Incwadzi ya-Enoshi

1 Buka, kwenteka kutsi mine, Enoshi, ngati kutsi babe bekayindvodza lelungile—ngoba wangifundzisa ngelulwimi lwakhe, kanjalo nangekondliwa kanye nangekwecwayiswa yiNkhosi—alibongwe libito laNkulunkulu ngaloko—

2 Futsi ngitawunitjela ngemshikashika lengaba nawo phambi kwaNkulunkulu, ngaphambi kwekutsi ngitfole kutsetselelwa kwetono tami.

3 Buka, ngahamba ngayotingela tinyamatane emahlatsini; nemavi lengangijwayele kuweva babe awakhuluma mayelana nekuphila lokuphakadze, kanye nekujabula kwalabangcwele, angena ajula enhlitiyweni yami.

4 Umphefumulo wami walamba; ngaguca phansi phambi kweMenti wami, ngakhala kuye ngemthandazo lomkhulu kanye nekuncusela umphefumulo wami; lilanga lonkhe ngakhala kuye; yebo, futsi nangesikhatsi busuku bufika ngachubeka nekuphakamisela livi lami etulu kangangekutsi lafinyelela emazulwini.

5 Kwefika livi kimi, litsi: Enoshi, tono takho titsetselelwe, futsi utobusiswa.

6 Futsi mine, Enoshi, ngangati kutsi Nkulunkulu angeke awacale emanga, ngaloko-ke, kuba nelicala kwami kwaphela nya.

7 Futsi ngatsi: Nkhosi, kwenteka kanjani na?

8 Yatsi kimi: Ngenca yelukholo lwakho kuKhristu, longakate umuve noma umbone nanini ngaphambilini. Futsi iminyaka leminyenti iyawundlula ngaphambi kwekutsi ativete enyameni; ngaloko-ke, hamba, lukholo lwakho lukusindzisile

9 Manje, kwenteka kutsi emvakwekutsi sengiwevile lamavi ngacala ngaba nesifiso senhlalakahle yabomnaketfu, emaNefi; ngaloko-ke, ngabathandazela ngenshisekelo lenkhulu kuNkulunkulu.

10 Ngesikhatsi ngisashikashikeka emoyeni, buka, livi leNkhosi laphindze lefika engcondvweni yami, litsi: Ngitawubavakashela bomnakenu njengekukhutsala kwabo ekugcineni imiyaleto yami. Ngibaniketile lelive, lilive lelingcwele; futsi angilicalekisi ngaphandle kwekutsi kube ngenca yebubi; ngaloko-ke, ngitawubavakashela bomnakenu njengobe ngishito; netiphambeko tabo ngitawutehlisa kanye nelusizi etikwetinhloko tabo lucobo.

11 Emvakwekutsi mine, Enoshi, sengiwevile lamavi, lukholo lwami lwacala lwangasanyakatiseki eNkhosini; futsi ngabathandazela eNkhosini ngemetamo leminyenti sikhatsi lesidze bomnaketfu, emaLamani.

12 Futsi kwenteka kutsi emvakwekutsi sengithandazile futsi ngasebenta ngako konkhe kukhutsala, iNkhosi yatsi kimi: Ngitawukunika njengekwetifiso takho, ngenca yelukholo lwakho.

13 Manje buka, lesi kwakusifiso lengangisifisa kuye—kutsi uma kwakungenteka, kutsi bantfu bami, emaNefi, awele esiphambekweni, futsi ngandlela tsite abhujiswe, emaLamani wona angabhujiswa, kutsi iNkhosi Nkulunkulu iyowugcina umbhalo webantfu bami, emaNefi; noma ngabe kungaba ngemandla esandla sayo lesingcwele, kute wembulelwe emaLamani ngalelinye lilanga lelitako, kute, mhlawumbe, aletfwe ekusindzisweni—

14 Ngoba njengamanje imetamo yetfu beyilite ekuwabuyiseleni elukholweni lweliciniso. Futsi afunga ngekutfukutsela kutsi, uma kwakungenteka, bekangayibhubhisa imibhalo yetfu kanye natsi, futsi kanjalo nawo onkhe emasiko abokhokho betfu.

15 Ngaloko-ke, mine ngati kutsi iNkhosi Nkulunkulu yayikwati kulondvolota imibhalo yetfu, ngakhala kuyo njalonjalo, ngoba yayitsite kimi: Noma ngabe yini loyicelako ngelukholo, ukholwa kutsi utoyitfola egameni laKhristu, utoyitfola.

16 Futsi nganginalo lukholo, ngakhala kuNkulunkulu kutsi ayigcine lemibhalo; futsi wenta sivumelwano nami sekutsi uyoyembula kumaLamani ngesikhatsi sakhe lesifanele.

17 Futsi mine, Enoshi, bengati kutsi kwakuyawuba njengesivumelwano leso lasenta; ngaloko-ke umphefumulo wami waphumula.

18 Futsi iNkhosi yatsi kimi: Bokhokho bakho nabo ngalokunjalo bayicelile kimi lentfo; futsi kuyawukwentiwa kubo njengekwelukholo lwabo; ngoba lukholo lwabo lwalunjengelwakho.

19 Manje kwenteka kutsi mine, Enoshi, ngahamba emkhatsini webantfu baNefi, ngiphrofetha ngetintfo lebetitawukwenteka, futsi ngifakaza ngetintfo lengangitivile ngiphindze ngitibonile.

20 Futsi ngiyafakaza kutsi bantfu baNefi bebafuna ngekukhutsala kutsi babuyisele emaLamani ekukholweni kweliciniso kuNkulunkulu. Kodvwa kusebenta kwetfu kwaba lite; inzondo yawo yayigcilile, futsi abeholwa yimvelo yawo lembi kangangekutsi aba tidlwangudlwangu, anelulaka, futsi abantfu labomela ingati, agcwele kukhonta tithico kanye nekungcola; adla tilwane letidla letinye; ahlala emathendeni, azulazula ehlane nesikhumba lesifishane etinkhalweni tawo kanye netinhloko tawo tishefiwe; futsi buciko bawo babusemcibisholweni, nakucelemba, kanye nasezembeni. Futsi lamanyenti awo abengadli lutfo ngaphandle kwenyama leluhlata; futsi abefuna kusibhubhisa njalonjalo.

21 Futsi kwenteka kutsi bantfu baNefi bawulima umhlabatsi, bakhulisa tonkhe tinhlobo talokuyinhlavu, kanye netitselo, kanye nemihlambi yemfuyo, kanye nemihlambi yato tonkhe tinhlobo tetinkhomo letitinhlobonhlobo, netimbuti, kanye netimbuti tesiganga, futsi ngalokunjalo nemahhashi lamanyenti.

22 Futsi kwakukhona labanyenti kakhulu baphrofethi emkhatsini wetfu. Labantfu bekubantfu labebanenkhani, balukhuni kucondza.

23 Futsi kwakute lutfo ngaphandle kwekukhuluma kakhulu, kushumayela kanye nekuphrofetha ngetimphi, netincabano, kanye nembubhiso, nekubakhumbuta njalonjalo ngekufa, nesikhatsi sekuphila lokuphakadze, netehlulelo nemandla aNkulunkulu, kanye nato tonkhe leti tintfo—babaphehla njalonjalo kubagcina basekwesabeni iNkhosi. Ngitsi kwakute lutfo ngaphandle kwaleti tintfo, futsi nekukhuluma lokunyenti kakhulu lokusobala, lokwakungabavimba ekuyeni ngekushesha ekubhujisweni. Futsi ngibhala ngalendlela mayelana nabo.

24 Ngatibona timphi emkhatsini wemaNefi kanye nemaLamani emalangeni ekuphila kwami.

25 Futsi kwenteka kutsi ngacala kuba mdzala, futsi iminyaka lelikhulu nemashumi lasikhombisa neminyaka leyimfica yaseyendlulile kusukela ngesikhatsi babe Lehi ashiya eJerusalema.

26 Futsi ngabona kutsi kwasekufanele masinyane ngehlele ethuneni lami, ekubeni ngisetjentiswe ngemandla aNkulunkulu kute ngishumayele futsi ngiphrofethe kulaba bantfu, ngimemetele livi njengekweliciniso lelikuKhristu. Ngilimemetele kuwo onkhe emalanga ami, futsi ngitfokotile ngalo ngetulu kwaloko kwemhlaba.

27 Futsi masinyane ngitohamba ngiye endzaweni yekuphumula kwami, leneMhlengi wami; ngoba ngiyati kutsi kuye ngitophumula. Futsi ngitfokotela lilanga lapho lokubhubhako kwami kuyawukwembatsa kungabhubhi, futsi ngime phambi kwakhe; ngalesi sikhatsi ngitobubona buso bakhe nginenjabulo, futsi utawutsi kimi: Wota kimi, wena lobusisiwe, kukhona indzawo lelungiselelwe wena etindlini taBabe. Amen.