1 Pea ko ʻeni ʻi he fanongo ʻa e tuʻí ki he ngaahi lea ní, naʻá ne pehē ki heʻene kau taulaʻeikí: ʻAve ʻa e tangatá ni, pea tāmateʻi ia; he ko e hā ʻatautolu ʻe fai kiate ia, he ʻoku faha ia.

2 Pea nau ʻunuʻunu atu ʻo feinga ke puke ia; ka naʻá ne taʻofi ʻa kinautolu, ʻo ne pehē kiate kinautolu:

3 ʻOua ʻe ala kiate au, koeʻuhi ʻe taaʻi ʻa kimoutolu ʻe he ʻOtuá ʻo kapau te mou ala ʻaki homou nimá kiate au, he kuo teʻeki ai te u fakahā ʻa e pōpoaki ʻa ia naʻe fekau kiate au ʻe he ʻEikí ke u fakahaá; pea kuo ʻikai foki te u fakahā kiate kimoutolu ʻa e meʻa naʻa mou kole ke u fakahā atú; ko ia, ʻe ʻikai tuku ʻe he ʻOtuá ke tāmateʻi au ʻi he taimí ni.

4 Ka kuo pau ke u fakahoko ʻa e ngaahi fekau ʻa ia kuo fekau kiate au ʻe he ʻOtuá; pea ko e meʻa ʻi heʻeku tala kiate kimoutolu ʻa e moʻoní, ko ia ʻoku mou ʻita ai kiate aú. Pea ko e tahá, koeʻuhi ko ʻeku lea ʻaki ʻa e folofola ʻa e ʻOtuá kuo mou fakamāuʻi ai ʻoku ou fahá.

5 Pea naʻe hoko ʻo pehē kuo ʻosi lea ʻaki ʻe ʻApinetai ʻa e ngaahi lea ní naʻe ilifia ʻa e kakai ʻo e tuʻi ko Noá ke ala honau nimá kiate ia, he naʻe ʻiate ia ʻa e Laumālie ʻo e ʻEikí; pea naʻe ulo hono fofongá ʻo fuʻu ngingila ʻaupito, ʻo hangē pē ko Mōsesé, ʻi heʻene ʻi he moʻunga ʻo Sainaí, lolotonga ʻena fefolofolai mo e ʻEikí.

6 Pea naʻe lea ia ʻi he mālohi mo e mafai mei he ʻOtuá; pea naʻá ne hoko atu ʻene ngaahi leá ʻo pehē:

7 ʻOku mou vakai ʻoku ʻikai te mou maʻu ha mālohi ke tāmateʻi au, ko ia, te u fakaʻosi ʻa ʻeku leá. ʻIo, pea ʻoku ou ʻiloʻi ʻoku lavea moʻoni homou lotó koeʻuhi ko ʻeku fakahā kiate kimoutolu ʻa e moʻoní ʻi hoʻomou ngaahi fai angahalá.

8 ʻIo, pea ʻoku fakafonu ʻe heʻeku ngaahi leá ʻa kimoutolu ʻaki ʻa e fakatumutumu, mo e ofo, mo e ʻita.

9 Ka ʻoku ou fakaʻosi ʻa ʻeku leá; pea ʻo ka hili ia, ʻe tatau ai pē pe te u ʻalu ki fē, kae kehe pē ke fakamoʻui au.

10 Ka ko hono lahi pē ʻeni ʻo e meʻa te u fakahā kiate kimoutolú, ko e meʻa te mou fai kiate au, ʻamuí, ʻe hoko ia ko ha sīpinga mo ha taipe ʻo e ngaahi meʻa ʻa ia ʻe hoko.

11 Pea ko ʻeni ʻoku ou lau kiate kimoutolu ʻa hono toe ʻo e ngaahi fekau ʻa e ʻOtuá, he ʻoku ou ʻiloʻi kuo ʻikai ke tohi ia ʻi homou lotó; ʻoku ou ʻiloʻi kuo mou ako mo akonaki ʻaki ʻa e angahalá ʻi hono konga lahi ʻo hoʻomou moʻuí.

12 Pea ko ʻeni, ʻoku mou manatu naʻá ku pehē kiate kimoutolu: ʻOua naʻá ke ngaohi kiate koe ha tamapua kuo tongitongi, pe ha meʻa fakatatau ʻe taha ʻi ha meʻa ʻi he langí ʻi ʻolunga, pe ha meʻa ʻoku ʻi he fonuá ʻi lalo, pe ki ha meʻa ʻoku ʻi he vaí ʻi he lalo fonuá.

13 Pea ko ʻeni: ʻOua naʻá ke punou hifo koe kiate kinautolu, pe tauhi ki ai; he ko au ko e ʻEiki ko ho ʻOtuá, ko e ʻOtua fuaʻa au, ʻoku ou totongi ʻa e fai angahala ʻa e ngaahi tamaí ki he fānaú, ʻo aʻu ki hono tolu mo hono fā ʻo e toʻu tangata ʻo kinautolu ʻoku fehiʻa kiate aú;

14 Peá u fakahā ʻa e ʻaloʻofa ki he ngaahi toko afe ʻo kinautolu ʻoku ʻofa kiate au mo tauhi ʻeku ngaahi fekaú.

15 ʻOua naʻá ke takuanoa ʻa e huafa ʻo e ʻEiki ko ho ʻOtuá; koeʻuhí ʻe ʻikai lau ʻe he ʻEikí ko e taʻehalaia ia ʻa ia ʻokú ne takuanoa ʻa hono huafá.

16 Manatu ki he ʻaho sāpaté, ke tauhi ia ke māʻoniʻoni.

17 Ko e ʻaho ʻe ono ke ke ngāue ai, ʻo fai ai hoʻo ngāue kotoa pē;

18 Ka ko hono fitu ʻo e ʻahó ko e ʻaho sāpate ia ʻo e ʻEiki ko ho ʻOtuá, ʻoua naʻá ke fai ʻi ai ha ngāue ʻe taha, ʻa koe, pe ko ho fohá, pe ko ho ʻofefiné, pe ko hoʻo tamaioʻeikí, pe ko hoʻo kaunangá, pe ko hoʻo pulú, pe ko e muli ʻoku nofo ʻi ho lotoʻaá;

19 He naʻe ngaohi ʻe he ʻEikí ʻi he ʻaho ʻe ono ʻa e langí mo e fonuá, mo e tahí, mo e ngaahi meʻa kotoa pē ʻoku ʻi aí; ko ia naʻe tāpuakiʻi ʻe he ʻEikí ʻa e ʻaho sāpaté mo fakatapui ia.

20 Fakaʻapaʻapa ki hoʻo tamaí mo hoʻo faʻeé, koeʻuhi ke fuoloa ho ngaahi ʻahó ʻi he fonua ʻoku foaki kiate koe ʻe he ʻEiki ko ho ʻOtuá.

21 ʻOua naʻá ke fakapō.

22 ʻOua naʻá ke tono. ʻOua naʻá ke kaihaʻa.

23 ʻOua naʻá ke tukuakiʻi loi ʻa ho kaungāʻapí.

24 ʻOua naʻá ke mānumanu ki he fale ʻo ho kaungāʻapí, ʻoua naʻá ke mānumanu ki he uaifi ʻo ho kaungāʻapí, pe ki heʻene tamaioʻeikí, pe ki heʻene kaunangá, pe ki heʻene pulú, pe ki heʻene ʻasí, pe ki ha meʻa ʻe taha ʻoku ʻa ho kaungāʻapí.

25 Pea naʻe hoko ʻo pehē ʻi he fakaʻosi ʻe ʻApinetai ʻa e ngaahi lea ní, naʻá ne pehē ange kiate kinautolu: Kuo mou akonaki koā ki he kakaí ni ke nau tokanga ke fai ʻa e ngaahi meʻá ni kotoa pē koeʻuhi ke tauhi ʻa e ngaahi fekaú ni?

26 ʻOku ou pehē kiate kimoutolu, ʻIkai; he kapau naʻa mou fai pehē, kuo ʻikai fekau au ʻe he ʻEikí ke u haʻu ʻo kikite ʻaki ʻa e kovi ki he kakaí ni.

27 Pea ko ʻeni kuo mou pehē ʻoku hoko mai ʻa e fakamoʻuí ʻi he fono ʻa Mōsesé. ʻOku ou pehē kiate kimoutolu ʻoku ʻaonga ke mou kei tauhi ʻa e fono ʻa Mōsesé; ka ʻoku ou pehē kiate kimoutolu, ʻe hokosia ʻa e taimi ʻe ʻikai toe ʻaonga ai ke tauhi ki he fono ʻa Mōsesé.

28 Pea ko e tahá, ʻoku ou pehē kiate kimoutolu, ʻoku ʻikai ke hoko mai ʻa e fakamoʻuí ʻi he fonó pē; pea ka ne taʻeʻoua ʻa e fakalelei, ʻa ia ʻe fai ʻe he ʻOtuá tonu koeʻuhi ko e ngaahi angahala mo e ngaahi hia ʻa hono kakaí, pehē kuo pau ke nau malaʻia, neongo ʻa e fono ʻa Mōsesé.

29 Pea ko ʻeni, ʻoku ou pehē kiate kimoutolu, naʻe ʻaonga ke fokotuʻu ha fono ki he fānau ʻa ʻIsilelí, ʻio, naʻa mo ha fono fefeka ʻaupito; he ko ha kakai kia-kekeva ʻa kinautolu, ʻa ia ʻoku nau fakavavevave ki he angahalá, mo nau fakatuotuai ke manatuʻi ʻa e ʻEiki ko honau ʻOtuá;

30 Ko ia ai naʻe tuku ha fono kiate kinautolu, ʻio, ko ha fono ʻo e ngaahi ngāue mo e ngaahi ouau, ko ha fono naʻe totonu ke nau fai pau ki ai ʻi he ʻaho ki he ʻaho, koeʻuhi ke tokoniʻi ʻa kinautolu ke nau manatu ki he ʻOtuá mo honau fatongia kiate iá.

31 Kae vakai, ʻoku ou pehē kiate kimoutolu, ko e ngaahi meʻá ni kotoa pē ko e ngaahi sīpinga ia ʻo e ngaahi meʻa ʻe hoko maí.

32 Pea ko ʻeni, naʻe mahino koā kiate kinautolu ʻa e fonó? ʻOku ou pehē kiate kimoutolu, ʻIkai, naʻe ʻikai mahino kiate kinautolu kotoa pē ʻa e fono; pea naʻe tupu ia mei he fefeka ʻa honau lotó; he naʻe ʻikai mahino kiate kinautolu ʻe ʻikai faʻa fakamoʻui ha tangata ʻe toko taha ka ʻi he huhuʻi pē ʻa e ʻOtuá.

33 He vakai, ʻikai naʻe kikite ʻa Mōsese kiate kinautolu ʻo kau ki he hāʻele mai ʻa e Mīsaiá, pea mo e huhuʻi ʻe he ʻOtuá ʻa hono kakaí? ʻIo, pea naʻa mo e kau palōfita kotoa pē kuo kikite talu mei he kamataʻanga ʻo māmaní—ʻikai kuo nau lau ki he ngaahi meʻa ʻe niʻihi ʻo e ngaahi meʻá ni?

34 ʻIkai kuo nau pehē ʻe hāʻele hifo ʻa e ʻOtuá tonu ki he fānau ʻa e tangatá, pea maʻu kiate ia ʻa e tatau ʻo ha tangata, pea hāʻele atu ʻi he māfimafi lahi ʻi he funga ʻo e māmaní?

35 ʻIo, pea ʻikai kuo nau pehē foki te ne fakahoko ʻa e toetuʻu ʻo e maté, pea ko ia, tonu, ʻe ngaohikoviʻi ia mo fakamamahiʻi?