔdze hɔn ^dwerɛ twer no no do.

21 Na afei hwɛ, mese hom dɛ hom runntum nntu ɔhen omumuyɛnyi adze do gyedɛ hom dua wentwiwentwi pii do, na hom kã bɔgya pii gu.

22 Na hwɛ, ɔwɔ ^aanyɛnkofo wɔ emumuyɛ mu, na ɔwɔ n’aweɔmfo so wɔ ne nkyɛn; na ɔbɛtsetsew hɔn a wodzii adze wɔ tsenenee mu no hɔn mbra mu egu n’enyim; na oetsiatsia Nyame ne mbrasɛm do wɔ n’ananadze.

23 Na ɔayɛ mbra ama no nkorɔfo, nyew, mbra a ɔnye ^an’emumuyɛdze bra sɛ; na hɔn a woenndzi ne mbra do no ɔama wɔasɛɛ hɔn; na hɔn a wɔbɛtsew etua wɔ no do no ɔbɛma no nsordaafo akɔ nye hɔn akɔkõ; na dɛm na ɔhen a ɔnnyɛ tseneneenyi yɛ dze kontom akwan tsenenee.

24 Na afei hwɛ mese hom dɛ, onnyi dɛ dɛm mbusu yi ba hom do.

25 Dɛm ntsi, hom ndua nkorɔfo no ndze do nyi atsɛmbuafo a wobodua mbra a hom egyanom dze egya no do ebua atsɛn, dza ɔtsen, na ɔyɛ mbra a ofi Ewuradze no.

26 Afei ɔnntɔ ka dɛ biribi a nkorɔfo no pɛ na wɔbɛma hɔn ndze do akã no rennyɛ adze papa; na mbom ɔtaa ka dɛ dza nkorɔfo no mu kumaabi pɛ no nnyɛ adze pa; dɛm ntsi hom nhwɛ iyi ho mfa nyɛ hom mbra—dɛ hom betsie nkorɔfo no hɔn ndze na hom dze edzi hom dwuma.

27 Na ^asɛ mber bi ba ma nkorɔfo yi fa dza ɔyɛ emumuyɛ a, nna mber aso dɛ Nyame n’atsɛmbu bɛba hɔn do; nyew, nna mber asõ dɛ ɔdze ɔsɛɛ kɛse ba hom do dɛ mbrɛ ɔdze aba asaase yi do pɛn no.

28 Na afei sɛ hom wɔ atsɛmbuafo a wommbu hom atsɛn dɛ mbrɛ mbra no a wɔdze ama hɔn no tse a, hom botum ama ɔtsɛmbuanyi panyin ebu hɔn atsɛn.

29 Sɛ hom atsɛmbuafo mpanyimfo no emmbu atsɛn tsenenee a, hom mma hom atsɛmbuafo nkumaa no hɔn mu kumaabi mpon nhyia, na wombu atsɛmbuafo mpanyimfo no atsɛn dɛ mbrɛ dɔm no se.

30 Na mehyɛ hom dɛ hom nyɛ dɛm ndzɛmba yi wɔ Ewuradze ho suro mu; na mese hom dɛ hom nyɛ dɛm ndzɛmba yi, osiandɛ hom nnyi ɔhen; ama sɛ nkorɔfo yi yɛ bɔn nye emumuyɛdze a, no ho mbuae ebogu hɔnankasa hɔn etsifi.

31 Na hwɛ mese hom dɛ, nyimpa dodowara hɔn bɔnyɛ fir hɔn ahemfo hɔn emumuyɛdze; dɛm ntsi hɔn emumuyɛ ho mbuae gu hɔn ahemfo etsifi.

32 Na afei memmpɛ dɛ ^ansonsonee biara ba asaase yi do, nkanka wɔ mo nkorɔfo mu; mbom mepɛ dɛ asaase yi yɛ ^bahotɔ asaase na ^cɔdasanyi biara n’enyi bɛgye ne kyɛfa nye ne ndzinoa ho, wɔ mber dodow biara a ɔbɔsɔ Ewuradze enyi dɛ ɔbɛma yɛatsena asaase yi do no, nyew wɔ mber dodow biara a hɛn asefo bɛtsena asaase yi enyi do no.

33 Na ndzɛmba pii na ɔhen Mosiah kyerɛwee dze maa hɔn, ɔkãa nsɔhwɛ nye akotorka pii a otwar dɛ ɔba ɔhen tseneneenyi do, nyew, dza ɔfa no nkorɔfo hɔn kra mu atseetsee nyinara, nye no nkorɔfo hɔn ehwinhwin so nyinara ho; na ɔkyerɛkyerɛɛ ne nyinara mu kyerɛɛ hɔn.

34 Na ɔkãa kyerɛɛ hɔn dɛ ɔmmfata dɛ dɛm ndzɛmba yi si; mbom asodzi no bɔsoa hɔn nyinara, ama ɔdasanyi biara aasoa ne kyɛfa.

35 Na ɔkãa amandzehu a sɛ wonya ɔhen a ɔnnyɛ tseneneenyi ma ɔhwɛ hɔn do a, otwar dɛ ɔba hɔn do kyerɛɛ hɔn.

36 Nyew, n’emumuyɛ nye n’ebusudze nye akõkoekõ na wentwiwentwi nye bɔgyakã nye adzewia na epoobɔ, nye ndwamambɔ, na emumuyɛ ahorow nyinara a worunntum nnkan—ɔsee hɔn dɛ ɔmmfata dɛ dɛm ndzɛmba yi nyinara si osiandɛ otsia Nyankopɔn ne mbrasɛm.

37 Na afei ɔbaa dɛ aber a ɔhen Mosiah somaa ma wɔdze dɛm nsɛm yi kɛmaa nkorɔfo no wɔgyee too mu dɛ ne nsɛm no yɛ nokwar.

38 Dɛm ntsi wɔammper dɛ wɔbɔhwehwɛ ɔhen bio, na ɔbɛyɛɛ hɔn ehiasɛm mbordo dɛ wɔbɔhwɛ ma ɔdasanyi biara enya ne kyɛfa pɛpɛɛpɛr wɔ asaase nyinara do; nyew, na ɔdasanyi biara gyee too mu dɛ obeyi nankasa no bɔn ano.

39 Dɛm ntsi, ɔbaa dɛ wɔboaboaa hɔn ano ekuwekuw wɔ asaase no do, kyerɛɛ hɔn adwen wɔ hɔn a wɔsɛ dɛ wɔyɛ hɔn atsɛmbuafo, ma woeebu hɔn atsɛn dɛ mbrɛ ^ambra a wɔdze ama hɔn no tse; na hɔn enyi gyee mbordo osian ^bahotɔ a wɔdze ama hɔn no ntsi.

40 Na dɔ a wɔwɔ wɔ Mosiah ho no yɛɛ dzen; nyew, wɔdze enyidzi kɛse maa no sen obiara; na wohun dɛ ɔnnyɛ osisifo a ɔreper hwehwɛ mfaso, nyew, ɔronnhwehwɛ ahonyadze a ɔsɛɛ ɔkra; osiandɛ ɔanngyegye sika emmfi hɔn hɔ, anaadɛ n’enyiwa anngye wɔ bɔgyakã ho; mbom ɔmaa ^aasomdwee baa asaase no do ama wɔaagye no nkorɔfo no efi nkowaasom ahorow nyinara mu; dɛm ntsi, wɔdze enyidzi maa no, nyew, enyidzi kɛse a wɔto ho abaw a onnhyia.

41 Na ɔbaa dɛ woyii ^aatsɛmbuafo dɛ wɔnhwɛ hɔn do, anaadɛ, wombu hɔn atsɛn dɛ mbrɛ mbra no tse, na wɔyɛɛ iyi wɔ asaase no nyinara do.

42 Na ɔbaa dɛ woyii Alma ma ɔbɛyɛɛ ɔtsɛmbuanyi panyin a odzi kan, nna ɔyɛ sɔfopanyin so, na n’egya, ɔdze dzibew no hyɛɛ no no, na ɔdze asɔr no mu dwumadzi nyinara hyɛɛ ne nsa.

43 Na afei ɔbaa dɛ Alma ^anantseew Ewuradze n’akwan mu, na odzii ne mbrasɛm do, na obuu atsɛn tsenenee, na asomdwee baa asaase no nyinara do kyɛree.

44 Na dɛm na atsɛmbuafo no hyɛɛ ase dzii adze wɔ Zarahemla asaase nyinara do, wɔ nkorɔfo a wɔfrɛ hɔn Nephifo nyinara do; na Alma nye ɔtsɛmbuanyi panyin a odzii kan.

45 Na afei ɔbaa dɛ n’egya wui nna oedzi mfe eduowɔtwe ebien, na ne nyinara mu no odzii Nyankopɔn ne mbrasɛm do.

46 Na ɔbaa dɛ Mosiah so wui wɔ n’ahendzi mfe eduasa ebiasa mu wɔ aber a nna oedzi ^amfe eduosia ebiasa; na wɔka ne nyinara bɔmu a, ɔyɛ mfe ahaenum nye akron fitsi aber a Lehi fii Jerusalem no.

47 Na dɛm na Nephi no nkorɔfo hɔn ahemfo hɔn ahendzi sii baa ewiei; na dɛm na Alma a ɔyɛ hɔn asɔr ne farbaa, no nkwa nda sii baa ewiei.