1 Pea naʻe hoko ʻo pehē naʻe liu mai ʻa e kau tau ʻa e tuʻí, kuo nau kumi taʻeʻaonga ki he kakai ʻo e ʻEikí.

2 Pea ko ʻeni vakai, naʻe tokosiʻi ʻa e kau tau ʻa e tuʻí, ko e meʻa ʻi hono fakatokosiʻí, pea naʻe tupu ha mavahevahe ʻi hono toe ʻo e kakaí.

3 Pea naʻe kamata ʻe he faʻahi tokosiʻi angé ha ngaahi lea fakamanamana ki he tuʻí, pea naʻe tupu ha fuʻu fakakikihi lahi ʻiate kinautolu.

4 Pea ko ʻeni naʻe ʻiate kinautolu ha tangata ko hono hingoá ko Kitione, pea ko ha tangata sino mālohi ia pea ko ha fili ia ki he tuʻí, ko ia naʻá ne unuhi ai ʻene heletaá, ʻo ne fuakava ʻi heʻene ʻitá te ne tāmateʻi ʻa e tuʻí.

5 Pea naʻe hoko ʻo pehē naʻá ne tau mo e tuʻí; pea ʻi he vakai ʻe he tuʻí ʻoku ofi ke ne ikunaʻi iá, naʻá ne hola ʻo lele ʻo kaka hake ki he funga ^ataua ʻa ia naʻe ofi ki he temipalé.

6 Pea naʻe tuli ia ʻe Kitione, peá ne kamata ke kaka hake ʻi he tauá ke tāmateʻi ʻa e tuʻí, pea naʻe ʻafio takai ʻa e tuʻí ki he fonua ko Semeloní, pea vakai, naʻe ʻi loto ʻi he ngaahi ngataʻanga fonuá ʻa e kau tau ʻa e kau Leimaná.

7 Pea ko ʻeni naʻe kaila ʻa e tuʻí ʻi he mamahi ʻa hono laumālié, ʻo ne pehē: ʻE Kitione, fakamoʻui au, he kuo ʻoho mai kiate kitautolu ʻa e kau Leimaná, pea te nau fakaʻauha ʻa kitautolu; ʻio, te nau fakaʻauha ʻa hoku kakaí.

8 Ka ko ʻeni naʻe ʻikai ke tokanga lahi ʻa e tuʻí ki hono kakaí ʻo hangē ko ʻene tokanga ki heʻene moʻui ʻaʻaná; ka neongo iá, naʻe fakamoʻui ia ʻe Kitione.

9 Pea naʻe fekau ʻe he tuʻí ki he kakai ke nau hola mei he kau Leimaná, pea naʻá ne muʻomuʻa ia ʻiate kinautolu, ʻo nau hola ki he feituʻu maomaonganoá mo honau kakai fefiné mo ʻenau fānaú.

10 Pea naʻe hoko ʻo pehē naʻe tuli ʻa kinautolu ʻe he kau Leimaná, ʻo maʻu ʻa kinautolu, ʻo kamata ke tāmateʻi ʻa kinautolu.

11 Pea naʻe hoko ʻo pehē naʻe fekau ʻe he tuʻí kiate kinautolu ke liʻaki ʻe he kau tangata kotoa pē ʻa honau ngaahi uaifí mo ʻenau fānaú, pea hola mei he kau Leimaná.

12 Ko ʻeni naʻe ʻi ai ʻa e tokolahi naʻe ʻikai fie liʻaki ʻa kinautolu, ka naʻa nau fie nofo ʻo mate fakataha mo kinautolu. Pea naʻe liʻaki ʻe hono toé ʻa honau ngaahi uaifí mo ʻenau fānaú ka nau hola.

13 Pea naʻe hoko ʻo pehē ko kinautolu naʻe nofo mo honau ngaahi uaifí mo ʻenau fānaú naʻa nau fekau ke ʻalu atu honau ngaahi ʻofefine hoihoifuá ʻo kole ki he kau Leimaná ke ʻoua naʻa nau tāmateʻi ʻa kinautolu.

14 Pea naʻe hoko ʻo pehē naʻe ʻofa mamahi kiate kinautolu ʻa e kau Leimaná, he naʻa nau saiʻia ʻi he hoihoifua ʻo honau kakai fefiné.

15 Ko ia naʻe fakamoʻui ai ʻa kinautolu ʻe he kau Leimaná, ʻo nau puke pōpula ʻa kinautolu pea nau toe ʻave ʻa kinautolu ki he fonua ko Nīfaí, pea fakangofua ʻa kinautolu ke nau maʻu ʻa e fonuá ʻo kapau te nau tukuange ʻa e tuʻi ko Noá ki he nima ʻo e kau Leimaná, pea tukuange ʻenau koloá, ʻio, ko hono vaeua ʻo ʻenau meʻa kotoa pē ʻoku nau maʻu, ko e vaeua ʻo ʻenau koulá, mo ʻenau silivá, mo ʻenau ngaahi meʻa mahuʻinga kotoa pē, pea ʻe pehē haʻanau totongi tukuhau ki he tuʻi ʻo e kau Leimaná mei he taʻu ki he taʻu.

16 Pea ko ʻeni naʻe ʻi ai ʻa e toko taha ʻo e ngaahi ʻalo ʻo e tuʻí ʻiate kinautolu naʻe puké, ʻa ia ko hono hingoá ko ^aLimihai.

17 Pea ko ʻeni naʻe fakaʻamu ʻa Limihai ke ʻoua ʻe tāmateʻi ʻa ʻene tamaí; neongo iá, naʻe ʻikai ke taʻeʻilo ʻa Limihai ki he ngaahi angahala ʻa ʻene tamaí, he ko ha tangata angatonu ia.

18 Pea naʻe hoko ʻo pehē naʻe fekau atu ʻe Kitione ha kau tangata ke nau ʻalu fakafufū ki he feituʻu maomaonganoá, ʻo kumi ki he tuʻí mo kinautolu naʻe ʻiate iá. Pea naʻe hoko ʻo pehē naʻa nau fetaulaki mo e kakaí ʻi he feituʻu maomaonganoá, ʻa kinautolu kotoa pē tuku kehe pē ʻa e tuʻí mo ʻene kau taulaʻeikí.

19 Ko ʻeni kuo nau fuakava ʻi honau lotó ke nau foki ki he fonua ko Nīfaí, pea ka ʻiloange kuo tāmateʻi honau ngaahi uaifí mo ʻenau fānaú, pea mo kinautolu foki kuo nofo mo kinautolú, pehē te nau feinga ke sauni ki ai, pea mate fakataha foki mo kinautolu.

20 Pea naʻe fekau kiate kinautolu ʻe he tuʻí ke ʻoua te nau foki; pea naʻa nau ʻita ki he tuʻí, ʻo nau fakamamahiʻi ia, ʻio, ʻo aʻu ki heʻene ^amate ʻi he afí.

21 Pea naʻa nau ʻai ke puke foki mo e kau taulaʻeikí ʻo tāmateʻi ʻa kinautolu, ka naʻa nau hola meiate kinautolu.

22 Pea naʻe hoko ʻo pehē naʻa nau teuteu ke foki atu ki he fonua ko Nīfaí, pea nau fetaulaki mo e kau tangata ʻa Kitioné. Pea naʻe fakahā kiate kinautolu ʻe he kau tangata ʻa Kitioné ʻa e ngaahi meʻa kotoa pē kuo hoko ki honau ngaahi uaifí mo ʻenau fānaú; pea mo hono fakangofua kinautolu ʻe he kau Leimaná ke nau maʻu ʻa e fonuá ʻi heʻenau totongi ha tukuhau ʻa ia ko e vaeua ʻo e ngaahi meʻa kotoa pē ʻoku nau maʻú.

23 Pea naʻe fakahā ʻe he kakaí ki he kau tangata ʻa Kitioné, kuo nau tāmateʻi ʻa e tuʻí, pea kuo hola meiate kinautolu ʻa ʻene kau taulaʻeikí ki ha potu mamaʻo ange ʻi he loto feituʻu maomaonganoá.

24 Pea naʻe hoko ʻo pehē ʻi he hili ʻa ʻenau feʻiloakí, naʻa nau foki ki he fonua ko Nīfaí ʻi he fiefia, koeʻuhi kuo ʻikai ke tāmateʻi honau ngaahi uaifí mo ʻenau fānaú; pea nau fakahā kia Kitione ʻa e meʻa kuo nau fai ki he tuʻí.

25 Pea naʻe hoko ʻo pehē naʻe fai ʻe he tuʻi ʻo e kau Leimaná ha ^afuakava kiate kinautolu, ʻe ʻikai tāmateʻi ʻa kinautolu ʻe hono kakaí.

26 Kae ʻumaʻā foki mo Limihai, ko e ʻalo ʻo e tuʻí, kuo tuku kiate ia ʻa e pule ^aʻe he kakaí, naʻá ne fai ha fuakava ki he tuʻi ʻo e kau Leimaná ke totongi ʻe hono kakaí ʻa e tukuhau kiate ia, ʻa ia ko e vaeua ʻo e meʻa kotoa pē ʻoku nau maʻú.

27 Pea naʻe hoko ʻo pehē naʻe kamata ʻe Limihai ke langa hake ʻa e puleʻangá pea ke fokotuʻu mo e melinó ʻi hono kakaí.

28 Pea naʻe fokotuʻu ʻe he tuʻi ʻo e kau Leimaná ha kau leʻo ke nofo takatakai ʻi he fonuá, koeʻuhi ke taʻofi ʻa e kakai ʻo Limihaí ʻi he fonuá, koeʻuhi ke ʻoua te nau ʻalu ki he feituʻu maomaonganoá; pea naʻá ne tauhi ʻene kau leʻó ʻaki ʻa e tukuhau naʻá ne maʻu mei he kau Nīfaí.

29 Pea ko ʻeni naʻe ʻi he tuʻi ko Limihaí maʻu ai pē ʻa e melino ʻi hono puleʻangá ʻi he taʻu ʻe ua, pea naʻe ʻikai feinga ʻa e kau Leimaná ke fakamamahiʻi pe fakaʻauha ʻa kinautolu.