1 ʻIo, ʻoku ʻikai koā naʻe pehē ʻe ʻĪsaia: Ko hai kuó ne tui ki heʻemau ongoongó, pea kuo fakahā kia hai ʻa e toʻukupu ʻo e ʻEikí?

2 He te ne tupu hake ʻi hono ʻaó ʻo hangē ko ha ʻakau matengofua, pea hangē ko ha aka mei he kelekele mōmoa; ʻoku ʻikai ha sino lelei pe ha fakaʻofoʻofa ʻiate ia; pea ka tau ka mamata kiate ia, ʻoku ʻikai ha fakaʻofoʻofa ke tau manako ai kiate ia.

3 ʻOku fehiʻanekina ia pea liʻaki ʻe he kakaí; ko e tangata ia ʻo e ngaahi mamahi, pea maheni mo e loto-mamahí; pea naʻa tau fufū ʻa hotau fofongá meiate ia; naʻe manukiʻi ia, pea naʻe ʻikai te tau mahuʻingaʻia ʻiate ia.

4 Ko e moʻoni kuó ne ^afuesia ʻa hotau ngaahi ^bmamahí, ʻo ne kātakiʻi ʻetau ngaahi loto-mamahí; ka naʻa tau mahalo kuo tautea, mo taaʻi ia mei he ʻOtuá, pea mamahiʻia.

5 Ka naʻe kafo ia koeʻuhi ko ʻetau ngaahi ^amaumau-fonó, naʻe fakavolu ia koeʻuhi ko ʻetau ngaahi angahalá; naʻe hanga ʻe he tautea naʻá ne fuesiá ʻo toe ʻomi ʻa e melinó kiate kitautolu; pea ko e meʻa ʻi hono ngaahi kafó kuo tau ^bmoʻui ai.

6 Kuo tau hē kotoa pē, ʻo hangē ko e fanga ^asipi; kuo tau afe taki taha kotoa pē ki hono hala ʻoʻona; pea kuo hilifaki kiate ia ʻe he ʻEikí ʻa e ngaahi angahala ʻatautolu kotoa pē.

7 Naʻe ngaohikovia ia, pea naʻe fakamamahiʻi ia, ka naʻe ʻikai ^asiʻane lea; ʻoku tataki mai ia ʻo hangē ko e ^blami ke tāmateʻi, pea hangē ha sipi ʻoku noa ʻi he ʻao ʻo hono kau tangata kosí ka naʻe ʻikai siʻane lea.

8 Naʻe ʻave ia mei he fale fakapōpulá pea mei he fakamāú; pea ko hai ha taha te ne fakamatala ki hono tupuʻangá ʻo e meʻa ʻe hoko kiate iá? He naʻe motuhi atu ia mei he fonua ʻo e moʻuí; pea koeʻuhi ko e ngaahi maumau-fono ʻa hoku kakaí naʻe teʻia ai ia.

9 Pea naʻá ne ngaohi hono fonualotó fakataha mo e kau fai angahalá, mo e kau ^akoloaʻiá ʻi heʻene pekiá; koeʻuhi kuo ʻikai te ne fai ha ^bkovi, pea naʻe ʻikai ha kākā ʻe taha mei hono fofongá.

10 Ka naʻe finangalo ʻa e ʻEikí ke fakavolu ia; kuó ne tuku ia ki he mamahi; ʻo ka ke ka ngaohi hono laumālié ko e feilaulau koeʻuhi ko e angahala te ne mamata ki hono ^ahakó, te ne fakalōloa hono ngaahi ʻahó, pea ko e finangalo ʻo e ʻEikí ʻe tuʻumālie ia ʻi hono toʻukupú.

11 Te ne mamata ki he mamahi lahi ʻo hono laumālié, pea ʻe fiemālie ai ia; ʻi he ʻilo kiate iá ʻe fakatonuhiaʻi ʻe heʻeku tamaioʻeiki māʻoniʻoní ʻa e kakai tokolahi; he te ne ^afua ʻenau ngaahi angahalá.

12 Ko ia, te u tuku kiate ia ha ʻinasi ʻi he kakai ongoongoá, pea te ne vahevahe ʻa e koloá mo e kakai mālohí; koeʻuhi kuo mamahi hono laumālié ʻo ne pekia; pea naʻe lau ia fakataha mo e kau maumau-fonó; pea naʻá ne fua ʻa e ngaahi angahala ʻo e tokolahi, peá ne fai ʻa e ^ataukapo koeʻuhi ko e kau maumau-fonó.