Ngaahi Folofolá
ʻEta 3


Vahe 3

ʻOku mamata ʻa e tokoua ʻo Sēletí ki he louhiʻi toʻukupu ʻo e ʻEikí ʻi heʻene ala ki he ngaahi foʻi maka ʻe hongofulu mā onó—ʻOku fakahā ʻe Sīsū Kalaisi ʻa hono sino fakalaumālié ki he tokoua ʻo Sēletí—Ko kinautolu ʻoku nau maʻu ha ʻilo haohaoá ʻe ʻikai ke taʻofi kinautolu ʻe he veilí—ʻOku foaki mai ha ngaahi meʻa liliu lea ke ʻomi ai ʻa e ngaahi lekooti ʻa e kau Sēletí ki he māmá.

1 Pea naʻe hoko ʻo pehē naʻe ʻalu atu ʻa e tokoua ʻo Sēletí (ko ʻeni ko e lahi ʻo e ngaahi vaka naʻe teuteú ko e vaka ʻe valu) ki he moʻunga, ʻa ia naʻa nau ui ko e moʻunga ko Seilemi, koeʻuhi ko ʻene fuʻu māʻolunga ʻaupitó, pea naʻá ne tutu ʻo ngaohi mei he maká ha ngaahi foʻi maka iiki ʻe hongofulu mā ono; pea naʻa nau hinehina mo ʻasinisini, ʻio ʻo hangē ko e sioʻata maʻa; pea naʻá ne toʻo ia ʻi hono nimá ki he tumutumu ʻo e moʻungá, ʻo ne toe tangi ki he ʻEikí, ʻo pehē:

2 ʻE ʻEiki, kuó ke folofola kuo pau ke ngalo hifo ʻa kimautolu ʻi he ngaahi vaí. Ko ʻeni vakai, ʻE ʻEiki, pea ʻoua naʻá ke houhau ki hoʻo tamaioʻeikí koeʻuhi ko hono vaivai ʻi ho ʻaó; he ʻoku mau ʻilo ʻokú ke māʻoniʻoni pea ʻokú ke ʻafio ʻi he ngaahi langí, pea ʻoku mau taʻefeʻunga ʻi ho ʻaó; pea koeʻuhí ko e ahingá kuo kovi maʻu ai pē ʻa homau ngaahi bʻulungāangá; ka neongo iá, ʻE ʻEiki, kuó ke fai kiate kimautolu ʻa e fekau kuo pau ke mau ui kiate koe, koeʻuhí ke mau maʻu meiate koe ʻo fakatatau mo ʻemau ngaahi fakaʻamú.

3 Vakai, ʻE ʻEiki, kuó ke taaʻi ʻa kimautolu koeʻuhi ko ʻemau angahalá, pea kuó ke kapusi atu ʻa kimautolu, pea kuó ke fekauʻi atu ʻa kimautolu ʻi he ngaahi taʻu lahí ni kuo mau nofo ʻi he maomaonganoá; ka kuó ke aʻaloʻofa mai kiate kimautolu. ʻE ʻEiki, ʻafio mai kiate au ʻi he ʻaloʻofa, ʻo taʻofi ʻa ho houhaú mei ho kakaí ni, pea ʻoua ʻe tuku ke nau folau atu ʻi he moana fakamanavaheé ni ʻi he fakapoʻuli; ka ke ʻafio mai ki he ngaahi meʻá ni, ʻa ia kuó u ngaohi ʻi hono tutu mei he maká.

4 Pea ʻoku ou ʻiloʻi, ʻE ʻEiki, ʻokú ke maʻu ʻa e amāfimafi kotoa pē, pea ʻokú ke faʻa fai ʻa e meʻa kotoa pē ʻokú ke finangalo ki aí koeʻuhi ke ʻaonga ki he tangatá; ko ia ke ke ala ki he ngaahi foʻi maká ni, ʻE ʻEiki, ʻaki ho louhiʻi toʻukupú, ʻo teuteu ia ke ulo atu ʻi he fakapoʻulí; pea ʻe ulo atu ia kiate kimautolu ʻi he ngaahi vaka ʻa ia kuo mau teuteú, koeʻuhí ke ʻi ai haʻamau maama lolotonga ʻa ʻemau folau atu ʻi he tahí.

5 Vakai, ʻE ʻEiki, ʻokú ke faʻa fai ʻeni. ʻOku mau ʻiloʻi ʻokú ke faʻa fakahā atu ha fuʻu māfimafi lahi, ʻa ia ʻoku angali siʻisiʻi ʻi he anga ʻo e fakakaukau ʻa e tangatá.

6 Pea naʻe hoko ʻo pehē ʻi he ʻosi lea ʻaki ʻe he tokoua ʻo Sēletí ʻa e ngaahi lea ní, vakai, naʻe mafao mai ʻe he aʻEikí ʻa hono toʻukupú ʻo ala ki he ngaahi foʻi maká taki taha ʻaki hono louhiʻi toʻukupú. Pea naʻe matoʻo ʻa e bveilí mei he ongo mata ʻo e tokoua ʻo Sēletí, ʻo ne mamata ki he louhiʻi toʻukupu ʻo e ʻEikí; pea naʻe hangē ia ko e louhiʻi nima ʻo ha tangata, ʻo hangē ko e kakanó mo e totó; pea naʻe fakatōmapeʻe hifo ʻa e tokoua ʻo Sēletí ʻi he ʻao ʻo e ʻEikí, he naʻe tō kiate ia ʻa e manavahē.

7 Pea naʻe ʻafio ʻa e ʻEikí kuo tō ʻa e tokoua ʻo Sēletí ki he kelekelé; pea folofola ʻa e ʻEikí kiate ia: Tuʻu hake, ko e hā kuó ke tō hifo aí?

8 Pea naʻá ne pehē ange ki he ʻEikí: Naʻá ku mamata ki he louhiʻi toʻukupu ʻo e ʻEikí, peá u manavahē telia naʻá ne taaʻi au; he naʻe ʻikai te u ʻilo kuo maʻu ʻe he ʻEikí ʻa e kakano mo e toto.

9 Pea naʻe folofola ʻa e ʻEikí kiate ia: Ko e meʻa ʻi hoʻo tuí, kuó ke vakai ai te u toʻo kiate au ʻa e akakano mo e toto; pea kuo teʻeki ai hū ha tangata ki hoku ʻaó ʻi he fuʻu tui lahi pehē ʻo hangē ko ia ʻokú ke maʻú; he kapau naʻe ʻikai ke pehē he ʻikai te ke faʻa mamata ki hoku louhiʻi nimá. Naʻá ke mamata koā ki ha toe meʻa kehe?

10 Peá ne tali ange: ʻIkai; ʻEiki, fakahā mai koe kiate au:

11 Pea folofola ʻa e ʻEikí kiate ia: ʻOkú ke tui ki he ngaahi lea ʻa ia te u leaʻakí?

12 Peá ne tali ange: ʻIo, ʻEiki, ʻoku ou ʻilo ʻokú ke folofola ʻaki ʻa e moʻoní, he ko e ʻOtua koe ʻo e moʻoní, pea ʻoku aʻikai te ke loi.

13 Pea ʻi he ʻosi ʻene lea ʻaki ʻa e ngaahi lea ní, vakai, naʻe afakahā ʻe he ʻEikí ia kiate ia, ʻo ne folofola: bKoeʻuhí ko hoʻo ʻilo ʻa e ngaahi meʻa ní, ko ia kuo huhuʻi ai koe mei he hingá; ko ia kuo fakafoki mai koe ki hoku ʻaó; ko ia ʻoku ou cfakahā ai au kiate koé.

14 Vakai, ko au ia ʻa ia naʻe teuteu talu mei hono ʻai ʻa e tuʻunga ʻo e māmaní ke ahuhuʻi ʻa hoku kakaí. Vakai, ko au Sīsū Kalaisi. Ko au ko e bTamaí pea mo e ʻAló. ʻE maʻu ʻiate au ʻe he faʻahinga ʻo e tangatá kotoa pē ʻa e cmoʻuí, pea maʻu ia ʻo taʻengata, ʻio ʻa kinautolu ʻe tui ki hoku hingoá; pea te nau hoko ko hoku ngaahi dfoha mo hoku ngaahi ʻofefine.

15 Pea kuo teʻeki ai te u fakahā au ki ha tangata ʻa ia kuó u fakatupu, he kuo teʻeki ai atui ha tangata kiate au ʻo hangē ko koé. ʻIkai kuó ke vakai naʻe fakatupu koe ʻi hoku btatau ʻoʻokú? ʻIo, naʻa mo e tangata kotoa pē naʻe fakatupu ʻi he kamataʻangá ʻi hoku tatau ʻoʻokú.

16 Vakai, ko e sinó ni, ʻa ia ʻokú ke mamata ʻeni ki aí, ko e sino ia ʻo hoku alaumālié; pea kuó u fakatupu ʻa e tangatá ʻi he tatau ʻo e sino ʻo hoku laumālié; pea hangē ko hono anga ʻo ʻeku hā kiate koe ʻi he laumālié te u hā pehē ki hoku kakaí ʻi he kakanó.

17 Pea ko ʻeni, ko au, Molonai, hangē ko ʻeku pehē, ʻe ʻikai te u faʻa fai ha fakamatala kakato ki he ngaahi meʻá ni ʻa ia kuo tohí, ko ia ʻoku feʻunga kiate au ke u pehē naʻe fakahā ʻe Sīsū ia ki he tangatá ni ʻi he laumālié, ʻio ʻo fakatatau mo e anga pea ʻi he tatau ʻo e sino pē ko iá ʻo hangē ko ʻene afakahā ia ki he kau Nīfaí.

18 Pea naʻá ne tauhi kiate ia ʻo hangē ko ʻene tauhi ki he kau Nīfaí; pea naʻá ne fai ʻeni kotoa, koeʻuhi ke ʻiloʻi ʻe he tangatá ni ko e ʻOtua ia, koeʻuhi ko e ngaahi fuʻu ngāue mahuʻinga lahi ʻa ia kuo fakahā ʻe he ʻEikí kiate iá.

19 Pea koeʻuhi ko e ʻilo ʻa e tangata ní kuo ʻikai taʻofi ia ʻe he aveilí; pea naʻá ne mamata ki he louhiʻi toʻukupu ʻo Sīsuú, ʻa ia, naʻá ne mamata ki ai, pea naʻá ne fakatōmapeʻe hifo ʻi he manavahē; he naʻá ne ʻilo ko e louhiʻi toʻukupu ia ʻo e ʻEikí; pea naʻe ʻikai ke toe ʻiate ia ʻa e tuí, he naʻá ne ʻiloʻi, pea ʻikai ke toe ʻi ai ha fakaʻaloʻalongaua.

20 Ko ia, ʻi heʻene maʻu ʻa e ʻilo haohaoá ni ki he ʻOtuá, naʻe aʻikai faʻa taʻofi ia ʻe he veilí; ko ia naʻá ne mamata kia Sīsū; pea naʻá ne tauhi kiate ia.

21 Pea naʻe hoko ʻo pehē naʻe folofola ʻa e ʻEikí ki he tokoua ʻo Sēletí: Vakai, ʻoua naʻá ke tuku ʻa e ngaahi meʻá ni ʻa ia kuó ke mamata mo fanongo ki aí ke mafola atu ki he māmaní, kae ʻoua kuo hokosia ʻa e ataimi ʻa ia te u fakaongoongoleleiʻi ai hoku hingoá ʻi he kakanó; ko ia, ke ke mataʻikoloaʻaki ʻa e ngaahi meʻa ʻa ia kuó ke mamata mo fanongo ki aí, pea ʻoua naʻa fakahā ia ki ha taha.

22 Pea vakai, ʻo ka ke ka haʻu kiate au, ke ke tohi mo fakamaʻu ʻa e ngaahi meʻá ni, ke ʻoua naʻa lava ʻe ha taha ʻo liliu ia; he te ke tohi ia ʻi ha lea ʻe ʻikai te nau lava ʻo lau.

23 Pea vakai, te u tuku ʻa e aongo maká ni kiate koe, pea te ke fakamaʻu fakataha foki ia mo e ngaahi meʻa te ke tohí.

24 He vakai, ko e lea ʻa ia te ke tohi ʻaki kuó u veuveuki ia; ko ia te u tuku ʻi he taimi ʻoku ou loto ki aí ke fakamahino ʻe he ongo maká ni ki he mata ʻo e tangatá ʻa e ngaahi meʻá ni ʻa ia te ke tohí.

25 Pea ʻi he hili ʻa e folofola ʻaki ʻe he ʻEikí ʻa e ngaahi folofola ní, naʻá ne fakahā ki he tokoua ʻo Sēletí ʻa e kakai akotoa pē ʻo e māmaní ʻa ia kuo ʻi ai, pea mo kinautolu kotoa pē ʻe ʻi aí; pea naʻe ʻikai te ne taʻofi ʻa kinautolu mei hono fofongá, ʻio ʻo aʻu ki he ngaahi ngataʻanga ʻo e māmaní.

26 He kuo ne folofola ʻaki kiate ia ʻi he ngaahi taimi ʻi muʻá, akapau te ne btui kiate ia te ne lava ʻo fakahā kiate ia ʻa e meʻa ckotoa pē—ʻoku totonu ke fakahā ia kiate ia; ko ia naʻe ʻikai faʻa taʻofi ʻe he ʻEikí ha meʻa ʻe taha meiate ia, he naʻá ne ʻiloʻi ʻoku lava ʻe he ʻEikí ʻo fakahā kiate ia ʻa e ngaahi meʻa kotoa pē.

27 Pea naʻe folofola ʻa e ʻEikí kiate ia: Tohi ʻa e ngaahi meʻá ni pea afakamaʻu ia; pea te u fakahā ia ʻi he taimi ʻoku ou loto ki aí ki he fānau ʻa e tangatá.

28 Pea naʻe hoko ʻo pehē naʻe fekau ʻe he ʻEikí kiate ia ke ne fakamaʻu ʻa e ongo amaka ʻa ia kuó ne maʻú, pea ʻoua ʻe fakahā ia ki ha taha, kae ʻoua ke fakahā ia ʻe he ʻEikí ki he fānau ʻa e tangatá.