1 Anajwan laa’in, aj Moroni, nintz’iib’a ka’ch’inaq jo’ chanru nink’oxla naq us; ut nintz’iib’ak choq’ reheb’ li was wiitz’in, eb’ laj Lamanita, ut nawaj raj naq te’xnaw naq ak xe’nume’ numenaq kaahib’ cient rik’in junmay chihab’ chalen chaq naq kik’eeman li eetalil chirix lix k’ulunik li Kristo.

2 Ut nink’e chaq xtz’apb’al li tz’iib’anb’il esil a’in, chirix naq ninye junjunq li aatin re elajink cheru.

3 K’ehomaq reetal, nawaj relajinkil cheru, naq jo’q’e teeril li k’a’aq re ru a’in tz’iib’anb’il, wi a’an xchaab’ilal xna’leb’ li Dios naq teeril ru, naq chijultiko’q eere chanru ruxtaanal chaq li Qaawa’ choq’ reheb’ li ralal xk’ajoleb’ li winq, chalen chaq xyo’ob’tesinkil laj Adan toj reetal ajwi’ xq’ehil naq teek’ul li k’a’aq re ru a’in, ut chetz’il rix sa’ eech’ool.

4 Ut naq teek’ul li k’a’aq re ru a’in, nawaj relajinkil cheru naq chepatz’ re li Dios, li Junelik Yuwa’b’ej, sa’ lix k’ab’a’ li Kristo, ma ink’a’ yaal li k’a’aq re ru a’in; ut wi texpatz’oq rik’in x’anchalil eech’ool, chi tiik eerajom, chi wank eepaab’aal chirix li Kristo, a’an tixk’utb’esi cheru li yaal chirix, rik’in lix wankil li Santil Musiq’ej.

5 Ut rik’in lix wankil li Santil Musiq’ej naru teenaw li yaal chirix chixjunil li k’a’aq re ru.

6 Ut yalaq k’a’ru chaab’il a’an tiik ut yaal; jo’kan ut, maak’a’ k’a’ru chaab’il natz’eqtaanank xyaalal li Kristo; naxch’olob’ b’an naq a’an wan.

7 Ut naru teenaw naq a’an wan, rik’in lix wankil li Santil Musiq’ej; jo’kan naq nawaj relajinkil cheru naq meetz’eqtaana xyaalal lix wankil li Dios; xb’aan naq a’an nak’anjelank rik’in wankilal, a’ yaal jo’ chanru xpaab’aaleb’ li ralal xk’ajoleb’ li winq, chi juntaq’eet anajwan, ut wulaj, ut chi junelik q’e kutan.

8 Ut jo’kan wi’chik, nawelaji cheru, ex was wiitz’in, naq meetz’eqtaana xyaalaleb’ li maatan naxk’e li Dios, xb’aan naq k’iheb’, ut neke’chal chaq rik’in li junaj chi Dios. Ut jalanq paay chan ru naq k’anjelanb’ileb’ li maatan a’in; a’b’anan a’an li junaj chi Dios li nak’anjelank re chixjunil rik’in chixjunileb’; ut k’eeb’ileb’ xb’aan lix k’utb’esihom lix Musiq’ li Dios chiruheb’ li winq, re rusilankileb’.

9 Xb’aan naq k’ehomaq reetal, re jun, k’eeb’il xb’aan lix Musiq’ li Dios, naq taaruuq tixk’ut li aatin re chaab’il na’leb;

10 Ut re jun chik, re taaruuq tixk’ut li nawb’il aatin rik’in ajwi’ li junaj chi Musiq’ej;

11 Ut re jun chik, li paab’aal q’axal nim, ut re jun chik, eb’ li maatan re k’irtesink rik’in ajwi’ li junaj chi Musiq’ej;

12 Ut jo’kan wi’chik, re jun chik, re taaruuq tixk’anjela xninqal ru sachb’a-ch’oolej;

13 Ut jo’kan wi’chik, re jun chik, re taaruuq taa’aatinaq jo’ profeet chirix chixjunil li k’a’aq re ru;

14 Ut jo’kan wi’chik, re jun chik, rilb’aleb’ li anjel ut li musiq’ej aj k’anjelanel;

15 Ut jo’kan wi’chik, re jun chik, li k’iila paay chi aatinob’aal;

16 Ut jo’kan wi’chik, re jun chik, xk’utb’al xyaalalil li jalanil aatin ut li jar raqal chi aatinob’aal.

17 Ut chixjunil li maatan a’in neke’chal xb’aan lix Musiq’ li Kristo, ut neke’chal chi jek’inb’il re li junjunq chi winq, a’ yaal jo’ chanru naraj a’an.

18 Ut nawaj relajinkil cheru, ex was wiitz’in raarookex inb’aan, naq chijultiko’q eere naq li junjunq chi chaab’il maatan nachal chaq rik’in li Kristo.

19 Ut nawaj relajinkil cheru, ex was wiitz’in raarookex inb’aan, naq chijultiko’q eere naq a’an juntaq’eet ewer, anajwan, ut chi junelik q’e kutan, ut naq chixjunileb’ li maatan a’in li kin’aatinak wi’, a’eb’ re musiq’ej, maajo’q’e te’k’ehe’q xraqik, chiru ajwi’ jo’ najtil xaqxooq li ruchich’och’, ka’ajwi’ a’ yaal jo’ xmaak’a’il lix paab’aaleb’ li ralal xk’ajoleb’ li winq.

20 Jo’kan ut, tento taawanq li paab’aal; ut wi tento taawanq li paab’aal tento ajwi’ taawanq li yo’onink; ut wi tento taawanq li yo’onink tento ajwi’ taawanq li rahok.

21 Ut wi moko wan ta li rahok eerik’in maamin texruuq chi kole’k sa’ li rawa’b’ejihom li Dios; chi moko naru texkole’q sa’ li rawa’b’ejihom li Dios wi maak’a’ eepaab’aal, chi moko wi maak’a’ eeyo’onihom.

22 Ut wi maak’a’ eeyo’onihom tento texwanq chi oso’jenaq eech’ool; ut nachal roso’jik eech’ool xb’aan li maa’usilal.

23 Ut li Kristo kixye chi yaal reheb’ li qayuwa’: Wi wan eepaab’aal naru teeb’aanu chixjunil li k’a’aq re ru li aajel ru choq’ we.

24 Ut anajwan nin’aatinak re chixjunil lix maril li ruchich’och’—naq wi taachalq xkutankil naq taa’oso’q sa’ eeyanq lix wankilal ut eb’ lix maatan li Dios, a’anaq xb’aan naq maak’a’ li paab’aal.

25 Ut rahilal chiwanq sa’ xb’eeneb’ li ralal xk’ajoleb’ li winq wi jo’ka’in wan; xb’aan naq maajun taawanq li nab’aanunk re li us sa’ eeyanq; relik chi yaal, maajun. Xb’aan naq wi ta wan junaq sa’ eeyanq li nab’aanunk re li us, taak’anjelaq rik’in lix wankilal ut eb’ lix maatan li Dios.

26 Ut rahilal sa’ xb’eeneb’ li te’sachoq re li k’a’aq re ru a’in ut te’kamq, xb’aan naq neke’kam sa’ xmaakeb’, ut moko te’ruuq ta chi kole’k sa’ li rawa’b’ejihom li Dios; ut a’in ninye jo’ chanru li raatin li Kristo, ut moko nintik’ti’ik ta.

27 Ut nawelaji cheru naq chijultiko’q eere li k’a’aq re ru a’in, xb’aan naq chi seeb’ taachalq xq’ehil naq teenaw naq moko nintik’ti’ik ta, xb’aan naq tineeril sa’ lix raqleb’aal aatin li Dios; ut li Qaawa’ Dios tixye eere: Ma ink’a’ kinch’olob’ li waatin eere, li tz’iib’anb’il xb’aan li winq a’in, chanchan jun li naxjap chaq re sa’ xyanqeb’ li kamenaq; relik chi yaal, chanchan ajwi’ junaq li na’aatinak chaq sa’ li poqs?

28 Ninch’olob’ li k’a’aq re ru a’in choq’ re xtz’aqob’resinkileb’ ru li profeetil aatin. Ut k’ehomaq reetal, taa’elq chaq sa’ xtz’uumal re li Dios li junelik taawanq; ut li raatin a’an taajub’aq chiru li junjunq tasal tenamit.

29 Ut li Dios tixk’ut cheru, naq yaal li k’a’ru kintz’iib’a.

30 Ut jo’kan wi’chik, nawaj relajinkil cheru naq chexchalq rik’in li Kristo, ut chechapaq eerib’ chiru li junjunq chi chaab’il maatan, ut meech’e’ li ink’a’ us aj maatan, chi moko li k’a’ru tz’aj.

31 Ut ajen, ut waklin chaq sa’ li poqs, at Jerusalen; relik chi yaal, ut k’e chawix laa chaq’al ru aq’, at xrab’in Sion; ut k’e xkawub’ laa woqechal, ut nimob’resi ru laa nub’aal chi junelik, re naq ink’a’ chik taasachq aana’leb’, re naq lix sumwank li Junelik Yuwa’b’ej li kixk’uub’ aawik’in, at xjunkab’al laj Israel, taaruuq chi tz’aqlok ru.

32 Relik chi yaal, chalqex rik’in li Kristo, ut chitz’aqloq eere eeru rik’in, ut chetz’eqtaana choq’ eere chixjunil li moko us ta; ut wi neketz’eqtaana choq’ eere chixjunil li moko us ta, ut nekera li Dios chi anchal eemetz’ew, eek’a’uxl, ut eekawilal, rik’in a’an tz’aqal li rusilal choq’ eere, re naq rik’in li rusilal taaruuq texwanq chi tz’aqal eere eeru rik’in li Kristo; ut wi xb’aan li rusilal li Dios tz’aqal eere eeru rik’in li Kristo, maamin texruuq chixtz’eqtaanankil xyaalal lix wankil li Dios.

33 Ut jo’kan wi’chik, wi laa’ex xb’aan li rusilal li Dios tz’aqal eere eeru rik’in li Kristo, ut ink’a’ neketz’eqtaana xyaalal lix wankilal, rik’in a’an santob’resinb’ilex rik’in li Kristo, xb’aan li rusilal li Dios, sa’ xk’ab’a’ lix hoyonik lix kik’el li Kristo, li wan sa’ lix sumwank li Yuwa’b’ej choq’ re risinkil lee maak, re naq tex’ok chi sant, chi maak’a’ eetz’ajnil.

34 Ut anajwan ninye re chixjunil, inwan. Chi seeb’ tinxik chi hilank sa’ lix hilob’aal li Dios, toj reetal naq lin musiq’ ut lin tib’el te’xjunaji wi’chik rib’, ut tink’ame’q jo’ aj q’axol u chiru li iq’, re eek’ulb’al chiru lix sahil raqleb’aal aatin li xnimal ru Jehova, li Junelik aj Raqol Aatin reheb’ li yo’yo jo’ ajwi’ li kamenaq. Amen.