1 Ko ʻeni ko ʻAlamā, ʻi he tomuʻa fakatokanga ʻe he ʻEikí ʻe haʻu ʻa e kau tau ʻa e tuʻi ko Noá kiate kinautolú, pea ʻi heʻene fakahā ia ki hono kakaí, naʻa nau tānaki leva ʻa ʻenau ngaahi takanga monumanu īkí, pea ʻave mo ʻenau kēlení, ʻo nau ʻalu ki he feituʻu maomaonganoá ʻo muʻomuʻa ʻi he kau tau ʻa e tuʻi ko Noá.

2 Pea naʻe fakamālohia ʻa kinautolu ʻe he ʻEikí, ʻo ʻikai lava ai ke maʻu ʻa kinautolu ʻe he kakai ʻo e tuʻi ko Noá ke fakaʻauha ʻa kinautolu.

3 Pea naʻa nau hola ʻo fononga ʻi he ʻaho ʻe valu ʻi he feituʻu maomaonganoá.

4 Pea naʻa nau aʻu atu ki ha fonua, ʻio, ko ha fonua matamatalelei mo fakalata, ko ha fonua naʻe ʻi ai ʻa e vai maʻa.

5 Pea naʻa nau fokotuʻu honau ngaahi fale fehikitakí, pea nau kamata ke ngoueʻi ʻa e kelekelé, ʻo kamata ke langa ha ngaahi fale; ʻio, naʻa nau faʻa ngāue, pea nau ngāue ʻo lahi ʻaupito.

6 Pea naʻe fakaʻamu ʻa e kakaí ke hoko ʻa ʻAlamā ko honau tuʻi, he naʻe ʻofeina ia ʻe hono kakaí.

7 Ka naʻá ne pehē kiate kinautolu: Vakai, ʻoku ʻikai lelei ke tau maʻu ha tuʻi; he ʻoku folofola peheni ʻe he ʻEikí: ʻOua te mou ^alau ʻoku lelei ange ha taha ʻi ha taha kehe, pe mahalo ʻe ha tangata ʻokú ne lelei ange ʻi ha taha kehe; ko ia ʻoku ou pehē kiate kimoutolu ʻoku ʻikai lelei ke mou maʻu ha tuʻi.

8 Ka neongo iá, kapau te mou lava ʻo maʻu maʻu ai pē ha kau tangata angatonu ke hoko ko homou ngaahi tuʻi pehē ʻe lelei ke mou maʻu ha tuʻi.

9 Kae manatu ki he ^aangahala ʻa e tuʻi ko Noá mo ʻene kau taulaʻeikí; pea ko au foki naʻá ku ^bʻefihia ʻi ha tauhele, peá u fai ʻa e ngaahi meʻa lahi naʻe fakalielia ʻi he ʻao ʻo e ʻEikí, ʻa ia naʻe fakatupu ai haʻaku fakatomala mamahi;

10 Ka neongo iá, ʻi he hili ha ^amamahi lahi, naʻe ʻafioʻi ʻe he ʻEikí ʻa ʻeku ngaahi tangí, ʻo ne tali ʻeku ngaahi lotú, pea kuó ne ngaohi au ko ha meʻa ngāue ʻi hono toʻukupú ke fakatafoki homou ^bfuʻu tokolahi fau ki hono ʻiloʻi ʻo ʻene moʻoní.

11 Ka neongo iá, ʻoku ʻikai te u pōlepole ʻi he meʻá ni, he ʻoku ʻikai taau mo au ke u pōlepole ʻiate au pē.

12 Pea ko ʻeni ʻoku ou pehē kiate kimoutolu, kuo ngaohikovia ʻa kimoutolu ʻe he tuʻi ko Noá, pea kuo mou pōpula kiate ia mo ʻene kau taulaʻeikí, pea kuo nau fakatupu hoʻomou angahalá; ko ia naʻe haʻi ai ʻa kimoutolu ʻaki ʻa e ngaahi ^ahaʻi ʻo e angahalá.

13 Pea ko ʻeni ko e meʻa ʻi he fakatauʻatāinaʻi ʻa kimoutolu ʻe he māfimafi ʻo e ʻOtuá mei he ngaahi haʻi ko iá; ʻio, mei he nima ʻo e tuʻi ko Noá mo hono kakaí, pea mei he ngaahi haʻi foki ʻo e angahalá, ko ia ʻoku ou fakaʻamu ke mou ^atuʻu maʻu ʻi he ^btauʻatāina ʻa ia kuo fakatauʻatāina ʻaki ʻa kimoutolú, pea ^cʻoua te mou falala ki ha tangata ke ne hoko ko ha tuʻi kiate kimoutolu.

14 Pea ʻoua foki te mou falala ki ha tokotaha ke ne hoko ko homou ^afaiako, pe ko hoʻomou faifekau, tuku kehe pē ʻo kapau ko ha tangata ia ʻa e ʻOtuá, pea ʻokú ne ʻaʻeva ʻi hono ngaahi halá mo tauhi ʻene ngaahi fekaú.

15 Naʻe akonaki pehē ʻe ʻAlamā ki hono kakaí, ke ^aʻofa ʻa e tangata taki taha ki hono kaungāʻapí ʻo hangē pē ko ia, pea ke ʻoua naʻa ʻi ai ha ^bfakakikihi ʻiate kinautolu.

16 Pea ko ʻeni, naʻe hoko ʻa ʻAlamā ko honau ^ataulaʻeiki lahí, he ko ia naʻá ne fokotuʻu honau siasí.

17 Pea naʻe hoko ʻo pehē naʻe ʻikai maʻu ʻe ha taha ʻa e ^amafai ke malanga pe akonaki tuku kehe kapau naʻe fou mai kiate ia mei he ʻOtuá. Ko ia naʻá ne fakanofo ʻa ʻenau kau taulaʻeiki kotoa pē mo honau kau akonaki kotoa pē; pea naʻe ʻikai fakanofo ha taha ʻo kapau naʻe ʻikai ko ha kau tangata angatonu.

18 Ko ia naʻa nau tokangaʻi honau kakaí, ʻo nau ^afafanga ʻa kinautolu ʻaki ʻa e ngaahi meʻa ʻoku kau ki he māʻoniʻoní.

19 Pea naʻe hoko ʻo pehē naʻa nau fakaʻau ke fuʻu tuʻumālie lahi ʻaupito ʻi he fonuá; pea naʻa nau ui ʻa e fonuá ko Heilami.

20 Pea naʻe hoko ʻo pehē naʻa nau tupu ʻo tokolahi mo tuʻumālie lahi ʻaupito ʻi he fonua ko Heilamí; pea naʻa nau langa ha kolo, ʻa ia naʻa nau ui ko e kolo ko Heilamí.

21 Ka neongo iá naʻe ʻafioʻi ʻe he ʻEikí ʻoku taau ke ^avalokiʻi ʻa hono kakaí; ʻio, ʻokú ne siviʻi ʻenau ^bkātakí mo ʻenau tuí.

22 Ka neongo iá—ko ia ia ʻoku ^afalala kiate iá, ʻe ^bhiki hake ia ʻi he ʻaho fakaʻosí. ʻIo, pea naʻe hoko pehē ki he kakaí ni.

23 He vakai, te u fakahā kiate kimoutolu naʻe fakapōpulaʻi ʻa kinautolu, pea naʻe ʻikai faʻa fakahaofi ʻa kinautolu ʻe ha taha ka ko e ʻEiki ko honau ʻOtuá pē, ʻio, ʻa e ʻOtua ʻo ʻĒpalahame mo ʻAisake mo Sēkopé.

24 Pea naʻe hoko ʻo pehē naʻá ne fakahaofi ʻa kinautolu, ʻo ne fakahā atu ai ʻa hono fuʻu māfimafi lahí kiate kinautolu, pea naʻe lahi ʻaupito ʻa ʻenau fiefiá.

25 He vakai, naʻe hoko ʻo pehē ʻi he lolotonga ʻenau nofo ʻi he fonua ko Heilamí, ʻio, ʻi he kolo ko Heilamí, lolotonga ʻenau ngoueʻi ʻa e kelekele takatakai ki aí, ʻiloange kuo hū mai ki he ngaahi ngataʻanga ʻo e fonuá ha kau tau ʻa e kau Leimaná.

26 Pea naʻe hoko ʻo pehē naʻe hola ʻa e kāinga ʻo ʻAlamaá mei heʻenau ngaahi ngoué, ʻo nau fakataha ʻa kinautolu ʻi he kolo ko Heilamí; pea naʻa nau fuʻu ilifia lahi koeʻuhi ko e ʻasi mai ʻa e kau Leimaná.

27 Ka naʻe ʻalu atu ʻa ʻAlamā ʻo ne tuʻu ʻi honau lotolotongá, ʻo ne naʻinaʻi kiate kinautolu ke ʻoua te nau manavahē, ka ke nau manatuʻi ʻa e ʻEiki ko honau ʻOtuá pea te ne fakahaofi ʻa kinautolu.

28 Ko ia naʻa nau taʻofi ʻa ʻenau ilifiá, ʻo nau kamata ke tangi ki he ʻEikí ke ne fakamolū ʻa e loto ʻo e kau Leimaná, ke nau fakamoʻui ʻa kinautolu, mo honau ngaahi uaifí mo ʻenau fānaú.

29 Pea naʻe hoko ʻo pehē naʻe fakamolū ʻe he ʻEikí ʻa e loto ʻo e kau Leimaná. Pea naʻe ʻalu atu ʻa ʻAlamā mo hono kāingá ʻo nau tukulolo kiate kinautolu; pea naʻe maʻu ʻa e fonua ko Heilamí ʻe he kau Leimaná.

30 Ko ʻeni ko e ngaahi kau tau ʻa e kau Leimaná, ʻa ia naʻa nau tuli ki he kakai ʻo e tuʻi ko Limihaí, kuo nau hē ʻi he feituʻu maomaonganoá ʻi he ngaahi ʻaho lahi.

31 Pea vakai, kuo nau ʻiloʻi ʻa e kau taulaʻeiki ʻa e tuʻi ko Noá, ʻi ha potu naʻa nau ui ko ʻAmulone; pea kuo nau kamata ke nofoʻi ʻa e fonua ko ʻAmuloné ʻo nau kamata ke ngoueʻi ʻa e kelekelé.

32 Ko ʻeni, ko e hingoa ʻo e taki ʻo e kau taulaʻeiki ko iá ko ʻAmulone.

33 Pea naʻe hoko ʻo pehē naʻe tangi ʻa ʻAmulone ki he kau Leimaná; ʻo ne fekau atu foki ʻa honau ngaahi uaifí, ʻa ia ko e ngaahi ^aʻofefine ʻo e kau Leimaná, ke nau tangi ki honau kāingá, ke ʻoua te nau tāmateʻi honau ngaahi husepānití.

34 Pea naʻe ^aʻofa mamahi ʻa e kau Leimaná kia ʻAmulone mo hono kāingá, pea naʻe ʻikai te nau fakaʻauha ʻa kinautolu, koeʻuhi ko honau ngaahi uaifí.

35 Pea naʻe kau fakataha ʻa ʻAmulone mo hono kāingá mo e kau Leimaná, pea naʻa nau lolotonga fononga ʻi he feituʻu maomaonganoá, ko e kumi ki he fonua ko Nīfaí ʻi heʻenau ʻiloʻi ʻa e fonua ko Heilamí, ʻa ia naʻe maʻu ʻe ʻAlamā mo hono kāingá.

36 Pea naʻe hoko ʻo pehē naʻe fakapapau ʻe he kau Leimaná kia ʻAlamā mo hono kāingá, kapau te nau fakahā kiate kinautolu ʻa e hala ʻoku fakatau ki he fonua ko Nīfaí te nau tukuange ke nau moʻui mo nau tauʻatāina.

37 Ka ʻi he hili ʻa e fakahā ʻe ʻAlamā kiate kinautolu ʻa e hala ʻoku fakatau ki he fonua ko Nīfaí naʻe ʻikai fai ʻe he kau Leimaná ki heʻenau fakapapaú; ka naʻa nau fokotuʻu ʻa e kau ^aleʻo ʻo takatakai ʻi he fonua ko Heilamí ke leʻohi ʻa ʻAlamā mo hono kāingá.

38 Pea naʻe ʻalu atu ʻa hono toe ʻo kinautolú ki he fonua ko Nīfaí; pea naʻe foki honau niʻihi ki he fonua ko Heilamí, ʻo nau ʻomi foki mo kinautolu ʻa e ngaahi uaifi mo e fānau ʻa e kau leʻo, ʻa ia kuo tuku ʻi he fonuá.

39 Pea kuo tuku ʻe he tuʻi ʻo e kau Leimaná kia ʻAmulone ke ne hoko ko ha tuʻi mo ha pule ki hono kakai, ʻa ia naʻe ʻi he fonua ko Heilamí; ka neongo iá ʻoku ʻikai totonu ke ne maʻu ha mālohi ke fai ha meʻa ʻo taʻehoa mo e finangalo ʻo e tuʻi ʻo e kau Leimaná.