1 Tariu, taraia, kam aki uringa warekan ana taeka te burabeti ae ^aTinoti, ngke e taetae nakon te bata are Iteraera, ni kangai:

2 Ongora, O ngkoe ae te bata are Iteraera, ao ongo n au taeka, ae ana burabeti te Uea.

3 Bwa taraia, e taku ana taeka te Uea, N na kabootauko, O ngkoe ae te bata are ^aIteraera, ma te ^bkai te oriwa ae manana, ae e tabekia te aomata man ribanaia ni kamwarakea n ana ^cnne ni kurebe; ao e bwebwerake, ao e a kara, ao e a moanna ni ^dmka.

4 Ao e koro bukina bwa e nako n noria te tia ununiki, ao e nori bwa e a moanna ni mka arokana ae te oriwa; ao e taku: N na koroi mwangana aika mka, ao ni kekena rarikina, ao ni kamwarakea, bwa e aonga ni bwebwe mwanga aika a uarereke man ububu, ao n aki mate.

5 E koro bukina bwa e waaki ni koroi mwangana aika a mka, ao e kekena rarikina, ao e kamwarakea n aron are taku bwa e na karaoia.

6 Ao e koro bukina bwa i mwin tabeua te bong ao e a nori mwanga tabeua aika a uarereke man ububu n riki; ma taraia, oin mwangangana a moanna ni mate.

7 Ao e koro bukina bwa e nora aio te tia uniuniki, ao e taku nakon ana tia mwakuri: E taonaki nanou n te rawawata ngkai e nang mate arokau aio; mangaia ae nako otoi mwangan te kai te oriwa ae riki n ^aaki akaaka, ao uoti nakoiu; ao ti na otoi taian mwanga aika a mate aikai, ao ti na karenakoi nakon te ai bwa aonga ni bue.

8 Ao taraia, e taku ana taeka Uean te onaroka ni kurebe, N na anai mwanga aika bwebwerake aikai aika a uarereke ma n ububu ao N na katomai ma kai nako ake I kan katomai mangaia; ao e aoria bwa ngkana e mate wakaan te kai aio ao I kona n ana uaana ibukiu, mangaia ae N na anai mwangangana aika a uarereke man ububu ao N na katomai ma are I taku inanou.

9 Anai mwangan te kai te oriwa ae riki n aki akaaka, ao katomai, n ^aonei mwin taian mwanga; ao N na karenakoi mwanga ake I a tia n otoi nako nanon te ai ni kabueki, bwa aonga n aki kamangeangea aon au nne ni kurebe.

10 Ao e koro bukina bwa e waaki ana tia mwakuri Uean te nne ni kurebe ni karaoi bwaai ake e tuangaki iroun Uean te nne ni kurebe bwa e na karaoi, ao e katomai mwangan te kai te oriwa are riki n ^aaki akaaka.

11 Ao e anga ana taeka Uean te nne ni kurebe bwa e na kenaki rarikina, ao ni koreaki mwangana aika a mka, ao ni kamwarakeaki, ao e taku nakon ana tia mwakuri: E rawawata nanou ngkai e na mate te kai aio; mangaia ae I a karaoa aio bwa I aonga n reita maiun wakaana bwa e aonga n aki mate, ao N na kateimatoa ibukiu, I a tia ni karaoa aio.

12 Mangaia ae waakina am mwakuri; tararua te kai, kamwarakea, n aron are I tuangko.

13 Ao N na katikui n te ^atabo ae kaokoroaki i nanon au nne ni kurebe, n aron are I taku inanou, ao e aki kakawaki aio nakoim; ao I karaoa aio ni kateimatoa n aron oin nanou mwangan te kai aio ni koaua; ao bwa I aonga ni kona ni kaawakin uaana ibukiu i mwin te tai; bwa e rawawata nanou ngkana e mate te kai aio ma uaana.

14 Ao e koro bukina ao e waaki Uean te nne ni kurebe, ao e karabai mwangan te kai te oriwa are e manana ae e unikaki n te tabo ae kaokoroaki i nanon te nne ni kurebe, tabeua n te tabo teuana ao tabeua n tabo riki tabeua, n aron nanona ma kukureina.

15 Ao e koro bukina bwa e maan i mwin aio, ao e taku Uean te nne ni kurebe nakon ana tia mwakuri: Nako mai bwa ti na nako ni kawara te nne ni kurebe, bwa ti na mwakuri i nanona.

16 Ao e koro bukina bwa a nako Uean te nne ni kurebe ma ana tia mwakuri nakon te nne ni kurebe bwa a na mwakuri. Ao e koro bukina bwa e taku te tia mwakuri nakon ana toka: Taraia, tanimai; noora te kai.

17 Ao e koro bukina bwa e taratara Uean te nne ni kurebe ao e noora te kai are a kanimwaki nako iai mwangan te kai te oriwa are e riki n aki akaaka; e a bon maiu raoi ao ni kariki ^auaa. Ao e nooria bwa e tamaroa; ao titebo uaana ma bon oin uaana.

18 Ao e taku nakon te tia mwakuri: Taraia, e a reke te ran nakon taian mwanga aika a oteaki man te kai te oriwa ae riki n aki akaaka man te wakaa, ao e a reke naba te korakora man te wakaa; ao ngkai e mwaiti te korakora are e reke man te wakaa ao a kariki uaa aika a tamaroa mwanga aika a reke man te kai te oriwa ae riki n aki akaaka. Ngke arona bwa ti aki katomai mwanga aikai, ao e na tia ni mate te kai. Ao ngkai, taraia, a mwaiti uaa n roko n tain te tai, aika a riki man te kai; aika uaa aika N na kona ni kawakin bon ibukiu i mwin te tai.

19 Ao e koro bukina bwa e taku Uean te nne ni kurebe nakon te tia mwakuri: Nakomai bwa ti na nako tabon te nne ni kurebe are raroa, man nooria ngkana a aki naba kariki uaa aika mwaiti oin mwangan te kai, bwa I aonga ni kona ni kawakin uaana ibukiu i mwin te tai.

20 Ao e koro bukina bwa a nakon te tabo are e karabaki iai mwangan te kai iroun te toka, ao e taku nakon ana tia mwakuri: Nori aikai; ao e noria bwa a mwaiti uaan te ^amoan mwanga; ao e noria bwa e tamaroa. Ao e taku nakon te tia mwakuri: Anai uaana, ao kawakin ibukiu i mwin te tai; ao e taku, taraia, e a maan au tai n ribanaia, ao e a tia ni kariki uaa aika a mwaiti.

21 Ao e koro bukina bwa e taku te tia mwakuri nakon ana toka: Bukin tera ngkai ko unika te kai aio ikai, ke te mwanga aio? Bwa taraia, bon te tabo ae aki maiu tanona mai buakon aon te nne ni kurebe.

22 Ao e taku Uean te nne ni kurebe nakoina: Ko na tai reireiai arou; I ataia bwa bon te tabo ae aki maiu tanona; mangaia ae I kangai nakoim, I a tia n ribanaia n te tai ae maan, ao ko a tia n nooria bwa a mwaiti uaana aika a riki.

23 Ao e koro bukina bwa e taku Uean te nne ni kurebe nakon ana tia mwakuri: Nora arei; I a tia n unika te mwanga teuana ikekei; ao ko ataia bwa e aki maiu riki te tano arei nakon are te moan. Ma tara te kai. I a tia n ribanaia n te tai ae maan, ao a mwaiti uaana aika a tia n riki; mangaia ae rikoi, ao kawakin ibukin tain te aki kariki ua, bwa I aonga ni kawakinna ibukiu.

24 Ao e koro bukina bwa e a manga taku riki Uean te nne ni kurebe nakon ana tia mwakuri: Tara aio, ao nora te ^amwanga riki teuana, are I a tia n unikia; ao taraia I a tia naba n ribanaia, ao e a tia ni kariki uaa.

25 Ao e taku nakon te tia mwakuri: Taraa aio ao noora te kabanea ni kai. Taraia, I a tia n unika aio n te tabo ae ^amaiu tanona; ao I a tia n ribanaia n te tai ae maan, ao ti teuana mwakorona ae kariki uaa aika a tamaroa, ao mwakorona are ^bteuana e kariki uaa aika a uarereke; taraia, I a tia n ribana te kai aio n aron are I karaoia nakon taian kai ake tabeua.

26 Ao e koro bukina bwa e taku Uean te nne ni kurebe nakon ana tia mwakuri: Otoi taian mwanga ake a aki kariki ^auaa aika a tamaroa, ao karenakoi nako nanon te ai.

27 Ma taraia, e taku te tia mwakuri nakoina: E riai bwa ti na ti koroi mwanga ake a mate, ao ti na kamwarakei riki teutana, ao a na bae ni kariki uaa aika a tamaroa ibukim, ao ko na kona ni kawakin n tain te aki kariki uaa.

28 Ao e koro bukina bwa a uaaia Uean te nne ni kurebe ma te tia mwakuri n ribanai uaan kaai ni kabane i nanon te nne ni kurebe.

29 Ao e koro bukina bwa e maan i mwin aio ao e taku Uean te nne ni kurebe nakon ana ^atia mwakuri: Nakomai, bwa ti na nako ni mwakuri i nanon te nne ni kurebe. Bwa taraia e a kaan te ^btai, ao e nang roko te ^ctoki; mangaia ae N na riai ni kaawakin uaa ibukiu n tain te aki kariki uaa.

30 Ao e koro bukina bwa a nako Uean te nne ni kurebe ma te tia mwakuri nakon te nne ni kurebe; ao a roko n te kai are e tia n oteaki mwangana ni koaua ao a kanimwaki i aona mwanga man te kai ae riki n aki akaaka ao taraia a ^amwaiti uaanikai i aona.

31 Ao e koro bukina bwa e katoong uaana tabeua Uean te nne ni kurebe, n aekaia nako aika a mwaiti. Ao e taku Uean te nne ni kurebe: Taraia, e a maan te tai are ti riribana iai te kai aio, ao I a tia ni kakawakin uaa aika a mwaiti ibukiu n tain te aki kariki uaa.

32 Ma taraia, n te tai aio ao e a mwaiti riki uaana, ao ^aakea mai buakoia ae tamaroa. Ao taraia, a mwaiti aekan uaanikai aika a buakaka mai iai; ao akea te bwai ae e na reke mai iai ibukiu, e ngae ngke I a tia ni kabanea au tai iaona, ao e rawawata nanou ngkai e nang mate te kai aio.

33 Ao e taku Uean te nne ni kurebe nakon te tia mwakuri: Teraa ae ti na karaoia nakon te kai, bwa ti aonga ni kona ni manga kaawakin uaana ibukiu n tain te aki kariki uaa?

34 Ao e taku te tia mwakuri nakon te toka: Taraia, ngkai ko kanim mwanga man te kai te oriwa ae riki n aki akaaka ao a kamaiua te wakaa, ao a reke maiuia ao aikoa mate; mangaia ae ko noria bwa a tamaroa.

35 Ao e koro bukina bwa e taku Uean te nne ni kurebe nakon ana tia mwakuri: Akea kabwaiau man te kai, ao akea naba kabwaiau man taian wakaa ngkana a teimatoa n anganai uaanikai aika a bubuaka.

36 Ma e ngae n anne, I ataia bwa a tamaroa taian wakaa, ao I ibukin oin au kantaninga I a tia ni kawakinia; ao ibukina bwa e bati korakoraia ao a karika uaanikai aika a tamaroa man taian mwanga aika a reke man mwanga aika a riki n aki akaaka.

37 Ma taraia, a rikirake taian mwanga ^ariaon ana kona te wakaa; ao ngkai e a riao rikirakeia taian mwanga nakon te wakaa ao a kariki uaanikai aika a bubuaka; ao ngkai a riki uaanikai aika a bubuaka i aona ao e a moanna ni mate; e aki maan ao e na mka, ao e na karenakoaki nako nanon te ai, ma i mwaain aio ao ti riai ni karaoa are ti kona ibukina bwa e aonga ni maiu.

38 Ao e koro bukina bwa e taku Uean te nne ni kurebe nakon ana tia mwakuri: Ti a nako nakon mwakoron te nne ni kurebe aika a raraoi, n noria bwa a kariki uanikai aika a bubuaka mwangan te kai ae ribanaki ke aki.

39 Ao e koro bukina bwa a nakon mwakoron te nne ni kurebe ae e raroa. Ao e koro bukina bwa a noria bwa a moanna naba ni bubuaka uaan taian mwanga man te kai ae ribanaki; eng, te ^amoan, te kauoua, ao taian kabanea n uanikai; ao a bane ni bubuaka.

40 Ao a ^ataonaki mwangan te kai aika a raoiroi ake a kariki uaanikai aika a tamaroa, n uaanikai aika a bubuaka, n te aro ae e mwau man ni mate te mwanga arei.

41 Ao e koro bukina bwa e a tang Uean te nne ni kurebe, ao e taku nakon te tia mwakuri: ^aTeraa are N na kona n tia ni karaoia ibukin au nne ni kurebe?

42 Taraia, I ataia bwa a bane ni buakaka uaanikai ni kabane i nanon te nne ni kurebe, ma ti aikai aika a aki. Ao ngkai mwanga ake a tia ngkoa ni kariki uaanikai aika a tamaroa, a riki naba ni buakaka; ao ngkai akea bonganaia kai ni kabane i nanon au nne ni kurebe, ma ti bonganaia riki bwa kanan te ai, ao a teweaki nako nanon te ai.

43 Ao noora te kabane ni uaanikai aio, ae e a tia n rai, I a tia n unikia n te tano ae ^amaiu; eng, ae te tabo ae maiu riki nakon aonon nako au nne ni kurebe.

44 Ao ko noria naba bwa I a tia ni koroi aroka ni kabane ake a ^ariki iaon te tano aio, bwa I aonga n unika te kai aio n te tabo anne.

45 Ao ko noria bwa e kariki uaanikai aika a tamaroa mwakorona teuana, ao mwakorona teuana e kariki uaanikai aika a bubuaka; ao ngkai I aki otoi mwanga akekei ma ni karenakoi nako nanon te ai, taraia, e eweka aon te mwanga ae tamaroa ao e riki ni mate iai.

46 Ao ngkai, taraia, e ngae ngke I a tia ni kakorakorai n tararua au nne ni kurebe, ao a bon riki ni buakaka kaai ake I uniki i nanona, ao a aki kariki uaanikai aika a tamaroa; ao I a tia ni baireia bwa N na kaawakin, ake N na kona ni kaawakin uaaia ibukiu n tain te aki kariki uaa. Ma taraia, a riki n ai aroia kai oriwa aika a riki n aki akaaka, ao ai akea bonganaia ma ti te koreaki ao te ^akarenakoaki nako nanon te ai; ao e nanokawaki nanou ngkai a nang mate.

47 Ma a na tera riki are N na kona n tia ni karaoia i nanon au nne ni kurebe? I a tia n taningarotia au mwakuri, ke n aki ribanai raoi? Tiaki te koaua aio, I a bon tia n ribanaia raoi, ao I a tia ni kekena rarikina, ao ni koroi mwanga aika a mate, ao ni kamwarakea; ao I a tia ni ^akamarurungai ni mwakuri man te ingabong ni karokoa te ^bbong. Ao e rawawata nanou ngkai e riai bwa N na koroi kai ni kabane i nanon au nne ni kurebe, ao ni karenakoi nako nanon te ai bwa a na kabuekaki. Antai ae kabuakaka nanon au nne ni kurebe?

48 Ao e koro bukina bwa e taku te tia mwakuri nakon ana toka: Tiaki bukin rietan taian kai are e riki iai aio—tiaki bukin rikin aio man korakoran bwebweraken taian mwanga nakon taian wakaa aika a tamaroa? Ao ngkai a korakora riki taian mwanga nakon taian wakaa, ao a waekoa riki n reke korakoraia nakon taian wakaa, ao anai korakoraia taian wakaa. Taraia, I taekina aio, tiaki aio are e karika buakakan arokam i nanon am nne ni kurebe?

49 Ao e koro bukina bwa e taku Uean te nne ni kurebe nakon ana tia mwakuri: Ti a nako ni koroi taian kai mai nanon te nne ni kurebe ao ni karenako nanon te ai, bwa aonga n aki kamangeangea nanon au nne ni kurebe, bwa I a tia ni karaoi ake I konai ni karaoi. Teraa riki are N na kona ni karaoia ibukin au nne ni kurebe?

50 Ma taraia, e taku te tia mwakuri nakon Uean te nne ni kurebe: Tai waekoa ni ^akoroi.

51 Ao e taku te Uea: Eng, N na aki waekoa ni koroi, bwa e rawawata nanou ngkai a nang mate taian kai ake i nanon au nne ni kurebe.

52 Mangaia ae ti na anai ^amwangan taian kai ake I uniki n taabo aika a raroa i nanon au nne ni kurebe, ao ti na katomai ma taian kai ake ti otoi ngkoa mai iai; ao ti na otoi taian mwanga ake a kariki uaanikai aika a mao man taian kai, ao ti na katomai mwangana ni koaua ao n onea mwia.

53 Ao N na karaoa aio bwa aonga n aki mate taian kai, ao bwa I aonga naba ni kona ni kaawakin wakaana ibukin bwaai ake I taku inanou.

54 Ao noria, ae a bon teimatoa ni maiu wakaan taian aroka ake I uniki n taabo nako; mangaia ae N na kawakin ibukin bwai ake I taku i nanou, ao N na anai mwangan te kai aio tabeua, ao N na ^akatomai nako aona. Eng, N na katomai nako iai taian mwanga man te tina ni kai, bwa I aonga ni kona ni kawakin wakaana ibukin oin nanou, bwa a aonga n anganai uaanikai aika a tamaroa n te tai are e reke iai maiuia, ao I aonga ni kakatonga n reken taian uaanikai man au nne ni kurebe.

55 Ao e koro bukina bwa a otoi taian mwanga man te kai are e a tia n riki ni maiu n aki akaaka, ao a katomai mwanga ngkoa nako aona, ake a tia naba n riki n aki akaaka.

56 Ao a anai naba mwangan te kai are a tia n riki n aki akaaka, ao a katomai mwangana ma te tina ni kai.

57 Ao e taku Uean te nne ni kurebe nakon ana tia mwakuri: Tai otoi mwanga aika a riki n aki akaaka man taian kai, ma ti ngkana a kariki uaanikai aika a mao; ao ko na onea mwia n aron are I a tia n tuangko.

58 Ao ti na manga ribanai taian kai i nanon te nne ni kurebe, ao ti na koroi mwanga ake a tia ni mate; ao ti na otoi mwanga man taian kai ake a mka, ao a nang mate, ao ti na karenakoi nakon te ai.

59 Ao I karaoa aio, bwa e aonga n ae e reke maiuia taian wakaa ngkai iai te raoiroi irouia; ao man te bitaki are e reke man taian mwanga ake a katomaki nako aona, bwa e aonga ni kona te buakaka te raoiroi.

60 Ao ngkai I a tia ni kamaiui mwanga ni kai ma taian wakaa naba, ao I a tia ni manga katomai taian mwanga nakon taiani kai ake a oteaki ngkoa mai iai, ao n tia ni kamaiui wakaan te tina ni kai, bwa aonga ni kona taian kai i nanon au nne ni kurebe ni manga kariki ^auaanikai aika a tamaroa; ao e na manga reke kimwareireiu ni uaan au nne ni kurebe, ao e na korakora naba kukureiu ngkai I a tia ni kawakin taian wakaa ma mwanga man te moan ua—

61 Mangaia ae ko na nako ni weteia ^ataan mwakuri ni kabane bwa ti na kakorakoraira ni ^bmwakuri i nanon te nne ni kurebe, bwa ti aonga ni katauraoa te kawai, bwa I aonga ni manga karika uaana a e aki renganaki, ae uaana a e aki renganaki ae raoiroi ma ni moan te kakawaki riki nakoia uaanikai nako.

62 Mangaia ae ti na nako ao ti na kakorakoraira ni mwakuri, bwa e a kaan te toki, ao aio au kabanea n tai ni kaitiaka au nne ni kurebe.

63 Katomai taian mwanga; waki man ake a ^akabane bwa aonga n riki rimoa ao ake a rimoa a na riki ni kabane. Ao keken rarikin taian aroka, aika a ataei ao aika a ikawai, man te moan ni karokoa te kabanea; ao a na bane n ribanaki mai moana ni karokoa kabaneana n te kabanea n tai.

64 Mangaia ae kekena rarikia, ao koroi mwangaia aika a mate, ao kamwarakeia, n te kabanea n tai, bwa e a kaan roko te toki. Ao ngkana a reke maiuia mwanga ake a katomaki, ao a kariki uaanikai aika a tamaroa, ao kam riai ni katauraoa te kawai ibukia bwa aonga n rikirake.

65 Ao ngkana a moanna n rikirake ao kam na kamwawai taian mwanga ake a kariki uaanikai aika a mao, n taratarai rikiraken buburaia ma tamaroaia; ao kam na aki ^akamwawai aika a buakaka n te tai ae ti teuana, bwa a rawa ni korakora riki wakaaia nakon taian mwanga ake a katomaki nako iai, ao a na mate taian mwanga, ao a na mate au kai ake i nanon au nne ni kurebe.

66 Bwa e rawawata nanou ngkai a na mate taian kai ake i nanon au nne ni kurebe; mangaia ae kam na karaoa kamwawakia aika a bubuaka n aron birimwaakan rikirakeia ake a raoiroi, bwa e aonga ni bootau korakoran te rabwata ma te wakaa, ni karokoa te tai are e na taonaki iai te buakaka iroun te raoiroi, ao e na koutaki are e buakaka man teweaki nako nanon te ai, bwa e na aki kamangeangea nanon au nne ni kurebe; ao N na iaakin nako aika a bubuaka ni kabane mai nanon au nne ni kurebe.

67 Ao N na kanimwi mwangan te kai are te oi nakon te kai are te oi.

68 Ao N na katomai mwangan te kai ngkoa nakon neia ake a oteaki ngkoa mai iai; ao N na manga botiia, bwa a na kariki uaanikai aika a tamaroa, ao a na manga riki n ti teuana.

69 Ao e koro bukina bwa a na ^akarenakoaki ake a buakaka, eng, mai nanon au nne ni kurebe; bwa taraia, bon ti te tai aio ae N na kaitiaka iai au nne ni kurebe.

70 Ao e koro bukina bwa e a kanakoa ana ^atia mwakuri Uean te nne ni kurebe; ao e nako te tia mwakuri ni karaoi bwaai ake tuangaki iroun te Uea, ao e kairiia taan mwakuri; aika ^btabeman mwaitia.

71 Ao e taku Uean te nne ni kurebe nakoia: Kam na nako, ao kam na ^amwakuri i nanon te nne ni kurebe, ma korakorami ni kabane. Bwa taraia, aio te ^bkabane n tai are N na ribana au nne ni kurebe; bwa e a kaan te toki, ao e a waekoa n roko te tai; ao ngkana kam kakorakoraingkami ni mwakuri ao e na reke iroumi te ^ckimwareirei n taian uaanikai ake N na kaawakin ibukiu n tain te aki kariki uaa ae e kaan rokona.

72 Ao e koro bukina bwa a nako taan mwakuri ni mwakuri ao a mwakuri ma korakoraia ni kabane; ao e mwakuri naba te Uea irarikiia; ao a kaawakin ana tua Uean te nne ni kurebe iaon bwaai ni kabane.

73 Ao e a riki uaan te kai are ngkoa i nanon te nne ni kurebe; ao a moanna n riki mwangan te kai are ngkoa ma ni maiu raoi; ao a oteaki mwanga ake a reke man te kai are e riki n aki akaaka ao a karenakoaki; ao a kaboraoi aron maiuia wakaa ma taian mwanga, n aron korakoraia.

74 Ao a mwakuri ni botumwaaka, ma te kakaonimaki, n aron ana tua Uean te nne ni kurebe, ni karenakoi naba ake a buakaka mai nanon te nne ni kurebe, ao Uean te nne ni kurebe e a kaawakin ibukina taian kai aika a kariki uaanikai aika a tamaroa; ao a riki n aiaron te rabwata ae ti ^ateuana; ao titebo aroia uaana ni kabane; ao e a kaawakin uaana aika a tamaroa Uean te nne ni kurebe ibukina, aika moan te kakawaki nakoina man moan karaoan aio.

75 Ao e koro bukina bwa ngke e a nooria Uean te nne ni kurebe bwa a raoiroi ana uaanikai, ao a aikoa buakaka kanoan ana nne ni kurebe, ao e a weteia ana tia mwakuri, ao e taku nakoia: Taraia, aio te kabanea n tai are ti na ribana iai te nne ni kurebe; ao kam a tia n nooria bwa I a tia ni karaoia n aron nanou; ao I a tia ni kaawakina te uaanikai are ngkoa, ae tamaroa, ao n aron tamaroana are ngkoa. Ao kam na ^akakabwaiaki; ngkai kam a tia ni kakaonimaki ni mwakuri ma Ngai i nanon au nne ni kurebe, ao ni kaawakin au tua, ao kam a tia ni manga karekea te uaanikai arei ^bngkoa nakoiu, ao e aikoa buakaka au nne ni kurebe, ma ni karenakoaki aika a bubuaka, taraia, kam na kimwareirei ma ngai ibukin uaan au nne ni kurebe.

76 Bwa taraia, e na ^amaan te tai are N na kona iai ni kaawakin uaanikai man au nne ni kurebe ibukiu n tain te aki kariki uaa, ae e na waekoa rokona; ao I a tia n ribana au nne ni kurebe, ma ni kaitiakia, ma ni keken rarikina, ma ni kamwarakea n te kabane n tai; mangaia ae N nang kaawakin uaanikai ibukiu, ibukin te tai ae maan, n aron are I a tia n taekinna.

77 Ao ngkana e roko te tai are a na manga kaoti iai uaanikai aika a buakaka, n te tai anne ao N na booti uaanikai aika a raoiroi ma aika a buakaka; ao N na kaawakin aika a tamaroa ibukiu, ao N na karenakoi aika a buakaka nakon oin aia tabo. Ao ngkanne e na roko tokin te ^atai; ao N na ^bkabueka au nne ni kurebe ma te ai.