1 Taeka ake e taekin Iakobwa are tarin Nibwaai, nakoia ana botanaomata Nibwaai, i mwin maten Nibwaai:

2 Ngkai, tariu aika kam tangiraki, Ngai ae Iakobwa, n aron te mwioko are mai iroun te Atua, are N na kamatoa nakoau n te koaua, bwa I aonga ni kaitiaki kunnikaiu ma n ami bure, I a nakoimi n te tembora n te bong aio bwa N na taekina ana taeka te Atua.

3 Ao kam ataia n tatabemaningkami nako bwa I a tia ni kakaonimaki n te nakoa are I a tia ni weteaki nako iai; man te bong aio ao I karawawataki riki ibukin tabeaiangau n aron maiun tamneimi nakon are I a tia n rinanona mai mwaaina.

4 Bwa taraia, kam a tia n aki ongeaba nakon ana taeka te Uea, ake I a tia n anganingkami.

5 Ma taraia, kam na kakauongo nakoiu, ao kam na ataia bwa ma n ana ibuobuoki te Tia Karikibwai ae korakora are e karika karawa ma aonaba ao I a kona n tuangkami kanoan ami ^aiango, ma aromi ni moana karaoan te bure, ae te bure ae moan te ribaki irou, eng, ao ae moan te ribaki naba iroun te Atua.

6 Eng, e rawawata tamneiu ao I kan karabaai ibukin te maamaa mai iroun are Karikai, ngkai N na riai ni kakoauai nakoimi aron buakakan nanomi.

7 Ao I a taonaki naba n te rawawata ngkai e riai bwa N na taetae nakoimi n te aro ae ^amatoatoa n aron taekami, i mataia kaainabami ma natimi, aika moan te maraurau nanoia man ^bitiaki ao ni kaiuruaki i matan te Atua, ake e kukurei iai nanon te Atua;

8 Ao I taku bwa a nakomai bwa a na ongora n ana ^ataeka te Atua aika a tamaroa, eng, te taeka are e na kamaiua te aomata ae e ikoaki.

9 Mangaia ae e rawawata tamneiu ngkai I a tia ni kateituaki, n aron te tua ae matoatoa are e reke irou mai iroun te Atua, bwa N na kataetaeingkami n aron ami bure, are n tokina ao a na kabuburaki ikoakiia ake a tia n ikoaki, ao n aki kabebeteia ma ni kamaoi ikoakiia; ao ake a tuai n ikoaki, a na aki kanuaia n ana taeka te Atua ae kakukurei man namakina te biti are e na ewari tamneia ao ni kaikoaki aia kaantaninga aika a kaiuruaki.

10 Ma e ngae ngke e korakora te mwakuri aio, ao e riai bwa N na karaoia n aron ana ^atua te Atua, ao n taekin nakoimi taekan ami bure ma ami mwakuri aika a ribaki, imataia aika a itiaki nanoia, ma nanoia aika uruaki, i aan matan te Atua ae Moan te Mwaaka are ^bnoori bwaai ni kabane.

11 Mangaia ae N na riai n tuangkami te koaua n aron ^amataatan ana taeka te Atua. Bwa taraia, n au tai n ukeuke nakon te Uea, ao e a roko te taeka nakoiu ae kangai: Iakobwa, ko na nakon te tembora n te ingabong, ao taekina te taeka ae N na anganiko nakoia te botanaomata aio.

12 Ao ngkai tariu aika kam tangiraki, aio te taeka are N na taekinna nakoimi, bwa a mwaiti i buakomi aika a moana ukoukoran te koora, te tirewa, ao ^aaeka n tano aika a kakawaki, aika tanon te aba aio, ae te ^baba ni berita nakoimi ma kanoami, ae moan te rawata iaon te aba aio.

13 Ao e kukurei nanon teuare ana bwai bwaai ma ni kakabwaiaingkami, ngkai a reke iroumi kaubwai aika a mwaiti; ma ngkami iai i buakomi aika a reke irouia kaubwai aika a mwaiti riki nakoia tarimi ao e ^arikirake te kamoamoa inanomi, ao kam bonotaninga ma ni karietatai atuumi ibukin bobuakan ami kunnikai, ao kam a bwainikirinia tarimi ngkai kam taku inanomi bwa kam rietata riki nakoia.

14 Ao ngkai, tariu n ami kaantaninga, kam taku bwa e na kukurei nanon te Atua iroumi ni karaoan aio? Taraia, I tuangingkami bwa, E aki. Ma e na karekei kaimi, ao ngkana kam teimatoa ni karaoi bwaai aikai ao e na waekoa n roko i aomi ana moti.

15 O teraa ngke e kona ni kaota korakorana ni koroiko, ao ngkana e taraiko ao ko na riki n aiaron te bubu n tano!

16 O tera ngke e kona ni katokiko man te bure ao te mwakuri ae e ribaki. Ao tera ngke kam kona n ongeaba n taekan ana tua, ao n aki kariaia ^akamoamoan nanomi bwa e na kamatei tamneimi!

17 Kabotauiia tarimi ma ngkami, ao iraorao mangaia ni kabane ao akoia ni ^akaubwaimi, bwa ^ba aonga ni kaubwai n aiaromi.

18 Ma i mwaain ae kam ukoukora te ^akaubwai, ao kam na ukoukora moa ^buean te Atua.

19 Ao ngkana e a tia n reke ami koaua i nanon Kristo ao a na reke iroumi taian kaubwai, ngkana kam ukoukori; ao ngkana kam ukoukori ibukin ^akaraoan ae raoiroi—ni karekei kunnikaia aika akea karabaia, ao ni kamwarakeia aika a baki, ao ni kaotinakoia aika a tautaekanaki man te tautaekanaki, ao n anga te ibuobuoki nakoia aoraki ma aika a ikoaki.

20 Ao ngkai, tariu, I a tia n taetae nakoimi ni kaineti ma te kamoamoa; ao ngkami aika kam a tia ni kaikoakia kaain rarikimi, ao ni bwainikiriniia ibukin te kamoamoa inanomi, ni bwaai ake e a tia n anganingkami te Atua, teraa ami taeka iai?

21 N ami kaantaninga a na ribaki bwaai aikai iroun teuare karikiia aomata ni kabane? Ao titebo kakawakin temanna imatana n aiaron kakawakin are temanna. Ao a bane n riki n iriko ni kabane man te bubun tano; ao titebo bukin karikaia ni kabane, bwa a na kaawakin ana ^atua ao n neboia n aki toki.

22 Ao ngkai N nang motika taekinan te kamoamoa nakoimi. Ao ngke arona bwa N na aki taetae nakoimi n taekina te bure ae rawawata riki, ao e na rang ni kukurei nanou iroumi.

23 Ma I karawawataki n ana taeka te Atua ibukin ami bure aika a rawawata riki. Ma taraia, e taku te Uea: E rikirake karaoan te bure irouia te botanaomata aio; a aki ataa kanoan koroboki aika tabu, bwa a kabanei aia tai ni karaoi mwakuri ni kabekaau, ibukin bwaai ake a tia ni koreaki man taekan Tawita, ma natina are Toromon.

24 Taraia, e taku te Uea, e koaua bwa a mwaiti ^abuuia ma aia kinano Tawita ma ^bToromon, ae te mwakuri ae bati n ribaki imatau.

25 Mangaia ae e taku te Uea, I a tia ni kairia te botanaomata aio mai Ierutarem, ni mwaakan baiu, bwa I aonga ni kona ni karikirakea te mwanga ae ^araoiroi man kanoan Iotebwa ibukiu.

26 Mangaia ae Ngai ae te Uea ae te Atua, I aki tangiriia te botanaomata aio bwa a na katotong bwaai ake a karaoi aomata ake ngkoa.

27 Mangaia ae kam na kakauongo nakoiu tariu, ao ongo n ana taeka te Uea: Bwa a na akea te mwaane i buakomi ae e na raka mwaitin buuna nakon ^atemanna; ke ni iai ana kinano;

28 Bwa Ngai ae te Uea ae te Atua, e kukurei nanou n ^aitiakiia aine. Ao mwakuri ni kabekaau a ribaki imatau; aikai ana taeka aia Uea Taanga ni Buaka.

29 Mangaia ae a na kaawakin au tua te botanaomata aio, n aron ana taeka aia Uea Taanga ni Buaka, ke e na ^akarekeaki kain te aba ibukin aki ongeabaia.

30 Bwa e taku aia Uea Taanga ni Buaka, ngkana e riai bwa N na karikirakea ^amwaitia au botanaomata ao N na tuatua nakoia au botanaomata, ma i mwaain ae I karaoa aio ao a riai n ongeaba ni bwaai aikai.

31 Bwa taraia, Ngai ae te Uea, I a tia n noorii man ongo tangiia natiu aine mai buakoia au botanaomata i Ierutarem, eng, ao n aaba nako ake a maeka iai au botanaomata, ibukin aia buakaka ma aia mwakuri aika a ribaki buuia.

32 E taku ana taeka aia Uea Taanga ni Buaka, I aki tangiria bwa N na manga ongo tangiia naati aine man te botanaomata aio, ake I kairia nako mai Ierutarem, bwa a na tangitang ibukin aia mwakuri mwaanen te botanaomata aio, e taku aia Uea Taanga ni Buaka.

33 Bwa a na aki kairia nako naati aine te botanaomata aio ngkai a ongeaba, bwa ngkana a karaoia ao N na anganiia te rekenikai ae rawawata nakoia, n irianna n te mate; bwa a na aki karaoi mwakuri ni ^akabekaau, n aron ake ngkoa, ao aikai ake e taekin aia Uea Taanga ni Buaka.

34 Ao taraia ngkai tariu aika kam tangiraki, kam ataia bwa e a tia n anganaki tua aikai tamara ae Riaai; mangaia ae kam a bon ataia mai i mwaina; ao a na korakora reken kaimi; ngkai kam a tia ni karaoi bwai aika kam riai n aki karaoi.

35 Taraia kam a tia ni karaoi bure aika a ^arawawata riki nakon ake a karaoi tarira aika Reimwanaite. Kam a tia n uru nanoia buumi aika a raraoi, ao ni kaakea karineami irouia natimi, ibukin ami katoto nakoia aika a aki raraoi; ao a waerake tangin nanoia iroumi nakon te Atua. Ao ibukin matoan ana taeka te Atua, ake a riki n roko ibukimi, ao a mwaiti naano aika a na toki, ao a na kananoaki ikoakiia.