Vahe 6
ʻOku ʻave ʻa e ngaahi vaka lafalafa ʻo e kau Sēletí ʻe he matangí ki he fonua ʻo e talaʻofá—ʻOku fakafetaʻi ʻa e kakaí ki he ʻEikí koeʻuhi ko ʻene angaleleí—ʻOku fili ʻa ʻOlaihā ko e tuʻi kiate kinautolu—ʻOku pekia ʻa Sēleti mo hono tokouá.
1 Pea ko ʻeni ko au, Molonai, ʻoku ou hoko atu ke ʻoatu ʻa e lekooti ʻo Sēleti mo hono tokouá.
2 He naʻe hoko ʻo pehē ʻi he hili hono teuteu ʻe he ʻEikí ʻa e ngaahi foʻi amaka naʻe ʻalu hake mo e tokoua ʻo Sēletí ki he moʻungá, naʻe ʻalu hifo ʻa e tokoua ʻo Sēletí mei he moʻungá, ʻo ne tuku ʻa e ngaahi foʻi maká ʻi loto ʻi he ngaahi vaka ʻa ia kuo teuteú, ko e foʻi maka ʻe taha ʻi he muiʻi vaka taki taha; pea vakai, naʻa nau fakamaama ʻa e ngaahi vaká.
3 Pea naʻe pehē hono fakaulo ʻe he ʻEikí ʻa e ngaahi maká ʻi he fakapoʻulí ke ulo ki he kakai tangata, mo e kakai fefine, pea mo e fānaú, koeʻuhi ke ʻoua naʻa nau folau atu ʻi he ngaahi vaí ʻi he fakapoʻuli.
4 Pea naʻe hoko ʻo pehē ʻi he hili ʻenau teuteu ʻa e faʻahinga ʻo e meʻakai kotoa pē, koeʻuhi ke nau moʻui ai ʻi he funga vaí, pea mo e meʻakai foki maʻa ʻenau ngaahi takanga monumanu īkí, mo e ngaahi takanga monumanu lalahí, mo e faʻahinga manu veʻe fā kotoa pē pe monumanu pe manupuna ʻa ia te nau ʻave mo kinautolú—pea naʻe hoko ʻo pehē ʻi he hili ʻenau fai ʻa e ngaahi meʻá ni kotoa pē naʻa nau heka leva ki honau ngaahi vaká pe lafalafá, ʻo tuku folau atu ki tahi, ʻo tuku atu ʻa ʻenau moʻuí ki he ʻEiki ko honau ʻOtuá.
5 Pea naʻe hoko ʻo pehē naʻe tuku ʻe he ʻEiki ko e ʻOtuá, ke angi mai ha fuʻu matangi afakamanavahē ʻi he funga ʻo e ngaahi vaí, ki he feituʻu ʻo e fonua ʻo e talaʻofá; ko ia naʻe fetekeʻaki ʻa kinautolu ʻi he ngaahi peau ʻo e tahí ʻe he matangí.
6 Pea naʻe hoko ʻo pehē naʻe tuʻo lahi ʻenau ngalo hifo ʻi he ngaahi loloto ʻo e tahí, koeʻuhi ko e ngaahi fuʻu peau lalahi naʻe lōmakiʻi ʻa kinautolú, pea mo e ngaahi fuʻu afā lalahi mo fakamanavahē ʻa ia naʻe fakatupu ʻe hono fuʻu mālohi ʻo e matangí.
7 Pea naʻe hoko ʻo pehē ʻi heʻenau ngalo hifo ʻi he moaná naʻe ʻikai ha vai ʻe faʻa maumauʻi ʻa kinautolu, he naʻe amalu ʻa honau ngaahi vaká ʻo hangē ko ha ipú, pea naʻe malu foki ia ʻo hangē ko e bʻaʻake ʻo Noá; ko ia ʻi he lōmekina ʻa kinautolu ʻe he ngaahi vai lahí naʻa nau tangi ki he ʻEikí, peá ne toe ʻohake ʻa kinautolu ki ʻolunga ʻi he ngaahi vaí.
8 Pea naʻe hoko ʻo pehē naʻe ʻikai tuku ʻa e angi ʻa e matangí ki he feituʻu ʻo e fonua ʻo e talaʻofá lolotonga ʻenau ʻi he funga ʻo e ngaahi vaí; pea naʻe pehē ʻa hono tekeʻi atu ʻa kinautolu ʻe he matangí.
9 Pea naʻa nau ahiva ʻaki ʻa e ngaahi fakafetaʻi ki he ʻEikí; ʻio, naʻe hiva ʻa e tokoua ʻo Sēletí ʻaki ʻa e ngaahi fakafetaʻi ki he ʻEikí, peá ne bfakamālō mo fakafetaʻi ki he ʻEikí ʻi hono kotoa ʻo e ʻahó; pea ʻi he hokosia ʻa e poʻulí, naʻe ʻikai tuku ʻenau fakafetaʻi ki he ʻEikí.
10 Pea ko ia naʻe pehē hono tekeʻi atu ʻa kinautolú; pea naʻe ʻikai ha fuʻu manu ʻo e tahí te ne faʻa laiki ʻa kinautolu, pe ha tofuaʻa te ne faʻa maumauʻi ʻa kinautolu; pea naʻa nau maʻu ha maama maʻu ai pē, ʻo tatau ai pē pe naʻe ʻi he fukahi vaí pe ʻi he loto vaí.
11 Pea ko ia naʻe tekeʻi atu ʻa kinautolu, ʻi he ʻaho ʻe tolungeau fāngofulu mā fā ʻi he funga vaí.
12 Pea naʻa nau tūʻuta ki he matātahi ʻo e fonua ʻo e talaʻofá. Pea ʻi he tuʻu leva honau vaʻé ki he matātahi ʻo e fonua ʻo e talaʻofá naʻa nau punou hifo ki he funga ʻo e fonuá, ʻo nau fakavaivaiʻi ʻa kinautolu ʻi he ʻao ʻo e ʻEikí, pea nau tangi ʻa loʻimata ʻi heʻenau fiefiá ʻi he ʻao ʻo e ʻEikí, koeʻuhi ko hono lahi ʻo ʻene ngaahi ʻaloʻofa ongongofua kiate kinautolú.
13 Pea naʻe hoko ʻo pehē naʻa nau ʻalu atu ki he funga ʻo e fonuá, ʻo kamata ke ngoueʻi ʻa e kelekelé.
14 Pea naʻe toko fā ʻa e ngaahi foha ʻo Sēletí; pea naʻe ui ʻa kinautolu ko Sēkomi, mo Kilikā, mo Meihā, pea mo ʻOlaihā.
15 Pea naʻe fanauʻi ʻe he tokoua ʻo Sēletí foki ha ngaahi foha mo e ngaahi ʻofefine.
16 Pea ko e ngaahi akaumeʻa ʻo Sēleti mo hono tokouá naʻe toko uofulu mā ua nai; pea naʻa nau fanauʻi foki ʻa e ngaahi foha mo e ngaahi ʻofefine ʻi he teʻeki ai ke nau aʻu ki he fonua ʻo e talaʻofá; pea ko ia naʻa nau fakaʻau ʻo tokolahi.
17 Pea naʻe akonekina ʻa kinautolu ke aʻaʻeva ʻi he loto-fakatōkilalo ʻi he ʻao ʻo e ʻEikí; pea naʻe bakonekina foki ʻa kinautolu mei he langí.
18 Pea naʻe hoko ʻo pehē naʻa nau kamata ke mafola atu ʻi he funga ʻo e fonuá, pea fakatokolahi mo ngoueʻi ʻa e kelekelé; pea naʻa nau fakaʻau ʻo mālohi ʻi he fonuá.
19 Pea naʻe fakaʻau ʻo motuʻa ʻa e tokoua ʻo Sēletí, ʻo ne ʻiloʻi kuo pau ke vave ʻene ʻalu hifo ki he faʻitoká; ko ia naʻá ne lea kia Sēleti: Tuku ke ta tānaki fakataha ʻa hota kakaí ke ta lau honau tokolahí, koeʻuhi ke ta ʻilo meiate kinautolu pe ko e hā ʻa e meʻa ʻoku nau fie maʻu meiate kitauá ʻi he teʻeki ai ke ta ʻalu hifo ki hota faʻitoká.
20 Pea ko ia naʻe tānaki fakataha ʻa e kakaí. Ko ʻeni ko e tokolahi ʻo e ngaahi foha mo e ngaahi ʻofefine ʻo e tokoua ʻo Sēletí ko e toko uofulu mā ua; pea ko e tokolahi ʻo e ngaahi foha mo e ngaahi ʻofefine ʻo Sēleti ko e toko hongofulu mā ua, peá ne maʻu ʻa e ngaahi foha ʻe toko fā.
21 Pea naʻe hoko ʻo pehē naʻá na lau ʻa e tokolahi ʻo hona kakaí; pea hili ʻena lau ʻa kinautolú, naʻá na fehuʻi kiate kinautolu pē ko e hā ʻa e ngaahi meʻa ʻoku nau fie maʻu ke na fai ʻi he teʻeki ai ke na ʻalu hifo ki hona faʻitoká.
22 Pea naʻe hoko ʻo pehē naʻe loto ʻa e kakaí ke na apani ha taha ʻi hona ngaahi fohá ke hoko ko ha tuʻi kiate kinautolu.
23 Pea ko ʻeni vakai, naʻe fakamamahi ʻa e meʻá ni kiate kinaua. Pea naʻe pehē ʻe he tokoua ʻo Sēletí kiate kinautolu: Ko e moʻoni ʻe afakatupu ʻe he meʻá ni ʻa e pōpula.
24 Ka naʻe pehē ʻe Sēleti ki hono tokouá: Tuku ke nau maʻu ha tuʻi. Pea ko ia naʻá ne pehē kiate kinautolu: Mou fili mei homa ngaahi fohá ha tuʻi, ʻa e tokotaha te mou loto ki aí.
25 Pea naʻe hoko ʻo pehē naʻa nau fili ʻa e ʻuluaki foha ʻo e tokoua ʻo Sēletí; pea ko hono hingoá ko Peikaki. Pea naʻe hoko ʻo pehē naʻá ne fakafisi, ʻo ʻikai te ne loto ke hoko ko honau tuʻi. Pea naʻe loto ʻa e kakaí ke hanga ʻe heʻene tamaí ʻo fekauʻi fakamālohi kiate ia, ka naʻe ʻikai loto ki ai ʻa ʻene tamaí; ʻo ne fekau kiate kinautolu ke ʻoua te nau fekauʻi fakamālohi ha tangata ʻe taha ke ne hoko ko honau tuʻí.
26 Pea naʻe hoko ʻo pehē naʻa nau fili ʻa e ngaahi tokoua kotoa ʻo Peikakí, kae naʻe ʻikai te nau loto ki ai.
27 Pea naʻe hoko ʻo pehē naʻe ʻikai foki loto ki ai mo e ngaahi foha ʻo Sēletí, naʻa mo kinautolu kotoa pē, tuku kehe pē ʻa e toko taha; pea naʻe pani ʻa ʻOlaihā ko e tuʻi ki he kakaí.
28 Pea naʻá ne kamata ke pule, pea naʻe kamata ke tuʻumālie ʻa e kakaí; ʻo nau fakaʻau ʻo fuʻu koloaʻia ʻaupito.
29 Pea naʻe hoko ʻo pehē naʻe pekia ʻa Sēleti, pea mo hono tokouá foki.
30 Pea naʻe hoko ʻo pehē naʻe ʻaʻeva ʻi he loto-fakatōkilalo ʻa ʻOlaihā ʻi he ʻao ʻo e ʻEikí, ʻo ne manatuʻi ʻa e ngaahi meʻa maʻongoʻonga kuo fai ʻe he ʻEikí maʻa ʻene tamaí, ʻo ne akoʻi foki ki hono kakaí ʻa e ngaahi meʻa maʻongoʻonga kuo fai ʻe he ʻEikí maʻa ʻenau ngaahi tamaí.