ជំពូកទី ៥៤
អាំម៉ូរ៉ុន និងមរ៉ូណៃ ចរចាដើម្បីប្ដូរឈ្លើយសង្គ្រាម — មរ៉ូណៃទាមទារឲ្យពួកលេមិនដកថយចេញ ហើយបញ្ឈប់ការវាយប្រហារដែលសម្លាប់មនុស្សរបស់គេ — អាំម៉ូរ៉ុនទាមទារឲ្យពួកនីហ្វៃដាក់អាវុធចុះ ហើយធ្វើជាចំណុះពួកសាសន៍លេមិន។ ប្រមាណជាឆ្នាំ ៦៣ ម.គ.ស.។
១ហើយឥឡូវនេះ ហេតុការណ៍បានកើតឡើងថា នៅដើមឆ្នាំទីម្ភៃប្រាំបួននៃពួកចៅក្រម នោះកអាំម៉ូរ៉ុនបានចាត់ឲ្យមនុស្សទៅស្នើមរ៉ូណៃថា ទ្រង់ចង់ប្ដូរឈ្លើយ។
២ហើយហេតុការណ៍បានកើតឡើងថា មរ៉ូណៃមានសេចក្ដីអររីករាយជាខ្លាំងចំពោះការស្នើសុំនេះ ព្រោះលោកមានបំណងចង់បានស្បៀង ដែលយកទៅចិញ្ចឹមពួកឈ្លើយសាសន៍លេមិនទាំងនេះ ដើម្បីទុកចិញ្ចឹមប្រជាជនរបស់លោកផ្ទាល់ ហើយលោកក៏មានបំណងចង់បានប្រជាជនលោកផ្ទាល់ផង ដើម្បីពង្រឹងកម្លាំងកងទ័ពរបស់លោក។
៣ឥឡូវនេះ ពួកលេមិនបានចាប់ពួកស្ត្រី និងកូនក្មេងជាច្រើន ហើយគ្មានស្ត្រីណាម្នាក់ ឬក្មេងណាម្នាក់នៅក្នុងចំណោមឈ្លើយទាំងអស់របស់មរ៉ូណៃ ឬពួកឈ្លើយដែលត្រូវមរ៉ូណៃចាប់នោះឡើយ ហេតុដូច្នេះហើយ មរ៉ូណៃសម្រេចឧបាយសឹកថា នឹងយកពួកឈ្លើយសាសន៍នីហ្វៃពីពួកលេមិនឲ្យបានកាន់តែច្រើនឡើងតាមដែលអាចធ្វើបាន។
៤ហេតុដូច្នេះហើយ លោកបានសរសេរសំបុត្រមួយច្បាប់ ហើយបានផ្ញើតាមអ្នកបម្រើរបស់អាំម៉ូរ៉ុន គឺជាអ្នកដែលបាននាំយកសំបុត្រមួយមកឲ្យមរ៉ូណៃនោះ។ ឥឡូវនេះ នេះគឺជាពាក្យទាំងឡាយ ដែលលោកបានសរសេរទៅកាន់អាំម៉ូរ៉ុនថា ៖
៥មើលចុះ អាំម៉ូរ៉ុន ទូលបង្គំបានសរសេរមកទ្រង់នូវកិច្ចការខ្លះអំពីសង្គ្រាមនេះ ដែលទ្រង់បានបង្កឡើងប្រឆាំងនឹងប្រជាជនទូលបង្គំ ឬបើនិយាយឲ្យចំ គឺកព្រះជេដ្ឋារបស់ទ្រង់បានបង្កឡើងប្រឆាំងនឹងពួកគេ ហើយជាចម្បាំងដែលទ្រង់ ក៏នៅតែប្ដេជ្ញានឹងធ្វើបន្តទៅទៀត បន្ទាប់ពីព្រះជេដ្ឋាទ្រង់បានសុគតទៅហើយ។
៦មើលចុះ ទូលបង្គំចង់ប្រាប់ទ្រង់ខ្លះ អំពីកសេចក្ដីយុត្តិធម៌នៃព្រះ និងដាវនៃព្រះពិរោធដ៏មានមហិទ្ធិឫទ្ធិរបស់ព្រះ ដែលព្យួរនៅពីលើទ្រង់ លើកលែងតែទ្រង់ប្រែចិត្ត ហើយដកពលទ័ពរបស់ទ្រង់ថយចេញទៅក្នុងដែនដីទ្រង់វិញ ឬដែនដីដែលជារបស់ផងទ្រង់ គឺជាដែនដីនីហ្វៃ។
៧មែនហើយ ទូលបង្គំចង់ប្រាប់ទ្រង់ពីការណ៍ទាំងនេះ បើសិនជាទ្រង់មានសមត្ថភាពធ្វើតាមវា មែនហើយ ទូលបង្គំចង់ប្រាប់ទ្រង់អំពីកស្ថាននរកដ៏គួរឲ្យស្ញែងខ្លាចនោះ ដែលរង់ចាំទទួលខឃាតករទាំងឡាយដូចជារូបទ្រង់ និងព្រះជេដ្ឋារបស់ទ្រង់នេះ លើកលែងតែទ្រង់ប្រែចិត្ត ហើយដកចេញនូវគោលបំណងសម្លាប់មនុស្សរបស់ទ្រង់ ហើយត្រឡប់ជាមួយនឹងពលទ័ពរបស់ទ្រង់ ទៅកាន់ដែនដីផ្ទាល់របស់ទ្រង់វិញ។
៨ប៉ុន្តែ ដូចជាទ្រង់ធ្លាប់បានបដិសេធការណ៍ទាំងនេះម្ដងទៅហើយ ហើយបានប្រយុទ្ធប្រឆាំងនឹងរាស្ត្រនៃព្រះអម្ចាស់យ៉ាងណា នោះទូលបង្គំអាចសន្និដ្ឋានថា ទ្រង់ក៏នឹងធ្វើយ៉ាងនោះទៅទៀតដែរ។
៩ហើយឥឡូវនេះ មើលចុះ យើងបានប្រុងប្រៀបខ្លួនជាស្រេច ដើម្បីទទួលទ្រង់ហើយ មែនហើយ ហើយលើកលែងតែទ្រង់បោះបង់ចោលគោលបំណងទាំងឡាយរបស់ទ្រង់ បើពុំនោះសោតទេ មើលចុះ ទ្រង់នឹងទាញចុះមកនូវសេចក្ដីពិរោធរបស់ព្រះអង្គនោះ ដែលទ្រង់បានបដិសេធ មកលើទ្រង់ គឺរហូតដល់ការបំផ្លិចបំផ្លាញដល់ទ្រង់ទាំងស្រុង។
១០ប៉ុន្តែ ប្រាកដដូចជាព្រះអម្ចាស់ទ្រង់មានព្រះជន្មរស់នៅ នោះពលទ័ពរបស់យើងនឹងវាយប្រហារទៅលើទ្រង់ លើកលែងតែទ្រង់ដកថយចេញ ហើយសេចក្ដីស្លាប់នឹងមករកទ្រង់នៅក្នុងពេលឆាប់ៗនេះ ព្រោះយើងនឹងរក្សាទុកនូវទីក្រុងទាំងឡាយ និងដែនដីទាំងឡាយរបស់យើង មែនហើយ ហើយយើងនឹងទ្រទ្រង់នូវសាសនារបស់យើង និងឧត្ដមគតិនៃព្រះរបស់យើង។
១១ប៉ុន្តែមើលចុះ ទូលបង្គំសន្និដ្ឋានថា ទូលបង្គំនិយាយនឹងទ្រង់អំពីការណ៍ទាំងនេះ ដោយឥតប្រយោជន៍ ឬក៏ទូលបង្គំសន្និដ្ឋានថា ទ្រង់ជាកកូននៃស្ថាននរក ហេតុដូច្នេះហើយ ទូលបង្គំនឹងបញ្ចប់សំបុត្ររបស់ទូលបង្គំដោយប្រាប់ទ្រង់ថា ទូលបង្គំនឹងពុំប្ដូរពួកឈ្លើយទេ លើកលែងតែដោយលក្ខខណ្ឌទាំងឡាយថា ទ្រង់នឹងដោះលែងបុរសម្នាក់ និងប្រពន្ធរបស់គាត់ និងកូនចៅរបស់គាត់សម្រាប់ឈ្លើយម្នាក់ បើសិនជានេះជាករណីដែលទ្រង់នឹងធ្វើ នោះទូលបង្គំនឹងប្ដូរ។
១២ហើយមើលចុះ បើសិនជាទ្រង់មិនធ្វើដូច្នេះទេ ទូលបង្គំនឹងវាយប្រហារទ្រង់ដោយពលទ័ពរបស់ទូលបង្គំ មែនហើយ គឺទូលបង្គំនឹងប្រដាប់អាវុធឲ្យពួកស្ត្រីរបស់ទូលបង្គំ និងកូនចៅរបស់ទូលបង្គំ ហើយទូលបង្គំនឹងវាយប្រហារទ្រង់ ហើយទូលបង្គំនឹងតាមទ្រង់រហូតដល់ក្នុង ដែនដីផ្ទាល់របស់ទ្រង់ ដែលជាដែនដីកេរ្តិ៍អាករដំបូងករបស់យើង មែនហើយ ហើយនឹងយកឈាមប្ដូរឈាម មែនហើយ ជីវិតប្ដូរជីវិត ហើយទូលបង្គំនឹងច្បាំងនឹងទ្រង់ រហូតដល់ទ្រង់ត្រូវបំផ្លាញចេញពីលើផ្ទៃផែនដីនេះទៅ។
១៣មើលចុះ ទូលបង្គំកំពុងខឹង ហើយប្រជាជនរបស់ទូលបង្គំក៏ដូច្នោះដែរ ទ្រង់បានរកកាប់សម្លាប់ពួកយើង ហើយយើងគ្រាន់តែរកការពារខ្លួនប៉ុណ្ណោះ។ ប៉ុន្តែមើលចុះ បើសិនជាទ្រង់រកបំផ្លាញយើងថែមទៀត នោះយើងនឹងរកបំផ្លាញទ្រង់វិញ មែនហើយ ហើយយើងនឹងស្វែងរកដែនដីយើង គឺជាដែនដីកេរ្តិ៍អាករដំបូងរបស់យើង។
១៤ឥឡូវនេះ ទូលបង្គំសូមបញ្ចប់សំបុត្ររបស់ទូលបង្គំហើយ។ ទូលបង្គំជាមរ៉ូណៃ ទូលបង្គំជាមេដឹកនាំម្នាក់របស់ប្រជាជននីហ្វៃ។
១៥ឥឡូវនេះ ហេតុការណ៍បានកើតឡើងថា អាំម៉ូរ៉ុន កាលទ្រង់បានទទួលសំបុត្រនេះហើយ ក៏មានព្រះទ័យខ្ញាល់ ហើយទ្រង់បានសរសេរសំបុត្រមួយទៀតទៅឲ្យមរ៉ូណៃ ហើយនេះគឺជាពាក្យទាំងឡាយ ដែលទ្រង់បានសរសេរថា ៖
១៦យើងជាអាំម៉ូរ៉ុន ជាស្ដេចរបស់ពួកសាសន៍លេមិន យើងជាព្រះអនុជរបស់អាម៉ាលិកាយ ដែលកអ្នកបានធ្វើឃាតនោះ។ មើលចុះ យើងនឹងសងឈាមឲ្យទ្រង់ទៅលើអ្នក មែនហើយ ហើយយើងនឹងវាយអ្នកដោយពលទ័ពរបស់យើង ព្រោះយើងមិនខ្លាចពាក្យគំរាមកំហែង របស់អ្នកទេ។
១៧ត្បិតមើលចុះ ពួកអយ្យកោអ្នកបានធ្វើខុសឆ្គងជាមួយនឹងបងប្អូនគេ រហូតដល់ពួកគេបានប្លន់យកកសិទ្ធិរបស់គេក្នុងរដ្ឋាភិបាល នៅពេលតាមច្បាប់ វាជារបស់ពួកគេ។
១៨ហើយឥឡូវនេះ មើលចុះ បើសិនជាអ្នកនឹងដាក់អាវុធចុះ ហើយប្រគល់ខ្លួនជាចំណុះ ក្រោមការអភិបាលនៃអ្នកទាំងឡាយ ដែលមានសិទ្ធិអភិបាលពេលនោះ យើងនឹងបញ្ជាឲ្យទ័ពយើង ដាក់គ្រឿងសស្ត្រាវុធគេចុះដែរ ហើយឈប់ធ្វើសង្គ្រាមតទៅទៀត។
១៩មើលចុះ អ្នកបានហាមាត់បញ្ចេញនូវការគំរាមកំហែងជាច្រើនទាស់នឹងយើង និងប្រជាជនយើង ប៉ុន្តែមើលចុះ យើងមិនខ្លាចពាក្យគំរាមកំហែងរបស់អ្នកទេ។
២០ក៏ប៉ុន្តែ យើងនឹងអនុញ្ញាតឲ្យប្ដូរឈ្លើយ តាមសេចក្ដីស្នើរបស់អ្នកដោយរីករាយ ដើម្បីយើងអាចសន្សំទុកនូវស្បៀងអាហារសម្រាប់ពួកមនុស្សថ្នឹកចម្បាំងរបស់យើង ហើយយើងនឹងបង្កសង្គ្រាមមួយដ៏នៅអស់កល្បជានិច្ច ដើម្បីដាក់ពួកសាសន៍នីហ្វៃ ជាចំណុះក្រោមអំណាចយើង ឬក៏ឲ្យពួកគេវិនាសសាបសូន្យអស់កល្បជានិច្ចទៅ។
២១រីឯអំពីព្រះដែលអ្នកនិយាយថា យើងបានបដិសេធនោះ មើលចុះ យើងពុំស្គាល់តួអង្គបែបនោះឡើយ ឯអ្នកក៏មិនស្គាល់ដែរ ប៉ុន្តែប្រសិនបើមានតួអង្គបែបនោះមួយមែន យើងពុំដឹងអ្វីក្រៅពីថា ទ្រង់បានបង្កើតយើងមក ដូចជាបានបង្កើតអ្នកមកដូច្នោះដែរ។
២២ហើយបើសិនជាមានអារក្សមួយ និងស្ថាននរកមួយ មើលចុះ តើវានឹងពុំបញ្ជូនអ្នកទៅទីនោះ ដើម្បីរស់នៅជាមួយព្រះជេដ្ឋារបស់យើង ដែលអ្នកបានធ្វើឃាត ដែលអ្នកបានប្រាប់ថា ទ្រង់បានទៅកន្លែងនោះទេឬអី? ប៉ុន្តែមើលចុះ ការណ៍ទាំងនេះមិនជាអ្វីទេ។
២៣យើងជាអាំម៉ូរ៉ុន ហើយជាពូជរបស់កសូរាំម្នាក់ ដែលពួកអយ្យកោរបស់អ្នក បានបង្ខំ ហើយនាំចេញពីក្រុងយេរូសាឡិមមក។
២៤ហើយមើលចុះ ឥឡូវនេះ យើងជាសាសន៍លេមិនដ៏ក្លាហានម្នាក់ មើលចុះ សង្គ្រាមនេះត្រូវបានបង្កឡើងដើម្បីសងសឹកដល់អំពើខុសឆ្គងទាំងឡាយរបស់ពួកគេ ហើយដើម្បីទ្រទ្រង់ និងដើម្បីយកសិទ្ធិទាំងឡាយរបស់គេក្នុងរដ្ឋាភិបាលវិញ ហើយយើងបញ្ចប់សំបុត្ររបស់យើងទៅកាន់មរ៉ូណៃ៕