ဧသာ ၂

အခန်းကြီး ၂

ယာရက်အမျိုးသားတို့သည် ကတိတော်မြေသို့သွားမည့် သူတို့၏လမ်းခရီးအတွက် ပြင်ဆင်ကြ၏—ထိုပြည်သည်ကား၊ လူသားတို့ ခရစ်တော်ကို အစေခံရမည့် သို့မဟုတ်လျှင် ပယ်ရှင်းပစ်ခံရမည့် အမြတ်ဆုံးပြည်ဖြစ်၏—ကိုယ်တော်ရှင်သည် ယာရက်၏အစ်ကိုနှင့် သုံးနာရီကြာအောင် စကားဆို၏—ယာရက်အမျိုးသားတို့သည် သမ္ဗန်များကို တည်ဆောက်ကြ၏—ကိုယ်တော်ရှင်သည် ယာရက်၏အစ်ကိုအား သမ္ဗန်များကို အဘယ်သို့အားဖြင့် အလင်းပေးရမည်ကို အဆိုပြုစေခြင်းငှာ မေးတော်မူ၏။

၁ ဤသို့အားဖြင့်အချိန်တန်လာသောအခါ၊ ယာရက်နှင့် သူ့အစ်ကို၊ ထို့အတူ သူတို့၏မိသားစုများ၊ ထို့အတူ ယာရက်နှင့် သူ့အစ်ကိုတို့၏ အဆွေခင်ပွန်းများနှင့် သူတို့၏မိသားစုများသည် မြောက်ဘက်လားရာအရပ်၌ရှိလေသည့် ချိုင့်ဝှမ်းထဲသို့ (ချိုင့်ဝှမ်း၏အမည်မှာ နိမ်ရောဒဟုခေါ်သည့် အားကြီးသောမုဆိုး၏အမည်အတိုင်း ဖြစ်၏) သူတို့အတူတကွစုဝေးသည့် သူတို့၏သိုးစုအထီးအမအမျိုးမျိုးတို့နှင့်အတူ ဆင်းသွားကြ၏။

၂ သူတို့သည် မိုးကောင်းကင်ငှက်တို့ကို ဖမ်းဆီးခြင်းငှာလည်း ထောင်ချောက်များကို ချကြ၏။ ခွက်ကိုလည်းပြင်ဆင်၍၊ ထိုခွက်ထဲ၌ ရေထဲမှငါးတို့ကို သယ်ဆောင်ကြ၏။

၃ သူတို့သည် ပျားရည်ဟု အနက်ရသည့် ဒေဇေရက်ကိုလည်း သူတို့နှင့်အတူ သယ်ဆောင်ကြ၏။ ထိုကဲ့သို့အားဖြင့်၊ သူတို့သည် ပျားအုံများနှင့် ထိုပြည်၏မျက်နှာပြင်ပေါ်၌ရှိသည့် အရာအမျိုးမျိုး၊ မျိုးစေ့အမျိုးမျိုးတို့ကို သူတို့နှင့်အတူ သယ်ဆောင်ကြ၏။

၄ ဤသို့အားဖြင့်အချိန်တန်လာသောအခါ၊ နိမ်ရောဒချိုင့်ဝှမ်းထဲသို့ သူတို့ဆင်းလာကြလျှင်၊ ကိုယ်တော်ရှင်ဆင်းလာတော်မူ၍၊ ယာရက်၏အစ်ကိုနှင့် ပြောဆို၏။ သူသည်လည်း မိုးတိမ်ထဲ၌ ရှိတော်မူသဖြင့် ယာရက်၏အစ်ကိုက မြင်ခြင်းမရှိ။

၅ ဤသို့အားဖြင့်အချိန်တန်လာသောအခါ၊ ကိုယ်တော်ရှင် သူတို့ကို မိန့်တော်မူသည်မှာ တောရိုင်းထဲသို့၊ အထူးသဖြင့် လူမရောက်ဖူးသည့် ထိုအရပ်ထဲသို့ ထွက်သွားရမည့်အကြောင်းပေတည်း။ ဤသို့အားဖြင့်အချိန်တန်လာသောအခါ၊ ကိုယ်တော်ရှင်သည် သူတို့ရှေ့မှ သွားတော်မူ၏၊ မိုးတိမ်ထဲ၌ ရပ်၍ သူတို့နှင့် စကားဆိုလျက်၊ သူတို့ခရီးသွားရမည့်အရပ်ကို ညွှန်ပြတော်မူ၏။

၆ ဤသို့အားဖြင့်အချိန်တန်လာသောအခါ၊ သူတို့သည် တောရိုင်းထဲ၌ ခရီးသွား၍၊ သမ္ဗန်များကို တည်ဆောက်ကြ၏၊ ထိုသမ္ဗန်များဖြင့် များစွာသောရေတို့ကို ဖြတ်ကူးကြ၏ ကိုယ်တော်ရှင်၏လက်တော်အားဖြင့် အစဉ်မပြတ်လမ်းညွှန်တော်မူခြင်းကိုလည်း ခံရကြ၏။

၇ ကိုယ်တော်ရှင်ကလည်း သူတို့ကို ပင်လယ်နှင့်သာ၍ဝေးသောအရပ် တောရိုင်းထဲ၌ ရပ်တန့်စေရန် အခွင့်မပေးလို၊ အခြားသောပြည်များအားလုံးထက် အမြတ်ဆုံးပြည်တည်းဟူသော၊ ဖြောင့်မတ်သောလူမျိုးတို့အတွက် ကိုယ်တော်ရှင်ဘုရားသခင် ထိန်းသိမ်းစောင့်ရှောက်ထားတော်မူသည့် ကတိတော်မြေသို့တိုင်အောင်ပင် ထွက်လာစေရန်သာ အလိုရှိတော်မူ၏။

၈ ဤကတိတော်မြေကို ထိုအချိန်မှစ၍၊ နောင်ကာလအစဉ်အဆက် ပိုင်ဆိုင်မည့်သူမှန်သမျှသည် မှန်ကန်သည့် တစ်ပါးတည်းသောဘုရားသခင်ကို အစေခံကြရမည်။ သို့မဟုတ်လျှင်၊ သူတို့အပေါ်သို့ သူ့အမျက်တော်အပြည့်အစုံ ကျရောက်လာသောအချိန်၌ ပယ်ရှားပစ်ခံရကြမည့်အကြောင်း သူ၏အမျက်တော်ဖြင့် ယာရက်၏အစ်ကိုကို ကျိန်ဆိုတော်မူခဲ့လေ၏။

၉ ယခုမူကား၊ ငါတို့သည် ကတိတော်မြေဖြစ်သည့် ဤပြည်နှင့်စပ်လျဉ်း၍ ဘုရားသခင်၏စီရင်ချက်များကို နားလည်နိုင်ကြ၏။ ထိုမြေကို ပိုင်ဆိုင်မည့် လူမျိုးမှန်သမျှသည် ဘုရားသခင်ကို အစေခံရကြမည်။ သို့မဟုတ်လျှင်၊ သူတို့သည် သူ၏အမျက်တော်အပြည့်အစုံ သူတို့အပေါ် ကျရောက်လာသောအချိန်၌ ပယ်ရှားပစ်တော်မူခြင်းကို ခံရလိမ့်မည်။ သူ၏အမျက်တော်အပြည့်အစုံသည်လည်း သူတို့ဒုစရိုက်၌ ရင့်မှည့်ကြသောအချိန်၌ သူတို့အပေါ် ကျရောက်လာ၏။

၁၀ အကြောင်းမူကား၊ ရှုလော့၊ ဤပြည်သည် အခြားသောပြည်များအားလုံးထက် အမြတ်ဆုံးဖြစ်သည့်ပြည် ဖြစ်၏။ သို့ဖြစ်၍၊ ထိုပြည်ကို ပိုင်ဆိုင်မည့်သူသည် ဘုရားသခင်ကို အစေခံရမည်။ သို့မဟုတ်လျှင် ပယ်ရှင်းပစ်တော်မူခြင်းကို ခံရမည်။ အကြောင်းမူကား၊ ထိုအရာသည် ဘုရားသခင်၏ထာဝရတည်မြဲသောစီရင်ချက် ဖြစ်၏။ ထိုပြည်သားတို့၌ ဒုစရိုက်၏ပြည့်စုံခြင်း မတိုင်မီ၊ သူတို့သည် ပယ်ရှင်းပစ်တော်မူခြင်းကို မခံရ။

၁၁ ဤမှတ်တမ်းသည်လည်း သင်တို့ထံသို့ ရောက်လာ၏၊ အို တပါးအမျိုးသားတို့၊ ဘုရားသခင်၏ စီရင်ချက်များကို သင်တို့သိနိုင်ကြစေခြင်းငှာ—သင်တို့နောင်တရနိုင်စေခြင်းငှာ၊ ထို့အတူ သင်တို့၏ဒုစရိုက်များ၌ ပြည့်စုံခြင်းသို့ ရောက်သည်တိုင်အောင် ဆက်၍ မရှိနိုင်ကြစေခြင်းငှာ၊ သင်တို့သည် ဤပြည်၌ နေထိုင်သူများ ယခင်ကပြုသကဲ့သို့ ဘုရားသခင်၏အမျက်တော်အပြည့်အစုံကို သင်တို့အပေါ် ကျရောက်စေခြင်း မရှိနိုင်ကြစေခြင်းငှာပေတည်း။

၁၂ ရှုလော့၊ ဤပြည်သည် အမြတ်ဆုံးပြည်ဖြစ်၏။ ထိုပြည်ကို ပိုင်ဆိုင်မည့်လူမျိုးမှန်သမျှသည် ငါတို့ရေးလေသည့် အရာတို့အားဖြင့် ထင်ရှားစွာပြသည့်သူ၊ ယေရှုခရစ်တော်တည်းဟူသော ထိုပြည်၏ဘုရားသခင်ကို အစေခံမှသာလျှင်၊ ကျွန်ခံရာမှ၊ ထို့အတူ ဖမ်းဆီးချုပ်နှောင်ခြင်းမှ၊ ထို့အတူ ကောင်းကင်အောက်ရှိ အခြားသောလူမျိုးခပ်သိမ်းတို့ထံမှ လွတ်လပ်လိမ့်မည်။

၁၃ ယခုမူကား၊ ငါသည် ငါ၏မှတ်တမ်းကို ဆက်၍ရေး၏။ အကြောင်းမူကား၊ ရှုလော့၊ အချိန်တန်လာသောအခါ၊ ကိုယ်တော်ရှင်သည် ယာရက်နှင့် သူ့ ညီအစ်ကိုတို့အား ထိုပြည်ကိုပိုင်းခြားသည့် ကြီးစွာသောပင်လယ်သို့တိုင်အောင်ပင် ခေါ်ဆောင်တော်မူ၏။ သူတို့သည် ပင်လယ်သို့ ရောက်သောအခါ သူတို့တဲများကို ဆောက်ကြ၏။ ထိုနေရာ၏အမည်ကို မော်ရန်ကူမာဟု ခေါ်ကြ၏။ ပင်လယ်ကမ်းနားရှိ တဲများထဲ၌ လေးနှစ်ကြာအောင်နေထိုင်ကြ၏။

၁၄ ဤသို့အားဖြင့်အချိန်တန်လာသောအခါ၊ လေးနှစ်၏အဆုံး၌ ကိုယ်တော်ရှင်သည် ယာရက်၏အစ်ကိုထံသို့ တစ်ဖန်ကြွလာတော်မူပြီးလျှင်၊ မိုးတိမ်ထဲ၌ရပ်၍ သူနှင့် စကားဆို၏။ ကိုယ်တော်ရှင်သည် ယာရက်၏အစ်ကိုနှင့် သုံးနာရီကြာအောင် စကားဆို၏။ ကိုယ်တော်ရှင်၏နာမတော်ကို ပဌနာပြုရန် သူ အောက်မေ့ခြင်းမရှိသောကြောင့်လည်း သူ့ကို ဆုံးမတော်မူ၏။

၁၅ ယာရက်၏အစ်ကိုသည် သူပြုသည့် မကောင်းမှုမှ နောင်တရ၍၊ သူနှင့်အတူရှိသည့် သူ၏ညီအစ်ကိုတို့အတွက် ကိုယ်တော်ရှင်၏နာမတော်ကို ပဌနာပြု၏။ ကိုယ်တော်ရှင်ကလည်း သူ့ကို မိန့်တော်မူသည်မှာ၊ ငါသည် သင်နှင့်သင်၏ညီအစ်ကိုတို့ကို သူတို့၏အပြစ်များမှ ခွင့်လွှတ်တော်မူမည်။ သို့ရာတွင်၊ သင်တို့သည် နောက်ထပ်၍ အပြစ်မပြုရ၊ အကြောင်းမူကား၊ ငါ၏ဝိညာဉ်တော်သည် လူသားကို အစဉ်အမြဲ ပဲ့ပြင်ဆုံးမလိမ့်မည်မဟုတ်ကြောင်း သင်တို့ သတိရကြလော့။ သို့ဖြစ်၍၊ သင်တို့သည် လုံးလုံးရင့်မှည့်သည့်တိုင်အောင် အပြစ်ပြုကြမည်ဆိုလျှင် ကိုယ်တော်ရှင်၏မျက်မှောက်မှ ပယ်ရှင်းခံရလိမ့်မည်။ ဤအရာတို့သည်ကား၊ သင်တို့နေထိုင်ရာအတွက် ငါပေးတော်မူမည့်ပြည်နှင့်စပ်လျဉ်းသည့် ငါ၏အတွေးအကြံတို့ပင်တည်း။ အကြောင်းမူကား၊ ထိုပြည်သည် အခြားသောပြည်များအားလုံးထက် အမြတ်ဆုံးပြည်ဖြစ်လိမ့်မည်။

၁၆ ကိုယ်တော်ရှင်မိန့်တော်မူသည်ကား၊ ယခင်က သင်တို့တည်ဆောက်သည့် သမ္ဗန်များထုံးစံအတိုင်း သွား၍တည်ဆောက်လော့။ ဤသို့အားဖြင့်အချိန်တန်လာသောအခါ၊ ယာရက်၏အစ်ကိုနှင့်၊ သူ၏ညီအစ်ကိုတို့သည်လည်း ကိုယ်တော်ရှင်၏ သွန်သင်ခြင်းတို့အတိုင်း သွား၍ သူတို့ တည်ဆောက်သည့်နည်းတူ သမ္ဗန်တို့ကို တည်ဆောက်ကြ၏။ ထိုသမ္ဗန်တို့သည် သေးငယ်၍၊ ရေပေါ်၌ ငှက်တစ်ကောင်၏ပေါ့ပါးခြင်းကဲ့သို့ပင်၊ ရေပေါ်၌ ပေါ့ပါးကြ၏။

၁၇ ထိုသမ္ဗန်တို့ကို အလွန်ရေလုံစေသောနည်းဖြင့် တည်ဆောက်သဖြင့်၊ ပန်းကန်ကဲ့သို့ပင် ရေကိုထည့်၍ရလိမ့်မည်။ အောက်ခင်းသည်လည်း ပန်းကန်ကဲ့သို့ ရေလုံ၏။ နံရံတို့သည်လည်း ပန်းကန်ကဲ့သို့ ရေလုံ၏။ အစွန်းတို့သည် ချွန်ထက်၏။ အမိုးသည်လည်း ပန်းကန်ကဲ့သို့ ရေလုံ၏။ အလျားသည် သစ်ပင်၏အလျား ဖြစ်၏။ တံခါးသည်လည်း ပိတ်သောအခါ ပန်းကန်ကဲ့သို့ ရေလုံ၏။

၁၈ ဤသို့အားဖြင့်အချိန်တန်လာသောအခါ၊ ယာရက်၏အစ်ကိုက ကိုယ်တော်ရှင်ထံသို့ တောင်းလျှောက်သည်မှာ၊ အို ကိုယ်တော်ရှင်၊ အကျွန်ုပ်သည် ကိုယ်တော် မိန့်တော်မူလေသည့်အတိုင်း ထိုအမှုကို ဆောင်ရွက်ပြီး၍၊ သမ္ဗန်တို့ကိုလည်း ကိုယ်တော်လမ်းညွှန်တော်မူလေသည့်အတိုင်း တည်ဆောက်ပြီးပါပြီ။

၁၉ ရှုတော်မူပါဦး၊ အို ကိုယ်တော်ရှင်၊ အထဲ၌ အလင်းမရှိပါ။ အကျွန်ုပ်တို့သည် အဘယ်အရပ်သို့ ဦးတည်ရပါမည်နည်း။ အကျွန်ုပ်တို့ ပျက်စီးရပါလိမ့်မည်၊ အကြောင်းမူကား၊ အကျွန်ုပ်တို့သည် အထဲ၌ ရှိသည့်လေမှတစ်ပါး အသက်ရှု၍မရနိုင်ကြပါ။ ထို့ကြောင့် ပျက်စီးရပါလိမ့်မည်။

၂၀ ကိုယ်တော်ရှင်ကလည်း ယာရက်၏အစ်ကိုအား မိန့်တော်မူလေသည်ကား၊ ရှုလော့၊ သင်တို့သည် အမိုးနှင့် အောက်ပိုင်းတို့၌ အပေါက်ဖောက်ရမည်။ လေလိုအပ်သောအခါတိုင်း၊ အပေါက်ကိုဖွင့်၍ လေကိုရယူကြလော့။ ထိုသို့ပြု၍ သင်တို့အပေါ်သို့ ရေဝင်လာလျှင်၊ ရှုလော့၊ ရေလွှမ်းမိုးခြင်းထဲ၌ မပျက်စီးနိုင်ကြစေခြင်းငှာ၊ အပေါက်ကို ပိတ်ရမည်။

၂၁ ဤသို့အားဖြင့်အချိန်တန်လာသောအခါ၊ ယာရက်၏အစ်ကိုသည် ကိုယ်တော်ရှင်မိန့်တော်မူလေသည့်အတိုင်း ဆောင်ရွက်၏။

၂၂ သူသည်လည်း ကိုယ်တော်ရှင်ထံသို့ တစ်ဖန်တောင်းလျှောက်သည်ကား၊ အို ကိုယ်တော်ရှင်၊ ရှုတော်မူပါ၊ အကျွန်ုပ်သည် ကိုယ်တော်မိန့်တော်မူလေသည့်အတိုင်းပင် ဆောင်ရွက်ပြီးပါပြီ။ အကျွန်ုပ်၏လူမျိုးတို့အတွက် သင်္ဘောကို ပြင်ဆင်ပြီး၍၊ ရှုတော်မူပါ၊ အထဲ၌ အလင်းမရှိပါ။ ရှုတော်မူပါ၊ အို ကိုယ်တော်ရှင်၊ ကိုယ်တော်သည် အကျွန်ုပ်တို့အား ဤကြီးစွာသောရေကို မှောင်မိုက်ထဲ၌ ဖြတ်ကူးရစေကြောင်း အခွင့်ပေးမည်လော။

၂၃ ကိုယ်တော်ရှင်ကလည်း ရာယက်၏အစ်ကိုအား မိန့်တော်မူလေသည်ကား၊ သင်တို့၏သင်္ဘောထဲ၌ အလင်းရနိုင်ခြင်းငှာ အဘယ်အရာကို ငါပြုစေရန်အလိုရှိကြသနည်း။ ရှုလော့၊ သင်တို့၌ ပြတင်းပေါက်များ မရှိနိုင်။ အကြောင်းမူကား၊ ၎င်းတို့သည် အပိုင်းပိုင်းကျိုးပဲ့လိမ့်မည်။ သင်တို့နှင့်အတူ မီးကိုလည်း ယူမသွားရ။ အကြောင်းမူကား၊ သင်တို့သည် မီး၏အလင်းဖြင့် သွားရမည်မဟုတ်။

၂၄ ရှုလော့၊ သင်တို့သည် ပင်လယ်ရေနက်၌ ဝေလငါးကဲ့သို့ ဖြစ်လိမ့်မည်။ အကြောင်းမူကား၊ တောင်သမျှမြင့်သော လှိုင်းတံပိုးတို့သည် သင်တို့အပေါ် ဆောင့်၍တိုက်ကြလိမ့်မည်။ သို့သော်လည်း ငါသည် သင်တို့ကို ပင်လယ်ရေနက်မှ တစ်ဖန် ဆောင်ယူတော်မူမည်။ အကြောင်းမူကား၊ လေသည် ငါ့နှုတ်မှ ထွက်သွား၍၊ ထို့အတူ၊ မိုးရေနှင့် ရေလွှမ်းမိုးခြင်းတို့ကိုလည်း ငါလွှတ်တော်မူလေပြီ။

၂၅ ရှုဦးလော့၊ ငါသည် ဤအရာတို့တစ်ဖက်၌ သင်တို့ကို ပြင်ဆင်ပေးတော်မူ၏။ အကြောင်းမူကား၊ ငါသည် ပင်လယ်လှိုင်းတံပိုးတို့၊ ထို့အတူ တိုက်သွားသည့်လေတို့၊ ထို့အတူ ရောက်လာမည့် ရေလွှမ်းမိုးခြင်းတို့ တစ်ဖက်၌ သင်တို့ကို ပြင်ဆင်ပေးခြင်းမရှိလျှင်၊ သင်တို့သည် ဤမဟာသမဒ္ဒရာကို မဖြတ်ကူးနိုင်ကြ။ ထို့ကြောင့်၊ ပင်လယ်ရေနက်ထဲ၌ ဝါးမျိုခံရသောအခါ၊ အလင်းကို ရရှိနိုင်ခြင်းငှာ သင်တို့အတွက် အဘယ်အရာကို ငါပြင်ဆင်ပေးစေရန် အလိုရှိကြသနည်းဟု မိန့်တော်မူ၏။