ဧသာ ၁၀

အခန်းကြီး ၁၀

ရှင်ဘုရင်တစ်ပါးသည် တခြားတစ်ပါး၏အရိပ်အရာကိုခံ၏—အချို့သောရှင်ဘုရင်တို့သည် ဖြောင့်မတ်ကြ၏။ အခြားသောရှင်ဘုရင်တို့သည် ဆိုးညစ်ကြ၏—ဖြောင့်မတ်ခြင်းက နိုင်သောအခါ လူတို့သည် ကောင်းချီးခံစား၍ ကိုယ်တော်ရှင်၏လက်တော်အားဖြင့် အောင်မြင်ကြ၏။

၁ ဤသို့အားဖြင့်အချိန်တန်လာသောအခါ၊ ဟေသ၏အမျိုးအနွယ်တစ်ဦးဖြစ်သူ ရှေဇသည်—ရှေဇမှတစ်ပါး၊ ဟေသနှင့် သူ၏အိမ်သူအိမ်သားခပ်သိမ်းတို့မှာ ငတ်မွတ်ခေါင်းပါးခြင်းဘေးအားဖြင့် ပျက်စီးလေရကား—သို့ဖြစ်၍၊ ရှေဇသည် ပြိုကွဲလျက်ရှိသော လူမျိုးတို့ကို တစ်ဖန်တည်ထောင်စပြု၏။

၂ ဤသို့အားဖြင့်အချိန်တန်လာသောအခါ၊ ရှေဇသည် သူ့ဘိုးဘေးတို့၏ပျက်စီးခြင်းကို အောက်မေ့လျက်၊ ဖြောင့်မတ်သောနိုင်ငံကို တည်ထောင်၏။ အကြောင်းမူကား၊ ယာရက်နှင့် သူ့အစ်ကိုအား နက်စွာသောရေကိုဖြတ်၍ ဆောင်ယူတော်မူရာ၌ ကိုယ်တော်ရှင်ပြုတော်မူသည့်အရာကို သူအောက်မေ့၏။ ကိုယ်တော်ရှင်၏လမ်းစဉ်များသို့လည်း လိုက်၍၊ သားသမီးများကို ဖွားမြင်စေ၏။

၃ ရှေဇအမည်ရှိသည့် သူ့သားအကြီးဆုံးသည် သူ့ကို ဆန့်ကျင်၍ပုန်ကန်၏။ သို့သော်လည်း၊ ရှေဇကို သူ၏အလွန်များသောစည်းစိမ်ဥစ္စာတို့ကြောင့်၊ ဓားပြ၏လက်ဖြင့် ပြင်းစွာအရိုက်ခံရခြင်းက သူ့အဘအဖို့ ငြိမ်းချမ်းခြင်းကို တစ်ဖန်ဖြစ်စေ၏။

၄ ဤသို့အားဖြင့်အချိန်တန်လာသောအခါ၊ သူ၏အဘသည် ထိုပြည်၏မျက်နှာပြင်ပေါ်တွင် မြို့များစွာကို တည်ဆောက်လျက်၊ လူတို့သည် ထိုပြည်၏မျက်နှာပြင်တစ်ခုလုံးပေါ် တစ်ဖန်ပျံ့နှံ့စပြုကြ၏။ ရှေဇသည်လည်း အသက်အလွန်ကြီးသည့်တိုင်အောင် အသက်ရှင်၍၊ ရိပလာကိရှကို ဖွားမြင်စေ၏။ သူသေ၍ ရိပလာကိရှသည် သူ၏နေရာ၌ နန်းစံ၏။

၅ ဤသို့အားဖြင့်အချိန်တန်လာသောအခါ၊ ရိပလာကိရှသည် ကိုယ်တော်ရှင်၏အမြင်၌ မှန်ကန်သည့်အရာတို့ကို မပြု။ အကြောင်းမူကား၊ သူ့တွင် ဇနီးနှင့် မယားငယ်များစွာ ရှိလျက်၊ ထမ်းဖို့လေးလံသည့်အရာကို လူတို့၏ပခုံးပေါ်၌ တင်၏။ ထိုမှတစ်ပါး၊ သူတို့ကို ကြီးလေးသောအခွန်များဖြင့် အခွန်ကောက်၍၊ ထိုအခွန်တို့ဖြင့် ကျယ်ဝန်းသည့် အဆောက်အအုံများစွာကို တည်ဆောက်၏။

၆ အလွန်တင့်တယ်သော ပလ္လင်တစ်ခုကိုလည်း သူ့အတွက် တည်ဆောက်၏။ ထောင်များစွာတို့ကိုလည်း တည်ဆောက်ပြီး၊ အခွန်ပေးဖို့ငြင်းဆိုသောသူမှန်သမျှကို ထောင်ထဲမှာ လှောင်ထား၏။ အခွန်ပေးဖို့မတတ်နိုင်သောသူသမျှကိုလည်း ထောင်ထဲမှာ လှောင်ထား၏။ သူတို့အထောက်အမအတွက် သူတို့ကို အစဉ်မပြတ်အလုပ်လုပ်စေပြီး၊ အလုပ်လုပ်ရန်ငြင်းဆိုသူမှန်သမျှကိုလည်း အသေသတ်ခံရစေ၏။

၇ သို့ဖြစ်၍၊ သူ၏တင့်တယ်သောလက်ရာအားလုံးတို့ကို ရရှိ၏။ အထူးသဖြင့်၊ သူ၏ရွှေစင်ကိုပင် ထောင်ထဲမှာ သန့်စင်စေ၏။ တင့်တယ်သည့်လက်ရာအမျိုးမျိုးတို့ကိုလည်း ထောင်ထဲမှာ ပြုပြင်စီရင်စေ၏။ ဤသို့အားဖြင့်အချိန်တန်လာသောအခါ၊ လူတို့ကို သူ၏မတရားသောမေထုန်အမှုနှင့် စက်ဆုပ်ရွံရှာဖွယ်အမှုတို့ဖြင့် ဒုက္ခပေး၏။

၈ သူသည်လည်း လေးဆယ့်နှစ်နှစ်ကြာအောင် အုပ်စိုးခဲ့ပြီးလေလျှင်၊ လူတို့သည် သူ့ကိုဆန့်ကျင်၍ ပုန်ကန်ထကြွကြ၏။ ထိုပြည်၌ စစ်တိုက်ခြင်းတစ်ဖန်ရှိစပြုလျက်၊ ရိပလာကိရှလည်း အသတ်ခံရ၏။ သူ၏အမျိုးအနွယ်တို့လည်း ထိုပြည်မှ နှင်ထုတ်ခံရ၏။

၉ ဤသို့အားဖြင့်အချိန်တန်လာသောအခါ၊ နှစ်ပေါင်းများစွာ ကြာပြီးမှ၊ မော်ရန်တန်သည် (သူသည် ရိပလာကိရှ၏ အမျိုးအနွယ်တစ်ဦး ဖြစ်လျက်) နှင်ထုတ်ခံရသောသူတို့၏တပ်တစ်တပ်ကို အတူတကွစုဝေးလျက်၊ ထွက်သွားပြီး၊ လူတို့ကို စစ်တိုက်၏။ သူသည်လည်း မြို့များစွာတို့ကို အစိုးရ၏။ စစ်တိုက်ခြင်းသည်လည်း အလွန်ပြင်းထန်လာပြီး၊ နှစ်ပေါင်းများစွာ ကြာ၏။ သူသည်လည်း ထိုပြည်တစ်ခုလုံးအပေါ် အစိုးရပြီး၊ ထိုပြည်တစ်ခုလုံးအပေါ်၌ သူ့ကိုယ်သူ ရှင်ဘုရင်အဖြစ် တင်မြှောက်၏။

၁၀ သူ့ကိုယ်သူ ရှင်ဘုရင်အဖြစ် တင်မြှောက်ခဲ့လေပြီးနောက်၊ လူတို့၏ဝန်ကို ပေါ့စေခြင်းအားဖြင့်၊ လူတို့၏မျက်လုံးများ၌ နှစ်သက်ခြင်းကို ခံရပြီး၊ သူ့ကို ရှင်ဘုရင်အဖြစ်၊ ဆီလိမ်း၍ ခန့်အပ်ကြ၏။

၁၁ လူတို့အဖို့ သူတရားမျှတစွာ ပြုသော်လည်း၊ သူ၏မတရားသောမေထုန်အမှုများစွာတို့ကြောင့် သူကိုယ်တိုင်အဖို့ မပြု။ သို့ဖြစ်၍၊ သူသည် ကိုယ်တော်ရှင်၏မျက်မှောက်မှ ပယ်ရှင်းခံရ၏။

၁၂ ဤသို့အားဖြင့်အချိန်တန်လာသောအခါ၊ မော်ရန်တန်သည် မြို့များစွာတို့ကို တည်ဆောက်၍၊ လူတို့သည် သူ၏အုပ်စိုးခြင်းအောက်တွင်၊ အဆောက်အအုံများ၌၊ ထို့အတူ ရွှေနှင့်ငွေတို့၌၊ ထို့အတူ စပါးစိုက်ပျိုးခြင်း၌၊ ထို့အတူ သိုးစုများနှင့် နွားစုများ၌၊ ထို့အတူ သူတို့ထံသို့ ပြန်ပေးသည့် ထိုကဲ့သို့သောအရာများဖြင့် အလွန်ကြွယ်ဝလာကြ၏။

၁၃ မော်ရန်တန်သည်လည်း အသက်အလွန်ကြီးသည်အထိ အသက်ရှင်ပြီးမှ ကိမကို ဖွားမြင်စေ၏။ ကိမသည်လည်း သူ့အဘ၏နေရာ၌ အုပ်စိုး၏။ သူရှစ်နှစ်ကြာနန်းစံပြီး၊ သူ့အဘ သေ၏။ ဤသို့အားဖြင့်အချိန်တန်လာသောအခါ၊ ကိမသည် ဖြောင့်မတ်ခြင်းဖြင့် မအုပ်စိုး။ သို့ဖြစ်၍၊ သူသည် ကိုယ်တော်ရှင်နှစ်သက်တော်မူခြင်းကို မခံရ။

၁၄ သူ့အစ်ကိုသည် သူ့ကို ဆန့်ကျင်၍ ပုန်ကန်ထကြွခြင်းအားဖြင့်၊ သူ့ကို ဖမ်းဆီးချုပ်နှောင်ခြင်းထဲသို့ ဆောင်ယူ၍၊ သူ၏အသက်တာတစ်လျှောက်လုံး ဖမ်းဆီးချုပ်နှောင်ရာ၌ ဆက်၍နေ၏။ ဖမ်းဆီးချုပ်နှောင်ရာ၌ ရှိစဉ်တွင် သားသမီးများကို ဖွားမြင်စေလျက်၊ အသက်ကြီးသောအချိန်တွင် လေဝိကို ဖွားမြင်စေ၏။ ထို့နောက်တွင် သူသေ၏။

၁၅ ဤသို့အားဖြင့်အချိန်တန်လာသောအခါ၊ လေဝိသည် သူ့အဘသေပြီးနောက်၊ ဖမ်းဆီးချုပ်နှောင်ခြင်းထဲ၌ လေးဆယ့်နှစ်နှစ်ကြာအောင် အစေခံ၏။ ထို့နောက်တွင်၊ ထိုပြည်၏ရှင်ဘုရင်ကို ဆန့်ကျင်၍ စစ်တိုက်ခြင်းအားဖြင့် သူကိုယ်တိုင်အတွက် နိုင်ငံကို ရရှိ၏။

၁၆ သူသည်လည်း သူကိုယ်တိုင်အတွက် နိုင်ငံကို ရရှိပြီးနောက်တွင်၊ ကိုယ်တော်ရှင်၏အမြင်၌ မှန်ကန်သည့်အရာကို ပြု၏။ လူတို့သည်လည်း ထိုပြည်၌ အောင်မြင်ကြ၏။ အသက်ကြီးရင့်သည်အထိ အသက်ရှင်ခဲ့ပြီး၊ သားများသမီးများကို ဖွားမြင်စေ၏။ ကော်ရုမ်ကိုလည်းဖွားမြင်စေပြီး၊ မိမိနေရာ၌ သူ့ကို ဆီလိမ်း၍ ရှင်ဘုရင်အဖြစ် ခန့်အပ်၏။

၁၇ ဤသို့အားဖြင့်အချိန်တန်လာသောအခါ၊ ကော်ရုမ်သည် ကိုယ်တော်ရှင်၏အမြင်၌ ကောင်းမြတ်သည့်အရာကို သူ့ဘဝတစ်လျှောက်လုံး ပြု၏။ များစွာသော သားသမီးတို့ကိုလည်း ဖွားမြင်စေ၏။ သူသည် နေ့ပေါင်းများစွာ တွေ့ကြုံရလေပြီးနောက်၊ မြေကြီးပေါ်ရှိအခြားသောသူများကဲ့သို့ပင် ကွယ်လွန်သွား၏။ ကိရှသည်လည်း သူ၏နေရာ၌ နန်းစံ၏။

၁၈ ဤသို့အားဖြင့်အချိန်တန်လာသောအခါ၊ ကိရှသည်လည်း ကွယ်လွန်သွားပြီး၊ လိဗသည် သူ၏နေရာ၌ နန်းစံ၏။

၁၉ ဤသို့အားဖြင့်အချိန်တန်လာသောအခါ၊ လိဗသည်လည်း ကိုယ်တော်ရှင်၏အမြင်၌ ကောင်းမြတ်သောအရာတို့ကို ပြု၏။ လိဗ၏လက်ထက်တွင်၊ အဆိပ်ရှိသောမြွေများကို ဖျက်ဆီး၏။ သို့ဖြစ်၍၊ သူတို့သည် ထိုပြည်ရှိလူတို့အတွက် စားစရာရှာခြင်းငှာ၊ တောင်ဘက်လားရာပြည်ထဲသို့ သွားကြ၏။ အကြောင်းမူကား၊ ထိုပြည်သည် တောတိရစ္ဆာန်တို့ဖြင့် ပြည့်လျက်ရှိ၏။ လိဗကိုယ်တိုင်သည်လည်း မုဆိုးကြီးဖြစ်လာ၏။

၂၀ သူတို့သည်လည်း ပြည်ကို ပင်လယ်ပိုင်းခြားသည့် နေရာအနီးရှိ ထိုပြည်၏ရှည်လျား ကျဉ်းမြောင်းသောအရပ်နားတွင် မြို့ကြီးတစ်မြို့ကို တည်ဆောက်ကြ၏။

၂၁ သူတို့သည် သားကောင်ရရှိခြင်းငှာ၊ တောင်ဘက်လားရာပြည်ကိုလည်း တောရိုင်းအဖြစ် ထိန်းသိမ်းစောင့်ရှောက်ထားကြ၏။ မြောက်ဘက်လားရာပြည်၏ မျက်နှာပြင်တစ်ခုလုံးသည်လည်း နေထိုင်သူတို့နှင့် ပြည့်လျက်ရှိ၏။

၂၂ သူတို့သည် အလွန်လုံ့လဝီရိယရှိကြပြီး၊ ဝယ်ကြ၊ ရောင်းကြလျက်၊ အကျိုးအမြတ်ရရှိနိုင်ခြင်းငှာ အချင်းချင်း အရောင်းအဝယ် ပြုကြ၏။

၂၃ သူတို့သည် အမျိုးမျိုးသောသတ္တုရိုင်းတို့ဖြင့်လည်း အလုပ်လုပ်၍၊ ရွှေ၊ ထို့အတူ ငွေ၊ ထို့အတူ သံ၊ ထို့အတူ ကြေးဝါ၊ ထို့အတူ အမျိုးမျိုးသော သတ္တုတို့ကို ပြုလုပ်ကြ၏။ သတ္တုရိုင်းကိုလည်း မြေကြီးထဲမှ တူးယူကြ၏။ သို့ဖြစ်၍၊ သူတို့သည် ရွှေကိုပြုလုပ်ရာ၊ ထို့အတူ ငွေကိုပြုလုပ်ရာ၊ ထို့အတူ ကြေးနီကိုပြုလုပ်ရာ သတ္တုရိုင်းကို ရရှိခြင်းငှာ မြေကြီးကို ကြီးစွာသောအစုအပုံများအဖြစ် စုပုံကြ၏။ သူတို့သည် တင့်တယ်သောလက်ရာအမျိုးမျိုးကိုလည်း ပြုလုပ်ကြ၏။

၂၄ သူတို့၌ ဖဲ၊ ထို့အတူ ပိတ်ချောများလည်း ရှိကြ၏။ သူတို့ကိုယ်သူတို့ အဝတ်မရှိသောကိုယ်ကို အဝတ်တန်ဆာဆင်နိုင်ကြခြင်းငှာ၊ အမျိုးမျိုးသော အဝတ်တန်ဆာတို့ကိုလည်း ပြုလုပ်ကြ၏။

၂၅ သူတို့သည် မြေကြီးကို ထွန်ယက်ဖို့၊ ထွန်ဖို့နှင့် စိုက်ပျိုးဖို့၊ ရိတ်သိမ်းဖို့နှင့် ပေါင်းရှင်းဖို့၊ ထို့အတူ စပါးနယ်ဖို့ကိုလည်း အမျိုးမျိုးသောကိရိယာများကို ပြုလုပ်ကြ၏။

၂၆ သူတို့၏တိရစ္ဆာန်များနှင့်အလုပ်လုပ်ရာ အမျိုးမျိုးသောကိရိယာတို့ကိုလည်း ပြုလုပ်ကြ၏။

၂၇ စစ်တိုက်ရာလက်နက်အမျိုးမျိုးတို့ကိုလည်း ပြုလုပ်ကြ၏။ အလွန်အနုစိတ်သောလက်ရာဖြင့်ပြုလုပ်သည့် အလုပ်အမျိုးမျိုးတို့ကိုလည်း ပြုလုပ်ကြ၏။

၂၈ သူတို့ထက်သာ၍မင်္ဂလာရှိသော၊ ထို့အတူ ကိုယ်တော်ရှင်၏လက်တော်အားဖြင့် သာ၍ အောင်မြင်သော လူမျိုးမရှိနိုင်ခဲ့ဖူးပေ။ သူတို့သည်လည်း ပြည်ခပ်သိမ်းတို့ထက် အမြတ်ဆုံးဖြစ်သည့် ပြည်၌ ရှိကြ၏။ အကြောင်းမူကား၊ ထိုအကြောင်းကို ကိုယ်တော်ရှင်မိန့်တော်မူလေ၏။

၂၉ ဤသို့အားဖြင့်အချိန်တန်လာသောအခါ၊ လိဗသည် နှစ်ပေါင်းများစွာ အသက်ရှင်လျက်၊ သားသမီးများကို ဖွားမြင်စေ၏။ ဟေသုမ်ကိုလည်း ဖွားမြင်စေ၏။

၃၀ ဤသို့အားဖြင့်အချိန်တန်လာသောအခါ၊ ဟေသုမ်သည် သူ့အဘ၏နေရာ၌ နန်းစံ၏။ ဟေသုမ်သည် နှစ်ဆယ့်လေးနှစ် နန်းစံပြီးနောက်၊ ရှုလော့၊ နိုင်ငံကို သူ့ထံမှ သိမ်းယူသွားကြ၏။ သူသည်လည်း ဖမ်းဆီးချုပ်နှောင်ခြင်း၌ နှစ်ပေါင်းများစွာ အစေခံ၏။ အမှန်စင်စစ်၊ သူ့အသက်တာ၏ကျန်ကြွင်းချိန်တစ်လျှောက်လုံးပင်တည်း။

၃၁ သူသည် ဟေသကိုလည်း ဖွားမြင်စေ၏။ ဟေသသည်လည်း ဖမ်းဆီးချုပ်နှောင်ခြင်း၌ သူ့အသက်တာတစ်လျှောက်လုံး အသက်ရှင်၏။ ဟေသသည် အာရုန်ကို ဖွားမြင်စေပြီး၊ အာရုန်သည်လည်း သူ့အသက်တာတစ်လျှောက်လုံး ဖမ်းဆီးချုပ်နှောင်ခြင်း၌ နေထိုင်၏။ သူသည် အာမနိဂဒ္ဒကို ဖွားမြင်စေပြီး၊ အာမနိဂဒ္ဒသည်လည်း သူ့အသက်တာတစ်လျှောက်လုံး ဖမ်းဆီးချုပ်နှောင်ခြင်း၌ နေထိုင်၏။ သူသည်လည်း ကော်ရန်တမ်ကို ဖွားမြင်စေပြီး၊ ကော်ရန်တမ်သည် သူ့အသက်တာတစ်လျှောက်လုံး ဖမ်းဆီးချုပ်နှောင်ခြင်း၌ နေထိုင်၏။ သူသည်လည်း ကုမ်ကို ဖွားမြင်စေ၏။

၃၂ ဤသို့အားဖြင့်အချိန်တန်လာသောအခါ၊ ကုမ်သည် နိုင်ငံ၏တစ်ဝက်ကို သူ့နောက်သို့ သွေးဆောင်ပြီး၊ ခေါ်ဆောင်သွား၏။ သူသည် နိုင်ငံ၏တစ်ဝက်ကို လေးဆယ့်နှစ်နှစ် အုပ်စိုး၏။ ထို့နောက်တွင်၊ အမ်ဂိဒမင်းကြီးကို ဆန့်ကျင်၍ စစ်တိုက်ခြင်းငှာသွား၍၊ သူတို့သည် နှစ်ပေါင်းများစွာကြာအောင် တိုက်ခိုက်လျက်၊ ထိုတိုက်ခိုက်ချိန်အတွင်း၊ ကုမ်သည် အမ်ဂိဒကို အနိုင်ရပြီး၊ နိုင်ငံ၏ကျန်ကြွင်းသည့်အပိုင်းကို အစိုးရ၏။

၃၃ ကုမ်၏လက်ထက်တွင် ထိုပြည်၌ ဓားပြများ ရှိစပြု၏။ ထိုသူတို့သည် အကြံအစည်အဟောင်းတို့ကို ခံယူ၍၊ ကျိန်ဆိုခြင်းများကို ရှေးကလူများနည်းတူ စီမံဆောင်ရွက်ကြပြီး၊ နိုင်ငံကို ဖျက်ဆီးခြင်းငှာ တစ်ဖန် ကြိုးစားအားထုတ်ကြ၏။

၃၄ ယခုတွင်၊ ကုမ်သည် သူတို့ကို ဆန့်ကျင်၍ များစွာတိုက်ခိုက်၏။ သို့သော်လည်း သူတို့ကို မနိုင်။