1 Hwɛ, afei ɔbaa dɛ ber a Moroni somaa ma wɔdze ne krataa no kɛmaa ambrado panyin no, annkyɛr koraa na ne nsa kãa krataa fii ^aPahoran a ɔyɛ ambrado panyin no nkyɛn. Na nsɛm a ɔwɔ mu nye yi:

2 Emi Pahoran a meyɛ ambrado panyin wɔ asaase yi do, dze dɛm nsɛm yi brɛ Moroni, mo nsordaafo hɔn ɔsahen panyin no. Hwɛ mekã kyerɛ ɔwo Moroni dɛ, minndzi dɛw wɔ ^aamandzehu kɛse a iruhu yi ho, nyew, me kra dzi yaw wɔ ho.

3 Mbom hwɛ, binom wɔ hɔ a wodzi dɛw wɔ amandzehu a iruhu yi ho, nyew, iyi ho ntsi wɔasoɛr atsew etua wɔ emi nye ^afahodzifo no so do, nyew, na hɔn a wɔasoɛr wɔ hɛn do dɔɔ sõ ara yie.

4 Na hɔn a wɔreper agye atsɛmbu egua no efi me nsamu no na wɔama emumuyɛ kɛse yi aba; osiandɛ wɔdze ndaadaa atwe dɔm pii hɔn akoma a dɛm ntsi wɔama ɔhaw a ɔtse dɛm aba hɛn do; na wɔmmfa hɛn edziban mma hɛn, na wɔahyɛ hɛn fahodzifo abagura ma wɔmmba hɛn nkyɛn.

5 Na hwɛ, wɔapam me efi enyim, ma meguan akɔ Gideon asaase do, menye dɔm dodow a me nsa kãa hɔn no kɔree.

6 Na hwɛ, mabɔ dawur wɔ asaase n’afã ha nyinara do; na hwɛ, wɔba hɛn nkyɛn daadaa bɛgye hɔn akodze dɛ wɔdze bɔbɔ hɛn man nye hɔn ^afahodzi ho ban, na woedzi wer wɔ bɔn a yɛdze ayɛ hɔn no ho.

7 Na wɔaba hɛn do dɛ wɔrobɔkõ etsia hɔn a wɔasoɛr atsew etua wɔ hɛn do no, nyew, dɛm ntsi wosuro hɛn na wonntum mmba hɛn do nye hɛn mmbɔkõ.

8 Na wɔagye asaase no, anaadɛ wɔagye Zarahemla kuropɔn no afa; na woeyi ɔhen ma ɔhwɛ hɔn do, na wɔakyerɛw Lamanfo hɔn hen no na ɔnye no akɛyɛ kor dɛ ɔno ɔbɔhwɛ Zarahemla kurow no do, na osusu dɛ dɛm no bɛma Lamanfo no etum agye asaase nkaa a aka no, ama sɛ Lamanfo no dzi hɔn do konyim a wɔdze no eedzi hen wɔ dɔm yi do.

9 Na afei, wo krataa no mu no akã m’enyim, na mbom ɔnnyɛ hwee; mobo mmfuwii, na mbom midzi dɛw wɔ w’akokodur ho. Emi Pahoran, moronnhwehwɛ tum, na mbom dɛ mebɛda ho atsena atsɛmbu egua no do ama meetum abɔ mo nkorɔfo hɔn kyɛfa nye hɔn ahotɔ ho ban. Me kra gyina pintsinn wɔ dɛm ahotɔ no a Nyame dze ama hɛn ^afahodzi no mu.

10 Na afei, hwɛ, yebesiw emumuyɛ ano sɛ ɔba no dɛ yɛkã bɔgya gu mpo a. Yɛrennka Lamanfo hɔn bɔgyaa nngu sɛ wɔbɛtsena hɔnankasa hɔn asaase do a.

11 Yɛrennka hɛn enuanom hɔn bɔgyaa nngu sɛ wɔannsoɛr anntsew etua na wɔammfa nkrantsee ammba hɛn do a.

12 Yɛbɛbrɛ hɛnho adze wɔ nkowaasom kɔndua ase mu sɛ Nyankopɔn ne pɛrpɛrdzi ma ɔba no dɛm a, anaadɛ sɛ ɔhyɛ hɛn dɛ yɛnyɛ dɛm a.

13 Mbom hwɛ ɔnnhyɛ hɛn dɛ yɛmfa hɛnho mma hɛn atamfo, na mbom dɛ yɛmfa hɛn ^awerɛ ntwer no mu, na ɔbɛgye hɛn.

14 Dɛm ntsi, mo nua dɔfo, Moroni, ma yensiw emumuyɛ ano, na emumuyɛ biara a yerunntum mmfa hɛn kasaa nnsiw ano no, nyew, biribi tse dɛ basabasayɛ nye etuatsew, ma yɛmfa hɛn nkrantsee nnkõ ^antsia ama yeetum esuo hɛn fahodzi mu yie, ama yeedzi dɛw wɔ ehutudze kɛse a ɔwɔ hɛn asɔr mu nye hɛn Pomfo na hɛn Nyankopɔn ntsi.

15 Dɛm ntsi, enye wo dɔm kakra mbra me nkyɛn ntsɛmara na gyaa hɔn a wɔaka no ma Lehi nye Teancum; na ma hɔn tum ma wondua Nyame no ^aSunsum a ɔyɛ fahodzi sunsum so no a ɔwɔ hɔn mu no do mfa nhwɛ ɔkõ a wɔrokõ wɔ dɛm bea no do no do.

16 Hwɛ masoma ma wɔdze edziban kakra rebrɛ hɔn, amma ɔkɔm ennkuku hɔn kesi dɛ hom bɛba me nkyɛn.

17 Boaboa nsordaafo biara a ibotum ano na enye hɔn mbra ha, na ntsɛmara yɛbɔkɔ akɔkõ etsia etuatsewfo no wɔ hɛn Nyankopɔn n’ahoɔdzen mu dɛ mbrɛ gyedzi a ɔwɔ hɛn mu no tse.

18 Na yɛbɛgye Zarahemla kurow no, ama yeetum enya edziban pii dze asoma ma wɔdze akɛma Lehi na Teancum; nyew, yɛbɔkɔ hɔn do wɔ Ewuradze n’ahoɔdzen mu, na yɛbɛma dɛm emumuyɛ kɛse yi aba n’ewiei.

19 Na afei, Moroni, ɔyɛ me dɛw dɛ me nsa akã wo krataa yi, osiandɛ nna ɔhaw me kakra wɔ dza ɔsɛ dɛ yɛyɛ ho, dɛ ɔfata dɛ yɛnye hɛn enuanom bɔkɔ akɔkõ.

20 Mbom wɔakã dɛ, gyedɛ wonu hɔnho, annyɛ dɛm a, Ewuradze ahyɛ wo dɛ enye hɔn nkɔkõ.

21 Hwɛ na ^ahyɛ Lehi na Teancum dzen wɔ Ewuradze mu; kã kyerɛ hɔn dɛ mma wonnsuro, na Nyame bɛgye hɔn, nyew, nye hɔn nyinara so a woegyina pintsinn wɔ dɛm ahotɔ a Nyame nam do dze ama woenya fahodzi no mu. Na afei medze me krataa a merekyerɛw dze akɛma mo nua dɔfo, Moroni no aba ewiei.