ບົດທີ 10
ກະສັດຜູ້ໜຶ່ງຂຶ້ນປົກຄອງແທນກະສັດອີກຜູ້ໜຶ່ງຕໍ່ໆກັນໄປ—ກະສັດບາງຄົນຊອບທຳ; ບາງຄົນກໍຊົ່ວ—ເວລາມີຄວາມຊອບທຳ ຜູ້ຄົນກໍຈະເລີນຮຸ່ງເຮືອງ ແລະ ໄດ້ຮັບພອນຈາກພຣະຜູ້ເປັນເຈົ້າ.
1 ແລະ ເຫດການໄດ້ບັງເກີດຂຶ້ນຄື ເຊັດ ຜູ້ສືບຕະກຸນຂອງເຫັດ—ເພາະເຫັດໄດ້ຕາຍໄປດ້ວຍຄວາມອຶດຢາກກັບຄົນໃນຄອບຄົວຂອງລາວທັງໝົດ ນອກຈາກເຊັດຄົນດຽວເທົ່ານັ້ນ—ດັ່ງນັ້ນ, ເຊັດຈຶ່ງໄດ້ເລີ່ມຕົ້ນສ້າງຜູ້ຄົນຜູ້ທີ່ຊຸດໂຊມຄືນອີກ.
2 ແລະ ເຫດການໄດ້ບັງເກີດຂຶ້ນຄື ເຊັດໄດ້ລະນຶກເຖິງຄວມພິນາດຂອງບັນພະບຸລຸດຂອງລາວ; ແລະ ລາວໄດ້ສ້າງອານາຈັກອັນຊອບທຳຂຶ້ນ; ເພາະວ່າລາວຈື່ຈຳສິ່ງທີ່ພຣະຜູ້ເປັນເຈົ້າໄດ້ກະທຳໃນການນຳພາຢາເຣັດ ແລະ ນ້ອງຊາຍຂອງລາວ ກຂ້າມຄວາມເລິກຂອງທະເລມາ; ແລະ ລາວໄດ້ເດີນໃນທາງຂອງພຣະຜູ້ເປັນເຈົ້າ; ແລະ ລາວໄດ້ມີລູກຊາຍ ແລະ ລູກສາວຫລາຍຄົນ.
3 ແລະ ລູກຊາຍກົກຂອງລາວຊື່ວ່າ ເຊັດ, ໄດ້ກະບົດຕໍ່ລາວ; ເຖິງຢ່າງໃດກໍຕາມ, ເຊັດໄດ້ຖືກຂ້າດ້ວຍມືຂອງໂຈນ, ເພາະຂອງມີຄ່າອັນຫລວງຫລາຍຂອງລາວ, ຊຶ່ງໄດ້ນຳສັນຕິສຸກມາສູ່ບິດາຂອງລາວອີກ.
4 ແລະ ເຫດການໄດ້ບັງເກີດຂຶ້ນຄື ບິດາຂອງລາວໄດ້ສ້າງຫລາຍເມືອງຂຶ້ນໃນຜືນແຜ່ນດິນ, ແລະ ຜູ້ຄົນເລີ່ມແຜ່ຂະຫຍາຍໄປທົ່ວຜືນແຜ່ນດິນອີກ. ແລະ ເຊັດໄດ້ມີຊີວິດຢູ່ດົນນານທີ່ສຸດ; ແລະ ລາວໄດ້ມີລູກຊາຍຄົນໜຶ່ງຊື່ ຣິບລາຄິດ. ແລະ ລາວໄດ້ສິ້ນຊີວິດໄປ, ແລະ ຣິບລາຄິດໄດ້ຂຶ້ນປົກຄອງແທນ.
5 ແລະ ເຫດການໄດ້ບັງເກີດຂຶ້ນຄື ຣິບລາຄິດບໍ່ໄດ້ເຮັດສິ່ງທີ່ຖືກຕ້ອງໃນສາຍພຣະເນດຂອງພຣະຜູ້ເປັນເຈົ້າເລີຍ, ຍ້ອນວ່າລາວມີມະເຫສີ ແລະ ກນາງສະໜົມຫລາຍຄົນ, ແລະ ໄດ້ວາງພາລະອັນເຫລືອທີ່ຈະທົນໄດ້ໃຫ້ກັບຜູ້ຄົນ; ແທ້ຈິງແລ້ວ, ລາວໄດ້ເກັບພາສີນຳຜູ້ຄົນເຫລົ່ານັ້ນດ້ວຍຄ່າພາສີອັນແພງ; ແລະ ດ້ວຍພາສີນັ້ນ ລາວຈຶ່ງໄດ້ສ້າງອາຄານອັນກວ້າງໃຫຍ່ຫລາຍແຫ່ງ.
6 ແລະ ລາວໄດ້ສ້າງບັນລັງອັນງົດງາມທີ່ສຸດໃຫ້ຕົນເອງ ແລະ ໄດ້ສ້າງຄຸກຫລາຍແຫ່ງນຳອີກ, ແລະ ຄົນໃດທີ່ບໍ່ຍອມເສຍພາສີ ລາວກໍເອົາເຂົາເຂົ້າຄຸກ; ແລະ ຄົນໃດທີ່ບໍ່ສາມາດເສຍພາສີ ລາວກໍເອົາເຂົາເຂົ້າຄຸກ; ແລະ ລາວໄດ້ໃຫ້ພວກເຂົາອອກແຮງງານໜັກຕະຫລອດເວລາເພື່ອລ້ຽງຕົນ; ແລະ ຄົນໃດທີ່ບໍ່ຍອມອອກແຮງງານ ລາວກໍສັ່ງໃຫ້ຂ້າຄົນນັ້ນຖິ້ມ.
7 ດັ່ງນັ້ນ ລາວຈຶ່ງໄດ້ສິ່ງຂອງດີໆທັງໝົດ, ແທ້ຈິງແລ້ວ, ເຖິງແມ່ນຄຳແນວດີຂອງລາວ, ລາວກໍສັ່ງໃຫ້ຫລໍ່ຫລອມໃຫ້ບໍລິສຸດຢູ່ໃນຄຸກ; ແລະ ງານຝີມືດີນາໆຊະນິດ ລາວກໍສັ່ງໃຫ້ເຮັດຢູ່ໃນຄຸກ. ແລະ ເຫດການໄດ້ບັງເກີດຂຶ້ນຄື ລາວໄດ້ເຮັດໃຫ້ຜູ້ຄົນໄດ້ຮັບຄວາມທຸກຍາກລຳບາກຫລາຍເພາະການໂສເພນີ ແລະ ຄວາມໜ້າກຽດຊັງຂອງລາວ.
8 ແລະ ເມື່ອລາວປົກຄອງເປັນເວລາສີ່ສິບສອງປີ ຜູ້ຄົນໄດ້ລຸກຂຶ້ນໃນການກະບົດຕໍ່ລາວ; ແລະ ມັນເລີ່ມມີສົງຄາມເກີດຂຶ້ນອີກໃນແຜ່ນດິນ, ເຖິງຂະໜາດທີ່ຣິບລາຄິດຖືກຂ້າຕາຍ, ແລະ ຜູ້ສືບຕະກຸນຂອງລາວກໍຖືກຂັບໄລ່ອອກຈາກແຜ່ນດິນໄປ.
9 ແລະ ເຫດການໄດ້ບັງເກີດຂຶ້ນຄື ຫລັງຈາກຫລາຍປີຜ່ານໄປ, ໂມຣິອານທັນ, (ໂດຍທີ່ເປັນຜູ້ສືບຕະກຸນຂອງຣິບລາຄິດ) ໄດ້ເຕົ້າໂຮມກຳລັງທັບຈາກຜູ້ຄົນຜູ້ທີ່ຖືກຂັບໄລ່ອອກໄປ, ແລະ ໄດ້ຍົກໄປສູ້ຮົບກັບຜູ້ຄົນ ແລະ ລາວໄດ້ຍຶດເອົາຫລາຍຫົວເມືອງ; ແລະ ສົງຄາມກັບມາຮ້າຍແຮງຫລາຍຂຶ້ນ, ແລະ ມັນໄດ້ຄົງຢູ່ເປັນເວລາຫລາຍປີ; ແລະ ລາວໄດ້ມີອຳນາດປົກຄອງທົ່ວແຜ່ນດິນ, ແລະ ໄດ້ສະຖາປະນາຕົນເອງຂຶ້ນເປັນກະສັດປົກຄອງທົ່ວແຜ່ນດິນ.
10 ແລະ ຫລັງຈາກທີ່ລາວໄດ້ແຕ່ງຕັ້ງຕົນເອງເປັນກະສັດແລ້ວ, ລາວໄດ້ຫລຸດຜ່ອນພາລະຂອງຜູ້ຄົນໃຫ້ເບົາບາງລົງ, ຊຶ່ງດ້ວຍການນີ້ ລາວຈຶ່ງໄດ້ຮັບຄວາມນິຍົມຊົມຊອບໃນສາຍຕາຂອງຜູ້ຄົນ, ແລະ ພວກເຂົາໄດ້ແຕ່ງຕັ້ງລາວໃຫ້ເປັນກະສັດຂອງພວກເຂົາ.
11 ແລະ ລາວໄດ້ໃຫ້ຄວາມຍຸດຕິທຳແກ່ຜູ້ຄົນ, ແຕ່ບໍ່ໄດ້ໃຫ້ແກ່ຕົວເອງ ເພາະການໂສເພນີຢ່າງຫລວງຫລາຍຂອງລາວ; ດັ່ງນັ້ນ ລາວຈຶ່ງໄດ້ຖືກຕັດອອກຈາກທີ່ປະທັບຂອງພຣະຜູ້ເປັນເຈົ້າ.
12 ແລະ ເຫດການໄດ້ບັງເກີດຂຶ້ນຄື ໂມຣິອານທັນໄດ້ສ້າງເມືອງຫລາຍເມືອງຂຶ້ນ, ແລະ ຜູ້ຄົນກັບມາຮັ່ງມີເປັນດີຢ່າງຍິ່ງພາຍໃຕ້ການປົກຄອງຂອງລາວ, ທັງອາຄານ ແລະ ຄຳ ແລະ ເງິນ, ແລະ ທາງການປູກຝັງພືດພັນທັນຍາຫານ, ແລະ ທາງຝູງສັດລ້ຽງ, ແລະ ສັດໃຊ້ແຮງງານ, ແລະ ສິ່ງດັ່ງກ່າວຖືກນຳກັບຄືນມາຫາພວກເຂົາອີກ.
13 ແລະ ໂມຣິອານທັນໄດ້ມີຊີວິດຢູ່ຢ່າງຍາວນານ, ແລະ ແລ້ວລາວໄດ້ມີລູກຊາຍຊື່ວ່າ ຄິມ; ແລະ ຄິມໄດ້ປົກຄອງແທນບິດາຂອງລາວຢູ່ແປດປີ, ແລະ ບິດາຂອງລາວກໍໄດ້ສິ້ນຊີວິດໄປ. ແລະ ເຫດການໄດ້ບັງເກີດຂຶ້ນຄື ຄິມບໍ່ໄດ້ປົກຄອງດ້ວຍຄວາມຊອບທຳ, ດັ່ງນັ້ນ ລາວຈຶ່ງບໍ່ເປັນທີ່ໂປດປານຂອງພຣະຜູ້ເປັນເຈົ້າ.
14 ແລະ ນ້ອງຊາຍຂອງລາວໄດ້ລຸກຂຶ້ນໃນການກະບົດຕໍ່ລາວ, ຊຶ່ງດ້ວຍການນີ້ ລາວຈຶ່ງໄດ້ເອົາອ້າຍມາເປັນຊະເລີຍ; ແລະ ຄິມໄດ້ຄົງຢູ່ເປັນຊະເລີຍຕະຫລອດວັນເວລາຂອງລາວ; ແລະ ລາວໄດ້ມີລູກຊາຍ ແລະ ລູກສາວຫລາຍຄົນໃນຂະນະທີ່ເປັນຊະເລີຍນັ້ນ, ແລະ ໃນໄວຊະລາຂອງລາວ, ລາວໄດ້ມີລູກຊາຍອີກຊື່ວ່າ ເລວີ; ແລະ ຄິມໄດ້ສິ້ນຊີວິດໄປ.
15 ແລະ ເຫດການໄດ້ບັງເກີດຂຶ້ນຄື ເລວີໄດ້ເປັນຊະເລີຍຫລັງຈາກບິດາຂອງລາວເປັນເວລາສີ່ສິບສອງປີ, ແລະ ລາວໄດ້ກໍ່ສົງຄາມກັບກະສັດຂອງແຜ່ນດິນ, ດ້ວຍເຫດນີ້ ລາວຈຶ່ງໄດ້ອານາຈັກມາເປັນຂອງຕົນ.
16 ແລະ ຫລັງຈາກລາວໄດ້ອານາຈັກມາເປັນຂອງຕົນແລ້ວ ລາວໄດ້ເຮັດສິ່ງທີ່ຖືກຕ້ອງໃນສາຍພຣະເນດຂອງພຣະຜູ້ເປັນເຈົ້າ; ແລະ ຜູ້ຄົນຈຶ່ງໄດ້ຮຸ່ງເຮືອງຂຶ້ນຢູ່ໃນແຜ່ນດິນ; ແລະ ລາວໄດ້ມີຊີວິດຢູ່ຢ່າງຍາວນານ, ແລະ ໄດ້ມີລູກຊາຍ ແລະ ລູກສາວຫລາຍຄົນ; ແລະ ລາວໄດ້ມີລູກຊາຍອີກຊື່ວ່າ ໂຄຣຳ, ຊຶ່ງລາວໄດ້ແຕ່ງຕັ້ງໃຫ້ເປັນກະສັດແທນ.
17 ແລະ ເຫດການໄດ້ບັງເກີດຂຶ້ນຄື ໂຄຣຳເຮັດແຕ່ສິ່ງທີ່ດີໃນສາຍພຣະເນດຂອງພຣະຜູ້ເປັນເຈົ້າຕະຫລອດວັນເວລາຂອງລາວ; ແລະ ລາວໄດ້ມີລູກຊາຍ ແລະ ລູກສາວຫລາຍຄົນ; ແລະ ຫລັງຈາກທີ່ລາວມີຊີວິດຢູ່ດົນນານແລ້ວ ລາວກໍໄດ້ຈາກໄປຄືກັນກັບຄົນອື່ນໆຂອງແຜ່ນດິນໂລກ; ແລະ ກີເຊໄດ້ຂຶ້ນປົກຄອງແທນ.
18 ແລະ ເຫດການໄດ້ບັງເກີດຂຶ້ນຄື ກີເຊໄດ້ຈາກໄປອີກ, ແລະ ລິບໄດ້ຂຶ້ນປົກຄອງແທນ.
19 ແລະ ເຫດການໄດ້ບັງເກີດຂຶ້ນຄື ລິບເຮັດສິ່ງທີ່ດີໃນສາຍພຣະເນດຂອງພຣະຜູ້ເປັນເຈົ້າຄືກັນ. ແລະ ໃນວັນເວລາຂອງລິບນັ້ນງູ ກພິດຖືກທຳລາຍຈົນໝົດສິ້ນ. ດັ່ງນັ້ນ ຜູ້ຄົນຈຶ່ງໄດ້ໄປຫາແຜ່ນດິນທາງໃຕ້ເພື່ອຊອກຫາອາຫານໃຫ້ຜູ້ຄົນຂອງແຜ່ນດິນ, ເພາະວ່າແຜ່ນດິນນັ້ນເຕັມໄປດ້ວຍສັດປ່າ. ແລະ ຕົວລິບເອງກໍກາຍເປັນນາຍພານໃຫຍ່ຜູ້ໜຶ່ງ.
20 ແລະ ພວກເຂົາໄດ້ສ້າງເມືອງໃຫຍ່ເມືອງໜຶ່ງຂຶ້ນໃກ້ກັບຊ່ອງແຄບຂອງແຜ່ນດິນໃກ້ກັບບ່ອນຊຶ່ງທະເລແບ່ງແຜ່ນດິນອອກ.
21 ແລະ ພວກເຂົາໄດ້ປົກປັກຮັກສາແຜ່ນດິນທາງໃຕ້ໄວ້ເປັນຖິ່ນແຫ້ງແລ້ງກັນດານ ເພື່ອຈະໄດ້ສັດໄວ້ລ່າ. ແລະ ສ່ວນແຜ່ນດິນທາງເໜືອນັ້ນ ເຕັມໄປດ້ວຍຜູ້ອາໄສຢູ່.
22 ແລະ ພວກເຂົາມີການອຸດສາຫະກຳຢ່າງຍິ່ງ, ແລະ ພວກເຂົາໄດ້ຊື້ຂາຍ ແລະ ທຳການຄ້າລະຫວ່າງກັນ ເພື່ອຈະໄດ້ຜົນປະໂຫຍດ.
23 ແລະ ພວກເຂົາໄດ້ຂຸດຄົ້ນແຮ່ນາໆຊະນິດ, ແລະ ໄດ້ຫລໍ່ຫລອມຄຳ, ແລະ ເງິນ, ແລະ ກເຫລັກ, ແລະ ທອງເຫລືອງ, ແລະ ໂລຫະນາໆຊະນິດ; ແລະ ພວກເຂົາໄດ້ຂຸດຄົ້ນມັນຂຶ້ນມາຈາກດິນ; ດັ່ງນັ້ນ, ພວກເຂົາຈຶ່ງໄດ້ຄູນດິນຂຶ້ນເປັນກອງໃຫຍ່ເພື່ອໃຫ້ໄດ້ແຮ່ ເປັນຄຳ, ແລະ ເປັນເງິນ, ແລະ ເປັນເຫລັກ, ແລະ ເປັນທອງແດງ. ແລະ ພວກເຂົາໄດ້ຜະລິດສິ່ງອື່ນໆອີກຫລາຍຢ່າງ.
24 ແລະ ພວກເຂົາໄດ້ຕ່ຳຜ້າໄໝ ແລະ ຜ້າລີນິນຕ່ຳຢ່າງດີ; ແລະ ພວກເຂົາໄດ້ເຮັດເສື້ອຜ້າຫລາຍຊະນິດ, ເພື່ອພວກເຂົາຈະໄດ້ຫຸ້ມຫໍ່ຄວາມເປືອຍເປົ່າຂອງພວກເຂົາ.
25 ແລະ ພວກເຂົາໄດ້ເຮັດເຄື່ອງມືນາໆຊະນິດເພື່ອໄຖດິນ, ທັງເພື່ອຂຸດ ແລະ ເພື່ອຫວ່ານ, ແລະ ເພື່ອເກັບກ່ຽວ ແລະ ເພື່ອພວນ, ແລະ ເພື່ອນວດນຳອີກ.
26 ແລະ ພວກເຂົາໄດ້ເຮັດເຄື່ອງມືນາໆຊະນິດ ຊຶ່ງພວກເຂົາໄດ້ເຮັດໂດຍໃຊ້ແຮງງານຂອງສັດຂອງພວກເຂົາ.
27 ແລະ ພວກເຂົາໄດ້ສ້າງອາວຸດແຫ່ງສົງຄາມທຸກຊະນິດ. ແລະ ພວກເຂົາໄດ້ເຮັດວຽກນາໆຊະນິດດ້ວຍຝີມືແປກຢ່າງຍິ່ງ.
28 ແລະ ບໍ່ເຄີຍມີຜູ້ໃດເລີຍທີ່ໄດ້ຮັບພອນຫລາຍກວ່າພວກເຂົາ, ແລະ ມີຄວາມຈະເລີນຮຸ່ງເຮືອງໂດຍພຣະຫັດຂອງພຣະຜູ້ເປັນເຈົ້າຫລາຍກວ່ານີ້. ແລະ ພວກເຂົາໄດ້ຢູ່ໃນແຜ່ນດິນທີ່ປະເສີດເລີດລ້ຳກວ່າແຜ່ນດິນອື່ນໃດທັງສິ້ນ, ເພາະວ່າພຣະຜູ້ເປັນເຈົ້າໄດ້ກ່າວດັ່ງນັ້ນ.
29 ແລະ ເຫດການໄດ້ບັງເກີດຂຶ້ນຄື ລິບມີຊີວິດຢູ່ຢ່າງຍາວນານ, ແລະ ໄດ້ມີລູກຊາຍ ແລະ ລູກສາວຫລາຍຄົນ; ແລະ ລາວກໍມີລູກຊາຍອີກຊື່ວ່າ ຮີອາທຳ.
30 ແລະ ເຫດການໄດ້ບັງເກີດຂຶ້ນຄື ຮີອາທຳໄດ້ປົກຄອງແທນບິດາຂອງລາວ. ແລະ ເມື່ອຮີອາທຳໄດ້ປົກຄອງຢູ່ຊາວສີ່ປີ, ຈົ່ງເບິ່ງ, ອານາຈັກຖືກຍຶດໄປຈາກລາວ. ແລະ ລາວໄດ້ຕົກເປັນຊະເລີຍຫລາຍປີ, ແທ້ຈິງແລ້ວ, ແມ່ນຕະຫລອດວັນເວລາທີ່ເຫລືອຢູ່ຂອງລາວ.
31 ແລະ ລາວໄດ້ມີລູກຊາຍຊື່ວ່າ ເຫັດ, ແລະ ເຫັດໄດ້ໃຊ້ຊີວິດຢູ່ໃນຄວາມເປັນຊະເລີຍຕະຫລອດວັນເວລາຂອງລາວ. ແລະ ເຫັດມີລູກຊື່ວ່າ ອາໂຣນ, ແລະ ອາໂຣນໄດ້ຢູ່ໃນຄວາມເປັນຊະເລີຍຕະຫລອດວັນເວລາຂອງລາວຄືກັນ; ແລະ ລາວມີລູກຊາຍຊື່ວ່າ ອາມນີແກດາ, ແລະ ອາມນີແກດາກໍໄດ້ຢູ່ໃນຄວາມເປັນຊະເລີຍຕະຫລອດວັນເວລາຂອງລາວຄືກັນ; ແລະ ລາວມີລູກຊາຍຊື່ວ່າ ໂຄຣິອານທຳ, ແລະ ໂຄຣິອານທຳກໍໄດ້ຢູ່ໃນຄວາມເປັນຊະເລີຍຕະຫລອດວັນເວລາຂອງລາວຄືກັນ; ແລະ ລາວມີລູກຊາຍຊື່ວ່າ ຄອມ.
32 ແລະ ເຫດການໄດ້ບັງເກີດຂຶ້ນຄື ຄອມໄດ້ຍຶດເອົາອານາຈັກໄປເຄິ່ງໜຶ່ງ. ແລະ ລາວໄດ້ປົກຄອງອານາຈັກສ່ວນນັ້ນເປັນເວລາສີ່ສິບສອງປີ; ແລະ ລາວໄດ້ໄປສູ້ຮົບກັບກະສັດອາມກິດ, ແລະ ທັງສອງໄດ້ຕໍ່ສູ້ກັນເປັນເວລາຫລາຍປີ ຊຶ່ງລະຫວ່າງເວລານັ້ນຄອມໄດ້ມີອຳນາດເໜືອອາມກິດ, ແລະ ໄດ້ຍຶດເອົາອານາຈັກສ່ວນທີ່ເຫລືອຢູ່ມາເປັນເຈົ້າຂອງ.
33 ແລະ ໃນວັນເວລາຂອງຄອມ ມັນເລີ່ມມີພວກໂຈນຢູ່ໃນແຜ່ນດິນ; ແລະ ພວກເຂົາເຫລົ່ານັ້ນໄດ້ນຳເອົາແຜນເກົ່າມາໃຊ້, ແລະ ໄດ້ເວົ້າ ກຄຳສາບານຕາມວິທີຂອງຄົນສະໄໝບູຮານ, ແລະ ພະຍາຍາມທີ່ຈະທຳລາຍອານາຈັກອີກ.
34 ບັດນີ້ຄອມໄດ້ຕໍ່ສູ້ກັບພວກເຂົາຢ່າງໜັກ; ເຖິງຢ່າງໃດກໍຕາມ, ລາວກໍຍັງເອົາຊະນະພວກເຂົາບໍ່ໄດ້.