1 Pea naʻe hoko ʻo pehē naʻá ne fanauʻi ʻa ʻOmea, pea naʻe pule ʻa ʻOmea ko hono fetongi. Pea naʻe fanauʻi ʻe ʻOmea ʻa Sēleti; pea naʻe fanauʻi ʻe Sēleti ha ngaahi foha mo e ngaahi ʻofefine.

2 Pea naʻe angatuʻu ʻa Sēleti ki heʻene tamaí, peá ne ʻalu ʻo nofo ʻi he fonua ko Hetí. Pea naʻe hoko ʻo pehē naʻá ne fakahekehekeʻi ʻa e kakai tokolahi, koeʻuhi ko ʻene ngaahi lea fakaolooló, kae ʻoua kuó ne maʻu ʻa hono vaeua ʻo e puleʻangá.

3 Pea ʻi he hili ʻene maʻu ʻa hono vaeua ʻo e puleʻangá naʻá ne tauʻi ʻa ʻene tamaí, ʻo ne ʻave ʻa ʻene tamaí ki he pōpula, pea naʻá ne tuʻutuʻuni ke ne tauhi kiate ia ʻi he pōpula;

4 Pea ko ʻeni, ʻi he ngaahi ʻaho ʻo e pule ʻa ʻOmeá, naʻá ne nofo pōpula ʻi hono vaeua ʻo hono ngaahi ʻahó. Pea naʻe hoko ʻo pehē naʻá ne fanauʻi ha ngaahi foha mo e ngaahi ʻofefine, ʻa ia naʻe kau ai ʻa ʻEsilome mo Kolianitomuli.

5 Pea naʻá na fuʻu tuputāmaki ʻaupito koeʻuhi ko e ngaahi ngāue ʻa Sēleti ko honau tokouá, ko ia naʻá na tānaki ha kau tau, ʻo tauʻi ʻa Sēleti. Pea naʻe hoko ʻo pehē naʻá na tauʻi ia ʻi he poʻulí.

6 Pea naʻe hoko ʻo pehē ʻi he hili ʻenau fakaʻauha ʻa e kau tau ʻa Sēletí pea naʻe ʻamanaki ke nau tāmateʻi mo ia foki; pea naʻá ne kole kiate kinautolu ke ʻoua te nau tāmateʻi iá, ka te ne tuku ʻa e puleʻangá ki heʻene tamaí. Pea naʻe hoko ʻo pehē naʻa nau fakamoʻui ia.

7 Pea ko ʻeni naʻe kamata ke fuʻu loto-mamahi lahi ʻa Sēleti, koeʻuhi ko e mole ʻa e puleʻangá, he kuó ne holi ke maʻu ʻa e puleʻangá pea mo e ngaahi fakaʻapaʻapa ʻa e māmaní.

8 Ko ʻeni ko e ʻofefine ʻo Sēletí naʻe fuʻu olopoto lahi, pea ʻi heʻene mamata ki he loto-mamahi ʻa ʻene tamaí, naʻá ne fakakaukau ke filioʻi ha founga ke ne toe maʻu ai ʻa e puleʻangá maʻa ʻene tamaí.

9 Ko ʻeni naʻe fuʻu hoihoifua ʻaupito ʻa e ʻofefine ʻo Sēletí. Pea naʻe hoko ʻo pehē naʻá ne talanoa mo ʻene tamaí, ʻo ne pehē ange kiate ia: Ko e hā ʻa e meʻa ʻoku loto-mamahi lahi ai ʻa ʻeku tamaí? ʻIkai koā kuó ne lau ʻa e lekooti naʻe ʻomi ʻe heʻetau ngaahi tamaí mei he kauvai ʻe taha ʻo e fuʻu moaná? Vakai, ʻikai ʻoku ʻi ai ha fakamatala ʻo kau ki he kakai ʻi muʻá, naʻa nau maʻu ʻi heʻenau ngaahi fakakaukau ^afufuú ʻa e ngaahi puleʻanga mo e fuʻu fakaʻapaʻapa lahi?

10 Pea ko ʻeni, ko ia tuku ke fekau ʻe heʻeku tamaí ke haʻu ʻa ʻEikisi, ko e foha ʻo Kiminoá; pea vakai, ʻoku ou hoihoifua, pea te u meʻe ʻi hono ʻaó, pea te u ^afakafiefiaʻi ia, pea te ne fie maʻu ke maʻu au ko hono uaifi; ko ia kapau te ne kole kiate koe ke ke foaki au kiate ia ke hoko ko hono uaifi, ke ke pehē ange leva: Te u foaki ia kiate koe, ʻo kapau te ke ʻomi kiate au ʻa e ʻulu ʻo ʻeku tamai, ko e tuʻí.

11 Pea ko ʻeni, ko ʻOmeá ko e kaumeʻa ʻo ʻEikisi, ko ia ʻi he fekau atu ʻe Sēleti ke haʻu ʻa ʻEikisí, naʻe meʻe ʻi hono ʻaó ʻa e ʻofefine ʻo Sēletí ʻo ne fakafiefiaʻi ia, ko ia naʻá ne fie maʻu ia ke hoko ko hono uaifi. Pea naʻe hoko ʻo pehē naʻá ne pehē ange kia Sēleti: Foaki ia kiate au ke u maʻu ko hoku uaifi.

12 Pea naʻe pehē ange kiate ia ʻe Sēleti: Te u foaki ia kiate koe, ʻo kapau te ke ʻomi kiate au ʻa e ʻulu ʻo ʻeku tamai, ko e tuʻí.

13 Pea naʻe hoko ʻo pehē naʻe tānaki ʻe ʻEikisi ki he fale ʻo Sēleti ʻa hono kāingá kotoa pē, ʻo ne pehē kiate kinautolu: Te mou fuakava kiate au ke mou faivelenga kiate au ʻi he meʻa te u kole kiate kimoutolú?

14 Pea naʻe hoko ʻo pehē naʻa nau ^afuakava kotoa pē kiate ia ki he ʻOtua ʻo e langí, pea ʻi he ngaahi langí foki pea ʻi he māmaní foki, pea ki honau ʻulú, ʻilonga ha taha ʻe fai kehe mei he tokoni ʻa ia naʻe fie maʻu ʻe ʻEikisí ʻe tuʻusi hono ʻulú; pea ʻilonga ha taha te ne fakahā ʻa e meʻa ʻa ia naʻe fakahā kiate kinautolu ʻe ʻEikisí, ʻe mole ʻa e moʻui ʻa e tokotaha ko iá.

15 Pea naʻe hoko ʻo pehē naʻa nau loto taha mo ʻEikisi. Pea naʻe fakafuakavaʻi ʻa kinautolu ʻe ʻEikisi ʻaki ʻa e ngaahi ^afuakava naʻe fai ʻe kinautolu ʻi muʻa ʻa ia naʻa nau feinga foki ke maʻu ʻa e mafaí, ʻa ia kuo tukufakaholo mai meia ^bKeini, ʻa ia ko e fakapō talu ʻa e kamataʻangá.

16 Pea naʻe langaki ʻa e ngaahi meʻá ni ʻe he mālohi ʻo e tēvoló ke fakafuakavaʻi ʻaki ʻa e ngaahi fuakavá ni ʻa e kakaí, ke taʻofi ʻa kinautolu ʻi he fakapoʻulí, ke tokoniʻi ʻa e faʻahinga ʻoku kumi ki he mafaí ke maʻu ʻa e mafaí, pea ke fakapō, pea ke vete koloa, pea ke loi, pea ke fai ʻa e ngaahi faʻahinga kotoa pē ʻo e fai angahala mo e ngaahi feʻauakí.

17 Pea ko e ʻofefine ʻo Sēletí ʻa ia naʻá ne fakahū ki hono lotó ke kumi ki he ngaahi meʻa ni mei muʻá; pea naʻe fakahū ia ʻe Sēleti ki he loto ʻo ʻEikisí; ko ia, naʻe fai ia ʻe ʻEikisi ki hono kāingá mo e ngaahi kaumeʻá, ʻo ne kākaaʻi ʻa kinautolu ʻaki ʻa e ngaahi talaʻofa ongo lelei ke nau fai ʻa e meʻa kotoa pē ʻokú ne loto ki aí.

18 Pea naʻe hoko ʻo pehē naʻa nau fokotuʻu ha ^akautaha fufū, ʻio ʻo tatau mo ia ʻi muʻá; ʻa ia ko e kautaha ʻoku fakalielia mo kovi taha ʻi he ngaahi kautaha kotoa pē, ʻi he ʻao ʻo e ʻOtuá.

19 He ʻoku ʻikai ke ngāue ʻa e ʻEikí ʻi he ngaahi kautaha fufū, pea ʻoku ʻikai foki te ne finangalo ke lilingi ʻe he tangatá ha toto, kā kuó ne tapui ia ʻi he meʻa kotoa pē, talu mei he kamataʻanga ʻo e tangatá.

20 Pea ko ʻeni ko au, Molonai, ʻoku ʻikai te u tohi ʻa e anga ʻo ʻenau ngaahi fuakavá mo e ngaahi kautahá, he kuo fakahā kiate au kuo maʻu ia ʻe he kakai kotoa pē, pea ʻoku maʻu ia ʻe he kau Leimaná.

21 Pea kuo nau fakatupu hono ^afakaʻauha ʻo e kakaí ni ʻa ia ʻoku ou lolotonga talanoa ki aí, pea mo e fakaʻauha ʻo e kau Nīfaí.

22 Pea ʻilonga ha puleʻanga ʻe poupou ki he ngaahi kautaha fufū peheé, ke maʻu ha mālohi mo e koloa, kae ʻoua kuo nau mafola ʻi he puleʻangá, vakai, ʻe fakaʻauha ʻa kinautolu; koeʻuhi ʻe ʻikai tuku ʻe he ʻEikí ʻa e ^atoto ʻo ʻene kau māʻoniʻoní, ʻa ia ʻe lilingi ʻe kinautolú, ke tangi maʻu ai pē kiate ia mei he kelekelé ke ^bsāuni kiate kinautolu ka ʻoku ʻikai te ne sāuni kiate kinautolu.

23 Ko ia, ʻA kimoutolu ʻe kau Senitaile, ko e finangalo poto ʻo e ʻOtuá ke fakahā ʻa e ngaahi meʻá ni kiate kimoutolu, koeʻuhí ke mou fakatomala ai mei hoʻomou ngaahi angahalá, pea ʻikai tuku ke mālohi ʻa e ngaahi kautaha fakapoó ni kiate kimoutolu, ʻa ia kuo fokotuʻu hake koeʻuhi ke maʻu ha ^amālohi mo e koloa—pea ko e ngāué, ʻio, ʻa e ngāue ʻo e fakaʻauhá ʻe hoko mai kiate kimoutolú, ʻio, ʻe tō ʻa e heletā ʻo e fakamaau ʻa e ʻOtua Taʻengatá kiate kimoutolu, ke ikunaʻi mo fakaʻauha ʻa kimoutolu ʻo kapau te mou tuku ke hoko ʻa e ngaahi meʻá ni.

24 Ko ia, ʻoku fekau kiate kimoutolu ʻe he ʻEikí, ʻo ka mou ka mamata ki he haʻu ʻa e ngaahi meʻá ni ʻiate kimoutolu ke mou ʻā hake ʻo ʻilo ki hoʻomou tuʻutāmaki fakamanavahē ʻoku tupu mei he kautaha fufū ko ʻeni ʻa ia ʻe ʻiate kimoutolú; pe ʻe hoko ki ai ʻa e malaʻia, koeʻuhi ko e toto ʻo kinautolu ʻa ia kuo tāmateʻí; he ʻoku nau tangi mei he efú ke sāuni ki ai, pea kiate kinautolu foki ʻa ia naʻe langa hake iá.

25 He ʻe hoko ʻo pehē ko ia ia ʻokú ne fokotuʻu iá ʻokú ne feinga ke fakaʻauha ʻa e ^atauʻatāina ʻa e ngaahi fonua kotoa pē mo e ngaahi kakai, pea mo e ngaahi puleʻanga pea ʻokú fakatupu ʻa e fakaʻauha ʻo e kakai fulipē, he kuo fokotuʻu ia ʻe he tēvoló, ʻa ia ko e tamai ʻa e ngaahi loi kotoa pē; ʻa e tangata loi ko ia naʻe ^bkākaaʻi ʻetau ʻuluaki ongo mātuʻá, ʻio, ʻa e tangata loi pē ko ia ʻa ia kuó ne ueʻi ʻa e tangatá ke fai ʻa e fakapō talu mei he kamataʻangá; ʻa ia kuó ne fakafefeka ʻa e loto ʻo e tangatá ko ia naʻa nau fakapoongi ai ʻa e kau palōfitá, mo tolomakaʻi ʻa kinautolu, mo kapusi ʻa kinautolu ki tuʻa talu mei he kamataʻangá.

26 Ko ia, ko au, Molonai, naʻe fekauʻi au ke hiki ʻa e ngaahi meʻá ni koeʻuhí ke fakangata ʻa e angahalá, koeʻuhi ke hoko mai ʻa e taimi ʻa ia ʻe ^aʻikai ke maʻu ai ʻe Sētane ha mālohi ki he loto ʻo e fānau ʻa e tangata, kae kehe ke lava ʻo ^bfakalotoʻi ʻa kinautolu ke failelei maʻu ai pē, ke nau haʻu ki he matavai ʻo e māʻoniʻoni kotoa pē pea moʻui.