1 Na afei ɔhen Mosiah see dɔm no nyinara dɛ wɔmboa hɔn ano.

2 Afei Nephi ne mba a wɔwɔ hɔ no nndɔɔ sõ pii, anaadɛ hɔn a wɔyɛ Nephi n’asefo no nndɔɔ sõ pii dɛ ^aZarahemla no nkorɔfo, na ɔno yɛ ^bMulek n’asenyi, na hɔn so wɔnye no fi sar no do bae.

3 Na Nephi no nkorɔfo nye Zarahemla no nkorɔfo nndɔɔ sõ pii wɔ hɔ dɛ Lamanfo; nyew, wonndu hɔn mu fã mpo.

4 Na afei Nephi no nkorɔfo no nyinara boaa hɔn ano, na Zarahemla no nkorɔfo nyinara so dɛmara, na wɔboaa hɔn ano ma wɔyɛɛ ekuw ebien.

5 Na ɔbaa dɛ Mosiah kenkanee, na ɔmaa hɔn so wɔkenkaan Zeniff ne nkyerɛwee no kyerɛɛ no nkorɔfo no; nyew, ɔkenkaan Zeniff no nkorɔfo hɔn nkyerɛwee fi ber a wofii Zarahemla asaase do kesi ber a wɔsaan hɔn ekyir bio bae.

6 Na ɔkenkaan Alma na no nuanom ho nsɛm nye dza ɔfa hɔn amandzehu ho fitsi aber a wofii Zarahemla asaase do dze kɛpem aber a wɔsanee baa bio.

7 Na afei ber a Mosiah dze nkyerɛwee no a ɔrekenkan no baa ewiei no, no nkorɔfo no a wɔkaa wɔ asaase no do hɔ no, ho dwuruuw hɔn na ɔyɛɛ hɔn ahobow.

8 Nna wonnyim dza wɔdwen wɔ ho koraa; na ber a wohun hɔn a ^awoyii hɔn fii nkowaasom mu no, dɛw mbordo hyɛɛ hɔn akoma mu ma.

9 Na bio, ber a wɔdwendween hɔn enuanom a Lamanfo ekuku hɔn ho no, awerɛhow hyɛɛ hɔn mã, na wokyii nyinsuwa pii.

10 Na bio, ber a wɔdwendween Nyankopɔn ne papayɛ na no tum a ɔdze gyee Alma nye no nuanom fii Lamanfo nsamu na oyii hɔn fii nkowaasom mu ho a ɔnkyɛree no, wɔmaa hɔn ndze do dze ndaase maa Nyankopɔn.

11 Na bio, ber a wɔdwendween Lamanfo a wɔyɛ hɔn enuanom no hɔn bɔn nye ɔsɛe tsebew a wɔwɔ mu no ho no, ^ayaw na awerɛhow hyɛɛ hɔn do dze maa hɔn ^bakra n’eyiedzi.

12 Na ɔbaa dɛ hɔn a wɔyɛ Amulon nye n’enuanom, no a wɔfaa Lamanfo hɔn mbabaa yɛɛ hɔn yernom no, hɔn mba no werɛ poow hɔn egyanom hɔn suban, ntsi wɔammpɛ dɛ wɔdze hɔn egyanom edzin bɛfrɛ hɔn bio, dɛm ntsi wɔfaa Nephi ne dzin too hɔn do ma wɔfrɛɛ hɔn Nephi ne mba na wɔkaan hɔn foraa hɔn a wɔfrɛ hɔn Nephifo no.

13 Na afei dɔm nyinara a wɔwɔ Zarahemla no ^awɔkaan hɔn foraa Nephifo no, osiandɛ wɔammfa ahendzi no amma obiara, gyedɛ hɔn a wɔyɛ Nephi n’asefo.

14 Na afei ɔbaa dɛ ber a Mosiah wiee kasa na ɔdze dza ɔrekenkan no so baa ewiei no, ɔpɛɛ dɛ Alma so bɛkasa akyerɛ dɔm no.

15 Na Alma kasaa kyerɛɛ hɔn wɔ aber a nna wɔaboa hɔn ano ekuwekuw akɛse akɛse no, na ofii kuw kor do kɔr kor so do kɛkyerɛkyerɛɛ dɔm no nnuho nye gyedzi wɔ Ewuradze mu.

16 Na ɔhyɛɛ Limhi nye n’enuanom no a woyii hɔn fii nkowaasom mu no nkuran, ma wɔakaa dɛ Ewuradze na ɔgyee hɔn.

17 Na ɔbaa dɛ ber a Alma kyerɛkyerɛɛ dɔm no ndzɛmba pii, na ɔnye hɔn wiee kasa no, ɔhen Limhi pɛɛ dɛ wonuma no; na no nkorɔfo nyinara so pɛɛ dɛ wonuma hɔn so.

18 Dɛm ntsi, Alma kɔr nsu no mu na ^aonumaa hɔn dɛ mbrɛ ɔyɛɛ no pɛpɛɛpɛr dze maa n’enuanom no wɔ ^bMormon esu mu no; nyew, na dodowara a onumaa hɔn no bɔdɔɔm Nyame n’asɔr; na wɔyɛɛ iyi osian hɔn gyedzi a wɔwɔ no wɔ Alma ne nsɛm no mu ntsi.

19 Na ɔbaa dɛ ɔhen Mosiah maa Alma kwan dɛ ɔnkyekyer nsɔr wɔ Zarahemla asaase nyinara do; na ɔmaa no ^atum dɛ ɔnhyɛ asɔfo na onyi akyerɛkyerɛfo mfa hɔn nsisi asɔr biara ano.

20 Afei ɔmaa wɔyɛɛ no dɛm osiandɛ dɔm no dɔɔ sõ dodow, ma kyerɛkyerɛnyi kor nnkotum ahwɛ hɔn nyina do; anaadɛ hɔn nyinara runntum nntsie Nyame n’asɛm wɔ nhyiamu dan kor pɛr mu.

21 Dɛm ntsi wɔboaboaa hɔn ano ekuwekuw, na iyi na wɔfrɛɛ hɔn asɔrasɔr no; asɔr biara wɔ n’asɔfoe nye n’akyerɛkyerɛfo, na sɔfo biara so kã asɛmpa a oenya efi Alma n’anomu.

22 Na dɛm ntsi; nna ɔammfa ho dɛ asɔrasɔr pii wɔ hɔ; hɔn nyinara yɛ ^aasɔr kor, nyew, Nyame n’asɔr; na wɔannka asɛmpa biara wɔ asɔrasɔr no nyinara mu hɔ gyedɛ dza ɔfa nnuho nye gyedzi wɔ Nyame mu.

23 Na afei nna asɔrasɔr esuon na ɔwɔ Zarahemla asaase do. Na ɔbaa dɛ obiara a onyaa pɛ dɛ ɔdze Christ ne ^adzin, anaa Nyame ne dze bɔto no do no, ɔkɔdɔɔm Nyame ne nsɔr no.

24 Na wɔfrɛɛ hɔn Nyame no ^ankorɔfo. Na Ewuradze huee no Sunsum guu hɔn do, na wohyiraa hɔn, na wɔyɛɛ prɔmprɔm wɔ asaase no do.