1 Ket ita idi nangngeg ti ari dagitoy a balikas, kinunana kadagiti saserdotena: Iyadayoyo daytoy a tao, ken patayenyo; agsipud ta ania ti pakaseknantayo kenkuana, agsipud ta agmauyong isuna.

2 Ket immasideg ken pinadasda a gammatan isuna; ngem naiwalinna ida, ket kinunana kadakuada:

3 Saandak a sagiden, agsipud ta saplitennakayo ti Dios no gammatandak, agsipud ta saanko pay naisao ti mensahe nga inted ti Apo nga isaok; wenno naibaga kadakayo ti dinawatyo a nasken nga ibagak; ngarud, saan nga ipalubos ti Dios a mapapatayak ita.

4 Ngem nasken a tungpalek dagiti bilin nga imbilin kaniak ti Dios; ket kaungetdak agsipud ta imbagak kadakayo ti kinapudno. Ket manen, inkeddengyo nga agmauyongak agsipud ta insaokon ti balikas ti Dios.

5 Ita napasamak a kalpasan ti panangisao ni Abinadi kadagitoy a balikas a saan nga impadas a gammatan dagiti tattao ni ari Noe, agsipud ta adda kenkuana ti espiritu ti Apo; ket nagsilnag ti rupana iti napalaus a rimat, uray pay a kas iti napasamak ken ni Moises idiay bantay ti Sinai, bayat iti pannakisaona iti Apo.

6 Ket nagsao nga addaan iti bileg ken turay manipud iti Dios; ket intuloyna dagiti balikasna, a kunana:

7 Napaneknekanyo nga awan ti bilegyo a mangpatay kaniak, ngarud ileppasko ti mensahek. Wen, ket matarusak a nasair dagiti pusoyo agsipud ta ibagak kadakayo ti kinapudno maipanggep kadagit kinadangkesyo.

8 Wen, ket pinunnona kayo dagiti balikasko iti kinadatdatlag ken kinasiddaaw, ken pungtot.

9 Ngem ileppasko ti mensahek; ket kalpasanna awan ti aniamanna iti mapanak, no la ket maisalakanak.

10 Ngem daytoy ti maibagak kadakayo, no ania man ti aramidenyo kaniak, kalpasan daytoy, kastanto ti kita wenno anniniwan dagiti banag a dumteng.

11 Ket ita ibasak kadakayo dagiti nabati kadagiti bilin ti Dios, ta matarusak a saanda a naisurat kadagiti pusoyo; matarusak nga inadalyo ken insuroyo ti kinadangkes iti kadakkelan a paset ti panagbiagyo.

12 Ket ita, lagipenyo nga imbagak kadakayo: Saankayo nga agaramid iti uray ania a kinitikitan a ladawan, wenno ti uray ania a kapadpada ti parsua sadi langit, wenno dagiti banag nga adda iti uneg ti daga, wenno dagiti banag nga adda iti danum iti uneg ti daga.

13 Ket manen: Dikayo agkurno kadakuada, wenno agserbi kadakuada; ta siak nga Apo a Diosyo naimunak a Dios, sarsarungkarak dagiti kinadangkes dagiti amma kadagiti ubbing, iti maikatlo ken maikapat a sangkaputotan dagiti manggurgura kaniak;

14 Ken mangipakita iti asik kadakuada a rinibu a mangay-ayat kaniak ken mangtungtungpal kadagiti bilinko.

15 Dimo aramaten ti nagan ti Apo a Diosmo iti barengbareng; agsipud ta saan ibilang ti Apo nga awanan basol ti mangaramat iti naganna a barengbareng.

16 Ti aldaw a panaginana ket lagipem, a ngilinem daytoy.

17 Agbannogka iti innem nga aldaw, ket aramidem amin a trabahom;

18 Ngem iti maikapito nga aldaw, ti aldaw a panaginana ti Apo a Diosmo, saanka nga agtrabaho iti uray ania, sika, wenno ti lalaki nga anakmo, wenno ti babai nga anakmo, ti lalaki a katulongam, wenno ti babai a katulongam, wenno dagiti bakam, wenno ti gangganaet nga adda iti uneg dagiti ruanganmo;

19 Agsipud ta iti innem nga aldaw inaramid ti Apo ti langit ken daga, ken ti baybay, ken amin nga adda iti unegda; gapuna binendisionan ti Apo ti aldaw a panaginana, ket pinagbalinna a nasantuan.

20 Dayawem ti ama ken ti inam, tapno agpaut ti aldawmo iti daga nga inted kenka ti Apo a Diosmo.

21 Dika mamapatay.

22 Dika makiabig. Dika agtakaw.

23 Dika agparbo a maibusor iti kaarrubam.

24 Dimo aguman ti balay ti kaarrubam, dimo aguman ti asawa ti kaarrubam, wenno ti lalaki a katulonganna, wenno ti babai a katulonganna, wenno ti bakana, wenno ti asnona, wenno ania man a kukua ti kaarrubam.

25 Ket napasamak a kalpasan ti panangigibus ni Abinadi kadagitoy a pagsasao nga imbagana kadakuada: Insuroyo kadi dagitoy a tao a nasken nga aramiden amin dagitoy a banag a panangtungpal kadagitoy a bilin?

26 Kunak kadakayo, Saan; ta no koma inaramidyo, saan koman nga imbilin ti Apo nga umayak ket ipadtok ti dakes a mapasamak maipanggep kadagitoy a tao.

27 Ket ita imbagayo a dumteng ti pannakaisalakan babaen iti linteg ni Moises. Kunak kadakayo a rumbeng unay a nasken a tungpalenyo pay ti linteg ni Moises; ngem kunak kadakayo, a dumtengto ti kanito a saanen a rumbeng a tungpalen ti linteg ni Moises.

28 Kangrunaanna pay, kunak kadakayo, a ti pannakaisalakan saan a dumteng babaen ti linteg laeng; ken no saan a gapu ti pannubbot, nga aramiden a mismo ti Dios para kadagiti basol ken kinadangkes dagiti taona, ta saan a maliklikan ti pannakaungawda, uray pay ti kinaadda ti linteg ni Moises.

29 Ket ita kunak kadakayo a rumbeng unay nga adda ti linteg a naited kadagiti annak ti Israel, wen, uray pay ti kaigetan a linteg; agsipud ta nasukirda a tattao, alistoda nga agaramid iti kinadangkes, ken nabannayatda a manglagip iti Apo a Diosda;

30 Ngarud adda linteg a naited kadakuada, wen, ti linteg ti panagaramid ken dagiti ordinansa, ti linteg a surotenda a siiget iti inaldaw, tapno kanayon a mangipalagip kadakuada iti Dios ken ti pagrebbenganda kenkuana.

31 Ngem kitaen, kunak kadakayo, nga amin dagitoy a banag ti kita dagiti banag a dumteng.

32 Ket ita, naawatanda kadi ti linteg? Kunak kadakayo, Saan, saanda amin a naawatan ti linteg; ket gapu daytoy ti kinatangken dagiti pusoda; agsipud ta saanda naawatan nga awan ti asino man a tao a maisalakan malaksid no babaen ti pannubbot ti Dios.

33 Ta kitaen, saan kadi impadto ni Moises kadakuada ti maipanggep iti yaay ti Mesias, ket nasken a subboten ti Dios dagiti taona? Wen, ken uray pay ti amin a propeta a namadto manipud iti punganay ti lubong—saanda kadi nagsao iti agarup maipanggep kadagitoy a banag?

34 Saanda kadi imbaga a bumaba a mismo ti Dios kadagiti annak ti tattao, ket agtagitao, ket mapan nga addaan iti naidaklan a bileg iti rabaw ti daga?

35 Wen, ken saanda kadi met imbaga nga ipatungpalna ti panagungar dagiti natay, ket isu, a mismo, mairurumen ket agsagabanto?