1 Pea ko ʻeni ko au, Molonai, ʻoku ou hoko atu ke fakaʻosi ʻeku lekooti ʻo kau ki he fakaʻauha ʻo e kakai ʻa ia ʻoku tefito ki ai ʻa ʻeku tohí.

2 He vakai, naʻa nau liʻaki ʻa e ngaahi lea kotoa pē ʻa ʻEtá; naʻá ne tala moʻoni kiate kinautolu ʻa e meʻa kotoa pē, talu mei he kamataʻanga ʻo e tangatá; pea ʻi he hili ʻa e ^amatuku atu ʻa e ngaahi vaí mei he funga ʻo e fonua ní naʻe hoko ia ko ha fonua mahuʻinga ange ʻi he ngaahi fonua kehe kotoa pē, ko ha fonua kuo fili ʻe he ʻEikí; ko ia ʻoku finangalo ʻa e ʻEiki ke ^btauhi kiate ia ʻa e tangata kotoa pē ʻoku nofo ʻi hono funga ʻo iá;

3 Pea ko e potu ia ʻo e ^aSelūsalema Foʻoú, ʻa ia ʻe ^bʻalu hifo mei langi, pea ko e potu toputapu māʻoniʻoni ʻo e ʻEikí.

4 Vakai, naʻe mamata ʻa ʻEta ki he ngaahi ʻaho ʻo Kalaisí, pea naʻá ne lea ʻo kau ki ha ^aSelūsalema Foʻou ʻi he fonuá ni.

5 Pea naʻá ne lea foki ʻo kau ki he fale ʻo ʻIsilelí, pea mo e ^aSelūsalema ʻa ia ʻe haʻu mei ai ʻa ^bLīhaí—ʻo ka hili hono fakaʻauhá ʻe toe langa hake ia, ko ha kolo ^cmāʻoniʻoni ki he ʻEikí; ko ia, ʻe ʻikai lava ke hoko ia ko ha Selūsalema Foʻou, he kuo tuʻu ia ʻi he kuonga muʻá; ka ʻe toe langa hake ia ʻo hoko ko ha kolo māʻoniʻoni ʻo e ʻEikí; pea ʻe langa ia moʻó e fale ʻo ʻIsilelí.

6 Pea ʻe langa foki ha ^aSelūsalema Foʻou ʻi he fonuá ni, moʻó e toenga ʻo e hako ʻo ^bSiosefá, ʻa ia ko ha ngaahi meʻa kuo ʻi ai hano ^csīpingá.

7 He hangē ko hono ʻomi ʻe Siosefa ʻa ʻene tamaí ki he fonua ko ^aʻIsipité, pea neongo naʻá ne pekia ʻi ai; ko ia, naʻe ʻomi ʻe he ʻEikí ha toenga ʻo e hako ʻo Siosefá mei he fonua ko Selūsalemá, koeʻuhi ke ne ʻaloʻofa ki he hako ʻo Siosefá ke ʻoua te nau ^bʻauha, ʻo hangē tofu pē ko ʻene ʻaloʻofa ki he tamai ʻa Siosefá ke ʻoua te ne ʻauhá.

8 Ko ia, ko e toenga ʻo e fale ʻo Siosefá ʻe toe langa hake ʻi he ^afonuá ni; pea ʻe hoko ia ko e fonua ʻo honau tofiʻá; pea te nau langa hake ha kolo māʻoniʻoni ki he ʻEikí, ʻo tatau mo e Selūsalema ʻi muʻá; pea ʻe ^bʻikai toe veuveuki ʻa kinautolu, kae ʻoua ke hokosia ʻa e ngataʻangá pea mole atu ʻa e māmaní.

9 Pea ʻe ʻi ai ha langi ^afoʻou mo ha māmani foʻou; pea te na tatau mo e ngaahi meʻa ʻi muʻá kae kehe kuo mole atu ʻa e meʻa ʻi muʻá, pea kuo hoko ʻo foʻou ʻa e meʻa kotoa pē.

10 Pea ʻe toki hoko mai ʻa e Selūsalema Foʻoú; pea ʻoku monūʻia ʻa kinautolu ʻoku nofo aí, he ko kinautolu ia ʻoku ^ahinehina honau ngaahi kofú ʻi he taʻataʻa ʻo e Lamí; pea ko kinautolu ia ʻoku lau fakataha mo e toenga ʻo e hako ʻo Siosefá, ʻa ia naʻe ʻo e fale ʻo ʻIsilelí.

11 Pea ʻe toki hoko mai foki mo e Selūsalema motuʻá; pea ko hono kakaí, ʻoku monūʻia ʻa kinautolu, he kuo fufulu ʻa kinautolu ʻi he taʻataʻa ʻo e Lamí; pea ko kinautolu ia ʻa ia naʻe fakamoveteveteʻi pea ^atānaki mai mei he ngaahi vahe ʻe fā ʻo e māmaní, pea mei he ngaahi fonua ʻi he ^btokelaú, pea kuo nau kau ʻi hono fakahoko ʻo e fuakava ʻa ia naʻe fai ʻe he ʻOtuá mo ʻenau tamai, ko ^cʻĒpalahamé.

12 Pea ʻo ka hoko mai ʻa e ngaahi meʻa ní, ʻe fakahoko ai ʻa e folofolá ʻa ia ʻoku pehē, ko kinautolu naʻe ^amuʻomuʻá, te nau muimui; pea ko kinautolu naʻe muimuí, te nau muʻomuʻa.

13 Pea naʻá ku mei hiki mo ha toe meʻa kehe, ka kuo taʻofi au; ka naʻe maʻongoʻonga mo fakaofo ʻa e ngaahi kikite ʻa ʻEtá; ka naʻa nau lau ia ko e meʻa noa pē, ʻo kapusi ia ki tuʻa; pea naʻá ne toitoi ʻi he ʻana ʻo ha maka ʻi he ʻahó, pea naʻá ne ʻalu atu ʻi he poʻulí ʻo mamata ki he ngaahi meʻa ʻa ia ʻe hoko ki he kakaí.

14 Pea lolotonga ʻene nofo ʻi he ʻana ʻo ha maká naʻá ne hiki hono toe ʻo e lekōtí ni, ʻo mamata ki he ngaahi fakaʻauha ʻa ia naʻe hoko ki he kakaí, ʻi he poʻulí.

15 Pea naʻe hoko ʻo pehē ʻi he taʻu pē ko ia ʻa ia naʻe kapusi ki tuʻa ia mei he kakaí naʻe kamata ke ʻi ai ha fuʻu tau lahi ʻi he kakaí, he naʻe ʻi ai ʻa e tokolahi ʻa ia naʻe angatuʻu, ʻa ia ko ha kau tangata mālohi, ʻo nau feinga ke fakaʻauha ʻa Kolianitomuli ʻaki ʻenau ngaahi fakakaukau fufū ʻo e fai angahala, ʻa ia kuo lau ki aí.

16 Pea ko ʻeni ko Kolianitomuli, kuó ne akoʻi, ia, ʻi he ngaahi faiva ʻo e taú pea mo e olopoto kotoa ʻo e māmaní, ko ia naʻá ne tauʻi ʻa kinautolu naʻe feinga ke fakaʻauha iá.

17 Ka naʻe ʻikai te ne fakatomala, pe ko hono ngaahi foha pe ngaahi ʻofefine hoihoifuá; pe ko e ngaahi foha mo e ngaahi ʻofefine hoihoifua ʻo Kohoá; pe ko e ngaahi foha mo e ngaahi ʻofefine hoihoifua ʻo Kolihoá; pea ko hono fakakātoá, naʻe ʻikai ha taha ʻo e ngaahi foha, mo e ngaahi ʻofefine hoihoifua kotoa pē ʻi he funga ʻo e māmaní kotoa naʻa nau fakatomala mei heʻenau ngaahi angahalá.

18 Ko ia, naʻe hoko ʻo pehē ʻi he ʻuluaki taʻu ʻa ia naʻe nofo ai ʻa ʻEta ʻi he ʻana ʻo ha maká, naʻe ʻi ai ʻa e kakai tokolahi ʻa ia naʻe tāmateʻi ʻi he heletā ʻa e ngaahi kautaha ^afufū ko iá, ʻa ia naʻe tauʻi ʻa Kolianitomuli ke nau lava ʻo maʻu ʻa e puleʻangá.

19 Pea naʻe hoko ʻo pehē ko e ngaahi foha ʻo Kolianitomulí naʻe lahi ʻenau taú pea mo e mole honau totó.

20 Pea ʻi hono ua ʻo e taʻú naʻe hoko mai ʻa e folofola ʻa e ʻEikí kia ʻEta, ʻoku totonu ke ne ʻalu pea kikite kia ^aKolianitomuli, kapau te ne fakatomala, pea mo e kotoa ʻo hono falé, ʻe tuku kiate ia ʻe he ʻEikí ʻa hono puleʻangá pea fakamoʻui ʻa hono kakaí.

21 Kapau ʻe ʻikai ʻe fakaʻauha ʻa kinautolu, pea mo hono falé kotoa tuku kehe pē ia. Pea te ne moʻui pē ke mamata ki hono fakamoʻoniʻi ʻo e ngaahi kikite kuo lea ʻaki ʻo kau ki he maʻu ʻe ha kakai ^akehe ʻa e fonuá ko honau tofiʻa; pea te nau tanu ʻa Kolianitomuli; pea ʻe fakaʻauha ʻa e kakai kotoa pē tuku kehe pē ʻa ^bKolianitomuli.

22 Pea naʻe hoko ʻo pehē naʻe ʻikai fakatomala ʻa Kolianitomuli, pe ko hono falé, pe ko e kakaí; pea naʻe ʻikai ke tuku ʻa e taú; pea naʻa nau feinga ke tāmateʻi ʻa ʻEta, ka naʻá ne hola meiate kinautolu ʻo ne toe toitoi ʻi he ʻanaʻi maka.

23 Pea naʻe hoko ʻo pehē naʻe hopo hake ʻa Seileti, pea naʻá ne tauʻi foki ʻa Kolianitomuli; pea naʻá ne ikuna ia, ko ia ʻi hono tolu ʻo e taʻú naʻá ne puke pōpula ai ia.

24 Pea naʻe hanga ʻe he ngaahi foha ʻo Kolianitomulí, ʻi hono fā ʻo e taʻú, ʻo ikuna ʻa Seileti, ʻo nau maʻu ʻa e puleʻangá ʻo fakafoki ki heʻenau tamaí.

25 Ko ʻeni naʻe kamata ʻa e tau ʻi he funga kotoa ʻo e fonuá, ko e tangata taki taha mo ʻene faʻahi naʻe tau ke maʻu ʻa e meʻa naʻá ne holi ki aí.

26 Pea naʻe ʻi ai ʻa e kau kaihaʻa, pea ko hono fakakātoá, naʻe ʻi ai ʻa e faʻahinga fai angahala kotoa pē ʻi he funga kotoa ʻo e fonuá.

27 Pea naʻe hoko ʻo pehē naʻe fuʻu ʻita ʻaupito ʻa Kolianitomuli kia Seileti, pea naʻá ne ʻalu atu kiate ia mo ʻene kau taú ke tauʻi ia; pea naʻa nau fepaki ʻi he fuʻu ʻita lahi, pea naʻa nau fetaulaki ʻi he teleʻa ʻo Kilikalí; pea naʻe fakaʻau ʻo fuʻu fakamanavahē lahi ʻa e taú.

28 Pea naʻe hoko ʻo pehē naʻe tauʻi ia ʻe Seileti ʻi he ʻaho ʻe tolu. Pea naʻe hoko ʻo pehē naʻe ikunaʻi ia ʻe Kolianitomuli, ʻo ne tuli ia kae ʻoua kuó ne aʻu atu ki he ngaahi potu tokalelei ʻo Hesiloní.

29 Pea naʻe hoko ʻo pehē naʻe toe tauʻi ia ʻe Seileti ʻi he ngaahi potu tokaleleí; pea vakai, naʻá ne ikunaʻi ʻa Kolianitomuli, ʻo ne tekeʻi fakaholomui ia ki he teleʻa ʻo Kilikalí.

30 Pea naʻe toe tauʻi ʻe Kolianitomuli ʻa Seileti ʻi he teleʻa ʻo Kilikalí, ʻa ia naʻá ne ikunaʻi ai ʻa Seileti ʻo tāmateʻi ia.

31 Pea naʻe hokaʻi ʻe Seileti ʻa Kolianitomuli ʻi hono alangá, ko ia naʻe ʻikai te ne toe ʻalu ai ki he taú ʻi he taʻu ʻe ua, pea ʻi he taimi ko iá ko e kakai kotoa pē ʻi he funga ʻo e fonuá naʻa nau fai ʻa e lilingi toto, pea naʻe ʻikai ha taha ke taʻofi ʻa kinautolu.