1 Pea ko ʻeni, naʻe fekau ʻe he tuʻi ko Mōsaiá ke fakataha mai ʻa e kakai kotoa pē.

2 Ko ʻeni naʻe ʻikai ke tokolahi ʻa e fānau ʻa Nīfaí, pe tokolahi ʻa kinautolu ko e hako ʻo Nīfaí, ʻo hangē ko e ^akakai ʻo Seilahemalá, ʻa ia ko e hako ʻo ^bMūlekí, pea mo kinautolu naʻe haʻu fakataha mo ia ki he feituʻu maomaonganoá.

3 Pea naʻe ʻikai ke tokolahi ʻa e kakai ʻo Nīfaí pea mo e kakai ʻo Seilahemalá, ʻo hangē ko e tokolahi ʻo e kau Leimaná; ʻio, naʻe ʻikai aʻu honau tokolahí ki hono vaeua.

4 Pea ko ʻeni kuo fakataha ʻa e kakai kotoa pē ʻo Nīfaí, kae ʻumaʻā foki ʻa e kakai kotoa pē ʻo Seilahemalá, pea kuo nau fakataha ki he fakatahaʻanga ʻe ua.

5 Pea naʻe hoko ʻo pehē naʻe lau ʻe Mōsaia, peá ne fekau ke lau, ʻa e ngaahi lekooti ʻa Sēnifí ki hono kakaí; ʻio, naʻá ne lau ʻa e ngaahi lekooti ʻo e kakai ʻo Sēnifí ʻo fai mei he taimi naʻa nau ʻalu atu ai mei he fonua ko Seilahemalá ʻo aʻu ki heʻenau toe foki maí.

6 Pea naʻá ne lau foki mo e lekooti ʻo ʻAlamā mo hono kāingá, pea mo ʻenau ngaahi faingataʻaʻiá talu mei he taimi naʻa nau ō atu ai mei he fonua ko Seilahemalá, ʻo aʻu ki he taimi naʻa nau toe foki mai ai ki aí.

7 Pea ko ʻeni, ʻi he fakaʻosi hono lau ʻe Mōsaia ʻa e ngaahi lekōtí, naʻe fuʻu ofo mo fakatumutumu lahi ʻa hono kakai ʻa ia naʻe nofo ʻi he fonuá.

8 He naʻe puputuʻu honau lotó; pea ʻi heʻenau mamata kiate kinautolu kuo fakahaofi ^amei he nofo pōpulá naʻe fakafonu ʻa kinautolu ʻaki ʻa e fuʻu fiefia lahi ʻaupito.

9 Pea ko e tahá, ʻi heʻenau fakakaukau ki honau kāinga kuo tāmateʻi ʻe he kau Leimaná naʻa nau fonu ʻi he loto-mamahi, pea naʻe lahi honau loʻimata ʻo e mamahi naʻe toó.

10 Pea ko e tahá foki, ʻi heʻenau fakakaukau ki he angalelei vave ʻa e ʻOtuá, mo hono māfimafí ʻi he fakahaofi ʻo ʻAlamā mo hono kāingá mei he nima ʻo e kau Leimaná mo e nofo pōpulá, naʻa nau hiki hake honau leʻó ʻo nau fakafetaʻi ki he ʻOtuá.

11 Pea ko e tahá, ʻi heʻenau fakakaukau ki he kau Leimana, ʻa ia ko honau kāingá, mo honau tuʻunga angahalaʻiá mo fakalieliá, naʻa nau fonu ʻi he ^amamahi mo e feinga ʻo e lotó koeʻuhi ko honau ^blaumālié.

12 Pea naʻe hoko ʻo pehē ko kinautolu ko e fānau ʻa ʻAmulone mo hono kāingá, ʻa ia kuo nau mali mo e ngaahi ʻofefine ʻo e kau Leimaná, naʻa nau fehiʻa ʻi he ngaahi angafai ʻa ʻenau ngaahi tamaí, ʻo ʻikai te nau loto ke toe ui ʻaki ʻa kinautolu ʻa e ngaahi hingoa ʻo ʻenau ngaahi tamaí, ko ia naʻa nau ʻai kiate kinautolu ʻa e hingoa ʻo Nīfaí, koeʻuhi ke ui ʻa kinautolu ko e fānau ʻa Nīfai, pea lau fakataha ʻa kinautolu mo kinautolu naʻe ui ko e kau Nīfaí.

13 Pea ko ʻeni naʻe ^alau fakataha ʻa e kakai kotoa pē ʻo Seilahemalá mo e kau Nīfaí, pea naʻe fai ʻeni koeʻuhi kuo teʻeki ai ke tuku ʻa e puleʻanga ʻi he fonuá ki ha taha ka ko kinautolu pē ʻa ia ko e hako ʻo Nīfaí.

14 Pea ko ʻeni naʻe hoko ʻo pehē ʻi he fakaʻosi ʻe Mōsaia ʻa ʻene folofolá mo ʻene lau ki he kakaí, naʻá ne loto ke fai foki ʻe ʻAlamā ha lea ki he kakaí.

15 Pea naʻe lea ʻa ʻAlamā kiate kinautolu, lolotonga ʻenau nofo fakataha ʻi ha ngaahi haʻofanga kakai tokolahí, pea naʻá ne ʻalu mei he haʻofanga kakai ʻe tahá ki he taha, ʻo malanga ʻaki ki he kakaí ʻa e fakatomalá mo e tui ki he ʻEikí.

16 Pea naʻá ne naʻinaʻi ki he kakai ʻo Limihaí mo hono kāingá, ʻa kinautolu kotoa pē kuo fakahaofi mei he nofo pōpulá, ke nau manatuʻi ko e ʻEikí naʻá ne fakahaofi ʻa kinautolú.

17 Pea naʻe hoko ʻo pehē ʻi he hili hono akoʻi ʻe ʻAlamā ki he kakaí ha ngaahi meʻa lahi, pea kuo fakaʻosi ʻa ʻene lea kiate kinautolú, naʻe fakaʻamu ʻa e tuʻi ko Limihaí ke papitaiso, pea naʻe fakaʻamu foki mo hono kakai kotoa pē ke nau papitaiso.

18 Ko ia, naʻe ʻalu atu ʻa ʻAlamā ki he loto vaí ʻo ne ^apapitaiso ʻa kinautolu; ʻio, naʻá ne papitaiso ʻa kinautolu ʻo fakatatau ki he founga ʻa ia naʻá ne papitaiso ʻaki ʻa hono kāingá ʻi he ngaahi ^bvai ʻo Molomoná; ʻio, naʻe kau ki he siasi ʻo e ʻOtuá ʻa kinautolu kotoa pē naʻá ne papitaisó; pea naʻe fai ʻeni koeʻuhi ko ʻenau tui ki he ngaahi lea ʻa ʻAlamaá.

19 Pea naʻe hoko ʻo pehē naʻe tuku ʻe he tuʻi ko Mōsaiá kia ʻAlamā ke ne fokotuʻu ha ngaahi siasi ʻi he fonua hono kotoa ʻo Seilahemalá; ʻo ne tuku kiate ia ʻa e ^amālohi ke fakanofo ha kau taulaʻeiki mo ha kau akonaki ki he siasi taki taha.

20 Ko ʻeni naʻe fai ʻeni koeʻuhi naʻe lahi fau ʻa hono tokolahi ʻo e kakaí ko ia naʻe ʻikai lava ai ke tauhi ʻa kinautolu ʻe he faiako pē ʻe toko taha; pea naʻe ʻikai foki te nau lava ʻo fanongo kotoa pē ki he folofola ʻa e ʻOtuá ʻi ha fakatahaʻanga pē ʻe taha;

21 Ko ia naʻa nau fakataha ai ʻa kinautolu ki ha ngaahi fakatahaʻanga kehekehe, ʻa ia naʻe ui ko e ngaahi siasi; pea naʻe maʻu ʻe he siasi taki taha kotoa pē hanau kau taulaʻeiki mo hanau kau akonaki, pea naʻe malanga ʻaki ʻa e folofolá ʻe he taulaʻeiki taki taha ʻo fakatatau ki he meʻa kuo fakahā mai kiate ia ʻi he ngutu ʻo ʻAlamaá.

22 Pea ko ia, neongo naʻe ʻi ai ha ngaahi siasi lahi, ka ko e ^asiasi pē taha, ʻio ko e siasi ʻo e ʻOtuá; he naʻe ʻikai ke malanga ʻaki ha meʻa ʻi he ngaahi siasí kotoa ka ko e fakatomalá mo e tui ki he ʻOtuá.

23 Pea ko ʻeni naʻe ʻi ai ʻa e siasi ʻe fitu ʻi he fonua ko Seilahemalá. Pea naʻe hoko ʻo pehē ʻilonga ʻa e kakai naʻa nau fie ʻai kiate kinautolu ʻa e ^ahuafa ʻo Kalaisí, pe ko e ʻOtuá, naʻa nau ului ki he ngaahi siasi ʻo e ʻOtuá;

24 Pea naʻe ui ʻa kinautolu ko e ^akakai ʻo e ʻOtuá. Pea naʻe lilingi hifo ʻe he ʻEikí ʻa hono Laumālié kiate kinautolu, pea naʻa nau monūʻia, mo tuʻumālie ʻi he fonuá.