1 Cunan imaura jatun mandaj cai shimicunata uyashca cashpa, paipaj sacerdotecunata nirca: Apaichi cai runata, huañuchichi; ima ricunata na charinchichu, paica juizu illa can.

2 Ñaupaman rirca paicunapaj maquicunata Abinadípapi churangapa munarca; ashtahuangari pai na saquirirca, paicunaman nirca:

3 Ama tacarihuaichi, Dios cangunata chugrichingami cangunapaj maquicunata ñuca jahuapi churajpica, ñuca na cushcanichu villachita imata Apunchij cachamurca cuchun; na nishcanipashchu imata canguna minishtinguichi ñuca nichun; chaimanda, Dios na saquingachu ñuca huañuchun cai punlla.

4 Ashtahuangari ñuca pactachishapachami rurachunbacha saquishcacunata imatami Dios mandahuashca; ciertopachata cangunaman nishcamanda ñucata fiñanguichi. Cutin, Diospaj shimita parlashca caimanda canguna ñucata ricushpa chasquichishcanguichi ñuca juizu illa cangui nishpa.

5 Yalishca jipa Abinadí cai shimicunata parlashca jipa jatun mandaj Noépaj llactapuracuna maquicunata Abinadípa jahuapi churangapa manllarca, Apunchijpaj Espíritu paipaj jahuapi carca; paipaj ñavi punchapamba carca ninan punchapamba caihuan, Moiséspashna Sinaí urcupi, Apunchijhuan parlajushpa.

6 Pai parlarca ushaihuan, Diospaj autoridadhuanbash; paipaj shimicunahuan catirca, nishpa:

7 Ricuichi canguna na ushaita charinguichi ñucata huañuchingapa, chaimanda ñuca tucuchini ñuca villachita. Ari, ñuca yashpa ricuipi cai cangunapaj shungucunata chugrichin ñuca ciertopachata villashcamanda cangunapaj na ali ruraicunamanda.

8 Ari, ñuca shimicuna jundachin juyaillahuan, manllarihuan, fiñaihuanbash.

9 Ashtahuangari tucuchini ñuca villaita; jipaman maiman rishpapash alimicanga, shina ñuca quishpirishca cani.

10 Ashtahuangari caitapash ninimi, imata ñucahuan ruranguichi, caimanda jipa, imashna canata shuj llandu ricuchi laya canga ima cuzascuna shamunamanda.

11 Cunan ñuca cangunaman liini Diospaj rurachunbacha saquishcacunapaj tucuchinacunata, ñuca yashpa ricuimanda cangunapaj shungucunapi caicuna na quilcashca can; ñuca yashpa ricuipi yachajushcanguichi, yachachishcanguichipash na ali ruraicunata cangunapaj causaicunata ashtahuan yalishca causashca punllacunapi.

12 Cunan, yaringuichimi ñuca nircani: Imamanbash rijchata dios ama quiquinda ruranguichu, nimatapacha jahua pachapi tiaj layata, nacashpaca ima alpaman tiajtapash, nacashpaca alpa ucu yacupi tiajtapash.

13 Cutin: Ama cunguringuichichu paicunapapi, ama paicunata sirvinguichichu; ñuca cani Apunchij quiquinba Dios ñucapalla cachun munaj Dios cani, taitacunapaj na ali ruraicunataca huahuacunapi ricuj shamuni, quimsa, chuscu miraicunacaman ñucata na ricunayachijcunata;

14 Llaquinata ricuchini huarangacunaman picunami juyaihuan ñuca rurachunbacha saquishcacunata alichin.

15 Ama yanga rimanguichu Apunchij quiquinba Diospa shutita; Apunchijca culpa illapi na charingachu paipaj shutita yanga rimajtaca.

16 Yaringui samana punllata, achilyachingui.

17 Sujta punllacunata trabajangui, quiquinba tucui ruraicunata rurangui;

18 Ashtahuangari canchis punllataca, samana Apunchijpaj quiquin Diospa, nima ruraita ama rurangui, quiquin, quiquinba churi, quiquinba ushi, quiquinba sirvij jari, quiquinba sirvij huarmi, quiquinba huagra, quiquinda ricungapa shamushca runa quiquinba huasi ucupi cajtapash;

19 Apunchijca sujta punllacunapi jahua pachata, cai alpatapash, jatun mama cochatapash, tucui caicuna causajcunatapash rurarca; chaimanda Apunchij achilyachirca samana punllata, alicachircapash.

20 Alicachingui quiquinba taitata, quiquinba mamatapash, Apunchij quiquinba Dios carashca alpapi ashtaca punllacunata causangui.

21 Ama huañuchingui.

22 Ama adulteriopi urmangui. Ama shuhuangui.

23 Quiquinpuracunata ama yanga llullata juchachishpa ninguichi.

24 Ama ñucapa cashcanman yanguichu shujpa huasita, ama ñucapa cashcanman yanguichu shujpa huarmita, shujpa sirvij runata, shujpa huagrata, shujpa burrota, nimata shujcunapata.

25 Yalishca jipa Abinadí cai shimicunata paicunaman nishpa tucuchirca: Yachachishcanguichichu cai llactapuracunaman tucui cai cuzascunata atirishpa rurachun cai rurachunbacha saquishcacunata alichichun?

26 Cangunaman nini, Na; canguna rurashca cajpica, Apunchijca na cachamuhuanmanllu carca na ali achil villachichun cai llactapuracunamanda.

27 Cunan canguna ninguichi quishpirinaca shamunmi Moiséspaj catichunbacha saquishcamanda. Cangunaman ninimi cunangamanga minishtirishca can Moiséspaj catichunbacha saquishcacunata alichina; ashtahuangari cangunaman nini, punlla shamungami ñana ashtahuan minishtirishca cangachu Moiséspaj catichunbacha saquishcacunata alichina.

28 Ashtahuanbash, cangunaman nini, quishpirinaca na shamunllu catichunbacha saquishcamandalla; shujpa juchacunamanda huañushca na caimanda, imami Dios paillata paipaj llactapuracunapaj juchacunamanda, na ali ruraicunamanda huañunga, ima rurai na tianman, paicuna tucurinmanbacha, masqui Moiséspaj catichunbacha saquishcamanda.

29 Cunan cangunaman nini minishtirishca carca shuj catinapacha tiana Israelpaj huahuacunaman cushca, ari, ruranapacha catichun saquishca cajpipash; na cazuj llactapuracuna carca; na ali ruraicunata rurangapa ñapashcuna, Apunchij paicunapaj Diosta yaringapaca unayaicuna;

30 Chaimanda catichunbacha saquishcacunata paicunaman curca, ari, shuj ricuchingapa, ordenanzacuna, catichun saquishcata punllan punllan rurachunbacha ricuna, paicunapi causa charingapa Diosta yarinata paiman ruraicunata ricuchinapash.

31 Ashtahuangari riqui, cangunaman nini, tucui cai cuzascuna carca ima shamuna cuzascunapaj ricuchinacuna.

32 Cunan, yuyaipi chasquircanguichichu catichunbacha saquishcata? Cangunaman nini, Na, na tucuilla yuyaipi chasquircachu catichunbacha saquishcata; paicunapaj shinlli shungucunamanda; paicuna na yuyaipi chasquirca maijan runapash na quishpiringachu imashpapash Diospaj jatun causachina na tiashcajpica.

33 Riqui, nachu Moisés achil villachirca Mesíaspaj shamunamanda, Dios jatun causachigrijta paipaj llactapuracunata? Ari, tucui achil villachijcuna achil villashca can cai pacha callarimandapacha—nachu paicuna parlashca shina shinalla cai cuzascunamanda?

34 Nachu paicuna nishca Diosllata urai shamunga runacunapaj huahuacunapaman, pai chasquinga runa layata, ringa jatun ushaihuan alpa jahuata?

35 Ari, nachu paicuna nishcapash huañushcacuna cutin causarinata yalichun pai apamunga, paillata, jatun llaquichi tucushca, nanachishcapash canga?